Itre Hnying Hna Fe Hnene La Itre Atr Ka Kapa La Maca
Maine nyipici laka ka ihnimi Akötresie, hnauëne hö la Nyidrëti a nue la iakötrë?
AKÖTRESIETI a nue la iakötrë hna kuca xanëne hnene la itre atr ka nyimutre catr. Hanawange la ketre ceitun, kola thele isi hnene la itre atr, me kuiëne la itre boob me humuthe la itre nekönatr, me angazone la fen me axulune la jiin. Nyimutre la itre atr ka ufi sixa matre kola kaaser ne idrefitr, maine pena angatr a nyi xetë, ene pe, kola tithi angatr hnene la itre mec ka solesol, tune la pokes me itre xane ju kö; ame itre xan, angatr a iji menu la kahaitr, matre kola hetre ethane kowe la idre i angatr, me itre xaa ewekë ju kö. Thaa ajane kö la itre atr celë troa paatre la ngazo, angatre pe a ajan troa kuca catrëne la itre ewekë cili ngo thaa tro kö pe a hetre ethane kowe la mele i angatr. Ame la angatr a menuëne la itre hnei angatr hna traan, öni angatre ka hape: “Hnauëne la kola traqa koi ni?” Nge angatr a jele ngazo Akötresie, tune la hna qaja hnei Ite Edomë 19:3, kola hape: “Ame la qene hmo ne la at, te, kola aqaline la jë i nyën ; nge tro la hni nyën’ a elëhni koi Iehova.” Eje hi lai laka, maine hnei Akötresieti ju hna sewe angatr troa kuca la aja i angatr ka ngazo, haawe, ijije hi tro angatr a wesitre koi Nyidrë; ngo ame la, tre, pëkö ka sewe angatr, matre thaa ijije kö tro angatr a upe zö Nyidrëti pena ha la isa aqane xeni pune angatr la itre huliwa i angatr.
Ame la Iehova a nue la iakötrë, tre, göne hi matre troa sa koi Satana pine la hnei angeic hna icilekeu. Hnei angeic hna qaja koi Akötresieti ka hape, thatreine troa mele nyipici koi Nyidrë hnene la itre atr hnei Nyidrëti hna amë e celë fen, e traqa pi koi angatr elanyi la itre itupath. (Iobu 1:6-12; 2:1-10) Ame la Iehova a nue angeice troa mel, tre, göne matre tro angeic a anyipicine la itre mekune hnei angeice hna pi tru fë. (Esodo 9:16) Kola catre thele hnei Satana troa ahleuhleune la mele ne la itre atr hnene la nöjei akötr, göne hi matre tro angatr a hane icilekeu me Iehova. (Hna Amamane 12:12) Ngo hnei Iobu hna mele nyipici koi Iehova tui Iesu. Ame mina fe la itre nyipi Keresiano ne la hneijine së, tre, angatre fe a hane mele nyipici koi Iehova.—Iobu 27:5; 31:6; Mataio 4:1-11; 1 Peteru 1:6, 7.
Eni a pi mejiune kowe la ketre paradraiso e celë fen hna troa mele ngön epine palua hnene la itre atr, ngo hapeu, ma ka lolo catre menu pala ha matre jole e tro sa lapaune kow?
Ohea. Thaa celë kö la mekuna i Tusi Hmitrötre lai. Maine jë tro sa nango luelue me mekune ka hape lolo menu pala ha; kola nango jole tro sa kapa la mekune cili, pine laka, tru catre pala ha la itre macatre ne akötre la atr. Hnei Iehova hna xupe la ihnadro me upe la itre atr troa nyialiene ej hnei trahmanyi me föe ka thiina ka meköt, nge tro angatr a thupëne la itre sinöe memine la itre öni. Nge thaa angatre kö a troa angazone la ihnadro ngo kolo pe a troa thupëne la emingömingöne ej. (Goeëne ju la götrane 12 me 17.) Thaa hnene kö laka ka lolo catre pala ha la aqane thingehnaeane la Paradraiso elany, tre, tro ha mekune hnei itre xan, ka hape, thaa tro jë kö a eatr; caasi pe la mejiune së, laka, pine laka ngazo catre pala ha la itre aqane mel enehila, haawe, thatreine kö tro itre ej a cile hut. Troa nyihnane itre ej hnene la Paradraiso.
Tro ni a sa tune kaa kowe la itre ka ihnyima sai ka qaja ka hape hna jele thoine la Tusi Hmitrötr hnene la aqane edromëne la itre drai hnapan memine la sias?
