KOI ANGETRE HEBERU

1 Ame ekö, nyimu aqane ithanata Akötresie kowe la itre qaaqaa së, nge anyimua ithanata nyidrë jëne la itre perofeta. 2 Ngo enehila, ngöne la itre drai tixenuë ne la hnedrai celë,* nyidrëti a ithanata koi së jëne la Nekön, lo hnei nyidrëti hna acil hun asë, me hna nyi jëne matre eköth la nöjei hnedrai. 3 Neköne la hnaiji ne la lolo i Akötresie, nge nyidrëti hnyawa hi la hnaiji i Nyidrë [maine, “Akötresie”]. Nge nyidrëti a sajuëne la nöjei ewekë asë hnene la trengewekë ka mene i nyidrë. Matre, thupene la hnei nyidrëti hna awië së qa ngöne la itre ngazo së, nyidrëti a lapa ju ngöne la götrane maca ne la Akötresie Ka Draië e hnengödrai. 4 Nge pine laka, ase hë nyidrë kapa la ketre ëj ka sisitria hune la itre angela, sisitria kö nyidrëti hui angatr.

5 Ke hanawang, drei hmaca ju kö la ketre angela hnei Akötresie hna qaja kow ka hape: “Hmunë la neköng; enehila, eni hë la keme i hmunë”? Nge: “Tro hë ni a keme i angeic, nge tro angeic a neköng”? 6 Nge ame hë la nyidrëti a upe hmaca la Neköne haetra i nyidrë nyipine la itre atr, öni nyidrë: “Epi tro la nöjei angela i Akötresie a thili koi angeic.”

7 Nge öni nyidrëti hmaca jë göi itre angela ka hape: “Nyidrëti a kuca matre, u ka men la itre angela, nge kösë ukahlokine eë la itre hlue i nyidrë.” 8 Ngo ame göi Nekön öni nyidrë: “Akötresie la therone i eö epin, epine palua, nge ame la sine tö ne la Baselaia i eö, tre sine tö ne la meköt. 9 Eö a hnine la meköt me methinëne la ka eni wathebo, celë hi matre Akötresie, lo Akötresi eö, a ië eö hnei oel, me hamën atrune koi eö la madrin hune lo itre xa joxu.” 10 Nge: “Ngöne lo qaan Joxu fe, hnei nyipëti hna ami trepene la fen, nge itre hnengödrai la huliwa ne la lue ime i nyipë. 11 Tro itre eje lai a patr, ngo tro pala hi nyipëti a ej, nge tune la ketre iheetr, tro itre ej asë a hnyiqetr. 12 Tro nyipëti a ewath itre ej tune la ikootr, me saze tune la iheetr. Ngo tha tro kö nyipëti a saze, nge ka pë pune la itre macatre i nyipë.”

13 Nge drei angela lo hnei Akötresieti hna qaja kow ka hape: “Lapa ju ngöne la götrane macang, uti hë la tro ni a amë la itre ithupëjia me hmunë fene la lue ca i hmunë”? 14 Hapeu, tha itre angela kö la itre u thatraqane la huliwa ka hmitrötr, nge hna up troa nyihluene la itre hna troa amelen?

2 Celë hi matre nyipiewekë koi së troa mekune hnyawa la itre ewekë hne së hna dreng, wanga nanyi pi së qa ngöne la lapaun. 2 Ke maine nyipici lo itre trengewekë ne la itre angela, nge hna nyipun thenge la meköt la nöjei tria me tha idrei, 3 haawe, tro sa mele tune kaa e hne së hna wangesixane la iamele ka tru? Ke Joxu së la ka nyiqaane qeje iamele, nge hna anyipicine koi së hnene lo itre ka drei nyidrë. 4 Ketre, hnei Akötresieti fe hna anyipicine lai jëne la itre iamamanyikeu, me itre ewekë nyine hain, me nöjei huliwa ka men, me anyipicine hmaca hnene la hna isa thawa la uati hmitrötr thenge la aja i nyidrë.

5 Nge tha hnei Akötresieti kö hna aijijëne la itre angela troa musi kowe la fene ka troa traqa, la hne së hna ithanatan. 6 Ngo ngöne la ketre götran, önine la ketre atre anyipicine ka hape: “Nemene la atr matre tro nyipëti a meku angeic, maine nekö i atr matre tro nyipëti a thupën? 7 Hnei nyipëti hna nango aconyi angeic fene la itre angela, nge hnei nyipëti hna hamëne la lolo me iatruny nyine korona i angeic, me acili angeic hune la itre huliwa ne la lue ime i nyipë. 8 Nge hnei nyipëti hna amë la nöjei ewekë fene la lue ca i Keriso.” Haawe, pine laka, ase hë Akötresie amë la nöjei ewekë fene la lue ca i angeic, pëkö ketre ewekë hnei angeic hna thatreine musi kow. Ngo enehila, tha öhnyi Iesu petre kö së a kola musi kowe la nöjei ewekë asë. 9 Ngo öhnyi Iesu hë së, lo hna nango acon fene la itre angela, nge enehila, ase hë nyithupei nyidrë hnei lolo me iatruny, ke hnei nyidrëti hna akötr me mec. Matre qa ngöne la ihnimi gufa i Akötresie, ase hë Iesu tupathe la mec thatraqane la nöjei atr asë.

10 Akötresie la qaane la nöjei ewekë, nge hna xup itre ej pine la lolo i nyidrë. Haawe, maine kola ajane troa hamëne la lolo koi nöjei nekön, nyipiewekë tro Akötresie a pane apexejene la Atre Itrosai kowe la mel jëne la itre akötr. 11 Ke ame la atre ahmitrötrën, me itre hna ahmitrötrën, angatr asë hi a xulu qaathene la kem ka cas, matre tha hmahma kö Iesu troa hë angatre ka hape, itre trejin. 12 Öni nyidrëti lo: “Tro ni a qaja la ëje i nyipë kowe la itre trejin me eni, nge nyipine la ekalesia, tro ni a atrunyi nyipë jëne la itre nyima.” 13 Nge ketre: “Tro ni a mejiune koi nyidrë.” Nge ketre hmaca: “Hanawang! Ce eni me itre nekönatr hnei Iehova* hna hamë ni.”

