PANE TUS I IOANE

1 Eahuni a cinyianyi koi nyipunie göne la trengewekë ne mel ka ej ngöne lo qaan, nge hne huni hna dreng, me öhne hnei luemek, me waipengön, me ketr hnei wanakoim, 2 (nyipici, hna mama koi huni la mele ka pë pun, nge hne huni hna goeën, me anyipicin me qaja atrun koi nyipunie. Nge qaathene la Kem la mele ka pë pun, lo ka mama koi hun), 3 lo hne huni hna öhne me dreng, me ce thawa me nyipunie. Qa ngöne lai, tro hë nyipunieti a caas me eahun, tune la aqane caasi hun memine la Kem me Nekö i nyidrë, Iesu Keriso. 4 Haawe, eahuni a cinyihane la itre ewekë cili matre ce pexeje hnyawa pi la madrine së.

5 Nge hanawang la maca hne huni hna dreng qaathei nyidrë me tro fë koi nyipunie: Akötresie la lai, nge pëkö jidri thei Nyidrë.* 6 Nge maine easë a qaja ka hape: “Caasi së me Nyidrë,” nge easë pala kö a tro ngöne la jidr, itretre thoi së, nge tha ka trongëne kö së la nyipici. 7 Haawe, maine tro sa tro ngöne la lai ke Akötresie ngöne la lai, tro hë sa caas, nge tro la madra ne la Neköi Nyidrë, Iesu, a ahmitrötrë së qa ngöne la nöjei ngazo së.

8 Nge maine easë a qaja ka hape: “Pëkö ngazo së,” easë lai a amenu së kö, nge patre kö la nyipici the së. 9 Ngo e tro sa qaja amamane la itre ngazo së, ka nyipici me meköt Akötresie, nge tro nyidrëti a nue la itre ngazo së, me ahmitrötrë së qa ngöne la nöjei thiina ka tha meköti kö. 10 Nge maine easë a qaja ka hape: “Pëkö ngazo së,” easë lai a jelethoi nyidrë, nge patre kö la trengewekë i nyidrë the së.

2 Ha nekönge fe, eni a cinyihane la itre ewekë cili koi nyipunie, matre tha tro kö nyipunieti a kuca la ngazo. Ngo e traqa ju ketre kuca la ngazo, hetre ixatua* thene la Kem. Iesu Keriso la ixatua, ene lo atre ka meköt. 2 Nyidrëti la huuj thatraqane la itre ngazo* së, ngo tha göi itre ngazo së hmekuje kö, ngo göne la fen asë. 3 Nge hnene lai, easë a atrehmekune ka hape, atre nyidrëti hë së: e tro pala hi sa trongëne la itre wathebo i nyidrë. 4 Matre ame la atre qaja ka hape, “Atre nyidrëti hë ni,” ngo tha trongëne pe la itre wathebo i nyidrë, atre thoi lai, nge patre kö la nyipici thene la atre cili. 5 Ngo ame la atre trongëne la itre trengewekë i Keriso, mama cile hnyawa ha ka hape, angeic a nyipi hnimi Akötresie. Nge hnene lai, xecie koi së laka, ka casi së me nyidrë. 6 Nge ame la atre qaja ka hape, ka casi pala hi angeic me nyidrë, qa i angeic troa tro thenge lo aqane tronge i nyidrë.

7 Ange hnimina, tha eni kö a cinyihane koi nyipunie la ketre wathebo ka hnyipixe, ngo hnapan, ene lo hnei nyipunieti hna drenge ngöne la qaan. Ame la wathebo hnapan, tre ene lo hnei nyipunieti hë hna dreng. 8 Eni hmaca a cinyihane koi nyipunie kösë wathebo ka hnyipixe, nge ka nyipici thei nyidrë me thei nyipunie, ke patre hë la jidr, nge hudrume hë la nyipi lai.

9 Ame la atre qaja ka hape, angeic ngöne la lai, ngo kolo pe a methinëne la trejin me angeic, angeice pala kö ngöne la jidr. 10 Ngo ame la atre hnime la trejin me angeic, catre angeice ngöne la lai, nge pëkö ewekë thei angeic ka iakeiny. 11 Ngo ame la atre methinëne la trejin me angeic, angeic e hnine la jidr, nge kola tro ngöne la jidr, nge thatre kö la hna tro kow, ke jidr a atimekë angeic.

