HNA AMAMAN KOI IOANE

1 Hna amaman* jëne Iesu Keriso, lo hnei Akötresie hna ahnithe kow troa amamane la itre ewekë ka troa canga traqa koi itre hlue i nyidrë. Matre hnei Iesu hna upe la angela i nyidrë troa amamane koi Ioane hlue i Akötresie* la itre ewekë cili, kösë itre hna meköle goeën. 2 Angeice hi la ka troa anyipicine la trengewekë hna hamën hnei Akötresie, me anyipicine la hna qaja hnei Iesu Keriso, me nöjei ewekë hnei angeic hna goeën. 3 Haawe, ka madrine la atre e catrëne la hna perofetan celë me itre ka dreng, me itre ka trongëne la hna cinyihan, ke calemi hë la drai hna sa.

4 Qaathei Ioane kowe la sevene lao ekalesia e Asia:

Epi eje thei nyipunie la ihnimi gufa me tingeting qaathene “la Atre ka ej enehila, nge ka ej qaane ekö, nge ka ej uti hë epin,” nge qaathene la sevene lao u ka cile qëmekene la therone i nyidrë, 5 nge qaathei Iesu Keriso, “lo Atre Anyipicin ka Nyipici,” me “haetra ne la itre ka mec,” me “Joxu ne la itre joxu ne fen.”

Nge koi nyidrë, atre hnimi së, me amele së qa ngöne la itre ngazo së jëne la sipu madra i nyidrë— 6 me atre kuca matre baselaia pi së, me itretre huuje kowe la Akötresie me Keme i nyidrë—nyipici, koi nyidrëti la lolo me men epine palua. Amen.

7 Hanawang! Nyidrëti a traqa me itre iaw, nge tro la nöjei alamek a goeë nyidrë, nge tro fe a goeën hnei itre ka jei faonyi nyidrë; nge hnei nyidrë matre tro la nöjei lapa e celë fen a isa xexe imano hnei hleuhleu. Nyipici tro lai a traqa, Amen.

8 “Eni la Qaane me Pun” öni Iehova* Akötresie, “la Atre ka ej enehila, nge ka ej qaane ekö, nge ka troa traqa, lo ka Tru Trenge Men.”

9 Eni Ioane trejin me nyipunie, atre ce thawa me nyipunie la itre itupath, me baselaia, me cile hut tune la itretre drei Iesu. Eni ngöne la hnapet hna hëne ka hape, Patamo, ke hnenge hna qeje Akötresie me anyipici Iesu. 10 Hnene la ua hna xomi ni kowe la drai i Joxu, matre hnenge hna drenge la ketre atr a sue hutröng, nge kösë trutru la nine ithanata i angeic, 11 kola hape: “Ame la nöjei ewekë hnei eö hna troa goeën, cinyianyine ju ngöne la tusi hna ewath, nge iupi fë jë kowe la sevene lao ekalesia: e Efeso, e Semurina, e Peregamo, e Thuataira, e Saradi, e Filadelefia, me e Laodikea.”

12 Nge ame ju hi la eni a xei troa wange ka hape, drei la ka ithanata koi ni, öhne ju hi ni la sevene lao tane laame gol. 13 Nge nyipine la itre tane laam, hetre ka cil, kösë nekö i atr, nge angeic a heetrë iheetr ka qea uti hë ngöne lue ca i angeic, nge angeic a fena ngöne imano la ketre isol gol. 14 Nge ame la he i angeic me itre ipenehe i angeic, tre kösë pene mamoe, ka wië kaca,* nge ame la luemeke i angeic, tre kösë ukahlokine eë. 15 Nge kösë nyipi kopa hna ahmun ngöne eë la lue ca i angeic, nge kösë tim ka kaca la nine ithanata i angeic. 16 Nge ngöne la ime maca i angeic la sevene lao wëtresij, nge kola tro qa ngöne la që i angeic la ketre taua hna xöl nge ka lue ulan. Nge ame la ialameke i angeic, tre kösë jö ka hudrume catr. 17 Matre ame la eni a öhnyi angeic, kei ju hi ni kowe la lue ca i angeic kösë ka mec.

Ame hnei angeic hna atë la ime maca i angeic hung me hape: “The xou kö, eni la Hnapan me Hnapin, 18 nge ka mele ni lo, nge hnenge hna mec, ngo hanawang! Eni ha mel epin epine palua, nge theng la kii ne la mec me Hua.* 19 Qa ngöne lai, cinyianyine ju la itre ewekë hnei eö hna öhn, me itre ewekë ka traqa enehila, me itre ewekë ka troa traqa e thupen. 20 Matre, ame la ini ka hmitrötr nge hna juetrën göne lo sevene lao wëtresij hnei eö hna öhne ngöne la ime macang, memine lo sevene lao tane laame gool, tre: Ame la sevene lao wëtresij, hatrene la sevene lao angela ne la sevene lao ekalesia. Nge ame la sevene lao tane laam, hatrene la sevene lao ekalesia.

2 “Cinyianyine ju kowe la angela ne la ekalesia ne Efeso ka hape: Hane hi la itre ewekë hna qaja hnene la atre xome la sevene lao wëtresij ngöne la ime maca i nyidrë, me atre tro nyipine la sevene lao tane lame gool: 2 ‘Atre hë ni la itre huliwa i eö, me trengecatre i eö, me aqane cile huti eö, nge atre fe hë ni laka, xele eö ma wange la itre atre ka ngazo. Nge eö a tupathe la itre ka selëne menune ka hape, aposetolo angatr matre öhne hë eö laka, itre ka thoi lai. 3 Nge mama ha la aqane cile huti eö, nge hnei eö hna cile catr pine la ëjeng, nge tha kucakuca kö eö. 4 Ngo ame pe, hetre ewekë ka ngazo hnenge hna öhne thei eö: patre hë lo ihnimi eö hnapan.

5 “ ‘Haawe, mekune ju lo hnei eö hna kei qa ngön, nge ietra ju, nge kuca hmaca jë la itre huliwa i eö hnapan. Ke maine tha ietra kö eö, tro ni a traqa koi eö me xometrije la tane laame i eö qa ngöne la göhnen. 6 Ngo loi pe, eö pala hi a methinëne la hna kuca hnene la hmi hna hëne ka hape, hmi i Nikolao, lo hnenge fe hna methinën. 7 Matre loi e tro la trene hnangenyë a dreng la hna qaja hnene la ua kowe la itre ekalesia: Kowe la atre huun, tro ni a aijijë angeic troa iji wene la sinöe ne mel hnine la paradraiso i Akötresie.’

8 “Nge cinyianyine ju kowe la angela ne la ekalesia e Semurina ka hape: Celë hi itre ewekë hna qaja hnene ‘la atre Hnapan me Hnapin,’ lo ka mec nge hna amelene hmaca: 9 ‘Atre hi ni la itre itupath thei eö, me aqane pë ewekë i eö—ngo ka trenamo eö—me itre trengathoi ne la itretre selëne ka hape, angetre Iudra angatr, ngo tha eje pe, ke angatre la itre sunago i Satana. 10 The xou kö pine la itre akötr ka troa traqa koi eö. Hanawang! Tro pala kö Diabolo a akalabusine la itre xan thei nyipunie, göi troa tupathi nyipunieti hnyawa, nge troa akötrë nyipunie koi treene lao drai. Ngo mele nyipici ju uti hë la mec, nge tro ni a hamë eö la korona ne mel. 11 Haawe, loi e tro la trene hnangenyë a hane dreng la hna qaja hnene la ua kowe la itre ekalesia: Tha tro kö la hnaaluene mec a ketr la atre ka huun.’

12 “Nge cinyianyine ju kowe la angela ne la ekalesia e Peregamo ka hape: Celë hi itre ewekë hna qaja hnene lo ka trene taua atraqatr hna xöle lue ulan: 13 Atre hi ni la götran hnei eö hna lapan, ene la hna acile la therone i Satana; ngo eö kö a catre xölehuje la ëjeng, nge tha trije pi kö eö la lapaune i eö koi ni, nge tune fe ngöne lo ijine i Anetipa, atre anyipici ni nge ka mele nyipici, lo hna humuth ezi eö ngöne la hnalapa i Satana.

14 “ ‘Ngo ame pe, hetre ngazo i eö theng laka, hetrenyi thei eö la itre ka kapa la ini i Balaama, lo atre ini Balaka troa ami etë ne iakeiny qëmekene la itre nekö i Isaraela, ene la troa xeni la itre ewekë hna huujën koi itre idrola, me kuci ngazo.* 15 Ketre tun, hetrenyi fe thei eö la itretre nyixölene lo hmi hna hëne ka hape, hmi i Nikolao. 16 Haawe, ietra ju, ke e tha kuca kö eö, tro hë ni a canga traqa koi eö fë la taua atraqatr ne la qëng, me isi me angatr.

17 “ ‘Matre loi e tro la trene hnangenyë a dreng la hna qaja hnene la ua kowe la itre ekalesia: Kowe la atre hun, tro ni a hamëne kow la mana hna juetrën, nge tro ni a hamëne kow la etë ka wië, me cinyianyine hun, la ëje ka hnyipixe, lo hna thatre hnei nöjei atr, ngo tro hi a atre hnene la atre kapa.’

18 “Nge cinyianyine ju kowe la angela ne la ekalesia e Thuataira ka hape: Celë hi itre ewekë hna qaja hnene la Nekö i Akötresie, lo ka trene alamek kösë ukahlokine eë, nge kösë nyipi kopa hna ahmune la lue ca i nyidrë: 19 ‘Atre hi ni la itre hnei eö hna kuca, me ihnim, me lapaun, me huliwa i eö koi Akötresie, me aqane cile huti eö, nge atre fe hi ni laka, tru catre hmaca kö la itre huliwa i eö enehila hun ekö.

20 “ ‘Ngo ame pe, hetre ewekë ka ngazo hnenge hna öhne thei eö, eö a nue la föe Iezebela, lo ka sipu selëne ka hape, perofeta angeic, nge angeic a inin me amenune la itre hlueng troa kuci ngazo,* me xeni la itre ewekë hna huujën koi itre idrola. 21 Ase hë ni nue ijine koi angeic troa ietra, ngo xele kö angeic troa ietrane trije la kuci ngazo* i angeic. 22 Hanawang! Tro ni a kuië angeic ngöne la ili ne wezipo, me kuiëne la itre ka kuci ngazo me angeic hnine la akötr atraqatr, e tha ietrane kö angatr la itre huliwa i angatr. 23 Nge tro ni a humuthe la itre nekö i angeic hnene la itre meci ka ngazo, matre tro la nöjei ekalesia a atre ka hape, eni la ka waipengöne la nöjei mekun* me hni, nge tro ni a isa të koi nyipunie thenge la isa huliwa i nyipunie.

24 “ ‘Eni a ithanata kowe la itre xan e nyipunie e Thuataira, itre ka xele ma trongëne la ini cili, nyipunie itre ka xele ma atrepengöne lo hna hape, “itre ewekë ka jui i Satana”: Tha eni kö a troa nyi xa ehnefe i nyipunie. 25 Ngo tune pala hi, xölehuje ju la hnei nyipunieti hna hetreny, uti hë la ijine traqa ni. 26 Nge ame kowe la atre ka huun, me nyixölene la itre huliwang uti hë la pun, tro hë ni a aijijë angeic troa mus kowe la itre nöj, 27 nge tro angeic a musinëne la itre atr hnene la sine tö kopa, matre troa lep anyilanyilanyi angatr, kösë ewekë hna xup hnei dro ka fedr, nge musi lai hnenge hna kapa qaathei Kaka. 28 Nge tro fe ni a hamë angeic la wëtresij hatrene la lai. 29 Matre loi e tro la trene hnangenyë a dreng la hna qaja hnene la ua kowe la itre ekalesia.’

3 “Cinyianyine ju kowe la angela e Saradi ka hape: Hane hi la itre ewekë hna qaja hnene lo atre hetrenyi la sevene lao u, me sevene lao wëtresij: ‘Atre hi ni la itre huliwa i eö laka, ka mel eö, ngo göi qaja hi, ke nyipici, meci hë eö. 2 Haawe, hmeke ju, nge acatrene hmaca jë la itre ewekë ka lapa pe, itre ewekë ka troa mec, ke tha öhne kö ni ka hape, pexeje la itre huliwa i eö qëmekene la Akötresing. 3 Qa ngöne lai, mekune kö lo itre ewekë hnei eö hna drenge me kapa, nge catre jë eö qale kow, nge ietra ju. Ngo e tha kuca kö eö, tro kö ni a traqa tune la atrekënö, nge thatre kö eö la hawa ne traqa ni.

