Nekönatr Hna Thingehnaean

Hnei Iosefa me Maria hna lapa e Bethelema, tha bëeke ju kö nyidro a tro Nazareta. Matre ame hë la kola eitre lao drai i Iesu, hna xötrehatrenyi nyën, thenge lo hna amekötin hnei Akötresie ngöne la Trenge Wathebo. (Levitiko 12:2, 3) Nge ngöne la drai cili, hna majemine ati ëjene la itre nekönatr trahmany. Matre nyidroti a ati ëje i nyën ka hape, Iesu, tune lo hna qaja hnei Gaberiela.

Ca treu hë nge sin, nge 40 hë lao drai i Iesu. Ngo keme me thine a tro sai nyën ekaa? Angatr a elë kowe la uma ne hmi e Ierusalema, nge tha nanyi kö qa ngöne la hnalapa i angatr. Önine lo Wathebo ka hape, e tro la ketre föe a hnahone la nekönatr trahmany, tro angeic a tro fë huuj ne iahmitrötrë ngöne la uma ne hmi, thupene la 40 lao drai ne hnaho.—Levitiko 12:4-8.

Celë hi hna kuca hnei Maria. Hnei angeic hna tro fë la lue neköi waco nyine huuj. Nge kolo hi lai a qajaqaja la etrune mani i Maria me Iosefa. Thenge lo Trenge Wathebo, troa huujëne la neköi kau me waco. Ngo e thatreine kö troa huujë neköi kau hnei thin, tro angeic a tro fë la lue melimala, maine lue piny. Celë hi hna atreine tro fë hnei Maria.

Hnine la uma ne hmi, hnene la ketre qatr hna easenyi Iosefa me Maria, Simeona la ëje i angeic. Hnei Iehova Akötresie hna qaja koi angeic ka hape, qëmekene troa mec, tro angeic a pane öhne lo atr hnei nyidrëti hna thingehnaean, ene Keriso la Mesia. Matre ngöne la drai cili, hnene la uati hmitrötr hna upi Simeona kowe la uma ne hmi, nge ixelë ju hi angeic me Maria me Iosefa, me nekö i nyidro. Ame hnei Simeona hna xepe lai medreng.

Simeona a ixep me ole Akötresie ka hape: “Enehila Joxu ka Sisitria, nyipëti a aijijëne la hlue i nyipë troa tro cememine la tingeting, thenge lo aqane qaja i nyipë, ke ase hë öhne hnei lue mekenge la jëne iamele i nyipë, ene la hnei nyipëti hna hnëkën qëmekene la nöjei atr asë, ene la lai ka troa hule trije la sine imaano ka thunge la luemekene la itre atre ne fen, nge lolo ne la nöje i nyipë, Isaraela.”—Luka 2:29-32.

Iosefa me Maria a hain la itre trengewekë cili. Ame hnei Simeona hna amanathithi nyidro me hape koi Maria, ame lai nekönatr, “nyën la kepin matre kei jë, nge mejë jë la ka ala nyimu e Isaraela,” nge tro la akötr a thine la hni Maria, kösë hna thine hnei hele.—Luka 2:34.

Hetre qatre föe fe, Ana, perofeta ka 84 lao macatre. Pëkö ca drai ne patre Ana hnine la uma ne hmi. Matre ngöne la drai cili, angeic a tro ju koi Iosefa me Maria, memine la neköi nyidro Iesu. Ame hnei Ana hna ole Akötresie, me qeje Iesu koi nöjei atr ka dreng.

Tha jole kö troa mekune la trenge madrine i Iosefa me Maria hnine la uma ne hmi! Nyipici, itre ewekë lai ka anyipicine koi nyidro ka hape, nekö i nyidroti hi lo Atre Hna Thingehnaean hnei Akötresie.