MEKENE 3
Mama Hmaca Ha La Itre Trenge Nyipici Qa Hnine La Tusi Hmitrötr
Itre hna hëne ekö ka hape, Les Étudiants de la Bible, ngöne lo itre macatre 1870
Pane zonal, ene Ita Ne Thup, lo macatre 1879
Ita Ne Thup enehila
Hnei Tusi Hmitrötre hna qaja ha ekö ka hape thupene jë hi la meci Iesu, troa xulu qaathene la itre nyipi Keresiano la itretre hamë ini ka thoi, nge tro angatr a atriane la itre trenge nyipici qa hnine la Tusi Hmitrötr. (Ite Huliwa 20:29, 30) Celë hi ewekë lai ka traqa. Hnei angatre hna ce xome la itre ini qaathei Iesu memine la itre ini wanaithihlë, ene pe cile jë hi la ketre hmi ka selëne ka hape, itre Keresiano angatr. (2 Timoteo 4:3, 4) Ngo nemene la ka amamane hnyawa enehila, la emekötine la aqane trotrohnine huni la itre ini qa hnine la Tusi Hmitrötr?
Ijine tro hë Iehova a amamane la nyipici. Hnei Nyidrëti hna ahnithe amë hë ka hape, ame ngöne la ‘hneijine la pun, tro ha kekë la inamacan.’ (Daniela 12:4) Ame ngöne lo macatre 1870, hnene la ala xalaith, lo angetre thele la nyipici hna öhne laka, tha hamëne kö hnei hmi la itre nyipi ini qa hnine la Tusi Hmitrötr. Haawe, angatr a nyiqaane thele jë troa atre la nyipi aliene la Tusi Hmitrötr, tune la sipu aqane troa trotrohnine ej ngöne la qaan; ame hnei Iehova hna amanathithi angatre ju me hamë angatre la trotrohnin.
Kola inine hnyawa la Tusi Hmitrötr hnene la itre atr ka ajan. Hetre aqane inine ekö la Tusi Hmitrötr hnene lo itre hna hëne ka hape Les Étudiants de la Bible nge hne huni fe enehila hna hane xötrethenge. Hnei angatr hna ithanatane la itre tane mekune ka isapengöne qa hnine la Tusi Hmitrötr. Ame itre xa ijin, hnei angatr hna traqa kowe la ketre mekune ka jole troa trotrohnin; angatr pëhë a thele ju ngöne la Tusi Hmitrötr la itre xa xötre ka ijije troa qejepengöne hnyawa lai mekune cili. Nge e traqa ha angatre kowe la mekune ka cas, nge e ihmeku hë memine la hna qaja hnei Tusi Hmitrötr, angatre pëhë a cinyihane ju. Pine laka hnei angatre hna nue la Tusi Hmitrötr troa sipu qejepengöne eje kö, haawe, mama hmaca pi hi koi angatre la itre trenge nyipici qa hnine la Tusi Hmitrötr; tune la ëje i Akötresie me Baselaia i Nyidrë, memine fe la aja i Nyidrëti koi së me kowe la fen, memine la pengöi itre ka mec, memine la mele hmaca. Ame la thangane la hnei angatre hna catre ithel, tre hna nuamacanyi angatre hë qa ngöne la itre huliwa me itre ini ka thoi.—Ioane 8:31, 32.
Qaane lo macatre 1879, atrehmekune hë angatr ka hape ijine hë troa tro fë e cailo fene la nyipici. Ame ju fe kö ngöne lai macatre cili, tre angatre a nyiqaane fejane ju la ketre zonal, hna ati ëjene hë enehila ka hape, Ita Ne Thup maca ne la baselaia i Iehova. Ame enehila, traqa ha koi 240 lao nöje hne huni hna tro fë kow la itre trenge nyipici qa hnine la Tusi Hmitrötr, jëne la itre itus hna ujëne ngöne la 750 lao qene hlapa. Nyine hain enehila la aqane haöthe la fene hnene la nyipici!
Nemene la ewekë ka traqa kowe la itre trenge nyipici qa hnine la Tusi Hmitrötr, thupene lo meci Iesu?
Nemene la hna kuca matre öhne hmaca jë la itre trenge nyipici qa hnine la Tusi Hmitrötr?