4 “ ‘Ngo hetrenyi pala kö e Saradi la ala xalaith* ka tha hane kö adrone la iheetre ka qea i angatr, nge tro angatr a ce tro me eni fë la itre iheetre ka wië, ke ijiji angatr. 5 Eje hi, troa heetrë ka wië hnene la ka huun ngöne la isi, nge tha tro pi kö ni a köletrije* la ëje i angeic qa ngöne la tusi ne mel, ngo tro pe ni a qaja la ëje i angeic koi Kaka me itre angela i nyidrë. 6 Matre loi e tro la trene hnangenyë a dreng la hna qaja hnene la ua kowe la itre ekalesia.’

7 “Cinyianyine ju kowe la angela e Filadelefia ka hape: Hane hi la itre ewekë hna qaja hnene lo atre ka hmitrötr, me ka nyipici, nge thei nyidrëti lo kii i Dravita, nyidrëti la atre fe, nge pëkö ka atreine thing, nge atre thing, nge pëkö ka atreine fe: 8 ‘Atre hi ni la itre huliwa i eö—hanawang ase hë ni amë qëmeke i eö la qëhnelö hna fe, lo hna thatreine thing hnei ketre. Nge atre hi ni ka hape, co hi la trengecatre i eö, ngo eö pe a hnine la trengewekëng, nge tha thoi kö eö kowe la ëjeng. 9 Hanawang! Ame la itre atrene la sunago i Satana, lo itre ka selëne thoine ka hape, angetre Iudra ngo tha eje pe—hanawang! Tro ni a kuca matre thili ju angatr kowe la lue ca i eö, nge tro kö ni a amamane koi angatr ka hape, hnenge hna hnimi eö. 10 Pine laka, hnei eö hna nyipiewekëne* lo hnenge hna qaja göi aqane cile hut, tro fe ni a hane thupë eö ngöne la hawa ne itupath, ene la ka troa traqa kowe la fen asë matre tupathe la itre atren. 11 Eni hë lai. Haawe, xölehuje catrëne jë la hnei eö hna hetreny, matre tha tro kö ketre a thapa la korona i eö.

12 “ ‘Ame la atre ka huun ngöne la isi—Tro ni a kuca matre tro angeic a nyi ikapa hnine la uma ne hmi ne la Akötresing; nge tha tro pi kö angeic a tro qa lai, nge tro ni a cinyihane hui angeic la ëje ne la Akötresing, memine la ëje ne la traon ne la Akötresing, lo Ierusalema Ka Hnyipixe ka troa uti qaathene la Akötresing, memine la ëjenge ka hnyipixe. 13 Matre loi e tro la trene hnangenyë a dreng la hna qaja hnene la ua kowe la itre ekalesia.’

14 “Cinyianyine ju kowe la angela e Laodikea ka hape: Hane hi la itre ewekë hna qaja hnene la Amen, lo atre mele nyipici, me nyipi atre anyipicin, me qaane la itre hna xup hnei Akötresie: 15 ‘Atre hi ni la itre huliwa i eö laka, tha idreuthi kö eö, nge tha lepanyi kö eö. Ngo ajange pe tro eö a lepany maine idreuth. 16 Haawe, pine laka, ka keu eö, matre tha ka idreuthi kö eö nge tha ka lepanyi pena, tro hë ni a hmitrane triji eö qa ngöne la qëng. 17 Öni eö ka hape: “Ka trenamo ni, nge eni pala hi a kepe mo, matre pë hmaca kö ketre ewekë hnenge hna ajan,” ngo tha öhne pe eö ka hape, ka pë ewekë eö, me timek, me cile xöe. 18 Haawe, eni a thuecatre koi eö troa itöne theng la gool hna dreuth hnei eë matre trenamo pi eö, nge troa itöne la iheetre ka wië matre heetre jë eö, nge tha hmahma pi eö troa cile xöe, nge troa itöne la drösinöe thatraqane la luemeke i eö matre goe pi eö.

19 “ ‘Ame la nöjei atr hnenge hna hnim, eni a hajin, me wenë amekötin. Qa ngöne lai, ietra ju nge catre pi! 20 Hanawang! Eni a cil ngöne la qëhnelö me fenafena. E tro ketre a drenge la eni a ewekë, me fe la qëhnelö, tro ni a lö kowe la uma i angeic, me ce xeni hej me angeic, nge angeic me eni. 21 Matre ame kowe la atre huun ngöne la isi, tro ni a alapa angeic me eni hune la theroneng, tune lo eni a huun me lapa memine la Kemeng hune la therone i nyidrë. 22 Matre loi e tro la trene hnangenyë a dreng la hna qaja hnene la ua kowe la itre ekalesia.’ ”

4 Ase jë hi ni goeëne lai, nge hanawang! mama pi hi la ketre qëhnelö hna fe e hnengödrai, nge ame la pane nine ithanata hnenge hna dreng, tre kösë nine trutru, nge kola ithanata koi ni me hape: “Elë jë kowe la, nge tro ni a amamane koi eö la itre ewekë ka troa traqa.” 2 Thupene lai, hna canga huliwa la uati hmitrötr theng, nge hanawang! hetre theron e hnengödrai nge hetre atr ka të hun. 3 Nge ame la atre lapan, ceitu i nyidrë memine lo etë iasepi me sadaio,* nge hetre lewen xötreithe la theron, nge kösë semerado.

4 Nge kola cile xötreithe la therone cili hnene la 24 lao theron, nge hun itre ej, kola isa të la 24 lao qatr ka heetrë ka wië, nge ka petrë korona gool. 5 Nge kola tro qa ngöne lo theron la itre nine ithanata me itre samek, nge e cili, hetrenyi la sevene lao uke jina atraqatr ka mel, nge itre ej a nyihatrene la sevene lao ua i Akötresie. 6 Nge qëmekene la theron, hetre ewekë kösë hnagejë thulu, nge ka lualai tune la kristal.

Nge nyipine* la theron, nge xötreithe la theron, hetrenyi la foa lao angela ka tiqa hnei alamek e qëmeken, me e hutrö. 7 Nge kösë liona la pane angela, nge ame la hnaaluen, ceitu me neköi kau, nge ame la hnaakönin, ceitu la iqëmeke i angeic me iqëmeke ne atr, nge ame la hnaafoan, tre kösë aeto ka sesë. 8 Nge ame la foa lao angela cili, isa sikisi lao iape i angatr, nge ka tiqa hnei alamek e hun me e fen. Nge angatre pala hi, e lai me jidr, a qaja ka hape: “Hmitrötr, hmitrötr, hmitrötr lae Iehova* Akötresie, lo ka Tru Trenge Men, nge ka hekö, nge ka ej, nge ka troa traqa.”

9 Nge ame la kola atrun, me metrötrën, me ole, hnene la itre angela cili kowe la Atre lapane la theron, lo Atre mel epin, epine palua, 10 kolo fe hi a thil hnene lo 24 lao qatr qëmekene la Atre lapane la theron, nge angatre fe a nyihluene la Atre mel epin, epine palua. Nge angatre fe a kuiëne la itre korona i angatr qëmekene la theron me hape: 11 “Ijiji nyipë Iehova* Akötresi hun troa kapa la lolo, me iatruny, me men, ke hnei nyipëti hna xupe la nöjei ewekë asë, nge hna xup asë hnene la aja i nyipë.”

5 Nge hnenge hna öhne ngöne la ime maca ne la Atre lapane la theron, la ketre tusi hna ewath, nge hna cinyihan ngöne la lue qenön,* nge hna acatrene hnyawa hnene la sevene lao ewekë nyine pelehatren. 2 Nge hnenge hna öhne la ketre angela ka catr, a kola qaja catrëne ka hape: “Drei la ka ijije troa fe la tus me aukene la hna pelehatren?” 3 Ngo pëkö ala cas e hnengödrai, maine e celë fen, maine fene la ihnadro ka ijije troa fe la tus hna ewath, me goeën la alien. 4 Ame hnenge hna treije catr, ke pëkö ala casi hna öhne ka ijije troa fe la tusi hna ewath, me goeëne la alien. 5 Ngo önine jë hi la ketre qatre koi ni ka hape: “Loi ju hë hna treij, ke hanawang la Liona ne la lapa i Iudra, lo iwaane i Dravita, ase hë nyidrëti hun ngöne la isi, matre ijiji nyidrëti troa fe la tusi hna ewath, me aukene lo sevene lao ewekë nyine pelehatren.”

6 Nge nyipine lai theron, me nyipine la foa lao angela, me nyipine la itre qatr, hnenge hna öhne la ketre neköi mamoe ka cil nge kösë hna humuth. Hetrenyi angeic la sevene lao jian, me sevene lao alamek, nge ame la itre alamek, itre ej a nyihatrene la sevene lao ua i Akötresie hna upe kowe la fen asë. 7 Ame hnene lai neköi mamoe hna tro kowe la Atre lapane la theron, me xome la tusi hna ewath ngöne la ime maca i angeic. 8 Nge ame ju hi la angeic a xome la tusi hna ewath, hnene la foa lao angela, memine lo 24 lao qatr hna thil qëmekene lai Neköi Mamoe, nge isa hetre arpe i angatr, me itre kape gool hna nyialien hnei itre ewekë nyine dreuth ka pui loi. (Ame la ka pui loi, tre kola nyihatrene la itre thithi ne la ange ka hmitrötr.) 9 Nge angatr a nyimane jë la ketre nyima ka hnyipixe me hape: “Ijiji nyipë troa xome la itusi hna ewath me aukene la hna pelehatren, ke hna humuthi nyipë, nge jëne la madra i nyipë, hnei nyipëti hna itöne la itre atr koi Akötresie qa ngöne la nöjei tribu, me nöjei qene hlapa, me nöjei hane ngönetrei, me nöjei nöj, 10 nge hnei nyipëti hna kuca matre baselaia pi angatr, me itretre huuj thatraqane la Akötresi së, nge tro hë angatr a itre joxu me musinëne la fen.”

11 Nge hnenge hna öhne me drenge la aqane ewekë ne la itre angela xötreithe la theron, me xötreithe la foa lao angela memine lo itre qatr, nge ame la etru i angatr tre, itre miriad* lao miriad, me itre thauzan lao thauzan. 12 Nge angatr a qaja catrëne jë ka hape: “Ijije tro la Neköi Mamoe a kapa la men, me trengamo, me inamacan, me catr, me iatruny, me lolo, me manathith.”

13 Ame hnenge hna drenge la nöjei hna xup e hnengödrai me e cailo fen, me fene la ihnadro, me hnine la hnagejë, nge nöjei ewekë ngön ej a qaja ka hape: “Epi tro la Atre lapane la theron memine la Neköi Mamoe a kapa la manathith, me iatruny, me lolo me men epin, epine palua.” 14 Nge önine jë hi la foa lao angela ka hape: “Amen!” nge itre qatre a sa iwatingöne ca ju, me nyihlu.

6 Ame hnenge hna öhne la Neköi Mamoe a aukene la pane ewekë ne lo seven lao nyine pelehatren, nge eni a drenge ju la ketre ne lo foa lao angela a kola ithanata kösë hedreng, öni angeic: “Trohemi!” 2 Nge eni pala kö a goeën, nge hanawang! la hos ka wië, nge ame la atre tith, angeic a nyinyape fë la tane pehna; ame hnei Akötresie hna hamë angeic la korona, nge angeic a tro pi troa ngaane la itre ithupëjia me angeic.

3 Nge ame ju hi la angeic a aukene la hnaaluene ewekë nyine pelehatren, drenge ju hi ni la hnaaluene angela, kola qaja ka hape: “Trohemi!” 4 Mama pi hi la ketre hos, nge ceitu me eë la hane i angeic. Hna aijijëne la atre tith troa xometrije la tingeting qa la fen, matre tro la itre atr a itö ihumuth. Nge hna hamë angeice fe la taua atraqatr.

