PANE TUS I PETERU

1 Eni Peteru aposetolo i Iesu Keriso, koi itre hna iën ka mele trenyiwa nge hna isa ijen e Ponoto, me Galatia, me Kapadokia, me Asia, me Bithunia. 2 Akötresie la Kem e hnengödrai, nge qaane lo qaan, ase hë nyidrë ië nyipunie, me ahmitrötrë nyipunie hnei ua, matre tro nyipunieti a idrengethenge me wië hnene la madra i Iesu Keriso:

Epi tro la ihnimi gufa me tingeting a mana thei nyipunie.

3 Loi e kapa la iatruny hnene la Akötresie me Keme ne la Joxu së Iesu Keriso, ke pine la etrune la utipine i nyidrë, hnei nyidrëti hna hnaho së hmaca thatraqane la mejiune ka mel, jëne la hna amele Iesu Keriso qa hna mec. 4 Nge mejiune lai ka tha tro kö a hnyiqetr, nge ka pë engazon, nge ka tha ae. Hna hnëkëne lai thatraqai nyipunie e hnengödrai, 5 nyipunie itre hna thupën hnene la mene i Akötresie jëne la lapaun, matre kapa la iamele hna troa amaman ngöne la hneijin ne la pun. 6 Hnene lai, kola elitrauje la madrine i nyipunie, ngo ka nyipiewekë la itre hnepe ijine kola akötrë nyipunie hnene la itre itupath, 7 matre jëne la lapaune hna tupath, tro ha qaja aloinyi nyipunie, nge tro nyipunie a kapa la iatrunyi me lolo, e mama pi la itre huliwa i Iesu Keriso. Nge sisitria kö la pengöne lapaune cili hune la gool ka troa hnyiqetr, ngacama hna tupath* fe ej hnei eë. 8 Nge maine tha öhnyi Keriso kö nyipunie, ngo nyipunieti a hnimi nyidrë. Nge ngacama tha öhnyi nyidrëti kö enehila, ngo nyipunieti pe a lapaune koi nyidrë, me madrin hnene la madrin ka ketre pengön, nge ka lolo, 9 ke xecie hë koi nyipunie troa kapa la iamele,* pine la lapaune i nyipunie.

10 Nge hnene lo itre perofeta ka perofetane la ihnimi gufa hna hnëkëne koi nyipunie, hna hnying me ithel göne la iamele cili. 11 Hnei angatre hna catre ithel göi Keriso, ene la hneijin maine ijin hna amaman hnene la ua ka eje thei angatr. Ua a canga qaja la itre akötr hna troa melën hnei Keriso, me lolo ka troa traqa e thupen. 12 Hna upi angatre troa itretre anyipicin, ngo tha koi angatre kö, ngo koi nyipunieti pe. Matre hnei angatr hna cinyihan la itre ewekë hna qaja amë göi nyipunie, nge nyipunieti a drenge la itre ewekë cili jëne la itre ka tro fë maca ka loi, itre hna xatuan hnene la uati hmitrötr qaa hnengödrai. Nge itre ewekë lai hna ajane troa atrepengöne hnyawa hnei itre angela.

13 Haawe, hnëkëne jë la itre mekune i nyipunie thatraqane la itre huliwa ka tru, nge huliwane hnyawane jë la aqane tuluewekë i nyipunie; nge mejiune jë kowe la ihnimi gufa hna troa hamëne koi nyipunie ngöne la ijine mama i Iesu Keriso. 14 Nge tune la itre nekönatre ka idrei, loi ju hë hna tro thenge* la itre aja i nyipunie ekö, lo thatre Akötresieti petre kö nyipunie. 15 Nge tune lo Atre Ka Hmitrötr ka hë nyipunie, hmitrötre ju fe ngöne la nöjei aqane ujë i nyipunie, 16 ke hna cinyihane lo ka hape: “Nyipiewekë tro nyipunie a hmitrötr, ke ka hmitrötre ni.”