14 Nge pine laka, hna xupe la itre “nekönatr” hnei madra me ijön, haawe, hnei nyidrëti fe hna hane mama ngöne la madra me ijön. Qa ngöne lai, jëne la mec i nyidrë, ijije tro nyidrëti a apatrene la ka atreine ihumuth, ene Diabolo, 15 matre nuamacane* la itre hna thahluën hnene la xoue mec ngöne la mele i angatre ka pexej. 16 Tha itre angela kö la hnei nyidrëti hna xatuan, ngo matra* i Aberahama pe. 17 Qa ngöne lai, ngöne la nöjei götran, tro hë nyidrëti a tune la itre “trejin” me nyidrë, matre tro nyidrëti a atre huuj ka sisitria ka iutipi, me ka nyipici kowe la itre ewekë i Akötresie, matre huujëne la huuj nyine he* la ngazo ne la nöjei atr. 18 Ketre, pine laka, ase hë akötrë nyidrë hnene la itupath, ijiji nyidrëti hi troa xatuane la itre hna tupath.

3 Qa ngöne lai ange trejin ka hmitrötr, itre ka ce thawa la ihë qaa hnengödrai, mekune hnyawa ju la aposetolo me atre huuj ka sisitria hne së hna atrepengön—Iesu. 2 Hnei nyidrëti lo hna nyipici kowe la Atre acili nyidrë, tune lo aqane ujë i Mose nyipine la hnalapa i Akötresie. 3 Ijije troa sisitria la aqane atrunyi Iesu hui Mose, ke kola atrune asisitriane la atre xupi uma hune la uma. 4 Eje hi, kola cile la nöjei uma ke hetre atre xup, ngo Akötresie la atre xupe la nöjei ewekë asë. 5 Nge hnei Mose, hlue hna acil hune la hnalapa i Akötresie asë, hna nyipici ngöne la hnëqa cili, matre anyipicine la itre ewekë ka troa traqa. 6 Ngo hnei Keriso, lo nekön hna acile hune la hnalapa i Akötresie, hna nyipici ngöne la hnëqa cili. Easë la hnalapa i Nyidrë, e tro pala hi së a catre cainöj, me xölehuje uti hë la pun lo mejiun hne së hna mama fë.

7 Celë hi matre önine la uati hmitrötr ka hape: “Enehila, maine nyipunieti a drenge la aqane ewekë i angeic, 8 the axetine kö la itre hni i nyipunie tune lo ijine kola amejëne la elëhni ngöne lo drai ne itupath hnine la hnapapa. 9 Lo kola tupathi ni hnei itre qaqaa i nyipunie, ngacama 40 hë lao macatre ne öhn angatre la itre huliwang. 10 Celë hi matre, hnenge hna sisine la xötr atre cili me hape: ‘Angatre pala hi a tro thenge la itre aja ne la itre hni angatr, nge tha trotrohnine pala kö angatr la itre jëng.’ 11 Qa ngöne lai, hnenge hna sisiny ngöne la elëhning: ‘Tha tro jë kö angatr a hane lö hnine la hnë manong.’ ”

12 Haawe ange trejin, wange pala kö, wanga cia jë thei ketre la hni ka ngazo ka pë lapaun, nge iananyi pi nyipunie qaathene la Akötresie ka mel. 13 Matre e nöjei drai, catre pi ithuecatrekeu, nge easë pala kö ngöne la drai hna hëne ka hape, “Enehila.” Qa ngöne lai, the tro pi kö ketre a axetine la hni angeic hnene la mene ka iaö ne la ngazo. 14 Ke tro hë sa ce thawa me Keriso, e hne së hna xölehuje catrën uti hë la pun lo mejiune së hnaapan, 15 thenge lo hna qaja ka hape: “Enehila, maine nyipunieti a drenge la aqane ewekë i angeic, the axetine kö la itre hni nyipunie tune lo ijine kola amejëne la elëhni.”

16 Ke drei lo itre ka pane dreng me amejëne la elëhni nyidrë? Hapeu, tha kolo kö lo itre ka tro qaa Aigupito fei Mose? 17 Nge drei la itre hnei Akötresieti hna xelene ngöne la 40 lao macatre? Hapeu, tha kolo kö lo itre ka kuca la ngazo, ame hna kei pi la itre ngönetrei ka mec i angatr ngöne la hnapapa? 18 Nge koi drei la hnei nyidrëti hna sisinyi laka, tha tro kö a lö hnine la hnë mano i nyidrë? Hapeu, tha koi itre ka tha idrei? 19 Haawe, kola mama hnyawa laka, tha lö ju kö angatr pine angatr pë lapaun.

4 Ngo pine laka, eje pala hi lo hna thingehnaeane troa lö hnine la hnë mano i nyidrë, wai së kö,* wanga tha ijiji ketre pi troa hane lö. 2 Nyipici, ase hë cainöjëne koi së la maca ka loi, tune lo aqane kuca koi angatr; ngo pë ju kö thangane la itre trengewekë hnei angatre hna dreng, ke tha casi kö angatr jëne la lapaun me itre ka idrei. 3 Ngo ame pe së itretre lapaun, easë a lö hnine la hnë mano i nyidrë. Matre ame koi angatr, hnei nyidrëti lo hna qaja ka hape: “Hnenge hna sisinyi ngöne la elëhning, ‘Tha tro jë kö angatr a hane lö hnine la hnë manong,’ ” ngacama ase hë la itre huliwa i nyidrë qaane lo kola nyitrepene la fen. 4 Ke ame ngöne la ketre götran, hnei nyidrë hna qaja göne la hnaasevenene drai ka hape: “Ame hnei Akötresie hna mano la hnaasevenene drai thupene la nöjei huliwa i nyidrë.” 5 Nge öni nyidrëti hmaca kö: “Tha tro jë kö angatr a hane lö hnine la hnë manong.”

6 Ame la itre ka pane drenge la maca ka loi, tha lö kö angatre hnine la hnë mano i nyidrë pine angatre tha idrei, ngo ijije pala kö koi itre xan. 7 Celë hi matre itre hneijine thupen, hnei Akötresieti hmaca hna qaja atrun la ketre drai ngöne la salamo i Dravita, me hape: “Enehila;” tune lo hna qaja ha ngöne la tusi celë: “Enehila, maine nyipunieti a drenge la aqane ewekë i angeic, the axetine kö la itre hni nyipunie.” 8 Ke maine hnei Iosua ju hna lö sai angatr hnine la hnë mano, tha tro hmaca kö Akötresie e thupen a sa la ketre drai. 9 Haawe, hetrenyi pala kö la ketre drai ne mano tune la drai sabath, thatraqane la nöje i Akötresie. 10 Matre ame la atre lö hnine la hnë mano i Akötresie, angeice fe a hane mano thupene la itre huliwa i angeic, tune lo aqane kuca i Akötresie thupene la itre huliwa i nyidrë.