5 Nge ame ju hi la angeic a aukene fe lo hnaakönine ewekë nyine pelehatren, drenge ju hi ni la hnaakönine angela, kola qaja ka hape: “Trohemi!” Nge hanawang, hnenge hna öhne la ketre hos ka wetrewetr, nge ame la atre tith, angeic a xometrongëne la itulu. 6 Ame hnenge hna drenge la ketre ewekë kösë aqane ithanata nyipine la foa lao angela, nge kola hape: “Ca drenari kowe la ca kilo bali, nge ca drenari kowe la köni kilo bali; ngo the kuca angazone kö la oel ne oliv me waina.”

7 Nge ame ju hi la angeic a aukene lo hnaafoan ewekë nyine pelehatren, drenge ju hi ni la hnaafoane angela, kola qaja ka hape: “Trohemi!” 8 Nge hanawang, öhne ju hi ni la ketre hos ka wië qatresi, nge Meci la ëjene la atre tith, nge Hua* a itrongëpi. Hna aijijë nyidro troa mus hune la ketre sin* ne la fen, matre ihumuth hnene la taua atraqatr, me jiin, me itre meci hna mecin, me jëne la itre öni ka ses e celë fen.

9 Nge ame la kola aukene lo hnaafaifine ewekë nyine pelehatren hnene lai Neköi Mamoe, öhne ju hi ni fene la ita ne huuj la madra* ne la itre hna humuth pine la trengewekë i Akötresie, me pine la huliwa ne cainöj hnei angatre hna majemine kuca. 10 Angatr a sue catre me hape: “Joxu ka Sisitria, ka hmitrötr me ka nyipici, uti hë eu la tro nyipëti a treqene troa amekötin, me të la madra hun kowe la itre ka lapane la fen?” 11 Ame hna isa hamë angatre la iheetre ka wië, nge hna upi angatr troa pane itreqe, uti hë pexeje pi la etrune la itre ka ce nyi hlu me angatr, me itre trejin me angatr, itre hna troa humuth tui angatr.

12 Nge ame la angeic a aukene lo hnaasikisin ewekë nyine pelehatren, öhne ju hi ni la kola traqa la ketre sa atraqatr, nge wetrewetre ju hi la jö kösë ibëek hna tith hnei ipenehe,* nge madra asë pi hi la treu, 13 nge mala pi hi la itre wëtresij qa hnengödrai kowe la fen, kösë iwacua hna jumejume hnei enyi ka catr, matre mala ija pi la itre wen. 14 Nge kola ewaewa la hnengödrai kösë tusi hna ewath, nge itre wetr me hnapet a isa feke göhnen. 15 Thupene lai, hnene la itre joxu ne fen, me itre trene mus, me itre tane sooc, me itre trenamo, me itre atre ka tru trengecatr, me nöjei hlu, me nöjei atr hna nue kö, hna zae hnine la itre ngönemenyi, me hnine la itre hnaop ne la itre wetr. 16 Nge angatre pala hi a qaja kowe la itre wetr me itre git ka hape: “Mala pi koi hun, nge juetrë huni ju matre tha öhnyi huni hnene la Atre lapane la theron, nge trianyi huni pi la elëhni ne la Neköi Mamoe, 17 ke traqa ha la drai ne elëhni i nyidro, nge drei la ka atreine cil?”

7 Thupene lai, hnenge hna goeëne la foa lao angela a cil ngöne la foa lao götrane ne la fen, angatr a isa cilaxome la foa lao enyi ka xulu qa ngöne la itre igötranene la fen, matre tha tro kö la ketre enyi a ufe la ihnadro, maine hnagejë, maine ketre sinöe pena. 2 Nge öhne ju hi ni la ketre angela kola elë qa ngöne la hna fetra hnei jö,* nge thei angeic la nyine pelehatren ne la Akötresie ka mel; nge angeic a hëne catrëne jë lo foa lao angela, itre hna aijijëne troa akötrëne la ihnadro me hnagejë, 3 me hape: “The pane akötrëne kö la ihnadro, me hnagejë, me itre sinöe, uti hë la eni a ase pelehatrene la itre göpadri ne la itre hlue ne la Akötresi së.”

4 Drenge ju hi ni la etrune la itre hna pelehatren, ala 144 000, itre hna pelehatren qa ngöne la nöjei lapa ne la itre nekö i Isaraela:

9 Nge thupene lai, hnenge hna goeëne la ka ala nyimu atraqatr, lo hna thatreine e, nge angatr a isa xulu qa ngöne la nöjei nöj, me nöjei tribu, me nöjei hane ngönetrei, me nöjei qene hlapa. Angatr a cile qëmekene la theron me qëmekene la Neköi Mamoe, nge angatr a heetrë iheetre ka qea ka wië, me cilaxome la itre dröne pama. 10 Nge angatre pala hi a suene ka hape: “Mele ju kö hun jëne la Akötresi hun, atre lapane la theron, me jëne la Neköi Mamoe.”

11 Nge kola cile xötreithe la theron hnene la nöjei angela, me itre qatr, memine lo foa lao angela, ame hnei angatr hna ce sa iwatingöne ca qëmekene la theron, me nyihlue i Akötresie, 12 me hape: “Amen! Nge loi e tro la Akötresi së a kapa la iatruny, me lolo, me inamacan, me ole, me metrötr, me mus, me men, epin, epine palua. Amen.”

13 Ame hnene la ketre qatre hna hnyingë ni ka hape: “Drei la itre ka heetrë iheetre ka qea ka wië, nge angatr a xulu qaa kaa?” 14 Canga sa jë hi ni ka hape: “Joxu, atre kö nyipë.” Öni nyidrëti jë hi: “Angatr a xulu qa ngöne la akötr atraqatr, nge hnei angatr hna wasine la itre iheetre i angatr, me awiën ngöne la madra ne la Neköi Mamoe. 15 Celë hi kepin matre angatr a cil qëmekene la therone i Akötresie, nge angatr a kuca la huliwa ka hmitrötr e lai me jidr hnine la uma ne hmi i nyidrë; nge ame lo Atre lapane la theron, nyidrëti a hnëkë itat koi angatr matre thupë angatr. 16 Tha tro hmaca kö angatr a pi xen me pi ij, nge tha tro hmaca kö a cinajönyi angatr, nge goi tha tro fe angatr a drenge la idreuth, 17 ke tro la Neköi Mamoe, lo ka cil nyipine la theron a thupë angatr, me troxomi angatr kowe la itre qeqe ne timi ne mel. Nge tro kö Akötresie a köletrije la nöjei trenge timidra qa ngöne la itre luemeke i angatr.”

8 Nge ame ju hi la nyidrë a aukene la hnaasevenene ewekë ka pelehatrene lai tus, pë ju hi mejen e hnengödrai koi sine la ca hawa. 2 Nge hnenge hna öhne la sevene lao angela a kola cile qëmeke i Akötresie, ame hna hamë angatre la sevene lao trutru.

3 Nge ame la ketre angela, angeic a traqa fë la ewekë nyine dreu ka pui loi, me cile ezine la ita ne huuj, nge hna hamën atrun koi angeic la itre ka pui loi, matre huujëne ngöne la ita ne huuj gool ka eje qëmekene la theron, lo hnë drenge la itre thithi ne la ange ka hmitrötr. 4 Ame hna elë jë koi Akötresie la so ne la ewekë ka pui loi hna dreuth hnene lo angela, hna ce elë memine la itre thithi ne la ange ka hmitrötr. 5 Ngo hnene la angela hna canga xome la ewekë nyine dreu ka pui loi, me nyialien hnene la eë ne la ita ne huuj, nge angeic a hna pi la eë kowe la fen. Ame hna mexeme la itre hedreng, me itre nine ithanata, me itre samek, me ketre sa. 6 Nge hnene lo sevene lao angela ka cilaxome lo sevene lao trutru, hna hnëkë troa uf.

7 Ame hna ufi trutru hnene la hnaapan. E cili, trotro pi hi la wene mani ka catr me eë hna nyinyikön hnei madra, nge hna trotro meköt kowe la ihnadro nge mele jë hi la sin* ne la ihnadro. Ame hna dreuth la sin* la itre sinöe, me manith asë la itre haö.

8 Ame hna ufi trutru hnene la hnaaluene angela, nge hna mala ngöne hnagejë la ketre ewekë kösë wetr atraqatr hna dreuth hnei eë. Nge saze pi hi la sin* la hnagejë troa nyi madra, 9 ame hna meci la sin* ne la itre öni* ne hnagejë, nge hna hane fe lö la sin* ne la itre he.

10 Ame hna ufi trutru hnene la hnaakönine angela, nge mala pi qaa hnengödrai la ketre wëtresij atraqatr ka mel kösë ukejina, ej a mala pi ngöne la sin* ne la itre hneopegejë, me hnine la itre qeqe ne tim. 11 Nge Hnitr Ka Haitr la ëje ne la wëtresije cili. Ame hna haitre pi la sin* ne la itre tim, matre ala nyimu la itre atr ka mec hnene la itre tim cili, ke aca tro haitre ju hi.

12 Ame hna ufi trutru hnene la hnaafoane angela, nge miti ju hi la sin* ne la jö, nge tune fe kowe la sin* ne la treu, me sin* ne la itre wëtresij. Hna traqa lai matre troa mit la sin* ne la itre ewekë cili, nge matre tha tro kö a lai ngöne la sin* ne la drai, me sin ne la jidr.

13 Ame hnenge hna öhne me dreng la ketre aeto ka sesë nyipine la hnengödrai, kola qaja catrëne ka hape: “Ekölö, ekölö, ekölö hi ni la itretre lapane la fen, pine la itre mejene trutru hna troa uf hnene la köni xa angela!”

9 Ame hna ufi trutru hnene la hnaafaifine angela, nge öhne ju hi ni la ketre wëtresij a mala qaa hnengödrai kowe la fen, nge hna hamëne kow la kii ne la hnaop ka jui nge ka thatrehmekun. 2 Nge hnei nyidrëti hna fe la ulane lai hnaop, ame hna mejë jë la so, kösë so ne eë atraqatr, nge miti ju hi la jö memine la eny hnei so. 3 Nge xulu pi hi la iume sipa qa hnine la so ne eë, nge angatr a haöthe la fen, nge hna hamë mene koi angatr, lo men hna hamëne fe kowe la itre sekopio ne ihnadro. 4 Hna wathebo angatr troa angazone la itre feja e cailo fen, nge goi tha tro fe a ketr la ketre iengen maine sinöe. Ngo tro hi a akötrëne la itre atr ka pë hatre i Akötresie hune la itre göpadri angatr.

5 Hna aijijëne la itre sipa troa akötrëne la itre atre cili koi faifi lao treu, ngo tha tro kö a hane humuthi angatr. Nge tro la akötr a tune la ka ithiny ne la sekopio. 6 Ngöne la ijine cili, tro la itre atr a thele mec, ngo tha tro kö angatr a öhn, nge tro angatr a ajane catrëne troa mec, ngo tro la mec a kötre angatr.

7 Nge ame la itre sipa, tre kösë itre hos ka hnëkë ne isi; nge angatr a petrëne la ketre ewekë kösë korona gool, nge ame la iqëmeke i angatr, tre kösë iqëmeke ne atr. 8 Ngo ame itre penehe i angatr, tre kösë ipenehe ne föe, nge itre inyö i angatr a tune la itre nyö ne liona. 9 Nge ame la itre imano i angatr, tre kösë fao nyine petrë imano, nge ame la meje ne la itre iape i angatr, tre kösë mejene la itre ikariota hna hule hnei hos troa isi. 10 Nge ame la itre pune i angatr, tre kösë ka ithinyi ne sekopio, nge ngöne la pune i angatr la men, lo men ka aijijë angatr troa akötrëne la itre atr koi faifi lao treu. 11 Hetre joxu i angatr, ene lo angela hna hamëne kow la kii ne la hnaop ka jui nge ka thatrehmekun. Nge ame la ëje i nyidrë qene Heberu, tre, Abadon,* nge qene Geres, Apoluon.*

12 Ase hë la pane hulö. Ngo hanawang! Lue hulö pala kö ka troa traqa thupene la itre ewekë cili.

13 Ame hna ufi trutru hnene la hnaasikisine angela, nge drenge ju hi ni la ketre aqane ewekë qa ngöne la itre jiane la ita ne huuje gool, lo ka cile qëmeke i Akötresie, 14 kola qaja kowe la hnaasikisine angela ka cile fë trutru ka hape: “Senge pi la foa lao angela hna oth ezine la hneopegejë Euferata.” 15 Ame hna nue pi la itre angela hna hnëkëne kowe la hawa, me drai, me treu, me macatre, matre humuthe la sin* ne la itre atr e cailo fen.