12 Eni a cinyiany koi nyipunie ange nekönatr, ke ase hë nue la itre ngazo i nyipunie pine la ëje i nyidrë. 13 Eni a cinyiany koi nyipunie itre kem, ke atre nyidrëti hë nyipunie, ene lo atre ka ej ngöne la qaan. Nge eni a cinyiany koi nyipunie itre thupëtresij, ke ase hë nyipunie ngaane la atre ka ngazo. Nge eni a cinyiany koi nyipunie ange nekönatr, ke atre hë nyipunie la Kem. 14 Eni a cinyiany koi nyipunie itre kem, ke atre nyidrëti hë nyipunie, ene lo atre ka ej ngöne la qaan. Nge eni a cinyiany koi nyipunie itre thupëtresij, ke ka catre nyipunie, nge eje pala hi thei nyipunie la trengewekë i Akötresie, nge ase hë nyipunie ngaane la atre ka ngazo.

15 The hnime kö la fen, me itre ewekë ne fen, ke maine tro ketre a hnime la fen, patre kö thei angeic la ihnim i Kem; 16 ke ame la nöjei ewekë ne fen, ene la itre aja ne ngönetrei, me itre aja i luemek, memine la troa pi mama fë la itre ewekë së, tre tha qaathei Keme kö, ngo qaathei fene pe. 17 Ketre, kola tro la fen me itre aja ne la fen, ngo ame la atre kuca la aja i Akötresie, tro angeic a lapa palua.

18 Itre nekönatre fe, traqa ha la hawa tixenuë, nge tune lo hnei nyipunie hna dreng, hawa ha ne mama la ithupëjia me Keriso, matre qaane enehila, tiqa ha hnei ithupëjia me Keriso. Qa ngöne lai, atre hë së ka hape, traqa ha la hawa tixenuë. 19 Angatr a xulu qaathe së, ngo isa pengöi* angatre kö me easë, ke maine ceitui easë ju, tro angatr a ce me easë. Ngo tro pi hi angatr, ame hna mama cile pi ka hape, tha ceitui angatr asë kö me easë. 20 Nge ase hë ië nyipunie hnene la Atre Ka Hmitrötr, nge thei nyipunieti asë la atrehmekun. 21 Tha eni kö a cinyiany koi nyipunie ke thatre kö nyipunie la nyipici, ngo pine laka, atre hë nyipunie, nge pëkö thoi ka xulu qa ngöne la nyipici.

22 Drei la atre thoi? Hapeu, tha ene kö lo atre xelene ka hape, Iesu la Keriso? Ithupëjia hi lai me Keriso, lo atre xelene la Kem me Nekön. 23 Matre ame la atre xelene la Nekön, tha casi kö angeic memine la Kem, ngo ame la ka atrehmekune la Nekön, casi fe angeic memine la Kem. 24 Haawe ame koi nyipunie, nyipiewekë troa qale catre kowe lo itre ewekë hnei nyipunieti hna dreng ngöne la qaan, ke e tro nyipunieti a qale kow, tro pala kö nyipunieti a casi memine la Nekön, me casi memine la Kem. 25 Ketre, hane hi la hnei nyidrëti hna thingehnaean koi së—mele ka pë pun.

26 Eni a cinyihane la itre ewekë cili pine la itre ka thele troa amenu nyipunie. 27 Ngo ame nyipunie, ase hë Akötresie ië nyipunie hnene la ua i nyidrë, nge thei nyipunieti pala hi la ua. Matre, Akötresie a huliwane la ua cili nyine ini nyipunie la nöjei ewekë asë, nge ka nyipici la ua nge tha thoi kö. Qa ngöne lai, isine jë troa casi pala hi me nyidrë, thenge lo aqane ini nyipunie hnene la ua. 28 Enehila ange nekönatr, catre jë casi me nyidrë, matre e mama pi nyidrë, tha tro kö sa xou troa ithanata, me hmahma me ananyi nyidrë ngöne la ijine celë hë nyidrë. 29 Ke e atre hë nyipunie ka hape, ka meköti nyidrë, tro fe nyipunie a atre ka hape, ame la itretre kuca la meköt, tre itre hna hnahon hnei nyidrë.

3 Hanawange la pengöne ihnim hna hamë së hnene la Kem, laka, troa hë së ka hape, itre nekö i Akötresie! Nge pengö së hi lai. Celë hi matre, trenyiwa së kowe la fen, ke thatre Akötresieti kö hnene la fen. 2 Ange hnimina, easë enehila la itre nekö i Akötresie, ngo tha mama pala kö la pengö së elany. Ngo atre hi së ka hape, e mama ha nyidrë, tro sa tui nyidrë, ke tro sa öhne la sipu pengö i nyidrë. 3 Nge ame la atre kapa la mejiune cili thei nyidrë, angeic a sipu ahmitrötrë angeic, tune la aqane hmitrötre nyidrë.