11 Qa ngöne lai, epi tro pala hi sa isine troa lö hnine la hnë mano cili, matre tha tro pi kö ketre a kei me xötrethenge la tulu ne tha idrei celë. 12 Ke ka mele me mene la trengewekë i Akötresie, nge ka idrei kö hune la taua ka lue ulan, nge ej a thin ajuine la atr matre mama pi la pengöi angeic e hnin me e trön. Nge ej a lö uti hë la itre hnaitöjun me ixëtren, nge atreine hi ej isa waipengöne la itre mekun me itre aja ne la hni. 13 Ke pëkö ewekë hna xupe ka sihngödri koi nyidrë, ngo mama asë hi la nöjei ewekë, nge lualai asë kowe la lue meke ne la atre hne së hna troa isa qeje thiinane kow.

14 Qa ngöne lai, pine laka hetrenyi hë së la ketre atre huuje ka sisitria, atre trongëne la hnengödrai, ene Iesu Nekö i Akötresie, epi tro pala hi sa qaja catrëne la lapaune së koi nyidrë. 15 Nge ame lai atre huuje së ka sisitria, trotrohnine i nyidrë la itre tria së, ke ngöne la nöjei götran, hna hane tupathi nyidrë tu së, ngo ka pë pe ngazo i nyidrë. 16 Haawe, epi tro sa easenyine la theron ne la ihnimi gufa me tha xou troa thith, matre kapa jë së la utipin, nge öhne jë së la ihnimi gufa nyine xatua së ngöne la nyipi ijin.

5 Ke ame la nöjei atre huuj ka sisitria thei itre atr, hna acili angatr hune la itre ewekë i Akötresie nyine loi kowe la atr, matre ijije tro angatr a hamë ahnahna, me huuj göne la itre ngazo. 2 Matre ame la atre huuj ka sisitria, ijije tro angeic a utipine* la itre ka kuca thatrene la ngazo, ke atre ka ngazo fe angeic. 3 Nge pine lai, nyipiewekë fe tro angeic a tro fë huuj thatraqane la itre ngazo i angeic, tune la aqane kuca i angeic koi itre xan.

4 Ngo eje hi laka, thatreine kö ketre sipu acili angeice troa atre huuj ka sisitria, ngo Akötresieti hmekuje hi la ka ijij, tune lo aqane kuca i nyidrë koi Arona. 5 Celë hi matre tha hnei Keriso kö hna sipu atrunyi nyidrë, me xome la hnëqa ne atre huuj, ngo hna atrunyi nyidrë hnene lo Atre qaja koi nyidrë ka hape: “Hmunë la neköng, nge enehila, eni hë la keme i hmunë.” 6 Nge öni nyidrëti hmaca kö ngöne la ketre götran ka hape: “Eö hi la atre huuj ka epine palua tui Melekisedek.”

7 Matre ame lo Keriso pala kö e celë fen,* hnei nyidrëti hna tro fë kowe la Atre atreine amele nyidrë qa hna mec, la itre xëwe me itre sipo hna sue catre fë ce me trenge timidra. Ame hna drei nyidrë, ke hnei nyidrëti hna xoue Akötresie. 8 Haawe, ngacama Neköne nyidrë, ngo hnei nyidrë hna inine troa idrengethenge, jëne la itre ewekë hnei nyidrë hna melën. 9 Nge ame ju hi la nyidrëti a pexej, acili nyidrëti jë hi troa jëne iamele epine palua kowe la nöjei atre ka drengethenge nyidrë, 10 ke ase hë Akötresie ië Keriso troa atre huuj ka sisitria tui Melekisedek.

11 Nyimu ewekë pala kö nyine troa qaja göi nyidrë, ngo jole e troa qejepengön, ke simi hë la itre hnangenyë i nyipunie. 12 Ke maine ju, itre ka hamë ini hë nyipunie, ngo enehila,* nyipiewekë hmaca tro la ketre a ini nyipunie lo itre pane ini ne la trengewekë i Akötresie, kösë bëeke hmaca ha nyipunie koi melek, nge tha ijiji nyipunieti kö la nyipi xen. 13 Nge ame la hna ithuan hnei melek, tha trotrohnine kö angeice la itre trengewekë ne la meköt, ke medrenge lai. 14 Ngo ame la nyipi xen, tre thatraqane la itre ka macaj, itre ka majemine huliwane la atreine i angatr troa wangatrehmekune la loi me ngazo.

6 Haawe, pine laka, ase hë së inine la itre pane ini göi Keriso, loi e tro sa isine troa macaj. Ngo tha kolo kö a hape, troa ami ketre trepen hune la trepene celë: ietrane la itre huliwa ka gufa, me lapaune koi Akötresie, 2 me ini göi bapataiso, me ati ime hui ketre, me mele hmaca, me iameköti ka epine palua. 3 Nge maine aja i Akötresie, tro hë së a hane macaj.

4 Ame kowe la itre hna alain, nge ka tupathe la ahnahna hna hamëne gufan qaa hnengödrai, itretre ce thawa la uati hmitrötr, 5 me tupathe la trengewekë ka lolo i Akötresie, me itre manathithi* nyine kapa ngöne la fene* ka troa traqa, 6 e tro angatr a trotrije la nyipici, pëkö ietra ka ijije koi angatr, ke kösë angatre hmaca a athipe la Nekö i Akötresie hune la sinöe, me ahmahmanyi nyidrë qëmekene la ka ala nyim. 7 Ke manathithi kowe la ihnadro la itre mani qaathei Akötresie, itre ej a thue imene lapane la dro, ame hna cia pi la itre feja ka nyipiewekë koi itre hna eënyine kow. 8 Ngo maine tro ej a aciane la itre ka ithinyi me itre hnitr, dro ka ngazo lai, nge easenyi hë tro Akötresie a ejin, nge ame hë la pun, tro ha dreuthetrij ej.