16 Nge drenge hë ni la etrune la itretre ti hos, ala lue miriad lao miriad.* 17 Hane hi la pengöne la itre hos me itretre tith, lo hnenge hna meköle goeën: “Angatr a heetrëne lo nyine petrë imano ka madra, me bulu, me hmedr.” Nge ame la iqëmeke ne la itre hos, tre tune la he ne la itre liona; nge kola tro pi qa ngöne la që i nyudren la eë, me so, me gaz. 18 Nge hna humuthe la sin* ne la itre atr hnene la köni hulö cili, ene la eë, me so, me gaz, ka tro pi qa ngöne la itre që i nyudren. 19 Ame la mene ne la itre hos, tre e hnine la itre që i nyudren, me ngöne la itre pune i nyudren. Ke ame la itre pune i nyudren, tre ceitu me un ka hetre hen, nge ka iakötrë.

20 Ngo ame la itre tha hna humuth hnene la köni hulö cili, tha ietrane kö angatr la itre huliwa ne la lue ime i angatr; nge tha mano kö angatr nyihluene la itre dremoni me itre idrola gool, me sileva, me kopa, me etë, me sinöe, ume ka thatreine goe, me dreng, me tro. 21 Nge goi tha ietrane fe angatr la itre aqane humu atr i angatr, me kuci haze, me kuci ngazo,* me atrekënö.

10 Nge öhne ju hi ni la ketre angela ka catr a uti qaa hnengödrai, ka heetrë* iaw nge lewen hune la he i nyidrë, nge kösë jö la ialameke i nyidrë, nge ceitu me lue ikapa eë la lue waca i nyidrë. 2 Nge ngöne la ime i nyidrë la ketre neköi tusi hna seluth. Nyidrëti a amë ju la waca maca i nyidrë ngöne la hnagejë, nge waca mi ngöne la ihnadro. 3 Nge nyidrëti a sue catre jë kösë liona a ho. Nge ame la nyidrëti a sue, mexeme jë hi la nin ne la sevene lao hedreng.

4 Thupene la kola ase ithanata hnene la sevene lao hedreng, eni lo a troa cinyiany, ngo drenge ju hi ni la kola ewekë qaa hnengödrai me hape: “Juetrëne ju la hna qaja hnene la sevene lao hedreng, nge the cinyianyine kö.” 5 Nge ame lo angela hnenge hna öhn, lo ka cil ngöne hnagejë me ihnadro, hnei nyidrë hna xejë draië la ime maca i nyidrë kowe la hnengödrai. 6 Nge ngöne la ëje ne la Atre mel epin, epine palua, lo atre xupe la hnengödrai me itre ewekë ngön ej, me atre xupe la ihnadro me itre ewekë ngön ej, me atre xupe la hnagejë me itre ewekë ngön ej, hnene lai angela hna sisinyi ka hape: “Ase hë la ijine itreqe.” 7 Matre ngöne la ijine troa ufi trutru hnene la hnaasevenene angela, tro ha eatre hnyawa lo ini ka hmitrötr nge hna juetrën, lo hnei Akötresie hna qaja kösë maca ka loi kowe la itre perofeta, itre hlue i nyidrë.

8 Nge drenge hmaca jë hi ni la kola ewekë koi ni qaa hnengödrai me hape: “Tro jë, nge xome jë la tusi hna seluth qa ngöne la ime ne la angela ka cil ngöne hnagejë me ihnadro.” 9 Matre eni a tro ju kowe lai angela, me sipone la neköi tus hna ewath. Öni nyidrë koi ni ka hape: “Xome jë nge xeni ju. Tro lai a haitre pun kowe la trengenane i eö, ngo tro pe a hnyapa kösë miel kowe la që i eö.” 10 Matre eni a xome ju la neköi tusi qa ngöne la ime ne lai angela me xen, nge hnine la qëng, kola hnyapa kösë miel, ngo ame ju hi la eni a ase xen, haitre pi hi la trengenaneng. 11 Öni angatre jë hi ka hape: “Qa i eö troa perofetane hmaca thatraqane la itre atr, me itre nöj, me itre qene hlapa, me itre joxu ka nyimutre.”

11 Ame hna hamë ni la hainy* kösë sine tö, nge kola ewekë koi ni me hape: “Mejë jë, nge tro jë troa tuluthe la uma ne hmi i Akötresie, memine la ita ne huuj, nge e jë la etrune la itre ka nyihlu e cili. 2 Ngo ame la götran gaa pë ihakun e tröne la uma ne hmi, nue pi, the tuluthe kö, ke hna hamëne kowe la itre atre ne fen, nge tro angatr a wajawaja la traon ka hmitrötr koi 42 lao treu. 3 Nge tro ni a kuca matre tro la lue perofetang a heetrë ibëek ka tru thenyin, me perofeta koi 1 260 lao drai.” 4 Nge kola nyihatre i nyidro hnene la lue isinö oliv, me lue tane laam ka cil qëmekene la Joxu ne la fen.

5 Nge maine ketre a thele troa akötrë nyidro, hetre eë ka tro qa ngöne la isa që i nyidro matre dreuthetrij la itre ithupëjia me nyidro. Nyipici, maine ketre a ajane troa akötrë nyidro, aqane tro lai a humuthi angeic. 6 Atreine hi nyidro thinge la hnengödrai matre tha tro kö a hane trotro la ketre wene mani ngöne la ijine nyidro a perofeta. Nge hna aijijë nyidroti fe troa musinëne la tim me saze ej troa nyi madra, me lepe la ihnadro hnene la nöjei pengöne hulö thenge la aja i nyidro.

7 Nge thupene la nyidro a ase cainöj, tro la öni ka ses, lo ka elë qa ngöne la hnaop ka jui nge ka thatrehmekun, a isi me nyidro, me ngaa nyidro, me humuthi nyidro. 8 Nge troa amë la lue ngönetrei i nyidro ngöne la gojenyi ka tru ne la traon ka tru, lo hna ati ëjen ka hape, Sodroma me Aigupito, e cili la hna jei faone la Joxu i nyidro. 9 Nge tro la itre atr ne la nöjei nöj, me tribu, me qene hlapa, me nöj, a goeëne la ngönetrei i nyidro koi köni drai nge sin, nge tro angatr a xel ma amë la lue ngönetrei i nyidro hnine hua. 10 Nge tro la itre atrene la fen a madrin me feetëne la meci nyidro, nge tro angatr a ihamënekeune la itre ahnahna, ke hnene la lue perofeta cili hna akötrëne la itre ka lapane la fen.

11 Thupene la köni drai nge sin, hnene la ua ne mel i Akötresie hna löthi nyidro, nge nyidroti a mejë jë, ame hna traqa la xou kowe la itre ka goeë nyidro. 12 Nge drenge ju hi nyidro la kola ewekë catre koi nyidro qaa hnengödrai me hape: “Elë jë kowe la.” Matre nyidroti a elë jë kowe la hnengödrai jëne la iaw, nge kola goeë* nyidro hnene lo itre ithupëjia me nyidro. 13 Nge ngöne la hawa cili, traqa pi hi la sa atraqatr, ame hna trotro lapa pi la sin ne la traon; nge ala 7 000 lao atr hna humuth hnene lai sa, nge kola ixouenyi la munën, ame hnei angatr hna thili ju kowe la Akötresie ne hnengödrai.

14 Ase hë la hnaaluene hulö. Ngo hanawang! Calemi catre hë la hnaakönin.

15 Nge hnene la hnaasevenene angela hna ufi trutru, nge kola drenge la kola ewekë catr qaa hnengödrai me hape: “Ame la baselaia ne la fen, tre Baselaia ha ne la Joxu së me Keriso i nyidrë, nge tro nyidrëti a joxu me mus epin, epine palua.”

16 Nge hnene la 24 lao qatr ka të hune la itre therone qëmeke i Akötresie, hna sa iwatingöne ca me nyihlue i nyidrë 17 me hape: “Eahuni a olene koi nyipë Iehova* Akötresie, ka Tru Trenge Men, nge ka ej, nge ka eje qaan ekö, ke hnei nyipëti hna huliwane la men atraqatre i nyipë, me nyiqaane mus tune la joxu. 18 Ngo hnene la itre nöj hna elëhni, ame hna xulu pi fe la elëhni i nyipë, nge traqa ha la ijine hna sa troa amekötine la itre ka mec, me amanathithine la itre perofeta, itre hlue i nyipë, me ange ka hmitrötr, me itretre xouene la ëje i nyipë, itre ka co me ka tru. Nge ijine tro fe nyipëti a të kowe la itre ka qanangazone* la ihnadro.”

19 Nge e hnengödrai, hna fe la uma ne hmi i Akötresie, nge mama pi hi e hnine la pua ne isisinyikeu i nyidrë. Nge mama pi fe la itre samek, nge mexeme jë hi la itre nine ithanata, me itre hedreng, me ketre sa, nge hlupi pi hi la wene mani ka catr.

12 Thupene lai, mama pi hi la ketre hatrene ka tru e hnengödrai: Hetre föe ka heetrë* jö, nge treu fene la lue ca i eahlo, nge ngöne la he i eahlo, la korona ka 12 lao wëtresij, 2 nge ka upune la föe, nge pine laka easenyi hë tro eahlo a hnaho, eahlo a sue me akötr.

3 Nge mama pi hi la ketre hatren e hnengödrai. Hanawang! La ketre drakona atraqatr ka palulu tune la eë, nge ka sevene lao he, nge treene lao jian, nge isa hetre korona ngöne la itre hen. 4 Nge ame la pune lai drakona, ej a hule trongëne la sine la itre wëtresij ne hnengödrai, me kuiën kowe la fen. Nge ame lai drakona, eje pala hi a cile qëmekene la föe ka troa hnaho, matre e hnaho pi la föe, tro ej a canga öni hatrëne la medreng.

5 Ame hnene la föe hna hnahone la ketre medreng, ketre trahmany, tro nyën a thupëne la nöjei nöj hnene la sine tö kopa. Nge hna xome* la nekö i eahlo koi Akötresie me kowe la therone i nyidrë. 6 Nge hnene la föe hna kötre kowe la hnapapa, ke hnei Akötresie hna hnëkëne la ketre göhnë e cili koi eahlo, nge tro ha thue a i eahlo e cili koi 1 260 lao drai.

7 Nge hna isi e hnengödrai: Hnei Mikaela* me itre angela i nyidrë hna isi memine la drakona, matre hnene la drakona me itre angela i angeic hna isi. 8 Ngo tha hune* kö angatr, matre pë hë göhnë i angatr e hnengödrai. 9 Qa ngöne lai, hna trije la drakona atraqatr, lo un ekö, lo hna hëne ka hape, Diabolo me Satana, atre amenune la fen asë. Hna ukapië angeic kowe la ihnadro; nge hna ce ukapië angeic me itre angela i angeic. 10 Nge drenge ju hi ni la kola ewekë catre qaa hnengödrai me hape:

“Enehila, traqa ha la iamele me men, me Baselaia ne la Akötresi së, me musi ne la Keriso i nyidrë, ke ase hë trije la atre nyizöne la itre trejin me eahun, lo ka nyizö angatr e lai me jidr, qëmekene la Akötresi së!” 11 Nge hnei angatr hna ngaa angeic jëne la madra ne la Neköi Mamoe, me jëne la maca hnei angatre hna cainöjën. Nge goi tha xou i angatre fe e thapa pi la mele* i angatr, ngacama kola qëmeke kowe la mec. 12 Haawe, madrine jë eö hnengödrai, me nyipunie itretre lapan, ngo ekölö hi ni la ihnadro me hnagejë, ke hna ukapië Diabolo koi nyipunie, nge atraqatr la trenge elëhni i angeic, ke hohopatre pe hi la ijine i angeic.”

