TUS I IAKOBO

1 Eni Iakobo, hlue i Akötresie, me hlue ne la Joxu Iesu Keriso, kowe la 12 lao lapa hna isa ijen:

Bozu!

2 Madrin atraqatre jë ange trejin, e kola traqa koi nyipunie la itre itupath, 3 ke atre hi nyipunie ka hape, ame la kola tupathe tune lai la lapaune i nyipunie, nyipunieti lai a inine troa xomihni. 4 Nge nue pi tro la thiina cili, ene la xomihni, a apexejene la huliwan ej, matre pexeje pi nyipunie, me pë engazon ngöne la nöjei götran asë, nge matre tha tro kö a pë la ketre ewekë thei nyipunie.

5 Haawe, maine ketre thei nyipunie a aja inamacan, loi e tro pala hi angeic a sipo Akötresie, ke nyidrëti a hamën atrun koi nöjei atr, nge tha ka thele gele së kö. Ame hna troa hamë angeic. 6 Loi e tro pala hi angeic a sipon me lapaun, ngo tha tro kö a luelu, ke ame la atre luelu, ceitu i angeic me hoke ne gejë hna ufenyin nge hna ufagön. 7 Nyipici, the tro kö angeic a mekune troa kapa la ketre ewekë qaathei Iehova;* 8 ke atre luelu lai, nge tha ka cile huti kö ngöne la itre jë i angeic.

9 Ngo loi e tro la trejin ka pë ewekë a madrine* la hna adraië angeic, 10 nge loi e tro la trenamo a madrine la hna aipië angeic, ke tune la iengen ne hnitr, tro angeice lai a patr. 11 Ke ame la kola fetra la jö memine la idreuthin ej, fitre pi la feja, ame hna fitre pi fe la iengen, matre patre hë lo la emingömingön, ketre tun, tro fe la trenamo a patr nyipine la itre huliwa i angeic.

12 Manathith la atr ka catre xomihni nyipine la itupath, ke thupene lai, tro ha kepe angeic, me hamë angeic la korona ne mel, lo hnei Iehova* hna thingehnaean thatraqane la itre ka catre hnimi Nyidrë. 13 Nge hnine la itupath, the tro pi kö ketre a qaja ka hape: “Kola tupathi ni hnei Akötresie.” Ke thatreine kö troa tupathi Akötresie hnene la itre ewekë ka ngazo, nge thatreine kö nyidrë tupathi ketre tune lai. 14 Ngo kolo pe a isa tupathi së, me huli së, me iaö së, hnene la itre sipu aja së. 15 Matre e upune hë la aja, ame hna hnahone pi la ngazo; ketre tun, e kuca ha la ngazo, ame hna hnahone pi la mec.

16 Haawe itre trejin hniminang, the nue kö troa amenu nyipunie. 17 Ame la nöjei loi me nöjei ahnahna ka pexej, tre ka qaa hnengödrai, kola uti qaathene la Keme ne la lai ne hnengödrai. Nge tha ceitu i nyidrëti kö me itre iahnu ka enij, ke tha ka saze kö nyidrë. 18 Aja i nyidrëti lo troa hnaho së hnene la trengewekë ne nyipici, matre tro së a tune la itre pane wen ne la itre hna xupe hnei nyidrë.

19 Ange trejin hniminang, atre jë ka hape: Nyipiewekë troa saqe dreng, me hmitre ithanata, me hmitre elëhni, 20 ke ame la elëhni ne la atr, tha eje kö a eatrëne la meköti Akötresie. 21 Qa ngöne lai, thipetrije pi la nöjei ewekë ka dro, me nöjei aqane iakötrë,* nge kapa amenyikene jë la trengewekë ne iamele* hna amë ngöne la isa hni i nyipunie.

22 The tro hmekuje kö nyipunie a itretre drenge la trengewekë, wanga amenu nyipunieti pi hnene la itre mekune ka tria, ngo loi e tro fe nyipunie a itretre trongën. 23 Ke maine tro hi ketre a drenge la trengewekë me tha trongën, ceitu i angeic me ketre atr ka thuluëne la qëmeke i angeic. 24 Angeic a thulu, me tro, me canga thëthëhmine la pengö i angeic. 25 Ngo ame la atre goeëne ajuine la wathebo ka pexej, lo ka nuamacanyi së, nge ka cile huti ngön, tha ceitu i angeice kö memine lo ka canga thëthëhmi, ngo ka trongëne pe. Nge tro hë angeic a madrin ngöne la nöjei huliwa i angeic.