9 Ngacama eahuni a qaja lai, ngo ame göi nyipunie itre hnimina, xecie hnyawa koi huni ka hape, lolo catre kö nyipunie hune la itre ka trotrije la nyipici, ke thei nyipunie la itre ewekë ka itroxom kowe la iamele. 10 Ke ka meköti pala hi Akötresie, matre thatreine kö nyidrëti thëthëhmine la itre huliwa i nyipunie, me ihnim hnei nyipunieti hna amamane kowe la ëje i nyidrë, ene lo itre huliwa i nyipunie ekö me enehila kowe la ange ka hmitrötr. 11 Ngo aja huni tro nyipunie a isa amamane la ca aqane akötrehni huliwa, matre xecie hnyawa pi la mejiune i nyipunie uti hë la pun. 12 Qa ngöne lai, the genyi kö, ngo nyitipune jë lo itre ka kapa la hna thingehnaean, ke hnei angatre hna lapaun me xomihni.

13 Ame lo ijine Akötresie a thingehnaeane la ketre ewekë koi Aberahama, hnei nyidrëti hna sisiny ngöne la sipu ëje i nyidrëti kö, ke pë hmaca ju kö ka draië hui nyidrë. 14 Matre öni nyidrë: “Tro kö ni a amanathithi eö, nge tro kö ni a kuca matre mana pi eö.” 15 Haawe, thupene la hnei Aberahama hna pane xomihni, angeic a kapa jë lo ewekë hna thingehnaean. 16 Ngo ame la kola qaja la ketre ewekë hnei itre atr, angatr a sisiny ngöne la ëje ne la ka draië hui angatr, nge celë hi ka nyipune la itre iwesitrë, ke kolo hi lai a anyipicine la hnei angatre hna qaja. 17 Hnei Akötresieti fe hna hane ujë tun matre amamane koi itre ka troa kepe edrö ka hape, tha tro jë kö a tria lo aja* i nyidrë. Hnei Akötresieti hna anyipicine* lai jëne la ketre isisinyikeu. 18 Haawe, jëne la isisinyikeu i nyidrë me itre hnei nyidrëti hna thingehnaean, tro hë së, itre ka zae thei Akötresie a xölehuje catrëne lo mejiune së, ke ase hë së kepe ithuecatr. Eje hi, thatreine kö nyidrëti thoi, nge tha tro jë kö a saze lo isisinyikeu i nyidrë, me itre hnei nyidrëti hna thingehnaean. 19 Nge the së la mejiune cili kösë iuhni kowe la mele së, iuhni ka tha uk nge ka catr. Nge ej a troxomi së tröne la maano ne thewe hnahag, 20 lo hna lö kow thatraqa së hnene la atre tro pa, ene Iesu, hna acil epine palua troa atre huuj tui Melekisedek.

7 Nge hnene lai Melekisedek cili, joxu ne Salema nge atre huuj ne la Akötresie ka draië catr, hna iöhnyi me Aberahama, lo nyidrëti a bëeke qa hna ngaane la itre joxu, ame hnei nyidrëti hna amanathithi angeic. 2 Matre Aberahama a hamë* nyidrëti pi la hnaatrenene la nöjei ewekë asë. Nge ame la ëje i nyidrë, kola hape “Joxu ne la Meköt,” nge ketre, nyidrëti fe la joxu ne Salema, kola hape, “Joxu ne Tingeting.” 3 Nge pine laka, pëkö keme me thine i nyidrë, nge pëkö xötre qaaqaa i nyidrë, nge tha hna cinyihane kö la drai ne hnahon me mec i nyidrë, matre kösë Nekö i Akötresie nyidrë. Haawe, nyidrëti a atre huuj epine palua.

4 Hane petre hi la ketre atr, lo hnei Aberahama, he ne hnepe lapa, hna hamëne kow la itre hnaatrenene ewekë hnei angeic hna thapa ngöne isi. 5 Nyipici, thenge la Wathebo, hna amekötine kowe la itre nekö i Levi, lo itre hna acile troa atre huuj, troa kapa la hnaatrenen qaathene la itre atr, ene la itre trejin me angatr, ngacama itre xa matra* i Aberahama hi angatr. 6 Ngo hnene la atre cili hna kapa la hnaatrenen qaathei Aberahama, ngacama tha ka xulu kö nyidrë qaathene la lapa i Levi, ame hnei nyidrëti hna amanathithine lai atre kapa lo hna thingehnaean. 7 Haawe, mama hnyawa ha ka hape, kola amanathithin la ka co, hnei ka tru. 8 Matre ngöne la ketre ijin, hna kapa la hnaatrenen hnene la itre ka troa mec, nge ngöne la ketre ijin, hna kapa lai hnene la atre hna anyipicin ka hape, ka mele nyidrë. 9 Qa ngöne lai, ijije tro sa qaja ka hape, hnei Levi, lo atre kapa la hnaatrenen, hna hane kuiëne fe la hnaatrenen jëne Aberahama, 10 ke angeice pala kö hnine la qaaqaa i angeic, ene Aberahama, lo nyidrëti a iöhnyi me Melekisedek.

11 Ngo maine nyipici ka hape, tro ha pexeje la itre atr jëne la itretre huuj ka xulu qaathei Levi (ke ewekë lai hna amekötin kowe la nöj) hnauëne hö laka, ka nyipiewekë pala kö troa hetre atre huuj tui Melekisedek, ngo tha tui Arona pe? 12 Nge maine ka nyipiewekë troa saze la aqane huuj, nga ka nyipiewekë fe troa saze la Wathebo. 13 Ke ame la atre hna qejepengön hnene la itre ewekë cili, tre ka xulu qaathene la ketre lapa, lo tha hna aijijëne kö troa hane huliwa ngöne la ita ne huuj. 14 Ngo mama hi ka hape, ka xulu la Joxu së qaa Iudra, nge pë fe kö hna qaja hnei Mose göne la itretre huuj ka troa fetra qa ngöne la lapa cili.

15 Ngo lualai pi hi la kola traqa hnene la ketre atre huuj ka tui Melekisedek, 16 lo hna acil, ngo tha qa ngöne ngönetrei me itre xötre matran, ngo thenge la mene ne la mel ka tha hnyiqetre kö. 17 Ke hna qaja nyine anyipicine koi nyidrë ka hape: “Eö hi la atre huuj ka epine palua tui Melekisedek.”