13 Enehila, pine laka, öhne hë la drakona ka hape, hna triji angeic kowe la fen, angeic a axösisine la föe ka hnahone lo nekönatre trahmany. 14 Ngo hna hamëne kowe la föe la lue iape ne la aeto atraqatr, matre tro eahlo a kötr ananyine la un, me feke qa ngöne la hnapapa kowe la göhnë i eahlo, lo hnë thue a i eahlo koi ca ijin, me lue ijin, me sine la ca ijin.*

15 Ame hnene la un hna fe la që i angeic me hmitra tim hutrö i föe kösë hneopegejë, matre nunucile jë eahlo. 16 Eloine hi, hna xatuane la föe hnene la ihnadro, matre ej a fe pi la që ne ej, me ulume la hneopegejë hna hmitran qa ngöne la që i drakona. 17 Ame hna elëhni catre la drakona kowe la föe, matre angeic a tro ju troa isi memine la munëne la itre matra* i eahlo, itre ka trongëne la itre hna amekötin hnei Akötresie, nge hna ahnithe kow la huliwa ne anyipici Iesu.

13 Nge ej* a cile ju ngöne la hnangöni ezine la hnagejë.

Nge öhne ju hi ni la kola fetra qa hnine la hnagejë la ketre öni ka ses, ka treen lao jian me seven lao he. Ame hune la itre jian, treene lao korona, nge hune la itre he, itre ëj ka qaqa Akötresie.* 2 Nge ame la öni ka ses hnenge hna öhn, ceitu i angeic me leopar,* ngo ame pe la itre wacan, tre kösë waca ne bea, nge ame la që, ceitu me që ne liona. Nge hnene la drakona hna hamëne kowe la öni ka ses la menen ej, me theron ej, me musi atraqatr.

3 Nge öhne ju hi ni la ketre he i angeic kösë hna lepe humuth, ngo meu pi hi la eatr ka tru i angeic, ame hnene la fen asë hna xötrethenge me hain lai öni ka ses. 4 Nge hnei angatr hna thili kowe la drakona, ke hnen ej hna hamëne la mus kowe la öni ka ses, matre angatr a nyihluene jë la öni ka ses hnene la itre trengewekë celë me hape: “Drei la ka tune la öni ka ses? Nge drei la ka atreine cile kow?” 5 Nge hna hamë angeic la ketre që ka selëne la itre ewekë ka tru, me ka ijelë, nge hna aijiji angeic troa huliwa koi 42 lao treu. 6 Angeic a fe pi la që i angeic troa jelengazo Akötresie, me jelëne la ëje i nyidrë, me hnë lapa hnei nyidrë, nge goi jelengazone fe angeic la itretre lapane la hnengödrai. 7 Nge hna aijijë angeic troa isi me ngaane la ange ka hmitrötr. Nge hna nue angeice fe troa musi kowe la nöjei tribu, me atr, me qene hlapa, me nöj. 8 Nge tro la nöjei atr ka lapane la ihnadro a nyihlue i angeic. Ngo qaane lo kola ami trepene la fen, pëkö ca ëje i angatr hna cinyihan ngöne la tusi ne mel ne lo Neköi Mamoe hna huujën.

9 Haawe, loi e tro la ka trene hnangenyë a dreng. 10 Nge maine troa akalabusi ketre, tro angeic a tro koi kalabus. Nge ame la atre humuthi ketre hnei taua,* tro fe a hane humuthi angeic hnei taua. Qa ngöne lai, nyipiewekë kowe la ange ka hmitrötr troa cile hut, me lapaun.

11 Thupene lai, öhne ju hi ni la kola mejë qa ngöne la ihnadro la ketre öni ka ses ka lue jian kösë neköi mamoe, ngo ej a ithanata tune la drakona. 12 Nge qëmekene lo pane öni ka ses, ej a mus tune lo pane öni ka ses. Nge ej a ukune la ihnadro me itretre lapan troa nyihluene lo pane öni ka ses, lo öni laka, kösë meci hë ngo egöcatre hmaca ha. 13 Nge ej a kuca la itre ewekë ka tru nyine hain, nge goi autine fe ej la eë qa hnengödrai kowe la fen, qëmeke i nöjei atr.

14 Nge jëne la itre huliwa ka tru hna aijijë angeic troa kuca qëmekene lo pane öni ka ses, ej a amenune la itretre lapane la ihnadro; nge ej a upi angatr troa kuca la hnasaatr ne lo öni ka ses hna lep hnei taua, ngo ka mele kö. 15 Nge hna aijijë angeice fe troa hamë mano ne mel kowe la hnasaatr ne lai öni ka ses, matre tro la hnasaatr ne la öni ka ses a hane ithanata, me kuca matre humuth la itre ka xel ma thili kowe la hnasaatr ne la öni ka ses.

16 Nge ej a upe la itre atr—itre ka co me ka tru, itre trenamo me ka pë ewekë, itre hna nue kö me itre hlu—troa ati hatrene la ime maca i angatr, maine göpadri angatr, 17 ngo e pëkö hatren, thatreine kö tro ketre a itö maine salem. Nge ame la hatren tre, ëje ne la öni ka ses, maine numera ne la ëjen ej. 18 Nge enehila hi la ijine troa inamacan: loi e tro la ka inamacan a wangatrehmekune la numera ne la öni ka ses, ke numera ne atr, nge ame la numera cili, tre 666.

14 Thupene lai, öhne ju hi ni la Neköi Mamoe a kola cil ngöne la Wetre Ziona, ce nyidrë memine la ala 144 000, nge hna sija la ëje i nyidrë me ëje ne la keme i nyidrë hune la itre göpadri i angatr. 2 Nge drenge ju hi ni la ketre mejen qa hnengödrai, kösë mejene la itre tim ka emuemu, me kösë mejene la itre hedreng ka catr; nge ame la mejen hnenge hna dreng, tre kösë itre ka nyima me ka elo arp. 3 Nge kösë angatr a nyimane la ketre nyima ka hnyipixe qëmekene la theron, me qëmekene lo foa lao angela, me qëmekene la itre qatr. Nge pëkö ka atreine inine la nyima cili, ngo ala 144 000 hmekuje hi, itre hna itön qaa la fen. 4 Itre ka wië angatr, ke eje hi, tha hane kö angatr ce meköl me föe. Angatre la itre ka catre xötrethenge la Neköi Mamoe ngöne la nöjei jë i nyidrë. Angatre la itre hna itön thene la itre atr, kösë itre pane wen koi Akötresie me kowe la Neköi Mamoe. 5 Nge pëkö iaö hna öhn ngöne la itre që i angatr; pëkö engazo i angatr.

6 Nge öhne ju hi ni la ketre angela kola sesë nyipine la hnengödrai,* nge thei angeic la ketre maca ka loi nge ka epine palua, maca nyine tro fë kowe la itre ka lapa e celë fen, koi nöjei nöj, me nöjei tribu, me nöjei qene hlapa, me nöjei atr. 7 Angeic a qaja catrëne ka hape: “Xoue Akötresieti ju, nge atrunyi nyidrëti jë, ke tha hmitre kö matre traqa pi la drai ne iameköti i nyidrë. Haawe, nyihluene jë la Atre xupe la hnengödrai me ihnadro, me hnagejë, me itre qeqe ne tim.”

8 Nge ketre, hnene la hnaaluene angela hna ixötrethenge me hape: “Kei hë! Kei hë Babulona atraqatr, lo ka traimene la nöjei nöj hnene la waina ne la trenge pi kuci ngazo* i angeic!”

9 Nge hnene la hnaakönine angela hna xötrethenge nyidro, me qaja catrëne ka hape: “Maine tro ketre a nyihluene la öni ka ses, me hnasaatr, me kapa la hatren hune la göpadri i angeic, maine ime i angeic, 10 tro hë angeic a iji la waina ne elëhni i Akötresie, lo tha hna ithuenyikön, nge hna neng ngöne la kap ne la elëhni i Nyidrë. Nge tro ha angazo angeic hnei eë me gaz qëmekene la itre angela ka hmitrötr, me qëmekene la Neköi Mamoe. 11 Nge ame la so ne la akötre i angatr, tre kola elë epin, epine palua; nge pëkö mano e lai me jidr kowe la itre ka nyihluene la öni ka ses me hnasaatr, me itre ka kapa la hatren ne la ëjen ej. 12 Ngo ijine hi lai kowe la ange ka hmitrötr troa cile hut, itretre nyipiewekën la hna amekötin hnei Akötresie, me xölehuje la lapaune i Iesu.”

13 Nge drenge ju hi ni la kola ewekë qa hnengödrai me hape: “Cinyianyine ju: Qaane enehila, madrine la atre ka mec nge ka casi me Joxu. Nyipici, önine la ua ka hape, loi e tro angatr a pane mano pine la huliwa i angatr, ke ce* angatr me itre huliwa ka loi i angatr.”

14 Thupene lai, hnenge hna öhne la ketre iaw ka wië, nge ame la atre lapa hune la iaw, ceitu i nyidrë me nekö i atr, nge hetre korona gool ngöne la he i nyidrë, nge nyidrëti a xolouth ngöne la ime i nyidrë la ketre ifos.

15 Ame hna xulu pi la ketre angela qa hnine la uma ne hmi, nge angeic a sue kowe la atre lapa hune la iaw ka hape: “Fosine jë, nge menue jë, ke hawa ne menue hë, hmedre hë la ihnadro troa menu.” 16 Nge hnene la atre lapa hune la iaw hna hna la fos i angeic kowe la fen, matre hna menuëne asë la ihnadro.

17 Nge hnene la ketre angela hna xulu qa hnine la uma ne hmi e hnengödrai, nge angeice fe a xolouthe la ketre ifos ka idrei.

18 Nge hnene hmaca la ketre angela hna xulu qa hnine la ita ne huuj, nge angeic a musinëne la eë, angeic a sue jë kowe la angela ka cile fë ifos me hape: “Huliwane jë la ifos i eö matre menuëne la itre wene vin ne la ihnadro, ke hmedre hnyawa ha la itre fini wene vin.” 19 Ame hnene lai angela hna hna la fos i angeic kowe la fen, me xawane la itre fini wene vin, me kuiën hnine la hnë weje wene vin ne la elëhni i Akötresie. 20 Nge hna wajawaja la itre wene vin tröne la traon, nge madra la ka neni qa ngöne la hnë weje wene vin; nge hnene la madra hna elë kowe la itre që ne la itre hos, me haöthe la 296 kilomet.*

15 Nge hnenge hna öhn e hnengödrai la ketre hatren, ka tru nge ka mingöming, ene la sevene lao angela me sevene lao hulö. Celë hi itre hulö tixenuë, ke jëne lai, tro ha pexeje la elëhni i Akötresie.

2 Nge hnenge hna öhne la ketre ewekë kösë hnagejë thulu hna nyinyikön hnei eë, nge ame la itre ka ngaane la öni ka ses me hnasaatr, me numera ne la ëjen ej, angatr a cil ezine la hnagejë thulu, me cila xome la itre arp i Akötresie. 3 Angatr a nyimane la nyima i Mose, hlue i Akötresie, me nyima ne la Neköi Mamoe me hape:

“Draië me mingöminge la itre huliwa i nyipë, Iehova* Akötresie, Ka Tru Trenge Men, Meköt me nyipici la itre jë i nyipë, Joxu ka epine palua. 4 Iehova* fe, drei la ka tha xoue nyipë, me ka tha atrune la ëje i nyipë, ke nyipëti hmekuje hi la ka mele nyipici? Tro la nöjei nöj a traqa me nyihlu qëmeke i nyipë, ke tro ha mama la itre wathebo ka meköt i nyipë.”

5 Thupene lai, hnenge hna goeën, nge hna fe la götrane gaa hmitrötr ne la uma maano i Akötresie e hnengödrai, celë hi uma maano ka qatrenge la hna anyipicin hnei Akötresie. 6 Nge hnene la sevene lao angela hna tro qa ngöne la uma maano memine la sevene lao hulö, nge angatr a heetrë lino ka wië me ka hudrum, nge hna sil ngöne la imano i angatr la itre isoole gool. 7 Ame hnene la ketre ne lo foa lao angela hna hamën kowe la ala seven, la sevene lao kap gool, ka tiqa hnene la elëhni i Akötresie, Atre mel epin, epine palua. 8 Nge hna tiqa pi la uma maano hnei so ne eë pine la lolo i Akötresie me mene i nyidrë, nge pëkö ka atreine lö hnine la uma maano, uti hë ase pi la sevene lao hulö ne lo sevene lao angela.