4 Ame la atre majemine kuca la ngazo, angeic a eni wathebo, ke ame la ngazo, tre ene la troa ena la wathebo. 5 Nge atre fe hi nyipunie ka hape, hnei nyidrëti hna mama matre köletrije la itre ngazo së, nge pëkö ngazo i nyidrë. 6 Pëkö atre casi me nyidrë nge ka kuca lapane la ngazo; nge ketre pëkö atre kuca lapane la ngazo ka öhnyi nyidrë, me atrepengöi nyidrë. 7 Ange nekönatre fe, the nue ketre kö troa amenu nyipunie, ame la atre kuca la meköt, tre ka meköt, tune la aqane meköt i Iesu. 8 Nge ame la atre majemine kuca la ngazo, ka qaathei Diabolo angeic, ke hnei Diabolo hna kuca la ngazo qaane lo qaan.* Haawe, hane hi la kepin matre mama pi la Nekö i Akötresie, matre lep apatrene la itre huliwa i Diabolo.

9 Ame la hna hnahon hnei Akötresie, tre tha atre majemine kuca la ngazo, ke thei angeic la ua* i nyidrë, nge thatreine kö angeice kuca la ngazo, ke hna hnaho angeic hnei Akötresie. 10 Nge isa mama kö la itre nekö i Akötresie me itre nekö i Diabolo qa ngöne la nyipici celë: ame la atre tha kuca la meköt, tha qaathei Akötresieti kö, nge tune fe hi kowe la atre tha hnime la trejin me angeic. 11 Celë hi maca hnei nyipunieti hna dreng ngöne la qaan ka hape, qa së troa ihnimikeu; 12 nge the tro kö a tui Kaina, atre xulu qaathene la ka ngazo, ke hnei angeic hna humuthe la jini angeic. Ngo hnauëne la angeic a humuthe la jini angeic? Pine laka, ngazo la nöjei huliwa i angeic, nge meköti la itre huliwa ne la jini angeic.

13 The sesëkötre kö ange trejin la kola methinë nyipunie hnene la fen. 14 Atre hë së ka hape, mejë hë së qa ngöne la mec kowe la mel, ke easë a hnime la itre trejin. Matre ame la atre ka pë ihnimin, angeice pala kö ngöne la mec. 15 Nge ame la atre methinëne la trejin me angeic, atre ihumuthi lai, nge atre hë nyipunie ka hape, pëkö atre ihumuth ka troa kapa la mele ka pë pun. 16 Qa ngöne lai, hne së hna atre la pengöne la ihnim, ke hnei nyidrëti hna nue la mele* i nyidrë thatraqa së, matre hnëqa së fe troa nue la mele* së thatraqane la itre trejin me easë. 17 Ngo ame la atre hetrenyi la ka ijij göi mel, nge kola öhne la trejine me angeic a aja ewekë, ngo tha utipine pe, troa lapa tune kaa la ihnimi i Akötresie thei angeic? 18 Ange nekönatre fe, the tro kö sa ihnim hnei trengewekë me thinem, ngo hnei huliwa me nyipici.

19 Qa ngöne lai, atre hë së laka, itre atre ne la nyipici së, nge tro hë sa akeukawane* la itre hni së qëmeke i nyidrë, 20 göne la itre ewekë hna nyizö së hnene la itre hni së, ke draië kö Akötresie hune la itre hni së, nge atre kö nyidrëti la nöjei ewekë asë. 21 Ange hnimina fe, maine tha nyizö së kö hnene la itre hni së, tha tro kö së a cile troa ithanata qëmeke i Akötresie. 22 Nge ame la nöjei ewekë hne së hna sipon, easë a kapa qaathei nyidrë, ke easë a trongëne la itre wathebo i nyidrë, nge easë a kuca la ka amadrinë nyidrë. 23 Ketre, hane hi la itre hnei nyidrëti hna amekötin: tro sa lapaun ngöne la ëje ne la Nekö i nyidrë Iesu Keriso, me ihnimikeu thenge lo hna amekötin hnei nyidrë. 24 Nge ame la atre trongëne la itre hnei nyidrëti hna amekötin, ka casi pala hi angeic me nyidrë, nge nyidrë me angeic. Nge pine la ua hnei nyidrëti hna hamë së, atre hi së ka hape, ka casi pala hi së me nyidrë.