26 Nge maine ketre a mekune ka hape, hlue* i Akötresie angeic, ngo tha xomehnöthe pe la thineme i angeic, angeic hmaca kö a amenune la hni i angeic, nge angeice a hmi menu. 27 Ngo hane hi la pengöne la hmi ka wië nge ka pë engazon qëmeke i Akötresie Keme së, kola hape: troa thupëne la itre neköeng me itre sine föe hnine la itre akötre i angatr, me thupën matre tha tro kö a adronyi së hnene la fen.

2 Ange trejine fe, nyipunieti a hnine tune kaa la lapaun ne la Joxu ka draië Iesu Keriso, nge nyipunieti pe a ië hna hnim? 2 Ke maine tro la ketre atr ka trene otrene wanakoim gool, nge ka heetrë iheetre ka mingöming a lö hnine la icasikeu i nyipunie, nge kolo fe a lö hnene la ka pë ewekë nge ka dro iheetr, 3 hapeu, tro kö nyipunieti a kuca hnyawane la ka heetre hnyawa me hape: “Lapa ju eö e celë ngöne la göhnë ka lolo”? Nge kowe la ka pë ewekë troa hape: “Cile ju pe hi eö,” maine, “Lapa ju e celë, fene la ita ne lue cang”? 4 Nge maine nyipici hi lai, hapeu, tha nyipunieti kö a wangatrune la ketre lapa hune la ketre? Nge hapeu, tha nyipunieti kö la itretre iameköti ka amekötine angazon?

5 Drenge ju ange trejin hniminang. Hapeu, tha hnei Akötresieti kö hna iëne la itre ka pë ewekë göi fen, troa trenamo ngöne la lapaun, me kepe edröne la Baselaia, lo hnei nyidrëti hna thingehnaean thatraqane la itretre hnimi nyidrë? 6 Ngo hnei nyipunieti pe hna thaipiëne la itre ka pë ewekë. Ngo hapeu, tha itre trenamo kö lo ka wajahuji nyipunie, me uti sai nyipunie koi gaa tru? 7 Nge tha angatre kö la itre ka adrone la ëje ka mingöminge hna hamë nyipunie? 8 Ngo maine tro nyipunie enehila a trongëne hnyawa lo wathebo ka tru* hna qaja ngöne la itre hna cinyihane ka hape: “Qa i eö troa hnime la atre lapa easenyi eö, tui eö hi,” haawe, ewekë ka loi lai. 9 Ngo maine tro pala hi nyipunieti a ië hna hnim, nyipunieti a kuca la ngazo, nge kola jelengazo* nyipunie hnene la wathebo.

10 Ke maine tro ketre a trongën la nöjei Wathebo, me ena la ca götrane hi, angeice hi lai a ngazo kowe la trenge Wathebo asë. 11 Ke ame la ka qaja ka hape: “The nyixetë kö,” nyidrëti fe a qaja ka hape: “The ihumuthi kö”. Matre enehila, maine tha nyipunieti kö a nyixetë ngo nyipunieti a ihumuth, itretre eni wathebo nyipunie. 12 Ngo, pine laka, nyipunie la nöj hna nuamacan, nge tro ha ameköti nyipunie thenge la wathebo* hna kuca koi nyipunie, haawe, catre pi ithanata me ujë thenge la wathebo cili. 13 Ke ame la atre tha majemine iutipi, tha tro kö a utipi angeic ngöne la ijine iameköti. Ke ka catre kö la utipin hune la iameköti.

14 Ke nemene la eloin ange trejin, e tro ketre a selëne ka hape, ka lapaun angeic ngo pë pe huliwan? Tro kö la lapaune cili a atreine amele angeic? 15 Maine tro la itre trejin, trahmanyi maine föe a aja iheetr* me nyine xeni kowe la drai, 16 nge ketre thei nyipunie a sa koi angatre ka hape, “Tro jë memine la tingeting, nge epi tro epuni a öhnyi iheetr me nyine xen,” ngo tha hamëne pe la hnei angatre hna ajan kowe la ngönetrei, nga nemene la eloin? 17 Ketre tun, maine pëkö huliwa, ka meci lai lapaun.