17 Nge maine tro nyipunieti a hëne la Kem, lo ka iameköti thenge la isa huliwan, nge ka tha ië hna hnimi kö, ujë jë cememine la xou ngöne la ijine nyipunieti pala kö a mele trenyiwa. 18 Nge atre hi nyipunie ka hape, tha hnei itre ewekë ka hnyiqetre kö, maine sileva me gool la ka thepe* nyipunie qa ngöne la mele ka pë alien, lo hna hamë nyipunie hnei itre qaaqaa* i nyipunie. 19 Ngo hna jëne la madra ka tru alameken, kösë madra ne neköi mamoe ka pë ethan, nge ka pë engazon, lo madra i Keriso. 20 Nyipici, hna ië nyidrë qëmekene troa nyitrepene la fen, nge hna amamai nyidrë ngöne la pun ne la itre hneijin, thatraqai nyipunie. 21 Jëne nyidrë, nyipunie a mejiune koi Akötresie, lo atre amele Keriso qa hna mec, me hamë lolo koi nyidrë, matre tro nyipunie a lapaun me mejiune koi Akötresie.

22 Pine laka, ase hë nyipunie ahmitrötrë nyipunie hnene la hna drengethenge la nyipici, nge hetrenyi hë nyipunie la ihnim trejin ka pë thoi ngön, haawe, catre jë ihnimikeu qa kuhu hni. 23 Nge ase hë hnaho nyipunieti hmaca, tha hnene la ka hnyiqetr, ngo hnene la wen* ka tha hnyiqetre kö, jëne la trengewekë ne la Akötresie ka mel nge ka epine palua. 24 Ke “ceitune la nöjei ijön* me haö, nge ame la itre emingömingön, tre kösë iengen ne hnitr; ngo fitre pi hi la haö, ame hna mala pi la iengen, 25 ngo ka epine palua la trengewekë i Iehova.”* Nge ame la trengewekë cili, tre maca ka loi hna tro fë koi nyipunie.

2 Qa ngöne lai, thipetrije pi la nöjei aqane ngazo thiina, me iaö, me lue iqëmek, me piin, me nöjei trenge ithanata ka iakötrë. 2 Nge tune la itre medreng, ajane catrëne jë la nyipi melek ne la trengewekë, matre jëne ej, tro hë nyipunie a kökötr matre mel, 3 ke drenge* hë nyipunie ka hape, lolo la Joxu.

4 Hnene la itre atr hna thipetrije la etë ka mel, ngo hnei Akötresieti pe hna iëne ej, me wangatrune catrën. Matre ame la nyipunieti a easenyine la Joxu 5 tune la itre etë ka mel, kolo hi lai a iatëkeunyi nyipunie nyine troa xupi uma jëne la ua i Akötresie, matre tro nyipunie a itretre huuj ka hmitrötr, nge jëne la huuje i Iesu Keriso, tro nyipunie a tro fë huuj thenge la ua, itre huuj ka amadrinë Akötresie. 6 Ke ase hë cinyihane ka hape: “Hanawang! Eni a amë e Ziona la etë hna iën, etë ka sisitria,* nyine trepene ka tru alameken, nge ame la atre lapaune kow, tha tro jë kö angeice lai a hmahma.”

7 Ngo ka tru alamekene koi nyipunie, ke nyipunie la itretre lapaun, ngo tha koi itre ka pë lapaune kö, ke önine la hna cinyihan ka hape: “Ame lo etë hna nuetrij hnene lo itre ka xupi uma, tre eje hi lo etë ka sisitria catr,”* 8 nge “etë ne iakeiny, me etë ne thingi gojeny.” Nyipici, angatr a kei, ke xele fe angatr ma drenge la trengewekë, nge pune hi lai koi angatr. 9 Ngo nyipunie la “lapa hna iën, me itre xötre huuje joxu, me nöj ka hmitrötr, me nöj ewekë i Akötresie, me itre ka qaja trongëne la itre thiina ka mingöming”* ne la atre hë nyipunie qa ngöne la jidr, kowe la elolone la lai i nyidrë. 10 Ke tha nöje pala kö nyipunieti lo, ngo enehila, nöje i Akötresieti hë nyipunie; nge tha hna utipi nyipunieti kö lo, ngo enehila, ase hë utipi nyipunie.