4 Ange hnimina fe, the canga mejiune kö kowe la nöjei trengewekë,* ngo tupathe ju matre öhne jë nyipunie ka hape, qaathei Akötresieti jë kö, ke nyimutre la itre perofeta thoi ka mama e cailo fen.

2 Nge hane hi la aqane tro nyipunieti a jelenyipicin ka hape, qaathei Akötresie la ketre trengewekë: Qaathei Akötresie la nöjei trengewekë ka amamane laka, hnei Iesu Keriso hna uti ngöne la ngönetrei. 3 Ngo ame la nöjei trengewekë ka tha jelenyipicine ka hape, hnei Iesu hna nyi atr, tre tha qaathei Akötresieti kö. Ngo kolo pe a xulu qaathene la ithupëjia me Keriso, lo hnei nyipunie hna drenge ka hape, ka tro ha traqa. Nge enehila, eje hë a jilapane la fen.

4 Ange nekönatr, qaathei Akötresie nyipunie, ase hë nyipunieti ngaa angatr, ke ame la atre casi me nyipunie, sisitria kö angeic hune la atre casi me fen. 5 Nge itre atre ne fen angatr; celë hi matre angatr a qaja la itre mekuna i fen, nge fen a drei angatr. 6 Ngo itre atre i Akötresieti pe së. Matre ame la atr atrepengöi Akötresie, angeic a drei së; ngo ame la atr ka tha qaathei Akötresie, tha angeice kö a drei së. Nge qa ngöne lai, easë a atrehmekune la itre trengewekë* ne la nyipici, me itre trengewekë* ne la thoi.

7 Ange hnimina fe, loi e tro pala hi sa ihnimikeu, ke qaathei Akötresieti la ihnim, nge ame la atre ihnim, hna hnaho angeic hnei Akötresie, nge ka atrepengöi nyidrë. 8 Matre ame la atre pë ihnim, ka thatre Akötresieti lai, ke Akötresieti la ihnim. 9 Nge hna mama la ihnimi nyidrëti koi së qa ngöne laka, hnei nyidrëti hna upe la Nekö hnimina i nyidrëti ka cas kowe la fen, göi troa amele së jëne la Nekön. 10 Hnei Akötresie hna upe la Nekö i nyidrë nyine huuj thatraqane la itre ngazo së.* Hnei nyidrëti hna kuca lai ke nyidrë a hnimi së, ngo tha hnene kö laka, easë a hnimi nyidrë.

11 Haawe ange hnimina, maine celë hi aqane hnimi së hnei Akötresie, nga qa së fe troa ihnimikeu. 12 Pëkö atr ka hane goeë Akötresie. Ngo e tro sa catre ihnimikeu, ce Akötresieti pala hi me easë, nge kola pexeje the së la ihnimi nyidrë. 13 Nge pine laka, nyidrëti a hamë së la ua i nyidrë, xecie koi së ka hape, casi pala hi së me nyidrë, nge ce nyidrëti pala hi me easë. 14 Ketre, hne huni hna sipu öhn, me anyipicin laka, hnene la Kem hna upe la Nekö i nyidrë, nyine iamele kowe la fen. 15 Matre ame la ka atrehmekune ka hape, Iesu la Nekö i Akötresie, ce Akötresieti pala hi me angeic, nge ce angeic me Akötresie. 16 Ame hne së hna atre, me mejiune laka, Akötresieti a hnimi së.

Akötresie la ihnim, matre ame la atre catre ihnim, ce angeic pala hi me Akötresie, nge ce Akötresieti pala hi me angeic. 17 Hane hi la aqane pexeje la ihnimi the së, matre tha tro kö sa xou* troa ithanata ngöne la drai ne iameköti, ke ngöne la fene celë, easë a tui Iesu Keriso. 18 Pëkö xou ngöne la ihnimi ka pexej, ej a trije* la xou, ke kola sewe së hnene la xou. Matre ame la atre xou, tha hna apexejenyi angeice kö hnene la ihnim. 19 Ngo ame easë, easë a ihnim, ke pa i nyidrëti kö hnimi së.

20 Haawe, maine tro ketre a qaja ka hape, “Eni a hnimi Akötresie,” ngo kolo pe a methinëne la trejin me angeic, atre thoi lai. Ke ame la ka tha hnime la trejin me angeic, lo hnei angeic hna öhn, thatreine kö troa hnimi Akötresie, lo hna tha öhn. 21 Nge ase hë së kapa qaathei nyidrë la hna amekötin celë, ame la atre hnimi Akötresie, qa i angeice fe troa hnime la trejin me angeic.