16 Nge drenge ju hi ni la kola ewekë catr qa hnine la uma maano, kola qaja kowe la sevene lao angela ka hape: “Trojë, nge nenge pi kowe la ihnadro la sevene lao kap ne la elëhni i Akötresie.”

2 Hnene la hnapan hna tro me nenge la kape i angeic kowe la fen, nge mama pi hi la itre ixelek ka akötre catr, kola mama thene la itre atr ka kapa la hatren ne la öni ka ses, nge ka thil kowe la hnasaatr.

3 Nge hnene la hnaaluene hna nenge la kape i angeic kowe la hnagejë, nge madra pi hi ej kösë madra ne atr ka mec, ame hna meci asë la itre öni, eje hi, nöjei ewekë ngöne la hnagejë.

4 Nge hnene la hnaakönin hna nenge la kape i angeic kowe la hneopegejë me itre qeqe ne tim, ame hna saze pi troa nyi madra. 5 Nge drenge ju hi ni la angela hna acil hune la itre tim, kola qaja ka hape: “Nyipë Atre ka ej, nge ka eje qaane ekö, Atre ka mele nyipici, ka meköti nyipë, ke hnei nyipëti hna amekötine lai, 6 hnei angatre hna anenine la madra ne la ange ka hmitrötr me itre perofeta, nge nyipëti a thue ime i angatre madra, nge pune kö lai koi angatr.” 7 Nge drenge ju hi ni la ita ne huuj a kola qaja ka hape: “Nyipici Iehova* Akötresie, Atre ka Tru Trenge Men, nyipici me meköt la aqane iameköti* i nyipë.”

8 Nge hnene la hnaafoan hna nenge la kape i angeic kowe la jö, ame hna nue la jö troa dreuthe la itre atr hnene la ecatren ej. 9 Nge hna dreuthe la itre atr hnene la ecatrene la jö, ngo hnei angatre kö hna jelengazone la ëje i Akötresie, atre mus kowe la itre hulö cili, nge tha ietra kö angatr me atrunyi nyidrë.

10 Nge hnene la hnaafaifin hna nenge la kape i angeic kowe la theron ne la öni ka ses, ame hna jidri pi la baselaia ne ej, nge itre atr a nyiqaane getre thinem hnei akötr, 11 ngo hnei angatre hna jelengazone la Akötresie ne hnengödrai pine la itre akötr me ixeleke i angatr, nge tha ietrane kö angatr la itre huliwa i angatr.

12 Nge hnene la hnaasikisin hna nenge la kape i angeic kowe la hneopegejë ka tru ne Euferata, ame hna pë tim, matre nyi gojenyine la itre joxu ka xulu qa ngöne la hna fetra hnei jö.*

13 Nge hnenge hna öhne la köni trengewekë ka ngazo qaathene la itre u, kösë itre gerenui, kola isa sesë qa ngöne la që ne la drakona, me qa ngöne la që ne la öni ka ses, me qa ngöne la që ne la perofeta thoi. 14 Itre trengewekë ne dremoni lai, nge angatr a kuci iamamanyikeu, me tro kowe la nöjei joxu ne fen, matre acasi angatr kowe la isi ne la drai ka tru i Akötresie, ka Tru Trenge Men.

15 “Hanawang! Eni a traqa kösë atrekënö. Haawe, manathithi la atre ka catre hmek, nge ka heetrëne la iheetre ka qea i angeic, matre tha tro kö angeic a tro xöe, nge tha tro kö la itre atr a öhne la hmahma i angeic.”

16 Nge hnene la itre trengewekë ne la itre u, hna acasi angatr kowe la götran hna hën qene Heberu ka hape, Amagedro.*

17 Nge hnene la hnaasevenen hna nenge la kape i angeic kowe la eny, ame hna drenge la kola ithanata qa hnine la uma maano ngöne la theron, kola hape: “Eje hë lai!” 18 Nge mama pi la itre samek, nge mexeme ju hi la itre aqane ithanata me itre hedreng, ame hna traqa la ketre sa atraqatr, lo tha hna traqa kö tun qa ngöne lo kola lapane la fen hnei itre atr, nyipici, tha ewekë ka co kö la sa cili. 19 Hna thawa könine la traon ka tru, nge hna kei la itre traon ne la itre nöj; ame hnei Akötresie hna mekune hmaca lo Babulona Atraqatr, matre hamë eahlo la kapë waina ne la elëhni ka tru i nyidrë. 20 Ame hna kötre pi la nöjei hnapet, me patre la itre wetr. 21 Thupene lai, hna trotro pi la wene mani ka catr, nge atraqatre pi hë la itre wene mani, ca talan* la ehacen, kola mala qa hnengödrai me trane la itre atr, nge angatr a jelengazo Akötresieti jë pine la wene mani ka catr, ke catrehnine pala ha la hulö cili.

17 Hnene la ketre ne lo sevene lao angela ka xome la sevene lao kap, hna traqa koi ni me hape: “Trohemi, nge tro ni a amamai eö la hna amekötin kowe la föe ne gojeny ka hlemu catr, lo ka lapa hune la itre tim ka nyimutre, 2 me ka kuci ngazo memine la itre joxu ne fen. Nge itre atrene la fen a hmo hnene la waina ne kuci ngazo* i angeic.”

3 Nge hnene la angela hna xomi ni kowe la hnapapa jëne la mene ne la ua. Ame hnenge hna öhne la föe a kola të hune la öni ka ses ka madra palulu, nge ka tiqa hnei itre ëje ka qaqa Akötresie, nge ka sevene lao he me treene lao jian. 4 Nge ame lai föe, angeic a heetrëne la iheetr ka maea ngön nge ka madra palulu, nge hna thaipin hnei gool me itre etë mo ka tru thupen, me penina. Nge angeic a lapa xome la ketre kap gool hna nyialien hnei itre ewekë ka sis, me itre ewekë ka pi ne la kuci ngazo* i angeic. 5 Nge hune la göpadri i angeic, hna cinyihane la ketre ëj hna thatreine trotrohnin: “Babulona Atraqatr thine ne la nöjei föe ne gojeny me itre ewekë ka sis ne la fen.” 6 Ngo öhne ju hi ni laka, kola hnaitö la föe hnene la madra i ange ka hmitrötr, me madra ne la itretre anyipici Iesu.

Matre sesëkötre ju hi ni la eni a goeë angeic. 7 Önine lai angela koi ni ka hape: “Hnauëne la eö a sesëkötr? Tro ni a qejepengöne koi eö la hna thatreine trotrohnin göne lai föe, me öni ka ses hna tith, lo öni ka sevene lao he, me treene lao jian: 8 Ame lo lai öni hnei eö hna goeën, ka mel eje lo, nge patre hë enehila, ngo easenyi hë matre fetra hmaca pi ej qa ngöne la hnaop ka jui nge ka thatrehmekun, nge tro ej a tro matre lep apatren ej. Nge tro la itre atrene la fen—itre ka pë ëjen hna cinyihan ngöne la tusi hna ewath, lo tusi ne mel hna kuca qaane lo kola ami trepene la fen—a hain troa goeëne la öni ka ses ka mel ekö, nge ka patr enehila, nge ka troa mele hmaca.

9 “Nge enehila la ijine troa inamacan: Ame la sevene lao he, tre sevene lao wetr hna lapa hune hnene lai föe. 10 Kola qaja la sevene lao joxu: Kei hë la ala faif, nge kola mus hnei ketre, nge tha mejë pala kö la ketre; ngo e mejë hë angeic, tha tro kö angeic a cil aqeany. 11 Nge ame lo öni ka ses, ka mel ekö me patr enehila, kolo hi a nyihatrene la hnaaeitrene joxu, ngo angeic a xulu qaathene lo ala seven, nge tro angeic a tro, matre lep apatrenyi angeic.

12 “Nge ame la treene lao jian hnei eö hna goeën, kola nyihatrene la treene lao joxu ka pë pala kö baselaian, ngo troa aijijë angatr troa ce mus memine la öni ka ses koi ca hawa. 13 Casi hi la mekuna i angatr, matre angatr a nue la mus me mene i angatr kowe la öni ka ses. 14 Nge tro angatr a isi memine la Neköi Mamoe, ngo pine laka, nyidrëti la Tane la itre ka mus, me Joxu ne la itre joxu, tro la Neköi Mamoe a ngaa angatr. Nge tro fe la itre ka ce me nyidrë a huun ngöne la isi, lo itre hna hën me iën, itre ka mele nyipici.”

15 Önine hmaca lai angela koi ni ka hape: “Ame la itre tim hnei eö hna goeën, lo hna lapa hun hnene la föe ne gojeny, kola nyihatrene la nöjei atr, me nöjei nöj, me nöjei qene hlapa. 16 Nge ame lo treene lao jian memine la öni ka ses hnei eö hna goeën, tro angatr a methinëne la föe ne gojeny, me thapa la nöjei ewekë i angeic, matre cile xöe pi angeic. Thupene lai, tro angatr a öni la itre ijöne i angeic me dreuthetriji angeic. 17 Ke tro Akötresie a amë hnine la itre hni angatr la aja troa sajuëne la mekuna i nyidrë, nyipici, troa eatrëne la mekune ka cas i angatr, ene la troa nue la mus i angatr kowe la öni ka ses, uti hë la ijine troa eatre hnyawa la itre trengewekë i Akötresie. 18 Nge ame la föe hnei eö hna goeën, angeic a nyihatrene la traon atraqatr, lo ka musi kowe la itre joxu ne fen.”

18 Thupene lai, hnenge hna öhne la ketre angela a kola uti qaa hnengödrai memine la mus atraqatr, nge hna alaine la fen hnene la lolo i nyidrë. 2 Nge nyidrëti a sue catre jë me hape: “Kei hë angeic! Kei hë Babulona atraqatr, nge angeic a nyi zine la itre dremoni, me zine la itre u ka ngazo,* me nöjei waco ka sis nge hna methinën! 3 Ke hnene la waina ne la trenge pi kuci ngazo i angeic, matre tha i angeic la nöjei nöj, nge itre joxu ne fen a ce kuci ngazo* me angeic, nge itre ka salem* ngöne la fen a trenamo, jëne la emenene la itre trengamo nyine hmahmane i angeic.”

4 Nge hnenge hna drenge la ketre aqane ewekë qaa hnengödrai, kola hape: “Lö triji angeice pi nöjeng, matre tha tro kö nyipunie a hane sine la itre huliwa ka ngazo i angeic, me ce xeni pune me angeic la hulö ka troa lepi angeic. 5 Ke ase hë xawane la itre ngazo i angeic, nge elë hë uti hë hnengödrai, nge hnei Akötresie hna mekune hmaca la itre aqane huliwa i angeic ka tha meköti* kö. 6 Të jë koi angeic thenge la aqane ujë i angeic koi itre xan, nyipici, alua të jë koi angeic pine la itre huliwa i angeic; nge hnine la kap hnei angeic hna hnëkë nyine ij, alua hnëkëne jë la etrune la hnei angeic hna kuca. 7 Hnei angeic hna selën atrunyi angeic, me mel nyipine la itre mo nyine hmahman, matre tro fe a të atrune koi angeic la akötr me treij. Ke hnei angeic hna majemine qaja ngöne la hni angeic ka hape: ‘Eni a lapa tune la isola, nge tha sine föe kö ni, nge tha tro kö ni a hane atre la imecitrij.’ 8 Celë hi kepin matre, troa aca tro traqa ngöne la ca drai la itre hulö i angeic, ene la mec, nge tro ha mecitriji angeic, nge tro angeic a mecijiin, nge troa dreuth apatrenyi angeic hnei eë, ke ka men Iehova* Akötresie, atre nyithupene koi angeic.

9 “Nge ame la itre joxu ne fen ka kuci ngazo* me angeic, me ce mel me angeic nyipine la itre mo nyine hmahman, tro angatr a lepelepe imano me treije latresi pi angeic, ke angatr a goeëne la so ne eë ka dreuthi angeic. 10 Nge tro angatr a cil ananyin ke xou i angatre la itre hulö ka traqa koi angeic, nge tro angatr a qaja ka hape: ‘Ekölö, ekölö eö traon atraqatr, eö Babulona traon ka catr, ke ngöne la ca hawa, traqa ha la iameköti koi eö!’

