HNAALUENE TUS I PETERU

1 Eni Simona Peteru, hlu nge aposetolo i Iesu Keriso, koi itre ka kapa tu hun la lapaun ka nyipiewekë, lo hna kapa jëne la thiina ka meköt ne la Akötresi së, me Atre Amele së, Iesu Keriso:

2 Epi kökötre thei nyipunie la ihnimi gufa me tingeting, jëne la hna atrehmekunyi Akötresieti hnyawa, me Iesu Joxu së. 3 Hnene la mene i Akötresie hna hamë* së la nöjei ewekë thatraqane la mel, nge ka aijijë së troa nyipici koi nyidrë. Hne së hna kapa la itre ewekë cili, ke easë a nyipi atrehmekunyi Akötresie. Nge nyidrëti a hë së, ke Akötresie ka Draië nyidrë nge ka loi hni. 4 Nge jëne la lue ewekë cili, hnei nyidrëti hna aijijë* së troa kapa la itre hna thingehnaean ka tru, nge ka sisitria, matre tro sa ce thawa la itre thiina i Akötresie, ke mele hë së qa ngöne la iajojezi ne la fen, thangane la itre aja ka ngazo.

5 Qa ngöne lai, isine jë troa nyixane la lapaune i nyipunie hnene la loi hni, me nyixane la loi hni hnei atrehmekun, 6 me nyixane la atrehmekun hnei xomehnöth, me xomehnöth hnei atreine cile hut, me nyixane la atreine cile hut hnene la troa nyipici koi Akötresie, 7 me nyipici koi Akötresie hnene la ihnimi trejin, me nyixane la ihnimi trejin hnene la ihnim koi nöjei atr. 8 Ke maine hetrenyi thei nyipunie la itre thiina cili, nge kola elitrauj, tro itre eje lai a thupë nyipunie matre tha tro kö nyipunieti a tha huliwa, me tha wa wen* göne la atrehmekune la Joxu së Iesu Keriso.

9 Nge ame la ka tha hetrenyi la itre thiina cili, timeke lai, ke xele* angeic ma goeëne la lai, nge thëthëhmine hë angeic la aqane köletrije la itre ngazo i angeice hnapan. 10 Qa ngöne lai ange trejin, isine jë troa lapa xome catrëne la manathithi nyipunie, ene la troa itre hna hën me iën hnei Akötresie, ke maine tro nyipunieti a catre kuca tun, tha tro jë pi kö nyipunieti a kei. 11 Nyipici, aqane tro lai a amanathithi nyipunie, ke troa alö nyipunie kowe la Baselaia ka epine palua, lo Baselaia ne la Joxu së me Atre Amele së, Iesu Keriso.

12 Celë hi kepin matre ajange pala hi troa amekunë nyipunie la itre ewekë cili, ngacama atre hë nyipunie, nge catre hnyawa ha nyipunie ngöne la nyipici ka eje thei nyipunie. 13 Ngo ame koi ni, meköt e tro ni a amekunë nyipunie la itre ewekë cili, nge eni pala kö ngöne la itat* celë, 14 ke atre hë ni ka hape, easenyi hë matre una trije pi ni la itateng, thenge lo hna qaja hnyawa koi ni hnei Iesu Keriso Joxu së. 15 Nge tro kö ni a isin, matre e traqa jë ni tro, tro pala hi nyipunie a mekune* la itre ewekë cili thatraqai nyipunie.

16 Nge ame lo eahuni a amamane koi nyipunie la men, memine la ijine celë hë la Joxu Iesu Keriso, tha hne huni kö hna nyitrepene lai hnene la itre ifejicatre hna sile hnei atr, ngo eahuni pe lo a qaja, ke hne huni hna sipu öhne la lolo i nyidrë. 17 Hnei nyidrëti hna kapa qaathei Akötresie la Kem, la iatruny me lolo, ngöne lo kola qaja koi nyidrë hnene la qaane la lolo ka hape: “Hane hi la Nekönge hniminang. Eni a madri nyën!” 18 Nyipici, hne huni hna drenge la itre trengewekë cili hna qaja qaa hnengödrai, lo ce eahuni me nyidrë hune la wetre ka hmitrötr.

19 Qa ngöne lai, xecie hnyawa ha koi së la itre hna perofetan, nge ka lolo la hnei nyipunieti hna kuca, ene la troa nyipiewekëne e kuhu itre hni i nyipunie la itre ewekë cili, tune la aqane nyipiewekëne la laam ka hudrum nyipine la jidr, [uti hë e kaqa ne lai, nge uti hë mama la wëtresij hatrene la lai]. 20 Nge ame la hnei nyipunieti hna pane atre, tre, pëkö ca hna perofetan hnine la itre hna Cinyihan ka xulu qaathei atr. 21 Nyipici, tha xulu kö la itre hna perofetan hnene la aja i atr, ngo itre atr a ithanata jëne* la uati hmitrötre i Akötresie.