5 Ame la atre mejiune ka hape, Iesu la Keriso, angeice hi la hna hnahon hnei Akötresie. Nge ame la atre hnime la atre hnaho, angeice fe a hnime la hna hnahon hnei nyidrë. 2 Hane hi la aqane tro sa atre ka hape, easë a hnime la itre nekö i Akötresie, qa ngöne la hne së hna hnimi Akötresie, me trongëne la itre hnei nyidrëti hna amekötin. 3 Ke ame la troa hnimi Akötresie, tre ene la troa trongëne la itre hna amekötin hnei nyidrë, nge eje hi, tha ka hace kö itre ej, 4 ke ame la itre hna hnahon hnei Akötresie, tre itretre ngaane la fen. Nge ame la jia ne isi ka aijijë së troa ngaane la fen, tre lapaune së.

5 Nge drei la ka atreine ngaane la fen? Hapeu, tha kolo kö lo atre mejiune ka hape, Iesu la Nekö i Akötresie? 6 Iesu Keriso lo atre traqa jëne la tim me madra. Ngo tha hnei tim hmekuje kö, ngo hnei tim me madra. Nge ua la ka anyipicin, ke ua la nyipici. 7 Köni ewekë ka anyipicine lai: 8 ene la ua, me tim, me madra; casi hi la ewekë hna anyipicin hnene la köni ewekë cili.

9 Nge maine easë a kapa la hna anyipicin hnei atr, nga sisitria kö la hna anyipicin hnei Akötresie, ke Akötresieti la ka sipu anyipicin, lo nyidrëti a anyipicine la Nekö i nyidrë. 10 Matre ame la atre lapaune kowe la Nekö i Akötresie, angeic a sipu kapa la hna anyipicin, nge ame la ka tha lapaune koi Akötresie, angeic a jelethoi nyidrë, ke tha lapaune kö angeic kowe la hna anyipicin hnei Akötresie göne la Nekön. 11 Nge hane hi la hna anyipicin, Akötresie a hamë së la mele ka pë pun, nge thene la Nekö i nyidrë la mele cili. 12 Matre kola hetrenyi la mele cili hnene la atre kapa la Nekön; ngo patre kö la mele cili thene la atre xelene la Nekön.

13 Haawe, eni a cinyihane la itre ewekë cili koi nyipunie matre tro nyipunieti a atre ka hape, thei nyipunie la mele ka pë pun, nyipunie itretre lapaun kowe la ëje ne la Nekö i Akötresie. 14 Nge hane hi la mejiune* së koi nyidrë, laka, e hetre ewekë hne së hna sipon thenge la aja i nyidrë, tro kö nyidrëti a drei së. 15 Nge pine laka, atre hë së ka hape, tro nyidrëti a drenge la nöjei sipo së, atre hë së laka, tro sa kapa la hne së hna sipon, ke hne së hna sipo nyidrë.

16 Maine tro ketre a öhne la trejin me angeic a kuca la ngazo tha hna mecine kö, tro angeic a thithi fë lai trejin, nge tro hë Akötresie a hamë mel kowe la trejin, nyipici troa hamën kowe la itre ka kuca la ngazo ka tha hna mecin. Ngo hetre ngazo hna mecin, nge tha eni kö a upi angeic troa thithi fë. 17 Ke ame la nöjei thiina ka tha meköti kö, tre ngazo lai. Ngo hetre ngazo laka, tha hna mecine kö.

18 Atre hë së ka hape, ame la hna hnahon hnei Akötresie,* tha angeice kö a kuca lapane la ngazo, ngo kola thupë angeic hnene la Nekö i Akötresie, matre tha tro kö a xolouthi* angeic hnene la atre ka ngazo. 19 Nge atre hë së ka hape, itre atre i Akötresieti së, ngo fene hnengödrai asë a lapa fene la musi ne la atre ka ngazo. 20 Nge atre fe hë së laka, calemi hë la Nekö i Akötresie, nge ase hë nyidrë hamë së la inamacan* matre atreine jë së atrehmekune la Atre ka nyipici. Nge casi së memine la Atre ka nyipici jëne la Nekö i nyidrë Iesu Keriso. Nyidrë la nyipi Akötresie, me qaane la mele ka pë pun. 21 Haawe ange nekönatr, iananyi pi me itre idrola.