18 Qa ngöne lai, hna apatrene lo wathebo hnapan, ke ka hetre ifegon nge ka hmaca të. 19 Nge pëkö hna apexejene hnene la Trenge Wathebo cili, ngo tha tune kö kowe la mejiune së ka sisitria, ka aijijë së troa easenyi koi Akötresie. 20 Ketre, tha hna acile kö la atre huuje cili nge tha pane sisinyi kö, 21 (ke eje hi, hetre itre atre huuj hna acil ngo tha hna sisinyi kö, ngo ame la atre cili, hna acili nyidrë pine la ketre isisinyikeu, isisinyikeu hna kuca göi nyidrë hnene la Atre qaja ka hape: “Ase hë Iehova* sisiny, nge tha tro pi kö nyidrëti a saze mekun,* ‘Eö la atre huuj ka epine palua.’ ”), 22 matre Iesu hi la enyipicine* la isisinyikeu ka sisitria. 23 Ngo ame la itre xa atre huuj, hnei angatre hna inyihnai pine la mec, ke mec a sewe angatr troa cilëne paluane la hnëqa cili. 24 Ngo ame nyidrë, pine laka, ka pë pune la mele i nyidrë, pëkö atre huuj ka troa nyihna i nyidrë. 25 Qa ngöne lai, ijije tro nyidrëti a amelene hnyawa la itre ka easenyi Akötresie jëne nyidrë, ke ka mele pala hi nyidrë, göi troa xëwe sai angatr.

26 Matre nyidrëti hnyawa hi la atre huuj ka loi koi së, atre ka mele nyipici nge ka pë engazon, me pë trian, nge ka isapengöne me itretre kuca la ngazo, nge ka draië hune la itre hnengödrai. 27 Isapengö i nyidrëti kö me itre atre huuje ka sisitria, ke tha nyipiewekë kö tro nyidrëti a huuj e nöjei drai. Hnapan, kowe la itre ngazo i nyidrë, nge hnaaluen, kowe la itre ngazo ne la nöj, ke ase hë nyidrëti aca kuca lai thatraqane la nöjei hneijin, lo nyidrëti a huujë nyidrëti kö. 28 Ame la Wathebo, ej a acile la itre atre huuj ka ngazo, ngo ame la trengewekë ne la isisinyikeu hna kuca thupene la Wathebo, ej a acile la Nekön, lo hna apexejen epine palua.

8 Nge hane hi la mekune ka tru ne la itre ewekë hne së hna ithanatan: Hetre atre huuje së ka lapa ngöne la götrane maca ne la theron ne la Akötresie ka draië e hnengödrai, 2 nge nyidrëti la hlue* ne la götrane gaa hmitrötr, me hlue ne la nyipi taat,* lo hna acile hnei Iehova,* ngo tha hnei itre atre kö. 3 Ke hna acile la nöjei atre huuj troa tro fë la itre ahnahna me itre huuj, matre nyipiewekë fe tro Iesu a hane tro fë huuj. 4 Nge maine nyidrëti ju e celë fen, tha tro pi kö nyidrë a atre huuj, ke hetrenyi hë la itre ka tro fë huuj thenge la Wathebo. 5 Nge itre huliwa i angatr a nyihatren la itre ewekë e hnengödrai. Nge hna anyipicine lai ngöne lo Akötresieti a amekötine koi Mose la aqane troa cane la uma maano. Öni nyidrë: “Trongëne hnyawa jë la itre ewekë celë nyine tulu, thenge lo hnenge hna amamane koi eö hune la wetr.” 6 Ngo enehila, ase hë Iesu kapa la huliwa ka sisitria catr, ke nyidrëti fe la atre ialoinekeun ngöne la ketre isisinyikeu; ame la isisinyikeu cili, tre hna amekötin thenge la wathebo, nge hna amë ngöne la trepene ka catr, ene la itre hna thingehnaean ka sisitria.

7 Maine ka pë ju engazon lo pane isisinyikeu, tha nyipiewekë kö troa hetre hnaaluen. 8 Ngo hetre ngazo hna öhn thene la itre atr, ke öni nyidrë: “ ‘Hanawang! Easenyi hë la ijin,’ öni Iehova,* ‘laka, tro ni a kuca la isisinyikeu ka hnyipixe memine la nöje Isaraela, me nöje Iudra. 9 Tha tro kö a tune la isisinyikeu hnenge hna kuca me itre qaaqaa i angatr, lo eni a ea catrëne la itre ime i angatr, me troxomi angatr qa Aigupito, ke tha hnei angatre kö hna metrötrëne la isisinyikeung. Haawe, tha thupë angatr hë ni,’ öni Iehova.*

10 “ ‘Ke celë hi isisinyikeu hnenge hna troa kuca memine la hnalapa i Isaraela, thupene la itre drai cili,’ öni Iehova.* ‘Tro ni a amë la itre wathebong hnine la itre mekuna i angatr, me cinyihan itre ej ngöne la itre hni angatr. Nge tro ni a Akötresi angatr, nge tro angatr a nöjeng.

11 “ ‘Nge tha tro hmaca kö angatr a isa inine la itre atrene la nöje i angatr, me itre trejin me angatr, me hape: “Atrepengöi Iehova* jë!” Ke tro angatr asë a atre ni, qaane ju hi la ka co uti hë la ka tru e angatr. 12 Nge tro ni a nue la itre huliwa ka tha meköt i angatr, nge tha tro hmaca kö ni a mekune la itre ngazo i angatr.’ ”

13 Matre ame la nyidrëti a qaja ka hape, “isisinyikeu ka hnyipixe,” nyidrëti lai a jele ka hekön lo hnapan. Nge ame la ewekë ka hnapane hë nge ka hekö, ka tro lai a patr.

9 Nge ame ngöne lo isisinyikeu hnapan, hetre wathebo göne la itre huliwa ka hmitrötr me götrane gaa hmitrötr e celë fen. 2 Ke hna xupe lo pane götran ne la uma maano, lo hnë amë la ita ne laam, me laulau, me itre areto* nyine amamane koi Akötresie. Götrane lai hna hëne ka hape, götrane Gaa Hmitrötr. 3 Nge thupene lo hnaaluene imaano ne thewe hnahag, kolo götrane la uma mano hna hëne ka hape, Gaa Nyipi Hmitrötr. 4 Nge e cili la nyine dreu sinöe ka pui loi hna kuca hnei gool, memine lo pua ne isisinyikeu hna pele goolën, memine lo treng hna kuca hnei gool nyine qatrenge lo mana me sine tö i Arona ka eng, me lue sine etë hna sija lo wathebo. 5 Nge hune la pua, hetrenyi la lue kerubi ka draië, nge kola hakuthe la ita ne ialoiny* hnene la iahnue i nyidro. Ngo tha ijine tro kö a ithanatane atrune la itre ewekë cili.

