Lue Maca Qaathei Akötresie

Meköt e tro sa mekune ka hape, maca qaathei Akötresie la Tusi Hmitrötr. Hnene la Keme së e hnengödrai hna hamëne lai, nyine ini së. Haawe, pane mekune jë la lue maca hna tro fë a 2000 hë lao macatre. Hna tro fë la lue maca cili hnei Gaberiela, angela ka “cile qëmeke i Akötresie.” (Luka 1:19) Tune kaa la mele ne la itre atr lo Gaberiela a tro fë maca?

Easenyi hë lo 3M.P.K. Matre, Gaberiela a pane tro fë maca koi drei? Zakaria, ketre atre huuj. Angeic a lapa ngöne la itre wetr e Iudra, ma tha nanyi kö qa Ierusalema. Qatre hë angeic me Elisabeth föi angeic, ketre, pëkö nekö i nyidro. Nge ijine hë koi Zakaria troa atre huuj hnine la uma ne hmi i Akötresie e Ierusalema. Zakaria e hnine la uma ne hmi, ame hna mama pi Gaberiela koi angeic, ezine la ita ne dreu ka pui loi.

Trotrohnine hi së la kola xou hnei Zakaria. Ngo matre lapa tingeting la hni angeic, önine lai angela: “The xou kö Zakaria, ke ase hë kapa la xëwe i eö, nge tro la ifënekö i eö, Elisabeth a hamë eö la nekönatr trahmany, nge tro hë eö a ati ëje i nyën, Ioane.” Öni Gaberiela hmaca ka hape, tro Ioane a “atr ka tru koi Iehova,” nge tro angeic a “hnëkëne la ketre nöj, thatraqai Iehova.”—Luka 1:13-17.

Ngo tha traqa kö la mekune cili koi Zakaria. Pine nemen? Pine laka, qatre hë angeic me föi angeic. Matre öni Gaberiela ka hape: “Tro hë eö a hum, tha tro hmaca kö eö a ithanata uti hë eatre pi la itre ewekë celë, pine eö tha lapaune kowe la itre trengewekëng.”—Luka 1:20.

Nge e trön, kola isa hnying hnene la itre atre ka hape, hnauëne laka hmitre pala ha Zakaria. Ngo ame hë la angeic a lö qa lai, thatreine hë angeice ithanata. Angeic a köjaköja, eje hi lai hnei angeic hna atreine kuca. Mama cile ju hi ka hape, hetre ewekë ka mama koi angeic hnine la uma ne hmi.

Thupene la Zakaria a ase la huliwa i angeic, angeic a bëeke hmaca jë kowe la hnalapa i angeic. Ngo tha qea ju kö e thupen, upune ju hi Elisabeth! Matre faif lao treu hnei eahlo hna pane umë, treqene la ijine hnahone la nekönatr.

Thupene lai, Gaberiela a mama hmaca pi kowe la ketre atr. Drei? Maria, ketre jajiny ka tha faipoipo, nge ka mel e Nazareta, ketre traon ne Galilaia, götrane kolopi e Ierusalema. Nemene la hna qaja hnene lai angela koi angeic? Önine lai angela: “Hna hnimi eö hnei Akötresie.” Öni Gaberiela hmaca: “Nge hanawang! Tro hë eö a upune, nge tro eö a hnahone la ketre nekönatr trahmany. Nge tro eö a ati ëje i nyën, Iesu.” Öni Gaberiela göi Iesu ka hape: “Nge tro nyën a atre ka tru, nge troa hë nyën ka hape, Nekö ne la Akötresie ka Draië Catr, . . . Nge tro nyën a mus me Joxu hune la hnalapa i Iakobo epine palua, nge tro ha pë pun la Baselaia i nyën.”—Luka 1:30-33.

Drei jë kö la ole i Gaberiela troa tro fë la lue maca cili! Nge ame la easa e la itre xa ithuemacany göi Ioane me Iesu, canga mama ju hi la enyipiewekëne la lue maca hna tro fë qa hnengödrai.