18 Ngo tro ketre a qaja koi ni ka hape: “Thei eö la lapaun, nge thenge la itre huliwa. Amamai ni jë la lapaune i eö ka pë huliwan, nge tro hë ni a amamai eö la lapauneng jëne la itre huliwang.” 19 Eö a mejiune ka hape, casi hi la Akötresie? Ka loi lai. Ngo itre dremoni fe a hane mejiun me hmengöhmengön. 20 Hmo, eö kö a aja nyine anyipicine ka hape, ka gufa la lapaun e pëkö huliwa? 21 Ame Aberahama keme së, hapeu, tha hna jelemekötine kö hnei itre huliwa, lo kola huujë Isaaka nekö i angeic hune la ita ne huuj? 22 Öhne hë nyipunie ka hape, ka mele la lapaune i angeic hnene la itre huliwa, nge kola apexejene la lapaune i angeic jëne la itre huliwa i angeic. 23 Nge eatre hë lo hna cinyihane ka hape: “Hnei Aberahama hna lapaun koi Iehova,* ame hna jelemeköti angeic,” ene pe, hë angeice jë hë ka hape, enehmu i Iehova.*

24 Öhne hnyawa ha nyipunie laka, troa jelemekötine la atr hnene la itre huliwa, ngo tha hnei lapaune hmekuj. 25 Ketre tun, hapeu, tha hna hane kö jelemeköti Rahaba, lo föe ne gojeny hnene la itre huliwa i angeic, ke hnei angeic hna kapa hnyawa la lue ka alamekëne la nöj, me upi nyidro jëne la ketre gojeny? 26 Ke eje hi, meci hë la ngönetrei e patre hë la hnamano,* ketre tun, meci hë la lapaun e pëkö huliwa.

3 Tha tro kö a ala nyimu la itre ka hamë ini thei nyipunie ange trejin, ke atre hi së laka, tro kö a catrehnine la iameköti koi itre ka hamë ini. 2 Nge itre ka tria pala hi së. Matre, maine tha tria* kö ketre hnei ithanata, atre ka pexej angeic, nge ka atreine xomacone la ngönetrei angeic. 3 E tro sa ati biritine la që ne la itre hos matre drei së, tro hë sa musinëne la ngönetrei asë. 4 Nge hanawange fe la itre he: Ngacama itre iatraqatr, nge hna uf hnei itre enyi ka catr, ngo nekö i ka co hi la iuji ka amekötine la he, thenge la mekuna ne la atre xomiuj.

5 Ketre tun la thinem, neköi ka co hi ngöne la ngönetrei, ngo ej a selëne la itre ewekë ka tru. Goeëne ju la neköi eë, ijije tro ej a manith asë la hnaxulu! 6 Eë la thinem, nge ngöne la ngönetrei, ej a nyihatren la fene ka tha meköti kö, ke ej a adrone la ngönetrei asë, me angazone la mel, nge ceitun ej me Gena,* ke ej a axulune la hnëjin. 7 Eje hi, ijije hi troa amemëne la nöjei öni, me waco, me itre öni ka wewë, me itre öni ne hnagejë, nge hna amemë itre xan hnei atr. 8 Ngo pëkö ala casi ka atreine amemëne la thinem, ke pëkö ka atreine musi kow, nge ka iakötrë, nge ka tiqa hnei poizin hna mecin. 9 Nyipici, jën ej, easë a atrunyi Iehova* la Kem, ngo jën eje fe, easë a ejine la itre atr ka mel, “itre hnaiji Akötresie.” 10 Haawe, qa ngöne la ihneqë ka cas, kola ce tro la manathith me ieji.

Ngo ange trejin, tha meköti kö troa ujë tun. 11 Ke hapeu, ijije kö troa ce neni qa ngöne la qeqene ka cas, la tim ka hnyapa me ka haitr? 12 Nge ange trejin, ijije kö tro la iwacua a hamë wene oliv me wene vin? Maine itre ivin a hamë wene wacua? Ketre tun, thatreine kö la hnagejë troa hamë tim.

13 Matre drei la ka inamacan, nge ka trotrohnin thei nyipunie? Loi e troa mama hnene la aqane ujë ka loi i angeic, troa mama jëne la itre huliwa hna kuca hnene la hni ka menyik, thangane la inamacan. 14 Ngo maine tiqa ha la itre hni nyipunie hnei izalukeu me iwesitrë,* the selëne kö la inamacane i nyipunie, ke trengathoi lai. 15 Tha inamacane kö lai ka qaa hnengödrai, ngo qaa hi la fen, nge ka qene öni, nge ka xulu qaathei itre dremoni. 16 Ke e hetre zalu me iwesitrë,* hetre zikoziko mina fe, me nöjei ewekë ka ngazo.