Thaa hmo kö së matre troa lapaune kowe la itre hna thingehnaeane cili. “Lapaune ngöne la hna deng.” Ame la ka inine la Wesi Ula i Akötresie, tre, angeic a kapa la inamacan nge kola kökötre la lapaune i angeic.—Roma 10:17; Heberu 11:1.
Hetre itre ithuemacanyi hna hamëne hnene la itre ka sine thele la itre apak; itre eje a anyipicine la hna edromën hnei Tusi Hmitrötr lo itre drai hnapan. Nge ame la nyipi Sias, tre, thaa ka isazikeu kö la hnene ej hna qaja memine la aliene la Tusi Hmitrötr. Hanawange la itre ewekë hna cinyihane ngöne la Tusi Hmitrötr, nge hna atrepengöne pë hë e thupene hnei atr: isa hetre ijine Akötresieti a xupe la nöjei ewekë matre hetrenyi pi la fen, ketre, ka xupexupëtre me raone la fen, nge ka thipi eje ngöne la pëkö; kola amamane mina fe la aqane sesëne la itre waco kowe la itre nöje gaa nany.—Genese, mekene 1; Isaia 40:22; Iobu 26:7; Ieremia 8:7.
Hna anyipicine ka hape qaathei Akötresieti la Tusi Hmitrötr, hnene la aqane eatre la itre hnei Nyidrëti hna perofetan. Hna ahnithe hë hnei Daniela la aqane acile memine la aqane kei la itre musi ne fen, memine fe la hneijin ne la traqa la Mesia me meci nyidrë. (Daniela, mekene 2, 8; 9:24-27) Ame enehila kola eatr la itre xaa hna perofetane hnei Tusi Hmitrötr, nge celë hi ka aijijë së troa atre laka, easa melëne la “ite drai hnapin.” (2 Timoteo 3:1-5; Mataio, mekene 24) Thatreine kö tro la atr a canga perofetane la itre ewekë ka troa traqa ngöne la drai elany. (Isaia 41:23) Maine nyipunieti a aja ithuemacany, wange ju la itre itus La Bible : Parole de Dieu ou des hommes ? et Y a-t-il un Créateur qui se soucie de vous ? hna amamane hnene la Itretre Anyipici Iehova.
Nemene la aqane tro ni a inine troa sa kowe la itre hnying göne la Tusi Hmitrötr?
Loi e tro sa inine la Tusi Hmitrötr me sine thele ej, me sipone koi Akötresie troa eatrongë së hnene la uati hmitrötre i Nyidrë. (Ite Edomë 15:28; Luka 11:9-13) Öni Tusi Hmitrötre ka hape: “Maine kete e nyipunie ka pë inamacan, tro angeic’ a sipo Akötesie, ate hamëne atrune kowe la nöjei ate asëjëihë, nge tha wesite kö, nge tro ha hamëne koi angeic.” (Iakobo 1:5) Hetrenyi fe la itre itusi ka qeje pengöne la Tusi Hmitrötr nyine tro sa xome matre troa xatua së. Nyipi ewekë mina fe troa xatua së hnene la itre xan, tune lo atre Aithiope hna xatuane hnei Filipo troa trotrohnine la Tusi Hmitrötr. (Ite Huliwa 8:26-35) Kola inine la Tusi Hmitrötr hnene la Itretre Anyipici Iehova memine la itre atr ka hni ka ajan ngöne la itre hnalapa i angatr; thaa hna nyithupene kö la ini tusi cili. The luelue kö e troa sipone troa inine la Tusi Hmitrötre me angatr.
Pine nemene matre kola icilekeu memine la Itretre Anyipici Iehova, me sewe së troa inine la Tusi Hmitrötr me angatr?
Hna sewe Iesu troa cainöj hnene la itre atr, nge hnei nyidrëti mina fe hna qaja ka hape, tro fe a hane icilekeu tune lai memine la itretre drei nyidrë. Ame ngöne la ketre ijin, hna haine hnene la itre atr la aqane hamë ini i Iesu; önine jë hi la itre hene ne hmi ka icilekeu koi angatre ka hape: “Hape u, ase hë amenu nyipunieti fe? Hape u, hete kete tane me ate faresaio a lapaune koi nyën?” (Ioane 7:46-48; 15:20) Nyimutre la itre atr ka hmekë nyipunie troa inine la Tusi Hmitrötr memine la Itretre Anyipici Iehova, hnene laka, ngazo la itre ithuemacanyi hnei angatr hna kapa; ame pena itre xan, ka iwangatrehmekunyi atr angatr. Haawe, inine jë la Tusi Hmitrötr memine la Itretre Anyipici Iehova, nge tro kö nyipunieti a isa wang la thangan maine nyipunieti a kökötr maine thaa kökötre pena ngöne la aqane trotrohnine la Wesi Ula i Akötresie.—Mataio 7:17-20.