2 Ngo hna hetre perofeta thoi thene la itre atr, nge tro fe a hane mama thei nyipunie la itretre hamë ini thoi. Tro angatr a acile juetrëne la itre hmi ka troa apatrene la lapaune i nyipunie, nge tro fe angatr a xelen la atre itö angatr. Qa ngöne lai, tro ha aca tro apatrenyi angatr. 2 Ala nyimu fe la itre ka troa kei thenge la itre huliwa nyine hmahmane i angatr, nge zö i angatr e troa qajangazone la gojenyi ne nyipici. 3 Ketre, tro fe angatr a ewathi nyipunie hnene la itre trenge iaö. Ngo ekö hë Akötresie eji angatr nge tha tro kö a hmitr, tro kö a apatrenyi angatr.

4 Ke tha cile kö Akötresieti lo troa amekötine la itre angela ka kuca la ngazo, me kuië angatr ngöne la Taretar,* me ceinë angatr ngöne la jidr atraqatr, treqene la iameköti. 5 Nge, tha cile kö nyidrëti troa apatrene lo fene hnapan, me thupë Noa, atre cainöjëne la meköt memine lo ala seven, ngöne lo nyidrëti a axulune la iwë atraqatr kowe la itre ka tha idrei. 6 Nge ame lo nyidrëti a kuca matre hnatresiji pi Sodroma me Gomora, nyidrëti lo lai a ameköti angatr, me hamë tulu nyine hmekëne la itre ka tha idrei göne la itre ewekë ka troa traqa. 7 Ngo hnei nyidrëti pe hna amele Lota, atr ka meköt, ke hna akötrë angeic hnene la itre huliwa nyine hmahmane hna kuca hnei itre ka pë wathebo. 8 Ke o drai, hna akötrën la hni angeic hnene la hna dreng me goeën la itre huliwa ka ngazo hna kuca xötreithi angeic. 9 Haawe, atre kö Iehova* la aqane troa thapa la itre ka nyipici koi nyidrë qa ngöne la itupath, me hnëkëne la itre ka tha meköti kö kowe la iameköti.* 10 Tro lai a traqa kowe la itre atr ka thele troa adrone la ngönetrei itre xan, nge ka methinëne la itre mus.*

Itre atre lai ka pi tru me catre që, ke tha xou i angatre kö troa qaja angazone la itre hna atrun hnei Akötresie. 11 Ngo ame la itre angela, ngacama ka tru menene nyudren, ngo tha qajangazone kö nyudreni la itre ka hamë ini thoi, ke nyudreni a metrötrë Iehova.* 12 Ngo ame la itre atre cili, angatr a tui itre öni, ke itre ka pë mekun me ka mele thenge la itre sipu aja i angatr, nge itre hna hnahon göi troa umën me humuth, ke angatr a jelengazone menun la hna thatre. Haawe, pine la itre ngazo hnei angatr hna kuca, tro ha apatrenyi angatr. 13 Eje hi, akötre la hnei angatre hna troa xeni pun, ke thangane la aqane iakötrë i angatr.

Pi tro catr angatr a xeni me ij, me feet qenahmo, nge goi kuca fe angatr ngöne la lai. Ceitu i angatr me dro ngöne iheetr, me ixelek ngöne ialamek, angatr a madrine fë* la itre ini thoi, me ce feet me nyipunie. 14 Tiqa ha la lue meke i angatr hnei nyixetë, nge tha inu hë angatr memine la ngazo, nge angatr a iaöne la itre ka luelu.* Saqe hi la itre hni angatr troa meciun, nge angatr la itre nekön hna ejin. 15 Hnei angatr hna trotrije la gojenyi ka meköt me tro menu, ene pe, xötrëne jë hi angatre la goje i Balaama, lo neköi Beora, atre ajane la thupen ne la ngazo. 16 Hna haji angeice lo, pine angeice tria. Hnene lo boliko hna ewekë tui atr, me sawa la perofeta troa huliwa menu.

17 Haawe, angatr la itre husapa ka weliwel, me itre iaw hna uf hnei enyi ka catr, nge thatraqai angatr la jidr atraqatr. 18 Angatre fe a aqeane la itre cainöj ka pë alien, nge jëne la itre aja i ngönetrei, me itre huliwa nyine hmahman,* angatr a iaöne la itre hna xötrei thapa qaathene la itre ka melëne la ngazo. 19 Ngacama angatr a sisiny koi itre xan la inuamacany, ngo kolo pe a thahluë angatr hnene la ngazo, ke ame la hna musinën hnei ketre, tre hlue ne la atre cili. 20 Ke ase hë thepe angatre lo qa ngöne la itre huliwa ka sis ne la fen. Hna thepe angatr hnene la hna nyipi atrehmekune la Joxu me Atre Amele së, Iesu Keriso. Ngo maine tro hmaca a ngaa angatr hnene la itre huliwa cili, nge troa abëekë angatr, nga loi ju kö lo tro hnapan. 21 Ke loi ju kö e tro angatr a thatre lo jë ne la meköt, hune la troa atre hnyawa, me trotrije la wathebo ka hmitrötr hnei angatre hna kapa. 22 Angatre hi lai a anyipicine lo edromë hna hape: “Bëeke hë la kuli kowe la hna hmitra, nge puaka hna siën a ujëujë hnine trëtr.”