6 Thupene la kola ase xupe tun la itre ewekë cili, hnene la itre atre huuj hna majemine lö hnine la pane götran ne lo uma maano, matre eatrëne lo huliwa ka hmitrötr. 7 Ngo ame la atre huuj ka sisitria, tro hmekuje hi angeic a aca lö ngöne la macatre kowe la hnaaluene götran, nge nyipiewekë tro angeic a lö fë la madra nyine huuj thatraqai angeic, me thatraqane la itre ngazo hna kuca thatren hnene la itre atr. 8 Nge uati hmitrötr a amamane hnyawa ka hape, ame la jë ne tro kowe la gaa nyipi hmitrötr, tre tha mama pala kö ngöne lo ijine cile la pane uma maano. 9 Matre, kola nyihatrene la hneijine celë hnene la uma maano, nge thenge lo hna amekötin, kola ce tro fë la huuj me ahnahna. Ngo ame pe, thatreine kö la lue ewekë cili awiëne la mekuthetheu ne la atre ka huliwa i Akötresie, 10 ke kolo hi a eatre koi xen, me nyine ij, me itre aqane troa iahmitrötrë.* Itre ewekë lai hna amekötin thatraqane la ngönetrei, nge hna amekötin uti hë la ijine hna sa göi troa xom amekötine la nöjei ewekë.

11 Ngo ame la Keriso a traqa me nyi atre huuj ne la itre ewekë ka lolo, nge ka eje hë, hnei nyidrëti hna lö kowe la ketre uma maano ka tru catre hmaca kö, nge ka pexeje hnyawa, tha hna kuca hnei wanakoim, kola hape, tha ka qaa kö la fen. 12 Ame hnei nyidrëti hna lö kowe la ketre götrane ka hmitrötr, ngo tha hna lö fë la madra ne nani maine neköi kau, ngo hna aca lö fë hi la sipu madra i nyidrë, matre nuamacanyi* së epine palua. 13 Ke maine hna ahmitrötrëne la ngönetrei hnene la madra ne la itre nani, me itre kau, me hnatresij ne la itre neköi kau hna kuikuiën hune la itre atre ka ngazo, 14 nga tha nyine qaja pala ha la madra i Keriso, ke jëne la ua ka epine palua, hnei nyidrëti hna huujë nyidrë ka pë ngazon koi Akötresie. Nge kolo lai a ahmitrötrëne la itre mekuthetheu së qa ngöne la itre huliwa hna mecin, matre troa nyihluene la Akötresie ka mel.

15 Celë hi matre nyidrëti la atre ialoinekeun ngöne la isisinyikeu ka hnyipixe, matre, tro la itre hna hën a kapa lo edrö ka epine palua hna thingehnaean. Nge tro ha traqa la itre ewekë cili hnene la meci nyidrë, ke jëne la thupene mel, kola nuamacanyi angatr qa ngöne la itre ngazo hna kuca fene lo isisinyikeu hnapan. 16 E hetre isisinyikeu, nyipiewekë troa pane meci lai atre kuca la isisinyikeu. 17 Eje hi, troa mene la isisinyikeu hnei mec, ke e mele pala kö la atre kuca la isisinyikeu, pëkö emenen. 18 Celë hi matre hna nyiqane* fe lo isisinyikeu hnapan hnei madra. 19 Thupene lo Mose a ase qaja la nöjei wathebo kowe la nöj, angeic a xome pi la madra ne la neköi kau me nani hna ithuenyikön me tim, me xome lino ka palulu, me pelethe la wa picine hisop, me thathan kowe la tusi hna ewath, me kowe la nöj, 20 me hape: “Celë hi madra ne la isisinyikeu hnei Akötresie hna ahnithe koi nyipunie.” 21 Angeic a thathane pi fe hnei madra lai uma maano, me itre trengen thatraqane la itre huliwa ne hmi. 22 Matre, thenge la Wathebo, xalaithe hi la itre ewekë hna tha ahmitrötrën hnei madra, nge maine pëkö madra hna neng, ketre pëkö ngazo hna nu.

23 Celë hi matre, nyipiewekë troa ahmitrötrëne la itre ewekë ka nyihatren la ka ej e hnengödrai, hnene la madra ne la itre öni hna huujën. Ngo ame göne la itre ewekë ne hnengödrai, nyipiewekë troa tro fë la ketre huuj ka sisitria. 24 Tha hnei Keriso kö hna lö hnine la ketre götrane ka hmitrötr hna kuca hnei iwanakoim, ke kolo hi a nyihatrene lo nyipi götrane gaa hmitrötr, ngo hnei nyidrëti pe hna lö e hnengödrai, matre troa mama enehila qëmeke i Akötresie, thatraqa së. 25 Ngo tha kolo kö a hape, tro pala hi a huujë nyidrë, tune lo aqane kuca hnene la atre huuj e nöjei macatre, lo kola lö fë la ifekë madran hnine la gaa hmitrötr. 26 Ke maine ju, tro nyidrëti a anyimua akötr qaane lo kola nyitrepene la fen. Ngo enehila, nyidrëti hi a aca mama ngöne la pune la fene celë,* matre apatrene la itre ngazo jëne la mele i nyidrë hna sipu huujën. 27 Nge tune lo hna hnëkën kowe la itre atr laka, tro hi a aca mec, nge thupene lai troa kapa la iameköti, 28 hna hane fe traqa tune koi Keriso, hna aca huujë nyidrë matre thu la itre ngazo ne la ka ala nyim, nge ame la hnaaluene mama i nyidrë, tre tha göi itre ngazo hmaca kö, ngo göi troa amelene la itre ka treqe nyidrë.

10 Ame la Wathebo, tre iahnue ne la itre ewekë ka loi ka troa traqa, ngo tha itre eje* kö, ke thatreine kö la wathebo, jëne lo itre öni hna huujën e nöjei macatre, apexejene la itre ka easenyi koi Akötresie. 2 Ke hapeu, tro hmaca kö la angetre kuca la huliwa i Akötresie a huuj, e ase hë ahmitrötrë angatr, nge tha nyizö angatre hmaca kö hnene la mekuthetheu i angatr? 3 Ngo ame la itre huuje cili hna tro fë e nöjei macatre, tre nyine amekunëne la itre ngazo. 4 Ke thatreine kö la madra ne kau me nani apatrene la itre ngazo.