Pine nemene matre kola tro hnene la Itretre Anyipici Iehova troa wange la itre atr ngo isa hetre hmi angatre hë?
Pine laka angatr a xötrethenge la tulu i Iesu. Hnei Iesu hna tro kowe la itretre Iudra. Hetre hmi angatr, ngo kola mama laka, ame la aqane hmi angatr, tre, tria ha qa ngöne la Wesi Ula i Akötresie. (Mataio 15:1-9) Isa hetre hmi ne asë hi la itre nöj; kolo itre nöj hna majemine hëne ka hape itre Keresiano la itre atren nge ame itre xan, tre, ketre hmi kö tune lo hmi koi buda me itre xane ju kö. Nyipi ewekë troa ihmeku hnyawa la itre hne së hna inin, memine la itre ini qa hnine la Tusi Hmitrötr. Kola thele hnene la Itretre Anyipici Iehova troa xatuane tune lai la itre atr ka easenyi angatr, nge angatre hi lai a amamane la ihnimi angatr.
Hapeue la Itretre Anyipici Iehova, angatr kö a mejiune laka ame la hmi angatr, tre, celë hi la nyipi hmi?
Ame la atr ka wanga atrune la hmi angeic, tre, loi e troa xecie hnyawa koi angeic ka hape, celë hi la nyipi hmi lai. Ngo maine thaa nyipi hmi kö, hnauëne hö laka melëne kö angeice la hmi cili? Hna eamo kowe la itre Keresiano ka hape: “Tupathe ju la nöjei ewekë asëjëihë ; xölehuje catëne ju la ka loi.” (1 Thesalonika 5:21) Loi e troa xecie hnyawa koi së laka, ame la itre ini hna hamën, tre, hna nyi trepene hnei Tusi Hmitrötr, pine laka, caasi hi la lapaun. Celë hi hna qaja ngöne Efeso 4:5, kola hape, “casi la Joxu nge casi la lapaun, nge casi la bapataiso.” Thaa hnei Iesu kö hna kapa la aqane mekune ka menu, nge ka hlemu ngöne la fene enehila, lo hna hape, nyimutre la itre gojeny, nyimu hmi, itre ej asë a fe gojenyi së kowe la mel. Ngo Iesu pe a qaja ka hape: “Ilite la qanahag, me co hi la gojenyi ne tro kowe la mel ; nge ala xalaithe hi angete öhne lai.” Lapaune hë la Itretre Anyipici Iehova, laka, gojenyi hi lai. Maine ju, tro pena ha angatr a thele ketre hmi pena ha.—Mataio 7:14.
Hapeu, mekunane la Itretre Anyipici Iehova ka hape a angatre hmekuje hi la hna troa amelene pe?
Ohea. Nyimutre catre la itre atr ka meci hë ekö, thaa Itretre Anyipici Iehova kö angatr, ngo kolo fe a troa hane amele angatre hmaca matre troa hane aijijë angatre troa hetrenyi la mele ka epine palua. Ijije pala kö kowe la itre atr ka mele enehila, troa hane kapa la nyipici memine la meköt qëmekene la troa nyiqaane lo “aköte atraqate,” me hane kapa la iamele. Ketre, hnei Iesu hna qaja ka hape, thaa tro kö sa qeje gelene la ketre. Caasi hi la hne së hna öhn, a itre ewekë hna goeën hnei lue meke së, ngo ame Akötresie, Nyidrëti a öhne la itre ewekë ka eje e kuhu itre hni së. Pëkö ka sihngödre koi Nyidrë, nge Nyidrëti a amekötin cememine la ajane troa senge la itre menu së. Hnei Nyidrëti hna amë hnine la lue ihnatrapaime i Iesu la hnëqa ne troa iameköti, ngo thaa hna hamëne kö koi së la hnëqa cili.—Mataio 7:1-5; 24:21; 25:31.
Nemene la hna thel göi manie thene la itre atr ka sin la itre icasikeu ne la Itretre Anyipici Iehova?