11 Ange hnimina, pine laka, itre trenyiwa me itre ka mele trenyiwa nyipunie, eni a catre iele nyipunie troa thipetrije la itre aja i ngönetrei, itre ka isi me nyipunie.* 12 Nge nyipine la itre nöj, loi thiina jë, matre e traqa jë angatr upe zö nyipunie la ketre ewekë ka ngazo, tro angatr a öhne la itre huliwa ka loi i nyipunie, nge tro hë angatr a atrunyi Akötresie ngöne la drai ne waipengöne nyidrë.

13 Haawe, pine la Joxu, drengethenge ju la nöjei hna acil* hnei atr: maine jë, ketre joxu ke ka draië angeic, 14 maine itre gavena hna acil hnei joxu matre trane la itre ka huliwa menu, me qaja aloine la itre ka kuca la loi. 15 Ke aja i Akötresie tro sa kuca la loi matre lep ahumun* la itre ka ewekë menu. 16 Nge ujë jë tui itre hna nuamacan, nge the huliwane menune kö la hna nuamacanyi nyipunie nyine nyi kepine troa kuca la ngazo, ngo tune la itre hlue i Akötresie, nyipiewekëne jë pe. 17 Metrötrëne ju la nöjei atr asë, nge hnime ju la lapa ne la itre trejin asë, nge xou Akötresieti ju, nge metrötrëne jë la joxu.

18 Loi e tro la nöjei hlu a drengethenge me metrötrëne hnyawa la itre maseta i angatr, tha koi itre maseta ka loi hmekuje kö me ka atreine tuluewekë, ngo kowe fe lo itre ka calogitr. 19 Ke nyine madrine la troa öhnyi ketre a cile hut göi troa hetre mekuthetheu ka wië qëmeke i Akötresie, ngacama angeic ngöne la itupath,* nge kola akötrë angeic menu. 20 Ke nemene la eloin la nyipunie a cile hut e kola lepi nyipunie pine kuca la ngazo? Ngo maine nyipunie a xomi akötr pine kuca la loi, ewekë ka lolo lai koi Akötresie.

21 Eje hi, hna hë nyipunie kowe lai, ke hnei Keriso fe hna hane akötre pi nyipunie, nge nyidrëti lai a amamai tulu koi nyipunie matre trongëne hnyawa la itre thupa ca i nyidrë. 22 Pëkö ngazo i nyidrë, nge goi pë fe trenge iaö hnine la që i nyidrë. 23 Ame lo kola qaqa* nyidrë, tha hane kö nyidrëti iqaqa, nge ame lo nyidrëti a akötr, tha hane kö nyidrë iköja, ngo hnei nyidrëti pe hna mejiune kowe la Atre Iameköti ka meköt. 24 Nge ngöne la ngönetrei i nyidrë, hnei nyidrëti hna sipu ajöne la itre ngazo së hune la sinöe,* matre meci* pi së göne la ngazo, nge mele jë së kowe la meköt. Nge “jëne la itre eatre i nyidrë, loi hmaca ha nyipunie.” 25 Ke ceitu i nyipunieti lo me itre mamoe ka patr, ngo enehila, bëeke hë nyipunie kowe la atre thup, lo atre thupëne la itre mele i nyipunie.