11 “Nge itre ka salem e cailo fen a treije me latresi pi angeic, ke pë hë ka itöne la itre ewekë i angatr, 12 ene la gool, me sileva, me itre etë mo, me penina, me lino ka lolo, me itre iheetr ka maea ngön, me asoa, me itre iheetr ka madra palulu, me nöjei ewekë hna tratrau hnei sinöe ka pui lolo, me nöjei ewekë hna kuca hnene la itre jiane elefa, me nöjei sinöe ka tru thupen, me kopa, me fao, me etë ka mingöming; 13 me kinamo, me itre paudra qaa Ëëd, me sinöe ka pui lolo, me oel ka pui lolo, me libanu, me waina, me oel ne oliv, me farin ka lolo, me qitr, me kau, me mamoe, me hos, me ikatr, me hlu, me mele* ne la itre atr. 14 Nyipici, kötre hë qaathei eö lo itre ewekë ka mingöming* hnei eö* hna ajan, nge ame la nöjei xeni ka lolo, me nöjei ewekë ka mingöming, patre hë qaathei eö, nge tha tro hmaca kö a öhn.

15 “Tro la itre ka salemëne la itre ewekë cili, itre hna atrenamon hnei angeic, a cil ananyi angeic, ke angatr a xouene la itre hulö ka traqa koi angeic, nge tro angatr a treij me latresi, 16 me hape: ‘Ekölö, ekölö la traon atraqatr, lo ka heetrë lino ka mingöming, ka maea ngön nge ka madra palulu, lo hna thaipin tune la itre trenamo hnei gool me itre etë mo, me penina. 17 Ngöne hi la ca hawa hna lep apatrene la itre mo ka tru cili!’

“Nge kola cil ananyi angeic hnene la itre ka xomiuji he, me nöjei atre ka ea qa ngöne la ketre götran kowe la ketre, me itre ka huliwa ngöne he, me nöjei atr ka mel hnei hnagejë, 18 nge ame ju hi la angatr a goeëne la so ne eë ka apatrenyi angeic, angatr a suene jë me hape: ‘Nemene traon la ka ceitu memine la traon atraqatr?’ 19 Angatr a sië hnatresijine ju la itre he i angatr, me treije latresi, me suene ka hape: ‘Ekölö, ekölö la traon atraqatr, lo ka atrenamone la nöjei atr ka trene he hnene la itre trengamo i angeic! Hna apatrenyi angeic ngöne hi la ca hawa!’

20 “Haawe, hnengödrai fe, madrine jë la ewekë ka traqa koi angeic, me nyipunie ange ka hmitrötr, me itre aposetolo, me itre perofeta, ke ase hë Akötresie ameköti angeice pi nyipunie!”

21 Ame hna mama pi la ketre angela, nge angeic a kapa ju la ketre etë ka tru, kösë etë ne amudromudron, nge angeic a hnatrije pi kowe la hnagejë me hape: “Celë hi aqane troa aca tro kuië Babulona kowe la hnagejë, ene lo traon atraqatr. Nge tha tro hmaca kö a hane öhnyi angeic. 22 Nge tha tro hmaca kö a hane drenge thei eö la nyima ne la itre ka nyima fë arp, me itre ka elo miuzik, me itre ka ufe la itre trutru ka tru, me itre trutru ka co. Nge goi tha tro fe a hane öhne hmaca thei eö la itre ka kuca la nöjei pengöne huliwa, nge tha tro hmaca kö a drenge la mejene etë nyine amudromudron. 23 Nge tha tro hmaca kö a mel la laame thei eö, nge tha tro hmaca kö a drenge thei eö la aqane ithanata ne la trahmanyi me föe ka xötrei faipoipo, ke ame lo itre ka salem thei eö, tre itre ka hlemu ngöne la fen, nge hnene la itre aqane kuci iöni eö, ame hnei eö hna amenune la fen asë. 24 Nyipici, hna öhne thei angeic la madra ne la itre perofeta, me ange ka hmitrötr, me nöjei hna humuth e cailo fen.”

19 Thupene lai, drenge ju hi ni la ketre mejen, kösë aqane ewekë ne la ka ala nyim e hnengödrai, angatr a hape: “Atrunyi Ia* jë! Thene la Akötresi së la iamele, me lolo, me men, 2 ke nyipici me meköt la iameköti i nyidrë. Hnei nyidrëti hna amekötine la föe ne gojenyi ka hlemu, atre amenune la fen hnene la aqane kuci ngazo* i angeic, nge ase hë nyidrëti të koi angeic, pine la madra ne la itre hlue i nyidrë, madra ka ej ngöne* la lue ime i angeic.” 3 Nge thupene ju hi lai, önine hmaca jë hi la ka ala nyimu ka hape: “Atrunyi Ia jë! Ke kolo pala hi a elë la so ne eë ka apatrene lo traon, ej a elë epin, epine palua.”

4 Ame hnene la 24 lao qatr memine lo foa lao angela, hna thil me nyihlue i Akötresie, atre lapane la theron. Öni angatr: “Amen! Atrunyi Ia jë!”

5 Nge önine fe la ketre aqane ewekë qaa hnine la therone ka hape: “Loi e troa atrune la Akötresi së, nyipunieti asë itre hlue i nyidrë, itretre xoue nyidrë, itre ka co me ka tru.”

6 Nge eni a drenge ju la ketre mejen, kösë aqane ewekë ne la ka ala nyim, me kösë mejene itre tim, me mejene itre hedrenge ka catr. Öni angatr: “Atrunyi Ia jë, ke tune la joxu, musi hë Iehova* Akötresi së Ka Tru Trenge Men! 7 Loi e tro sa madrin, me madrin atraqatr, me atrunyi nyidrë, ke ijine tro ha faipoipo la Neköi Mamoe, nge hnëkë hë la jajiny kowe la faipoipo. 8 Eje hi, hna aijijëne lai jajiny troa heetrë nyipi lino ka melemel, nge ka pë ethan—ke ame la nyipi lino, kola nyihatrene la itre huliwa ka meköt i ange ka hmitrötr.”

9 Nge önine la angela koi ni ka hape: “Cinyianyine ju: Madrine la itre hna hëne kowe la nyikein ne faipoipo ne la Neköi Mamoe.” Nge öni angeic hmaca jë: “Sipu trengewekë i Akötresieti lai.” 10 Ame hnenge hna thili ju kowe la lue ca i angeic matre nyihluen, ngo öni angeice koi ni: “Eö a u? The tune kö lai! Ketre hlue hi ni tui eö, me tune la itre trejin me eö, itre hna ahnithe kow la huliwa ne anyipici Iesu. Nyihlue i Akötresieti jë pe! Ke ame la hna anyipicin göi Iesu, celë hi alien la itre hna perofetan.”

11 Nge öhne ju hi ni la kola fe la hnengödrai, nge hanawang! mama pi hi la ketre hos ka wië. Nge ame la ëje ne la atre tith tre, Mele Nyipici me Nyipici. Nyidrëti a iameköti, me isi thenge la meköt. 12 Nge ukahlokine eë la lue meke i nyidrë, nge nyimu korona hune la he i nyidrë. Nge hna cinyianyine la ketre ëj hui nyidrë, nge pëkö ka atreine trotrohnin, ngo nyidrëti hmekuje hi. 13 Nge nyidrë a heetrëne la ketre iheetre ka qea nge ka si* madra. Nge hna hë nyidrë ka hape, Trengewekë i Akötresie. 14 Nge kola xötrethenge nyidrë hnene la itre trongene isi ne hnengödrai hune la itre hos ka wië. Nge angatr a heetrë nyipi lino ka wië me ka pë ethan. 15 Nge kola tro qa ngöne la që i nyidrë la ketre taua ka tru hna xöle hnyawa, matre lepe la itre nöj. Nge tro nyidrëti a elemekene la itre nöj memine la sine tö fao, nge nyidrëti fe la atre wajawaja la itre wene vin hnine la hnë weje wene vin ne la elëhni i Akötresie, Ka Tru Trenge Men. 16 Nge hune la iheetre ka qea i nyidrë, nyipici, hmekune la itrepë i nyidrë, hetre ëj hna cinyihan ka hape, Tane la itre ka mus, nge Joxu ne la itre joxu.

17 Nge öhne ju hi ni la ketre angela a cil ngöne la jö, kola sue catre koi itre waco ka sesë e nyipine la hnengödrai* ka hape: “Trohemi, nge casi jë kowe la nyikein atraqatr i Akötresie. 18 Tro hë nyipunie a öni la ijön ne la itre joxu, me ijön ne la itre tane sooc, me ijön ne la itre atr ka catr, me ijön ne la itre hos, me ijön ne la itretre tith, me ijön ne la nöjei atr, me ijön ne la itre atr hna nue kö me itre hlu, itre ka co me itre ka tru.”

19 Nge öhne ju hi ni la öni ka ses me itre joxu ne fen, nge kola cas la itre trongene isi i angatr troa isi memine la atre ti hos, me trongene isi i nyidrë. 20 Ame hna xolouthe la öni ka ses me itre perofeta thoi, itre ka kuca la itre ewekë nyine hain qëmekene la öni ka ses, itre ewekë ka amenune la itretre kapa lo hatren ne la öni ka ses, me amenune la itretre nyihluene lo hnasaatr ne lai öni ka ses. Hna ce kuiën amele nyidro kowe la hneopegejë eë me gaz. 21 Ngo ame pë hë la munën, hna humuthi angatr hnene la taua ka tro qa ngöne la që ne la atre ti hos. Nge itre waco asë a ce öni la itre ijöne i angatr.

20 Nge öhne ju hi ni la ketre angela a kola uti fë qaa hnengödrai la kii ne la hnaop ka jui nge ka thatrehmekun, memine la ketre cein atraqatr ngöne la ime i nyidrë. 2 Nge hnene lai angela hna xolouthe la drakona, lo une hnapan, ene Diabolo nge Satana, me ceinë angeic koi 1 000 lao macatre. 3 Nge nyidrëti a kuië angeice pi kowe la hnaop ka jui nge ka thatrehmekun, me thing me kiin, matre tha tro hmaca kö angeic a amenune la itre nöj, e tha pane ase kö la 1 000 lao macatre. Thupene lai, tro ha nue angeic hmaca koi ca hnepe ijin.

4 Nge hnenge fe hna öhne la itre theron me itretre lapan, itre hna aijijëne troa iameköti. Nyipici, hnenge hna öhne la madra* ne la itre hna humuth* pine anyipici Iesu, nge pine qeje Akötresie, me madra ne la itre ka tha hane kö nyihluene la öni ka ses, maine hnasaatr ne la öni ka ses, me itre ka tha kapa lo hatren ngöne la itre göpadri me ime i angatr. Tro ha amele angatre hmaca, nge tro hë angatr a ce musi me Keriso koi 1 000 lao macatre. 5 (Nge ame la munëne la itre ka mec, tha hna amele angatre kö qëmekene troa nyipune la 1 000 lao macatre.) Celë hi pane mele hmaca. 6 Ka manathith me hmitrötr la itre ka sine la pane mele hmaca: pëkö emenene la hnaaluene mec koi angatr, ngo tro pe angatr a itre atre huuje i Akötresie me Keriso, nge tro angatr a ce musi me Keriso koi 1 000 lao macatre.

7 Ngo ame ju hi la kola ase la 1 000 lao macatre, tro ha nue Satana qa ngöne la kalabus i angeic. 8 Nge tro angeic a tro troa amenune la itre nöj ngöne la foa lao götrane la fen, Gog me Magog, matre acasi angatr kowe la isi. Nge ame la etru i angatr, tre tune la itre wene ngöni. 9 Nge angatr a haöthe la fen me cile xötreithe la itre atr ka hmitrötr, memine la traon hna hnim. Ngo mala pi hi la eë qaa hnengödrai, ame hna dreuth apatrenyi angatr. 10 Nge ame Diabolo, atre amenu angatr, hna kuië angeic kowe la hneopegejë eë me gaz, götran hna kuiëne fe la öni ka ses me perofeta thoi; nge e cili, tro ha umë angatr e lai me jidr, epin, epine palua.