5 Celë hi matre, ame lo nyidrëti a uti kowe la fen, öni nyidrë: “ ‘Tha ajane kö nyipë la itre öni hna huujën, me itre xa huuj; ngo hnei nyipëti pe hna hnëkë ngönetrei koi ni. 6 Tha madrine kö nyipë kowe la itre huuj ne dreuth asë, me itre huuj thatraqane la itre ngazo.’ 7 Matre öning: ‘Hanawang! Eni a traqa (kola qeje ni ngöne la tusi hna ewath) troa kuca la aja i nyipë, Akötresieti fe.’ ” 8 Thupene la hna pane qaja ka hape: “Tha ajane kö nyipë, nge tha madrine kö nyipëti kowe la itre öni hna huujën, me itre xa huuj, me itre huuj ne dreuth asë, me itre huuj thatraqane la itre ngazo” —itre huuj hna tro fë thenge la Wathebo— 9 öni nyidrëti hmaca: “Hanawang! Eni a traqa troa kuca la aja i nyipë.” Matre nyidrëti a apatrene lo hnapan matre acile la hnaaluen. 10 Haawe, hnene la “aja” cili, hna ahmitrötrë së jëne la hna aca huujëne la ngönetrei i Iesu Keriso.

11 Ketre, itre atre huuj a cilën e nöjei drai la hnëqa ka hmitrötr* i angatr, me huujëne lapane la itre öni, itre huuj ka thatreine apatrene paluane la itre ngazo. 12 Ngo ame lai atre cili, casi hi la huuj hnei nyidrëti hna tro fë thatraqane la itre ngazo, nge hna aca kuca hi, ame hnei nyidrëti hna lapa ngöne la götrane maca i Akötresie. 13 Qaane ju hi lai, nyidrëti a treqene troa amë la itre ithupëjia me nyidrë fene la lue ca i nyidrë. 14 Nge jëne la hna aca huuj, nyidrëti a apexejene paluane la itre hna ahmitrötrën enehila. 15 Ketre, uati hmitrötr a anyipicine koi së me hape: 16 “ ‘Ke celë hi isisinyikeu hnenge hna troa kuca me angatr thupene la itre drai cili,’ öni Iehova.* ‘Tro ni a amë la itre wathebong hnine la itre hni i angatr, me cinyihan itre ej ngöne la itre mekuna i angatr.’ ” 17 Nge kolo hmaca a qaja ka hape: “Tha tro hmaca kö ni a mekune la itre ngazo, me aqane eni wathebo i angatr.” 18 Matre enehila, pine laka, Akötresie a nue la itre ngazo cili, tha nyipiewekë hë troa tro fë huuj.

19 Qa ngöne lai ange trejin, jëne la madra i Iesu, xecie hë koi së troa trongëne la jë ne tro kowe la gaa nyipi hmitrötr, 20 lo hnei nyidrëti hna fe* koi së, kösë gojenyi ka hnyipixe nge ka troxomi së kowe la mel, me lö qa ngöne la maano ne thewe hnahag, ene la ngönetrei i nyidrë. 21 Nge pine laka, hetrenyi hë së la atre huuje ka sisitria, hna acil hune la uma i Akötresie, 22 loi e tro sa easeny koi Akötresie fë la hni ka nyipici me lapaun ka pexej, nge loi e tro sa awiëne la itre hni së me itre mekuthetheu së ka ngazo, me awiëne la itre ngönetrei së hna siën hnei tim. 23 Nge loi e tro pala hi sa catre qaja qëmeke i nöjei atr la mejiune së me tha luelu, ke ka nyipici la atre sisiny. 24 Nge loi e tro fe sa imekunekeun, matre aciane* la ihnim me itre huliwa ka loi, 25 nge the tro kö a trije la itre icasikeu së, tune lo hna majemin hnei itre xan, ngo tro pe a ithuecatrekeu; nge pine laka, calemi hë la drai i Akötresie, catre pi së kuca tune lai.

26 Ke maine tro pala hi sa kuca atrene la ngazo, nge ase hë së kapa la nyipi atrehmekune göne la nyipici, haawe, pë hmaca kö huuj ka ijije kowe la ngazo. 27 Ngo tro pë hë a treqene me xouene la iameköti, me elëhni ka mel kösë eë, nge ka troa dreuth apatrene la itre ka icilekeu. 28 Ke ame lo atre thipetrije la Wathebo i Mose, angeic a mec e hna anyipicin hnei ala lu maine ala kön, nge tha hna utipi angeice kö. 29 Matre hapeu, tha tro kö a ngazo catre la pun kowe la atre wajahuje la Nekö i Akötresie, me jele tha nyipiewekëne la madra ne la isisinyikeu ka ahmitrötrë angeic, me qaja angazone la ua ne la ihnimi gufa fë la hni ka pi tru? 30 Ke atre hnyawa hi së la atre qaja ka hape: “Qange troa të la ngazo; nge tro kö ni a nyithupen.” Ketre mina, “Tro Iehova* a amekötine la nöje i nyidrë.” 31 Nge nyine xouene la troa kei ngöne la iwanakoimene la Akötresie ka mel.

32 Ngo ame pe, mekune ju lo itre drai hnapan, thupene lo hna alainyi nyipunie, hnei nyipunieti hna cile hut ngöne la isi ka tru, nyipine la itre akötr. 33 Nge hna traqa fe la itre ijine laka, hna xomi nyipunie kowe la gaa ala nyim,* matre ahmahmanyi nyipunie me axösisi nyipunie, nge itre xa ijin, nyipunieti a ce akötr* memine la itre ka melëne la itre akötre cili. 34 Hnei nyipunie hna utipine la itre hna akalabusin, me kapa madrine troa atrekënö la itre ewekë i nyipunie, ke atre hi nyipunie ka hape, eje kö thei nyipunie la ewekë ka sisitria nge ka epine palua.

35 Qa ngöne lai, the cile kö troa ithanata, ke tru la thupen hna troa kapa. 36 Nyipiewekë koi nyipunie troa atreine cile hut, matre, e ase jë nyipunieti kuca la aja i Akötresie, tro hë nyipunieti a kapa lo hna thingehnaean. 37 Ke “tha qea pe kö,” nge “tro ha traqa hnene lo atre ka troa traqa, tha tro kö nyidrëti a hmitr.” 38 “Nge tro la atrenge ka meköt a mel hnene la lapaun,” ngo “e tro angeic a hmacahmaca, tha tro kö ni* a kepe angeic.” 39 Enehila, tha ce easë kö me itre ka hmacahmaca kowe la mec, ngo ce easë pe me itre ka lapaun matre thupëne la mele së.*

11 Ame la lapaun, tre mejiune ka hetre nyipi trepen laka, troa eatre la nöjei ewekë hna thingehnaean, nge ej a anyipicine la nöjei ewekë ka tha mama kö koi luemek. 2 Nge lapaune cili la ka aijijëne lo itre atr ekö* troa kapa la enyipicin ka hape, hna kepe angatr hnei Akötresie.

