Meken 3
Ase Hë Hnahone La Ka Tro Pa Troa Nyihnyawa Gojeny
EASENYI catre hë matre hnaho pi Elisabeth. Köni treu ne pane lapa Maria thei nyidro. Ngo, enehila traqa ha la ijine tro nyidro a isa ije, Maria hmaca ha a bëeke Nazareta eë. Sikisi pala kö lao treu, matre hane pi fe angeice hnaho.
Thupei Maria jë pe hi, nge kola hnaho hnei Elisabeth. Atraqatre la madrine ne la itre atr ngöne la angatre a öhne laka, pëkö ejolene la kola hnaho, nge egöcatre hi la thine memine la nekönatr! Ngöne la kola amamane hnei Elisabethe la nekönatre kowe la itre atr ka lapa ezi nyidro, me kowe fe la fami, angatre asë hi a ce madrine me nyidro.
Ame ngöne la ketre wathebo hna hamëne hnei Akötresie koi angetre Isaraela, ke, thupene la hna hnahone la medrenge trahmany, troa peritomo nyëne thupene la eitr lao drai. Ngöne la ijine cili, hna traqa itronyi troa iwai hnene la itre enehmu memine la itre sine la lapa. Angatre a mekune laka, tro la nekönatre a xome la ëjene la keme i nyën, ene Zakaria. Ngo kola catre fë hnei Elisabethe ka hape: “Tha eje kö lai, ngo loi pe Ioane la ëje i nyën.” Kola amekunë së lo ëje hna hamëne hnene la angela Gaberiela, thatraqane la nekönatr.
Ngo önine kö la itre enehmu ka hape: “Pëkö ka cahae me nyipo a hete ëjene ka tune lai.” Nge, kola qene humu hnei angatre koi kem, matre hnyingëne la mekune i nyidrë, ngöne la aqane troa ati ëjene la nekönatr. Zakaria a sipone la peeni nyine cinyihan, nge kola sesëkötre la itre atr, ngöne la nyidrë a cinyihane ka hape: “Ioane la ëje i nyën.”
Nge e cili, kola mama la ketre iamamanyikeu, ene laka, nyiqaane ithahnata hmaca ha Zakaria. Atre hi së lo kepine matre, thaa ithahnata pi nyidrë, hnene laka, thaa hnei nyidrëti kö hna lapaune kowe la maca hna qaja hnene la angela, ene laka, tro Elisabethe a upune. Haawe, ame hmaca ha la Zakaria a ithahnata, kolo asë hi a hai la nöjei atr me isa hnyinge ka hape: “Tro ha uejë la nekö trahmanyi celë?”
Tiqa ha Zakaria enehila hnei uati hmitrötr, nge nyidrëti a madrine atraqatre me hape: “Ole koi Joxu Akötesi angete Isaraela; qa ngöne laka hnei anganyidëti hna xöji me nyi thupene mele ne la nöjei ate i nyidë. Nge hnei nyidëti hna acilë la jone iamele thatraqai shë ngöne la lapa i Davita hlue i nyidë.” Ame la “jone iamele” celë, ke, kola qeje Iesu joxu hna troa hnahon, a calemi hë la drai. Kola qaja hnei Zakaria, ka hape jëne la joxu cili, tro Akötresieti a “amele shë qa ngöne la ite iwanakoime ne la nöjei ithupëjia me eëshë, tro anganyidëti a nue koi së troa nyi hlue i anganyidë nge pëkö qou, memine la thina ka metöte me meköti qëmeke i nyidë, ngöne la nöjei drai shë asë.”
Thupene lai, Zakaria a perofetane la itre ewekë ka troa traqa koi Ioane nekö i nyidrë, kola hape: “Nge ame eö nekönat, tro ha qeje eö perofeta ne la Kasisitia; ke tro ha eö a tro pa qëmeke ne la Joxu troa nyihnyawane la ite jë i nyidë, me troa hamëne kowe la nöjei ate i anganyidë troa ate la iamele, hnene la troa shenge la ite ngazo i angat, qa ngöne la nyipi ihnimi ka menyike i Akötesi shë. Qa ngöne lai troa xöji shë hnene la kaqa ne lai qa hnengödrai, troa alainyi angete lapa hnine la jidi memine la ahnuene la mec, troa ea la ite lue ca eëshë kowe la jëne tingeting.”
Nge ngöne la ijine cili, traqa ha Maria e Nazareta, nge thaa ase petre kö nyidroti faipoipo. Nemene la ewekë ka troa traqa koi nyidroti, ngöne la kola mama laka, ka upune nyidro? Luka 1:56-80; Levitiko 12:2, 3.
▪ Ka nango tru kö Ioane hui Iesu, ije treu e kuhu nyipi nyidro?
▪ Nemene la ewekë hna kuca ngöne la hna eitrene drai Ioane?
▪ Tune kaa la aqane ujë Akötresieti kowe la nöje i Nyidrë?
▪ Nemene la huliwa hnei Ioane hna troa kuca, thenge lo aqane perofetane hë?