11 Nge öhne hë ni la ketre theron atraqatr ka wië, memine la atre lapan. Nge qëmeke i nyidrë, hna kötre la ihnadro me hnengödrai, nge pëkö göhnë i nyidro. 12 Nge hnenge hna öhne la itre ka mec, itre ka tru me ka co, angatr a cil qëmekene la theron, nge hna fe la itre tusi hna ewath, ngo fe pi hi la ketre, ene lo tusi ne mel. Hna amekötine la itre ka mec qa ngöne la hna cinyihan ngöne la itre tus, thenge la isa huliwa i angatr. 13 Nge hnene la hnagejë hna hamëne la itre ka mec thei angeic, nge hnei mec me Hua* hna nue la itre ka mec thei nyidro, nge hna isa ameköti angatr thenge la isa huliwa i angatr. 14 Ame hna kuiëne la mec me Hua* hnine la hneopegejë eë. Kola nyihatrene la hnaaluene mec hnene la hneopegejë eë. 15 Nge ame la nöjei atr ka pë ëjen hnine la tusi ne mel, hna kuië angatre fe hnine la hneopegejë eë.

21 Nge hnenge hna öhne la hnengödrai ka hnyipixe me fene ka hnyipixe; ke patre hë lo hnengödrai me fene hnapan, nge patre fe hë la hnagejë. 2 Nge hnenge fe hna öhne la traone ka hmitrötr, ene la Ierusalema Ka Hnyipixe, kola uti qaa hnengödrai thei Akötresie, nge hna hnëkën kösë jajinyi ka troa faipoipo kowe la föi angeic. 3 Ame hnenge hna drenge la kola ithanata catr qa ngöne la theron me hape: “Hanawang! thene la itre atr la uma maano i Akötresie, nge tro nyidrëti a lapa me angatr, nge tro angatr a nöje i nyidrë. Nge tro Akötresieti a ce me angatr. 4 Nge tro nyidrëti a köletrije la itre trenge timidra qa ngöne la itre lue meke i angatr, nge pë hmaca kö mec, me hleuhleu, me treij, me akötr. Patre hë lo itre ewekë hnapan.”

5 Nge önine la atre lapane la theron ka hape: “Hanawang! Eni a ahnyipixene la nöjei ewekë asë.” Öni nyidrëti hmaca jë: “Cinyianyine ju, ke nyine mejiune kow, nge ka nyipici la itre trengewekë celë.” 6 Nge öni nyidrëti fe koi ni ka hape: “Eatre hë itre ej! Eni la A me Z, nge qaane me pun. Matre ame kowe la atre pi ij, tro ni a ithueimene la tim ka pë thupen, lo tim hna jöe ngöne la qeqe ne timi ne mel. 7 Nge ame la atre ka huun ngöne la isi, tro ha edrö i angeice la itre ewekë cili, nge tro ni a Akötresi angeic, nge tro angeic a neköng. 8 Ngo ame kowe la itre ka cilehnö me itre ka pë lapaun, me itre ka dro me ka kuci ewekë ka sis, me itre ka ihumuth, me itre ka kuci ngazo,* me itre ka kuci haze, me itre ka thili koi idrola, me nöjei atr ka thoi, tro ha edrö i angatre la hneopegejë eë me gaz. Celë hi hnaaluene mec.”

9 Ame hnene la ketre angela qa ngöne lo ala seven, lo itre ka cilaxome la sevene lao kap hna atiqan hnene la sevene lao hulö tixenuë, hna traqa koi ni me hape: “Jë fe, nge tro ni a amamai eö la jajiny ka troa faipoipo, föe ne la Neköi Mamoe.” 10 Angeic a xomi ni jë jëne la mene ne la ua, me tro sai ni kowe la ketre wetr atraqatr ka draië, nge angeic a amamai ni ju la Ierusalema, traon ka hmitrötr a kola uti qaa hnengödrai thei Akötresie. 11 Nge thei Ierusalema la lolo i Akötresie. Ame la ehudrumen ej, tre kösë itre etë mo ka tru thupen, kösë iasepi ka lualai tune la kristal. 12 Nge hetre ihag atraqatr nge ka draië, kola e la 12 lao qëhnelö me 12 lao angela ka thupën, nge ngöne la itre qëhnelö, hna sija la ëje ne la 12 lao lapa ne la itre nekö i Isaraela. 13 Ngöne la götrane koië, hetrenyi la köni qëhnelö, nge könitre e kolopi, nge könitre e kolojë, nge könitre e kuë. 14 Nge hetrenyi fe la 12 lao trepen la ihag, nge hun itre ej, hna sija la 12 lao ëje ne la 12 lao aposetolo ne la Neköi Mamoe.

15 Ame la ka ithanata koi ni, angeic a xolouthe la ketre hainy gool nyine tuluthe la traon, me itre qëhnelö, me ihag. 16 Nge ceitune la traon me ketre kare, matre ceitu hi la eqeane me eisaisane la traon. Angeic a xome jë la hainy me e la tulu ne la traon, traqa koi 2 220 kilomet;* nge ceitune hi la eqean, me eisaisan, me edraiën. 17 Angeic a xome jë la tulu ne la hag, nge traqa koi 144 kubit* thenge la aqane tulu ewekë i atr. Nge kolo fe hi a xomi tulu hnene la ketre angela. 18 Ame la ihag, hna xupe hnei iasepi, nge ame la traon, hna xup ej hnei nyipi gool ka lualai tune la ver. 19 Hna amingömingöne la itre trepene la traon hnene la nöjei pengöne etë mo: ame la hnaapan, hna kuca hnei iasepi, hnaaluen, safairo, hnaakönin, kalekedoni, hnaafoan, semerado, 20 hnaafaifin, sadonuki, hnaasikisin, sadaio, hnaasevenen, kerusolit, hnaaeitren, berulo, hnaanaenen, topazio, hnaatrenen, kerusopala, hnaalevinen, uakini, nge hnaatruelofen, amethusa. 21 Ketre, ame la 12 lao qëhnelö, tre 12 lao penina; hna kuca la itre qëhnelö hnei isa ca penina. Nge ame la gojenyi ka tru ne la traon, tre nyipi gool kösë ver ka lualai.

22 Ngo tha öhne kö ni la ketre uma ne hmi hnine la traon, ke Iehova* Akötresie, Atre ka Tru Trenge Men, la sipu uma ne hmi i nyidrë, nge tune fe kowe la Neköi Mamoe. 23 Nge tha nyipiewekë kö troa hetre jö me treu troa hudrum hnine la traon, ke ijije hë la lolo i Akötresie troa thinan, nge laame ne la traon la Neköi Mamoe. 24 Nge tro la itre nöj a tro jëne la lai ne la traon, nge tro la itre joxu ne fen a traqa fë la itre lolo i angatr. 25 Nge ngöne la drai ka pexej, tha tro pi kö a hane thinge la itre qëhnelö, ke tha tro kö a hane jidr e cili. 26 Nge tro la itre nöj a traqa fë hnine la traon, la lolo me iatrunyi angatr. 27 Ngo ame la itre ewekë ka hetre ethan, me nöjei atr ka kuca la hna sisin nge ka huliwa iaö, tha tro kö angatr a lö hnine la traon; ngo tro hi a lö hnene la itre hna siji ëjen hnine la tusi hna ewath, lo tusi ne mel ne la Neköi Mamoe.

22 Nge angeic a amamai ni jë la hneopegejë ne timi ne mel, ka lualai tune la kristal, nge ka neni qa ngöne la therone i Akötresie, me theron ne la Neköi Mamoe, 2 nge ej a neni ngöne la gojenyi ka tru ne la traon. Ngöne la lue öline la hneopegejë hetre itre sinöe ne mel, itre ej a atruelof lao wa wen ngöne la macatre. Nge ame la itre dröne la itre sinöe, tre nyine aloine la itre nöj.

3 Nge pë hmaca kö ieji e cili, ngo tro la therone i Akötresie me theron ne la Neköi Mamoe a cil ngöne la traon, nge tro la itre hlue i Akötresie a nyihlue i nyidrë; 4 nge tro angatr a goeëne la iqëmeke i nyidrë, nge troa sija la ëje i nyidrë hune la itre göpadri angatr. 5 Ketre, tha tro hmaca kö a hane jidr, nge tha nyipiewekë kö koi angatr la ehudrumene la laam, me ehudrumene la jö, ke tro kö Iehova* Akötresie a thina angatr, nge tro angatr a itre joxu, me mus epin, epine palua.

6 Öni nyidrëti koi ni ka hape: “Nyine mejiune kow nge trenge nyipici la itre trengewekë celë; nyipici, hnei Iehova* Akötresie, lo atre ithanata jëne la itre perofeta, hna upe la angela i nyidrë matre amamane kowe la itre hlue i nyidrë la itre ewekë ka troa canga traqa. 7 Dreng! Eni hë lai. Manathithe la atre trongëne la itre trengewekë hna perofetan hnine la tusi hna ewathe celë.”

8 Eni Ioane, la ka drenge me goeëne la itre ewekë cili. Nge ame la eni a drenge me öhn, eni a thili ju kowe la lue ca ne la angela ka amamai ni la itre ewekë cili, matre atrunyi angeic. 9 Ngo öni angeic koi ni ka hape: “Eö a u? The tune kö lai! Ketre hlue hi ni tui eö, me tune la itre trejin me eö, itre perofeta, me itre ka trongëne la hna qaja hnine la tusi celë hna ewath. Nyihlue i Akötresieti jë pe!”

10 Nge öni angeice hmaca: “The juetrëne kö la itre trengewekë hna perofetan hnine la tusi hna ewath celë, ke easenyi hë la ijine hna sa. 11 Nue pi la atr ka tha meköti kö, troa kuca catrëne la ka tha meköti kö; nge nue pi la atre ka ngazo thiina, troa kuca catrëne la ngazo; Ngo loi e tro la ka meköt, a kuca catrëne la meköt, nge loi e tro la atre ka hmitrötr, a kuca catrëne la ka wië.

12 “ ‘Dreng! Eni hë lai, nge theng la thupen hna troa hamën, matre isa nyithupen thenge la isa huliwa hna kuca. 13 Eni hi la A me Z, nge hnapan me hnapin, nge qaane me pun. 14 Madrine la itre ka wasine la iheetre ka qea i angatr, ke tro ha aijijë angatr troa tro kowe la itre sinöe ne mel, me aijijë angatr troa lö jëne la itre qëhnelö kowe la traon. 15 Ngo lapa ju pë hë e tröne la itre kuli,* me itre ka kuci haze, me itre ka kuci ngazo,* me itre ka ihumuth, me itre ka thili koi idrola, me nöjei atr ka ajane la thoi me ka thoi lapa.’

16 “ ‘Eni, Iesu, a upe la angelang matre anyipicine koi eö la itre ewekë celë, thatraqane la itre ekalesia. Eni la iwaan, me matra i Dravita, me wëtresij ka melemel, lo wëtresij hatrene la lai.’ ”

17 Nge ua me jajinyi ka troa faipoipo a qaja lapane ka hape, “Jë fe!” nge loi e tro la nöjei ka dreng a hane qaja ka hape, “Jë fe!” nge loi e tro la nöjei atr ka pi ij a traqa; nge tro la nöjei ka ajan a xome la timi ne mel ka pë thupen.

18 “Eni a anyipicine koi nöjei atr ka drenge la itre trengewekë hna perofetan hnine la tusi hna ewath: Maine tro ketre a nyixane la itre ewekë cili, tro Akötresie a nyixane koi angeic la itre hulö hna qaja hnine la tusi hna ewath celë. 19 Nge maine tro ketre a xometrije la ketre trengewekë hna perofetan hnine la tusi hna ewath, tro Akötresie a apatrene la hna hnëkëne koi angeic ngöne la itre isinöe ne mel, me traon ka hmitrötr, itre ewekë hna qaja hnine la tusi hna ewath.

20 “Önine la atre anyipicine la itre ewekë cili ka hape: ‘Nyipici, eni hë lai!’ ”

“Amen! Traqa pi, Iesu Joxu.”

21 Haawe, epi tro la ihnimi gufa i Iesu Joxu a ce me ange ka hmitrötr.