3 Ketre tun, nyipunie itre föe, drengethenge ju la itre föi nyipunie, matre e xele kö itre xan ma dreng la trengewekë, tro ha ahmalane la itre hni angatr, hnene la aqane ujë ne la itre ifënekö i angatr, 2 ke hnei angatr hna goeëne la thiina ka loi* i nyipunie, me etrune la metrötre i nyipunie. 3 The tro hmekuje kö nyipunie a amamane la emingömingö i nyipunie hnei aqane ele ihe, me thaipi gool, me heetrë iheetre ka mingöming, 4 ngo loi pe troa mama qa ngöne la pengöne la itre hni i nyipunie. Qa ngöne lai, thaipi nyipunieti jë hnene la menyik me loi hni, ke itre nyine thaipine lai ka tha tro kö a hnyiqetr, nge ka tru koi Akötresie. 5 Nge celë hi hna thaipin hnene lo itre föe ekö ka hmitrötr nge ka mejiune koi Akötresie, itre ka majemine drengethenge la itre föi angatr, 6 tune lo aqane drengethenge Aberahama hnei Sara, lo kola hë nyidrë ka hape, joxu. Nge enehila, nyipunie la itre nekö i angeic e tro pala hi nyipunie a kuca la loi, me tha cile hnö.

7 Ketre tui nyipunieti fe itre trahmany, catre jë ce mel me itre föi nyipunie, thenge la hna atrehmekune* la itre hni i angatr, nge nyipiine jë la itre föe kösë nyipunieti a ea hnyawa la ketre trengene iengen ka kaqakaqa, ke tro fe angatre a ce kepe edrö me nyipunie, lo ahnahna hna hamëne gufan, ene la mel, wanga tha drenge pi Akötresie la itre thith i nyipunie.

8 Nge koi nyipunieti asë, loi e troa ca mekun, me ce akötr, me ihnimikeu tune la itre trejin, me iutipinekeun, me ipië, 9 nge the tro kö a të la ngazo hnei ngazo, me iqaqa hnei iqaqa, ngo të jë hnei manathith, ke hna hë nyipunie thatraqane lai, matre manathithi pi nyipunie.

10 Ke “ame la atre hnine la mel, me thele la itre drai ka loi, nyipiewekë tro angeic a thupën la thineme i angeic qa ngöne la ngazo, me që i angeic qa ngöne la trenge iaö. 11 Nge loi e tro angeic a trotrije la ngazo me kuca la loi; nge loi e tro angeic a thele la tingeting me trongën. 12 Ke luemeke i Iehova* a goeëne la itre ka meköt, nge lue hnagenyë i nyidrë a drenge la itre xëwe i angatr, ngo Iehova* a methinëne la itre ka kuca la ngazo.”

13 Ke drei la ka troa akötrë nyipunie pine nyipunie catre kuca la loi? 14 Maine tro nyipunie a akötr pine la meköt, ka madrine hë nyipunie. Ngo the xouene kö la ka iaxoueny,* nge the hnehengazo menu kö. 15 Ngo atrehmekune ju ngöne la isa hni i nyipunie ka hape, Keriso la Joxu, nge ka hmitrötre nyidrë. Nge hnëkë jë matre tro pala hi nyipunie a atreine sa kowe la itre ka hnyingëne la kepine la lapaune i nyipunie, ngo troa sa cememine la menyike me metrötr atraqatr.

16 Nge isine jë matre tro pala hi a wië la itre mekuthetheu i nyipunie, ke e traqa jë jelengazo nyipunie, tro la itre ka qeje nyipunie a hmahma pine la thiina ka loi i nyipunie, ke aqane ujë ne la itretre drei Keriso lai. 17 Nge maine aja i Akötresie tro nyipunie a akötr pine kuca la loi, ka loi ju kö lai hune la troa akötr pine kuca la ngazo. 18 Ke aca meci hi Keriso thatraqane la nöjei ngazo asë, hna meci hnene la ca atre ka meköt thatraqane la nöjei ka tha meköti kö, matre xometrongë nyipunie koi Akötresie. Hna humuthi nyidrë ngöne la ngönetrei ne atr, nge hna amele nyidrë ngöne la ngönetrei ne hnengödrai. 19 Ngöne la ngönetrei cili, hnei nyidrëti hna cainöj kowe la itre angela hna akalabusin, 20 lo itre ka tha idrei lo kola itreqe hnyawa hnei Akötresie ngöne lo hneijine i Noa, hmekune la kola cane la aka, nge xalaithe hi lo itre hna amelen hune la tim, ala* eitr.

