Meken 117

Akötre i Iesu Ngöne La Hnepe Hlapa

ASE hë Iesu thith, nyidrëti pëhë a ce thinge memine lo 11 lao aposetolo, la itre nyima nyine atrunyi Iehova. Hnenyipajidri hë, angatre a uti pi qa ngöne la hnahag, me tro Bethania eë jëne la hnathupe ne Kederona. Ngo e kuhu hë gojeny, angatre a pane cile ngöne la hlapa e Gethesemane, ketre götrane hnei angatre hna pune ce traqa itrohnyi ngön, hune la wete Elaio, maine ezine pena. Hnei Iesu me itretre drei nyidrë hna majemine lapa fene lai itre elaio.

Iesu a pane nue pe la eitre lao aposetolo i nyidrë,​—maine jë easenyine lai hnë lö kowe la hlapa,​—öni nyidrë koi angatre ka hape: “Lapa ju e ce, pane tro ni a thithi e cili.” Thupene lai, nyidrëti a thenge jë la köni xan e angatr, ene Peteru, me Iakobo me Ioane, me tro kowe la hlapa. Kola nyiqaane hlehleu la mele i Iesu. Öni nyidrëti ka hape: “Kola aköte atraqate la unge kösë troa mec; lapa ju e ce, me ce hmekëne ju me ini.”

Nyidrëti a tro kowe la gaa easeny, me kei qe ipië, me hmeti, me thithi ka hape: “Kakati fe, maine pucatine patepi qathenge la inege celë; ngo tha eje kö la ajang, loi pe la aja i cilie.” Nemene la aliene la hna ithahnata cili? Pine nemene la nyidrëti a “akötre atraqatr, kösë troa mec”? Hapeu, nyidrëti a nue trije lo mekune i nyidrë, ene la troa meci me hamëne la mele i nyidrë nyine thupene mele koi së?

Ohe! Thaa Iesu kö a sipone troa atrianyi nyidrë la mec. Nge nyidrëti a sisine mina fe lo mekune hna hamë nyidrëti hnei Peteru, ene la troa mel, ngo thaa tro kö a hujëne la mele i nyidrë. Ame la akötre koi nyidrëti pe, nge hnei nyidrë hna xouen, ke, ene lai aqane troa mec, tune la atre ihumuth​—kösë kola ahmahmane la ëje ne la Tretretro i nyidrë. Atre hi nyidrëti laka, itre hnepe hawa pe hi matre athipi nyidrëti jë hune la sinöe, tune la ka atrekënö, me atre qaja angazonyi Akötresie! Celë hi ewekë lai ka akötrëne catrëne la hni nyidrë.

Thupene la hnei nyidrëti hna thith, laka, nango qea pi hë, Iesu a bëeke me öhne la köni aposetolo a imeköleny. Öni nyidrëti koi Peteru ka hape: “Hape u, tha ’teine kö nyipunie troa ce hmekëne me ini ngöne la haua ka cas? Hmekëne ju nyipunie me thith, mate tha lö kö kowe la itupath.” Trotrohnine hi nyidrëti laka, hace la itre hni angatr, nge jidri catre hë, nyidrëti a qaja ka hape: “Ke kola ajane la hni, ngo kucakuca la ngönetei.”

Iesu a nango tro ananyi angatre hmaca, me sipone kowe la Tretretro i nyidrë troa xome ananyi nyidrë la “inege celë,” kola qaja la götrane hna amekötine koi nyidrë hnei Iehova, ene la aja i Nyidrë koi Iesu. Nyidrëti a bëeke hmaca, me öhne lo köni aposetolo i nyidrëti a imeköleny, ngo thaa hane pe thithi matre thaa tro kö a kei ngöne la itupath. Pëkö atreine sa e angatr, ngöne la Iesu a ithahnata koi angatr.

Nyidrëti a hnaakönine tro hmaca pi; thaa nanyi menu kö qaa lai, nyidrëti a sa iwatingöneca ju, me ithahnata catr, nge kola xölaxöla la itre trenge tihmidra i nyidrë, nge nyidrëti a thithi jë me hape: “Kakati fe, maine cilieti a hanengëtine troa xolomëtine la aleneitra celëti thawangö.” Atraqatre catre la akötre i Iesu, pine laka, nyidrëti a troa meci tune la ketre atr ka ihumuth, nge kola troa adrone la ëje ne la Tretretro i nyidrë. Jole catre koi nyidrëti troa kapa laka, kola troa kootrë nyidrë ceitune memine la ketre atre thoi​—ketre atr ka qaja angazo Akötresie.

Ngo Iesu pala hi a thithi me hape: “Loi pe tha eje kö troa longëtine la hanengëngö, ngo jiniati pe la hanengë i cilie.” Haawe, nyidrëti a drenge thenge me nue la mele i nyidrë koi Akötresie. Ame hna mama pi koi nyidrëti la ketre angela me ithuecatre koi nyidrë, jëne la itre hnepe hna ithahnata nyine akeukawan. Maine jë kola qaja koi nyidrëti ka hape, hna kepe nyidrë hnene la Tretretro i nyidrë.

Ngo drei kö la itupathi ka tru hna thue hnei Iesu! Ene la mele i nyidrë, me mele ka thaa ase palua kö ne la itre atr asë. Pine laka, catrehnine catre la itupath, haawe, Iesu a ketre thithi catre fe; ene pe kola xöla me mala e kuhu hnadro la zihnue i nyidrë kösë itre wene madra. Kola qaja hnene la ketre zonale (Journal de l’Association des médecins américains), ka hape, “Ngacama thaa hna traqa tune kö la ewekë cili kowe la atr, ngo maine troa elitrauje menu pala ha la akötr e kuhu hni angeic . . . eje hi laka, ijije hi troa wene madra la zihnue i angeic.”

Thupene lai, Iesu a bëeke hmaca kowe la itre aposetolo, me öhnyi angatre e imeköleny. Kucakuca catre angatre pine la hleuhleu ka eje thei angatr. Öni Iesu koi angatre ka hape: “Meköle pala ju kö nyipunie me mano; loi hë, traqa ha la hawa; hana wang, ase hë wanaxoeëne la Nekö i ate kowe la ite iwanakoime ne la nöjei ate ka ngazo. Cile jë; tro shë; hana wang, dei hë la ate wanaxoeë ni.”

Nge nyidrëti petre kö a ithahnata, ene pe xulu pi hi Iuda Isakariota memine la ka ala nyim, fë la itre jiane isi, me itre jina me itre lamepa. Mataio 26:30, 36-47; 16:21-23; Mareko 14:26, 32-43; Luka 22:39-47; Ioane 18:1-3; Heberu 5:7.

▪ Thupene la hnei Iesu hna tro pi qa hnine la hnahage e koho, Iesu a ce tro ju ië memine la itre aposetolo, nge traqa ha nyidrë, nemene la hnei nyidrëti hna kuca?

▪ Ame ngöne la ijine Iesu a thith, nemene la hna kuca hnene la itre aposetolo?

▪ Pine nemene matre Iesu a akötr, nge nemene la sipo i nyidrëti koi Akötresie?

▪ Nemene la ewekë ka mama qa ngöne laka, kösë wene madra pena ha la zihnue i Iesu?