Meken 6

Nekönatre Hna Thingehnaean

THAA bëeke hmaca ju kö Iosefa me Maria Nazaretaeë, ngo nyidroti a lapa ju e Betheleema. Ame hë la kola eitr lao drai Iesu, nyidroti a peritomo nyidrëti ju, thenge la hna amekötine hnene la Trenge Wathebo i Akötresie hna hamëne koi Mose. Hna majemine fe troa ati ëjene la medrenge ngöne la hna eitr ne drai nyën. Haawe, Maria a ati ëjene ju la nekönatr, ka hape Iesu, tune lo hna ahnithe koi nyidroti hnene la angela, ene Gaberiela.

Ame ngöne la hna 40 ne drai Iesu, kola caa treu nge sin. Hna tro sai nyidrë hnene la keme me thine i nyidrë, kola tro ië? Angatre a xomi nyidrë Ierusalema eë kowe la ēnē, a itre hnepe kilomet hi qaa lai hnei angatre hna lapa. Hna amekötine hnene la Trenge Wathebo i Akötresie hna jëne Mose, laka, troa tro kowe la ēnē hnene la nöjei föe ka hnaho trahmany, thupene la 40 lao drai, matre troa hamëne la ahnahna nyine apuiloin.

Celë hi hna kuca lai hnei Maria. Nyidroti a hamëne nyine ahnahna, la lue waco. Easë a öhne e celë laka, thaa trene manie kö Iosefa me Maria. Hna amekötine hnene la Trenge Wathebo i Mose laka, ngöne la ijine cili, troa hujëne la neköi mamoe trahmany, nge ka tru thupene catre kö hune la itre waco. Ngo maine thatreine kö la föe troa hamë mamoe, haawe, ka loi pena hi la lue piny, maine lue meketrë.

Hnine la ēnē, kola xepi Iesu hnene la ketre qatre trahmany. Ame la ëje i nyidrë ke Simeona. Hna amamane koi Nyidrë hnei Akötresie, laka, meci jë kö nyidrëti e ase hë öhne la Keriso i Iehova, ene lo Mesia hna thingehnaean. Ame la Simeona a tro ngöne la ijine cili kowe la ēnē, uati hmitrötre a ee nyidrë kowe la nekönatre hna traqa fë hnei Iosefa me Maria.

Simeona a xepi Iesu me olene koi Akötresie, kola hape: “Joxue, nuengëtinepi enehila la hluewa i enëtilai jötëtia ithuëti ngöne la tingeting, thenge la wesi ula i cilie; Qa ngöne laka ötetëtinë hë hnei lue xajawangö la iamele i cilie, ene la nöi cilieti hna hnëkëne qëmekene la nöjei ate asëjëihë, ene la hodromëti nyine alaine la nöjei ethen, nge nyine lolo ne la nöje i cilie Isaraela.”

Ame la kola drenge lai hnei Iosefa me Maria, nyidroti a hai atraqatr. E cili Simeona a amanathithi angatr, me qaja koi Maria ka hape, ame la nekö i nyidroti ke, “hna ami nyidëti nyine akeine me nyine acilëne la nöjei ate ka ala nyimu e Isaraela” nge akötre koi nyidro kösë kola thine axulune la hni hnei taua.

Hna hane sine fe la ijine cili hnene la ketre perofeta föe ka 84 hë lao macatre, Ana la ëje i nyidro. Pëkö ijine paatre eahlo ngöne la ēnē. Ngöne la hawa celë, eahlo a amamane la ole i eahlo koi Akötresie, me qeje Iesu kowe la itre ka ajane troa drenge lai.

Drei kö la madrine i Iosefa me Maria, ngöne la nyidroti a öhne lai itre ewekë ka traqa hnine la ēnē! Itre ewekë lai ka amamane hnyawa koi nyidro laka, ame la nekönatre cili ke, angeice hi lo hna thingehnaeane hnei Akötresie. Luka 2:21-38; Levitiko 12:1-8.

▪ Tune la hna majemin, eue la ijine troa ati ëjene la ketre medrenge trahmanyi ne Isaraela?

▪ Nemene la nyine troa kuca hnene la föe ne Isaraela, ngöne la kola traqa koi 40 lao drai ne la nekönatr? Nge tune kaa la aqane eatrëne Maria la hna amekötine cili, a kola amamane laka thaa trene manie kö nyidro?

▪ Drei la itre atr ka atrehmekunyi Iesu ngöne la ijine cili? Nge nemene la aqane amamane angatr?