21 Nge kolo fe a amele nyipunie enehila hnene la ewekë celë, ene la bapataiso jëne la mele hmaca i Iesu Keriso. Ame la bapataiso, tre tha ene kö la troa siëne trije la dro qa ngöne la ngönetrei, ngo ene pe la troa sipone koi Akötresie troa hetre mekuthetheu ka loi. 22 Nge Iesu Keriso hë ngöne la götrane maca i Akötresie, ke elë hë nyidrë a tro hnengödrai, nge ase hë nue koi nyidrë la itre angela, me itre mus, me itre trene men.

4 Pine laka, ase hë Keriso akötr ngöne la ngönetrei, hnëkë jë nyipunie troa waiewekë* tui nyidrë, ke ame la atre akötr ngöne la ngönetrei, ase hë angeic trotrije la ngazo, 2 matre ngöne la hnepe ijin angeice pala kö ngöne la ngönetrei, tha angeice hmaca kö a trongëne la itre aja i atr, ngo aja i Akötresieti pe. 3 Ke ase hë lo ijine nyipunie a kuca la itre aja ne la itre nöj, me nyinyape thel la itre huliwa nyine hmahman,* me itre trenge aja hna thatreine xomehnöth, me hmo hnei ka haitr, me feete qenahmo, me ithikeu troa iji menu la ka haitr, me thili kowe la itre idrola ka sis. 4 Nge angatr a sesëkötr ke tha ce nyinyape hmaca kö nyipunieti me angatr kowe la itre huliwa ka ngazo, matre angatr a qajangazo nyipunie. 5 Ngo tro la itre atre cili a isa qeje thiinan koi Keriso, lo ka troa amekötine la itre ka mel me ka mec. 6 Hane hi lai kepin matre hna cainöjëne la maca ka loi koi itre ka mec, ke ngacama ase hë ameköti angatr ngöne la ngönetrei thenge la aqane waiewekë i atr, ngo ijiji angatre troa mele thenge la ua i Akötresie.

7 Ngo easenyi hë la pune la nöjei ewekë asë. Qa ngöne lai, loi e tro nyipunieti a atreine tulu ewekë, me hmek* troa thith. 8 Nge hune la nöjei ewekë asë, catre jë ihnimikeu, ke ihnim la ka atreine he la nöjei pengöne ngazo. 9 Itö ikepe ju nge the wepele kö. 10 Haawe, pine laka, ase hë së isa kepe ahnahna, isa huliwane jë hë thatraqai ketre me ketre, tune la itre hlue ka lolo nge ka atreine huliwa, itre hlue ne la ihnimi gufa i Akötresie, lo ka nyimu pengön. 11 Nge maine ketre a ithanata, nue angeice pi troa qaja la itre maca qaathei Akötresie; nge maine tro ketre a nyihlu, nue angeice pi troa kuca thenge la trengecatr hna hamë angeic hnei Akötresie, matre ngöne la nöjei ewekë asë, troa atrunyi Akötresie jëne Iesu Keriso. Thei nyidrëti la lolo me iatruny epin, epine palua. Amen.

12 Ange hnimina, the sesëkötre kö pine la itre itupath* ka tru hnei nyipunieti hna melën, kösë nyipunie a melëne la itre ewekë ka hnyipixe. 13 Ngo madrin atraqatre jë pe, ke nyipunieti fe a melëne la itre akötre i Keriso, matre tro nyipunie a madrin, me madrin atraqatr, uti hë la ijine mama la lolo i nyidrë. 14 Nge e kola qaqa nyipunie pine la ëje i Keriso, manathithi nyipunie, ke thei nyipunieti hë la ua ne la lolo, nyipici, kolo ua i Akötresie.