Drei la hna qaja hnei Paulo aposetolo göne la itre ahnahna manie, öni nyidrë: “Loi e isa hamëne thenge la hna axeciëne e kuhu hni ; tha ngöne la hace hnin, me hna musinëne pena ; ke aja i Akötesie la ate hamëne madin.” (2 Korinito 9:7) Pë fe kö sipone me hle manie e hnine la itre Uma Ne Baselaia maine ngöne la itre hnë asabele ne la Itretre Anyipici Iehova. Hetrenyi la itre sine kees hna hnëkëne thatraqane la itre ka mekune troa hamë ahnahna. Pëkö ka atre la etrune la hna hamëne hnene la ketre, nge thatre kö së maine hna hamën maine thaa hna hamë manie pena hnene la ketre. Maine jë troa tru la hna hamën hnei itre xan hune la itre xan; ame pena itre xan, tre, ma thaa ijiji angatre jë kö troa hane hamë manie. Hnei Iesu hna amamane la aqane waiewekë ka loi, ngöne la nyidrëti a qaja la trengene manie e hnine la ēnē e Ierusalema memine la itre atr ka hamë ahnahna. Ame la ka nyipi ewekë, tre, thaa celë kö la etrune la manie hna kuiën, ngo ene pe la hni ne ajan ka eje thene la itre atr troa isa hamën la hnei angatr hna atrein.—Luka 21:1-4.
Maine tro ni elanyi a hane Atre Anyipici Iehova, tro kö ni a hane cainöj?
Ame la easa atre la hna thingehnaeane göne la ketre Paradraiso e celë fen hna musinëne hnene la Baselaia i Keriso, caasi hi la aja së, ene la troa hane thuemacane fe la itre xaa atr. Nyipunieti mina fe hi a hane kuca lai, pine laka, celë hi ketre maca ka loi lai!—Ite Huliwa 5:41, 42.
Easë hi lai a amamane ka hape easa hane xötrethenge Iesu Keriso. Hna hë Iesu hnine la Tusi Hmitrötr ka hape, “ate anyipicine ka nyipici.” Ame ngöne lo nyidrëti e celë fen, hnei Iesu hna cainöje me qaja ka hape: “Eashenyi hë la baselaia ne hnengödrai,” nge hnei nyidrëti hna upe la itretre drei nyidrë troa cainöjëne fe la ewekë cili. (Hna Amamane 3:14; Mataio 4:17; 10:7) Thupene lai, hnei Iesu hna upe la itretre drei nyidrë troa kuca la ketre huliwa; öni nyidrë: “Qa ngöne lai, trojë nyipunie a inine la nöjei nöj’ asëjëihë, . . . ini angate jë.” Hnei nyidrëti fe hna ahnithe ka hape, qëmekene troa traqa la pun, tre, “tro ha cainöjëne la maca ka loi celë ne la baselaia e cailo fene nyine anyipicine kowe la nöjei nöj.”—Mataio 24:14; 28:19, 20.
Hetrenyi la itre xaa aqane troa tro fë la maca ka loi. Ijije hi tro sa ce thawa la maca cili ngöne la easa porotrike memine la itre sinee së me itre xaa atr hne së hna atre. Ijije mina fe tro sa cinyany me telefon matre troa qaja la maca cili. Ijije fe tro sa iupi fë kowe la ketre atr la itre itus ka qeje pengöne la Tusi Hmitrötr; itre itus hne së hna mekune ka hape, troa hane ketri angatre hnen. Ame la aja ne la Itretre Anyipici Iehova, tre, ene la troa ketr la nöjei atr asë, celë hi matre angatr a cainöj ngöne itre hnalapa trootro.
Kola könë së hnei Tusi Hmitrötr, ka hape: “Öni Ua me tepu i Iesu, ka hape, Trohemi. Nge ame la ate ajan, xome gufane jë la timi ka mel.” (Hna Amamane 22:17) Ame koi itre ka troa ce ithanatane memine la itre atr la pengöne la Paradraiso elany memine la itre aqane mel e hnin, tre, loi e tro angatr a kuca xanëne lai, hnene laka kola upi angatr hnene la hni angatr ka tiqa hnene la ajane troa ce thawa la maca ka loi cili.
Maine jë hetrenyi la itre xaa hnying hnei epuni hna ajane troa sa hnene la Itretre Anyipici Iehova, göne la pengö i angatr maine pena göne la itre ini hnei angatr hna hamën. Ma thaa kapa jë fe kö nyipunieti la itre xan. Eahuni a ajane troa sa la itre hnyinge i nyipunie. Qa ngöne laka, thaa ijiji së kö troa qaja asë itre ej hnine la boroshüre celë, eahuni a sipo nyipunie troa hnyinge kowe la Itretre Anyipici Iehova ngöne la nöje i nyipunie. Ijije hi tro nyipunie a hnyinge koi angatr ngöne la itre ijine angatr a icasikeu hnine la Uma Ne Baselaia i angatr, maine ngöne la angatr a traqa troa cainöj ngöne la hnalapa i nyipunie. Ijije fe tro nyipunie a iupi fë la itre hnyinge i nyipunie kowe la Itretre Anyipici Iehova jëne cahu ketre hune tus.