17 Ngo ame la inamacan qaa hnengödrai, tre ka pane wië, nge ka tingeting, nge ka menyik,* nge ka canga iupe troa idrengethenge, nge ka tiqa hnei utipin me huliwa* ka loi, nge ka tha ië hna hnimi kö, nge ka tha ixöjetrij. 18 Ketre, ame la itin ne la wene ne la meköt, tre hna tran ngöne la tingeting koi* angetre melëne la tingeting.

4 Ka xulu qa kaa la itre iwesitrë me itre isi thei nyipunie?* Hapeu, tha ka xulu kö qa ngöne la itre aja i ngönetrei ka thele troa musinë nyipunie? 2 Nyipunieti a ajan ngo patre kö. Nyipunieti pala hi a ihumuth me meciun, ngo tha kapa kö nyipunie. Nge nyipunie pala hi a ifaitrë me isi. Ngo tha kapa kö nyipunie, ke tha hnei nyipunieti kö hna sipon. 3 Nge e sipone hë nyipunie, ketre tha kapa kö, ke kola sipone fë la aja ka ngazo, matre eatrëne la itre aja i ngönetrei.

4 Atre nyixetë,* thatre kö nyipunie ka hape, ithupëjia me Akötresie e troa nyi sineene la fen? Ke ame la atre thele troa nyi sineene la fen, angeice hi lai a ithupëjia me Akötresie. 5 Nge hapeu, hna cinyihane menun ka hape: “Hni së ka iuku troa piin, a huli së troa ajane catrëne la nöjei ewekë”? 6 Ngo ka sisitria kö la ihnimi gufa qaathei Nyidrë. Matre önine la itre hna cinyihan ka hape: “Akötresie a icilekeu memine la ka pi tru, ngo nyidrëti pe a hamë ihnimi gufa kowe la ka ipië.”

7 Qa ngöne lai, drengethenge Akötresieti ju, nge icilekeu ju me Diabolo, nge tro hë angeic a ananyi nyipunie. 8 Easenyi Akötresieti jë, nge tro nyidrëti a easenyi koi nyipunie. Ahmitrötrëne pi la itre ime i nyipunie, itre atre ka ngazo, nge ahmitrötrëne jë la itre hni nyipunie, itretre luelu. 9 Loi e tro nyipunie a hleuhleu, me hnë mec me treij. Nge loi e tro la itre hnyima i nyipunie a latresi, nge tro la madrine a hleuhleu. 10 Haawe, ipië ju qëmeke i Iehova,* nge tro hë nyidrëti a adraië nyipunie.

11 Nge loi ju hë hna iqej ange trejin, ke ame la atre qaja la trejin me angeic, me ameköti nyën, angeic a qejegelene la wathebo, me amekötine la wathebo. Nge e amekötine hë nyipunie la wathebo, tha itre ka trongën hmaca kö nyipunie, ngo itre ka iameköti. 12 Ngo casi hi la ka Acili Wathebo me Iameköti, lo atre ka atreine amelene me apatren. Ngo drei nyipunie matre amekötine la atre lapa easenyi nyipunie?

13 Enehila, drenge ju nyipunie angetre qaja ka hape: “Enehila maine elany, tro huni a tro kowe la traon, me lapa e cili koi ca macatre, nge tro huni a huliwa me thele mani,” 14 ngo thatre pe nyipunie la ka troa traqa koi nyipunie elany. Ke ceitu i nyipunie me wene lepany ka mama enehila, nge ka troa canga patr. 15 Haawe, loi e tro pe nyipunie a qaja ka hape: “Maine aja i Iehova,* tro sa mel, me kuca la ewekë celë maine ewekë cili.” 16 Ngo enehila, nyipunie a pi tru fë la hnei nyipunieti hna sipu selën, nge itre aqane iselë lai ka ngazo. 17 Qa ngöne lai, e atre hë ketre la aqane troa kuca la meköt, ngo tha kuca pe, ngazo hë lai koi angeic.

