Meken 28

Aliene La Thaa Xen

KOLO ha troa caa macatre thupene lo hnei Iesu hna sine la Paseka ne 30 M.K. Nyimu treu ne Ioane bapataiso hë e kalabus. Nge aja i nyidrë tro la itretre drei nyidrë a xötrethenge Keriso, ngo thaa hnei angatre asë kö hna tro tune lai.

Enehila kola tro hnene la itre xaa ka drei Ioane troa hnyingë Iesu ka hape: “Hna uëne laka a nyimu a tha xeni huni me angete Faresaio, ngo tha hane kö tha xeni la angete dei cilie.” Ame itre Faresaio, angatre a alua thaa xeni ngöne la wiik; celë hi hna amekötine lai hnene la hmi i angatr. Ngo ame pena ha itretre drei Ioane, maine jë angatre jë fe a hane xötrethenge la hna majemine cili. Ketre, ma angatre jë pena a thaa xeni pine la hna akalabusi Ioane, nge angatre a thele la kepine matre thaa hane fe kö la itretre drei Iesu amamane la hace i angatr.

Iesu a sa ka hape: “Hape u, ateine la ite sine ne la ate xötei faipoipo troa teije e kolo pete kö a ce lapa me angate la ate xötei faipoipo? Ngo tro ha traqa la ite drai, ame hna xomejë qa thei angate la ate xötei faipoipo, nge celë hi ijine tro angat’ a tha xen.”

Eje hi, kola mekune hmaca hnene la itretre drei Ioane lo nyidrë a qeje Iesu kösë ate ka xötrei faipoipo. Celë hi matre, thaa nyipi ewekë kö tro Ioane memine la itretre drei Iesu a thaa xen, pine laka, ce nyidrëti pala kö me angatr. Ame la Iesu a mec, e cili tro hë la itretre drei nyidrë a hnëmeci me thaa xen. Ngo ame hë la nyidrëti a melehmaca me elë hnengödrai eë, haawe, thatreine hmaca kö tro angatre a hnëmeci me thaa xen.

Thupene lai, Iesu a hamëne pi la itre ceitune celë: “Pëkö ate icanekeune la sine mano ka hnyipixe kowe la ixete ka sinë hë, ke tro ha zezene la ixete ka hnyeqetre hnene la nyine axetin, ame hna ataqatepi la zezen. Kete pëkö ate nenge la waina ka hnyipixe kowe la ite tengene ka sinë hë, wanga kaqapi la ite tengen, ene pe nenipi la waina, ame hna ngazopi la ite tengen. Ngo angat’ a nenge la waina ka hnyipixe kowe la ite tengene ka hnyipixe.” Nemene la aliene la itre ceitune celë ngöne la pengöne la thaa xen?

Iesu a xatuane jë la itretre drei Ioane troa trotrohnine laka, thaa tro jë kö angatre a öhne la itretre drei nyidrë e xötrethenge hmaca lo itre ewekë hna majemine kuca ngöne la hmi i angetre Iudra, tune la troa thaa xen. Thaa nyidrëti kö a traqa troa icanekeune me nyixane pena la itre aqane hmi hnapane ka hnyeqetre hë, nge hna troa nue trij. Thaa tro jë kö la hmi i Keresiano a xomi tulu qa ngöne la hmi hna kuca ngöne la hneijine cili hnei angetre Iudra, ketre tune mina fe la itre hna majemine kuca hnei atr. Ohe, thaa tro kö eje a ceitune memine la ketre sine mano ka hnyipixe hna cane hune la ketre hnaheetre ka hnyeqetre hë, maine waina ka hnyipixe pena hna nenge hnine la ketre trengene ka nyihatre hë. Mataio 9:14-17; Mareko 2:18-22; Luka 5:33-39; Ioane 3:27-29.

▪ Drei la ka thaa xen, nge nemene kepin?

▪ Pine nemene matre thaa nyipi ewekë kö troa thaa xeni hnene la itretre drei Iesu, ngöne la nyidrëti petre kö me angatr, thupene lai, nemene la itre ewekë ka troa apaatrene la thaa xeni thei angatr?

▪ Nemene la itre ceitune hnei Iesu hna hamën, nge nemene la aliene itre ej?