15 Ngo tha tro kö la ketre thei nyipunie a akötr pine angeic ihumuth, maine atrekënö, maine kuca la ngazo, maine lö hnine menune la ifekë jolen. 16 Ngo e traqa jë ketre akötr, pine laka, Keresiano angeic, the tro kö angeice a hmahma, ngo tro pe angeic a catre atrunyi Akötresie, me mele thenge la ëje i nyidrë. 17 Ke enehila hi la ijine hna sa troa iameköti, nge troa nyiqaane ngöne la uma i Akötresie. Haawe, maine nyidrëti a nyiqaane the së, nemene jë la pun kowe la itre ka xele ma drenge la maca ka loi i Akötresie? 18 “Nge maine jole kowe la atre ka meköt troa kapa la iamele, nemene jë la pun kowe la ka xele Akötresie, me kowe la atre kuca la ngazo?” 19 Haawe, loi e tro la itre ka akötr pine la aja i Akötresie a nue* angatr* kowe la Atre Xup ka nyipici, nge troa catre kuca la loi.

5 Pine laka, eni fe hi la ketre qatre thup, nge atre goeëne la itre akötre i Keriso, me atre kapa la lolo ka troa mama, eni a thuecatrene* la itre qatre thup thei nyipunie, ka hape: 2 Thupëne hnyawa ju la itre mamoe i Akötresie, lo hna ahnith koi nyipunie, thupëne ju tune la itre atre thup, ngo tha hnei hna imusinë, ngo hnene la hni ka ajan qëmeke i Akötresie; nge tha tro kö a isine göi thupen, ngo tro pe a kuca qa kuhu hni, 3 nge the tro kö a qene joxune la edrö i Akötresie, ngo nyi tulu jë kowe la hnënge mamoe. 4 Ke e mama ha la tane la itretre thup, tro hë nyipunieti a kapa la korona ne lolo ka tha hnyiqetre kö.

5 Ketre tui nyipunie itre thupëtresij, drengethenge ju la itre xötre ka tru.* Nge nyipunieti asë, ipië* ju ketre koi ketre, ke methi Akötresie la itre ka pi tru, ngo nyidrëti pe a hamëne la ihnimi gufa koi itre ka ipië.

6 Haawe, ipië ju fene la ime ka catre i Akötresie, matre e traqa la ijin, tro nyidrëti a adraië nyipunie, 7 nge nu asë pi koi nyidrë la itre hnei nyipunieti hna hnehengazon,* ke nyidrëti a meku nyipunie. 8 Haawe, waiewekë hnyawa ju, nge hmeke jë! Ke ame Diabolo, lo ithupëjia me nyipunie, angeic a tro kösë liona ka ho, nge ka thele tha. 9 Ngo icilekeu jë me angeic, nge cile huti ju ngöne la lapaun, ke atre hë nyipunie ka hape, hna traqa fe la itre akötre cili kowe la lapa ne la itre trejin me nyipunie e cailo fen. 10 Nge thupene la tro nyipunie a pane akötr, tro hë la Akötresie ne la nöjei ihnimi gufa, a sipu apexejene la ini i nyipunie, nyidrë lo atre hë nyipunie kowe la lolo i nyidrë ka epine palua ce me Keriso. Tro nyidrëti a acatrenyi nyipunie, tro nyidrëti a aegöcatrenyi nyipunie, nge tro nyidrëti a acile huti nyipunie. 11 Epi troa eje pala hi thei nyidrë la men epine palua. Amen.

12 Jëne Silevana,* lo hnenge hna jelenyipicine ka hape, trejin ka nyipici, eni a cinyihane la tusi ka co celë matre thuecatre i nyipunie, me hamë nyine anyipicin laka, nyipi ihnimi gufa i Akötresieti la. Haawe, xölehuje ju. 13 Nge kola ibozu me nyipunie hnene la föe* e Babulona, lo hna iën tui nyipunie, me Mareko neköng. 14 Haawe, ibozu jë nyipunie nge itö idremi* ju.

Nge epi tingeting la nöjei atr ka casi me Keriso thei nyipunie.