5 Trohemi nyipunie itre trenamo, hokötre jë nge latresi ju pine la hulö ka traqa koi nyipunie. 2 Hnyiqetre hë la itre mo i nyipunie, nge ase hë xuje la itre iheetre i nyipunie. 3 Nge xojë hë la itre gool me sileva i nyipunie nyine qajaqaja la itre ngazo i nyipunie. Nge tro ha dreuthetrije la itre ngönetrei i nyipunie hnen itre ej, ke ame la hnei nyipunieti hna xawan, tre troa tune la eë ngöne la itre drai hnapin. 4 Nge hanawang! Kolo pala hi a sue la thupen hnei nyipunieti hna cipan kowe la itre ka menuëne la itre zi i nyipunie, nge traqa ha la aqane sue cili kowe la lue hnangenyë i Iehova,* joxu ne la itre trongene isi e hnengödrai. 5 E celë fen, hnei nyipunieti hna mel nyipine la itre mo, me thatraqane la itre aja ka sis. Nge hnei nyipunieti hna agirisine la itre hni nyipunie, uti hë la drai ne ihumuth. 6 Hnei nyipunieti hna amekötine la pun, nge hnei nyipunieti hna humuth la atre ka meköt. Matre hapeu, tha nyidrëti* kö a icilekeu me nyipunie?

7 Pane treqene* ju ange trejin, uti hë la ijine celë hë la Joxu. Ke goeëne ju la atre eëny! Angeic a treqene troa kapa la wen qaathene la ihnadro, matre angeic pala hi a treqene la itre pane mani, me itre mani tixenuë. 8 Haawe, ketre catre pi fe nyipunie xomihni; nge aegöcatrene jë la itre hni i nyipunie, ke calemi hë la ijine celë hë la Joxu.

9 The eetre* kö pine la itre xan ange trejin, matre tha tro kö a ameköti nyipunie. Ke hanawang! Cile hë la Atre Iameköti ngöne la qëhnelö. 10 Nge ange trejin, xomi tulu jë thene la itre perofeta ka ithanata ngöne la ëje i Iehova,* ke hnei angatre hna xomiakötr me itreqe. 11 Nge hanawang! Eahuni a qaja ka hape, ka madrine* la itretre cile hut. Ke ase hë nyipunieti drenge lo aqane cile hut i Iobu, me aqane amanathithi angeic hnei Iehova.* Nge öhne fe hë nyipunie laka, ka nyipi menyike* la ihnimi i Iehova* nge ka iutipi.

12 Nge ame la ka nyipiewekë ange trejin, loi ju hë hna sisiny göne la hnengödrai maine ihnadro, maine nöjei isisinyikeu. Ngo epi tro la “Öö” i nyipunie a öö, nge “Waea,” waea, matre tha tro kö a othi nyipunie göi troa amekötin.

13 Hetre atre kö ka mele hnine la itupath thei nyipunie? Loi e tro angeice a catre thith. Nge hetre ka madrine kö? Loi e tro angeic a nyimane la itre salamo. 14 Nge hetre ka wezipo kö thei nyipunie? Loi e tro angeice a hëne la itre qatre thup ne la ekalesia, nge tro angatr a thithi sai angeic, me nei oel hui angeic ngöne la ëje i Iehova.* 15 Nge tro la thithi ne lapaun a aegöcatrene la wezipo,* nge tro Iehova* a amejë angeic. Ketre, maine hnei angeic hna kuca la ngazo, tro ha nue la ngazo i angeic.

16 Qa ngöne lai, iqajakeune jë la itre ngazo i nyipunie, nge itö ithithi sai ju, matre aloinyi nyipunie. Ke ka hetre thangane catre* la thithi ne la atre ka meköt. 17 Ame Elia lo, tre ketre atr ka tu së hi, nge casi hi la itre aliene hni së me angeic. Nge ame lo angeic a thith matre tha tro kö a mani, tha trotro pi kö la mani ngöne la nöj koi köni macatre nge sikisi lao treu. 18 Angeic a thithi hmaca ju, ame hna trotro pi la mani qaa hnengödrai, nge cia xeni jë hi la nöj.

19 Haawe ange trejin, maine tro la ketre thei nyipunie a iananyi memine la nyipici, nge tro la ketre a abëekë angeic, 20 atre ju ka hape, ame la atre abëekëne la trejin qa ngöne la gojenyi ka menu, angeice hi lai a amelene la trejin* qa ngöne la mec, me hetrëne la nöjei ngazo.