3 Ange hnimina, enehila eni a cinyihane la hnaaluene tusing, nge tune lo hnapan, eni a ahlëne la itre mekune i nyipunie hnene la itre xa nyine amexej, 2 the tro kö nyipunie a thëthëhmine la itre trengewekë hna qaja* hnene lo itre perofeta ka hmitrötr, memine la hna amekötin hnene la Joxu me Atre Amele së, jëne la itre aposetolo i nyipunie. 3 Nyipiewekë tro nyipunie a pane atre ka hape, ame ngöne la itre drai ne la pun, tro la itre ka ihnyima sai, a hnyima fë la itre ewekë ka loi, me isa kuci mekun, 4 nge tro angatr a hape: “Ekaa ha lo ijine hna hape, nyidrëti hë la? Ke, qaane lo kola meköle ngöne la mec hnene la itre qaaqa së, pëkö ca ewekë ka saze qaane lo kola xupe la fen.”

5 Ke angatr a thatre thoine ka hape, hetre hnengödrai me ihnadro hna tha hetin hnei tim, nge ka manij jëne la trengewekë i Akötresie, 6 nge hna apatrene lo fene hnapan hnene la itre ewekë cili, hna apatren hnei tim. 7 Nge jëne pala hi la trengewekë cili, ase hë hnëkëne la hnengödrai me fene celë kowe la eë, me amë thatraqane la drai ne iameköti, me drai ne apatrene la itre atr ka ngazo.

8 Ange hnimina fe, the thëthëhmine kö laka, ame la ca drai koi Iehova,* tre ca thauzan lao macatre, nge ame la ca thauzan lao macatre, tre ca drai. 9 Tha hmitre kö Iehova* troa eatrëne la itre hna thingehnaean, tune la aqane mekuna i itre xan, ngo nyidrëti pe a xomihni nyipunie ke xele kö Nyidrë troa apatrene la ketre e nyipunie, ngo loi e tro pe nyipunieti asë a ietra. 10 Nge tro la drai Iehova* a traqa tune la atrekënö, nge e cili, troa aca tro patr la hnengödrai me nyi mejen atraqatr, nge tro la itre ewekë hna dreuth a hmu, ame hna troa mama pi la ihnadro me itre huliwa ne ej.

11 Haawe, pine laka troa apatrene tune la itre ewekë cili, isa waipengö i nyipunieti jë, wange ju ka hape, nyipunieti kö la itre atre ka melëne la thiina ka meköt, nge ka kuca la itre huliwa ka nyipici koi Akötresie, 12 ketre, treqene ju nge the thëthëhmine kö la ijine hna hape, celë hë la drai Iehova.* Ijine troa dreuthetrije la hnengödrai, nge tro la itre ewekë ne hnengödrai me fen a hmu hnene la idreuth atraqatr! 13 Ngo thenge lo hnei Nyidrëti hna thingehnaean, easa lapa treqen la hnengödrai ka hnyipixe me fen ka hnyipixe, nge e cili, tro pala hi a eje la thiina ka meköt.

14 Haawe ange hnimina, pine laka nyipunie a lapa treqene la itre ewekë cili, isine jë matre tro Akötresie a öhne ka hape, nyipunieti pala hi a pë ethan, me wië, me tingeting. 15 Nge mekune ju laka, ame la aqane xomihni ne la Joxu së, tre iamele lai koi së, tune lo hna cinyihane koi nyipunie hnei Paulo, trejine hnimina, thenge la inamacan hna hamë angeic, 16 ke hnei angeice hna qaja hnyawa lai ngöne la nöjei tusi angeic. Ngo ame pe, tha ka hmaloi kö troa trotrohnine la itre xa ewekë, itre ewekë lai hna aqaline hnene la itre atr ka thatre* me ka luelu, tune lo aqane kuca i angatr kowe la itre xa hna Cinyihan. Nge angatre hi lai a sipu ahnëjinë angatre kö.

17 Qa ngöne lai ange hnimina, pine laka, atre hë nyipunie la itre ewekë cili, wai nyipunieti kö, wanga ce huli nyipunieti jë me angatr hnene la ngazo ne la itre ka eni wathebo, nge luzi pi lo aqane cile catre i nyipunie. 18 Ngo catre jë pe kökötre ngöne la ihnimi gufa me atrehmekun ne la Joxu së Iesu Keriso, Atre Amele së. Haawe, epi ej thei nyidrëti la lolo enehila, nge uti hë epine palua. Amen.