3 Hnene la lapaun matre atrehmekune hë së ka hape, ame la aqane trongene la itre hneijin,* tre hna amekötin hnene la trengewekë i Akötresie, matre kola eje la itre ewekë hne së hna goeën, hnene la itre ewekë ka tha mama kö.

4 Hnene la lapaun, hnei Abela hna huuje koi Akötresie, nge sisitria la huuje i angeic hune la huuje i Kaina, matre jëne la lapaune cili, hnei angeic hna kapa la enyipicin ka hape, ka meköti angeic. Ke hnei Akötresieti hna madrine* kowe la ahnahna i angeic, matre, ngacama meci hë angeic, ngo ithanata pala kö angeice jëne la lapaune i angeic.

5 Hnene la lapaun, hna xomi Enoka matre tha tro kö angeic a öhne la mec, nge pëkö ka atreine öhnyi angeic, ke Akötresie la atre xomi angeic; nge qëmekene troa xomi angeic, hnei angeice hna kapa la enyipicine ka hape, hnei angeice hna amadrinë Akötresie. 6 Ketre, e pëkö lapaun, thatreine kö troa amadrinë Akötresie, ke ame la atr easenyi Akötresie, nyipiewekë tro angeic a mejiune laka, ka mele nyidrë, nge nyidrëti la atre nyithupen kowe la itre ka thele nyidrë.

7 Hnene la lapaun, hnei Noa hna xoue Akötresie, me cane la aka nyine emelene la hnepe lapa i angeic, ke hnei Akötresie hna hmekë angeic qa ngöne la itre ewekë ka tha mama pala kö; nge hnene la lapaun, hnei angeic hna ahnëjinëne la fen, nge hna jelemeköti angeic pine la lapaun.

8 Hnene la lapaun, ame la kola hë Aberahama, hnei angeic hna drengethenge me tro kowe la götrane hna troa hamën nyine edrö i angeic; matre angeic a tro ju, ngacama thatre kö angeic ka hape, troa tro ië. 9 Nge hnene la lapaun, hnei angeic hna mele trenyiwa ngöne la nöje hna thingehnaean, kösë nöje trenyiwa, hnei angeic, me Isaaka me Iakobo hna mel hnine la itre itat, lo lue ka troa kepe edrö me angeic qa ngöne la hna thingehnaean ka cas. 10 Angeic a treqene la traon ka hetre nyipi trepen, lo hna siji tulun me xup hnei Akötresie.

11 Hnene la lapaun, hetre trengecatre i Sara troa upune* ngacama sasaithe hë eahlo la itre macatre ne hnaho, ke mejiune eahlo laka, ka nyipici la Atre thingehnaean. 12 Qa ngöne lai, xulu hë qaathene la ala cas, lo kösë ka meci hë, la itre nekön ka ala nyimu tune la itre wëtresij ne hnengödrai, nge hna thatreine e, tune lo itre wenengöni ne ngönegejë.

13 Meci asë hë angatre lai ngöne la lapaun, nge ngacama tha kapa ju kö angatre lo itre hna thingehnaean, ngo öhne hë angatre qaa gaa nany, nge angatr a hale kow. Nge qëmekene la ka ala nyim, hnei angatr hna sipu qeje angatr ka hape, itre trenyiwa me itre ka feke trootro ngöne la nöj. 14 Nge ame la itre ka ithanata tun, angatr a amamane hnyawa ka hape, angatr a thele nöje koi angatr. 15 Ngo maine hnei angatre ju hna lapa mekune lo götran hnei angatre hna trotrij, tro hë angatre a thele jëne troa bëeke hmaca. 16 Ngo enehila, angatr a trengeneune la götrane ka sisitria laka, hnengödrai la atrekë ewekën. Nge tha Akötresieti kö a hmahma e angatr, me hmahmane tro angatr a hë nyidrë ka hape, Akötresi angatr, ke ase hë nyidrëti hnëkë traone thatraqai angatr.

17 Hnene la lapaun matre ame lo kola tupathi Aberahama, kösë ase hë angeice huujë Isaaka—nyipici, hnene lo atre kapa madrine la itre hna thingehnaean hna hmalahnine troa huujëne la nekö i angeice ka cas— 18 ngacama ase hë lo qaja koi angeice ka hape: “Ame la itre hna troa hëne ka hape, matra i eö, tro angatr a xulu qaathei Isaaka.” 19 Ngo hnei angeice pe hna mekune ka hape, atreine hi Akötresie amele nyëne hmaca qa hna mec, ke hna hamë nyëne lo qa ngöne la mec, nyine tulu.

20 Hnene la lapaun, hnei Isaaka hna amanathithi Iakobo me Esau göi itre ewekë ka troa traqa.

21 Hnene la lapaun, qëmekene tro Iakobo a mec, hnei angeic hna isa amanathithine la itre nekö i Iosefa, me nyihlue i Akötresie ngacama angeice hë a huja tö.

22 Hnene la lapaun, qëmekene tro Iosefa a mec, hnei angeic hna ithanatane la trongene la itre nekö i Isaraela, me amekötine la nyine kuca* memine la itre trepe june* i angeic.

23 Hnene la lapaun, hnene la keme me thine i Mose hna juetrë nyën koi köni treu thupene la hna hnaho nyën, ke öhne hë nyidro ka hape, mingöminge catre la nekönatr, nge tha xou i nyidroti kö lo hna amekötin hnei joxu. 24 Nge tru hë Mose matre hnene la lapaun, xelë hë Mose troa hë angeic ka hape, nekö ne la nekö i Farao jajiny. 25 Nge hnei angeic hna iëne troa ce qanangazo angeic memine la nöje i Akötresie, hune la troa madrine fë la ngazo ka canga patr. 26 Nge mo ka tru alamekene koi angeic la troa hmahma pi Keriso hune la itre trengamo ne Aigupito, ke angeic a goeëne hutine la nyipi thupen. 27 Hnene la lapaun, hnei angeic hna trotrij e Aigupito, nge tha xou i angeice kö la elëhni i joxu, matre hnei angeice hna cile catr kösë kola goeëne la Ka tha mama kö. 28 Hnene la lapaun, hnei angeic hna kuca la Paseka, me thane la madra, matre tha tro kö la atre ihumuth a ketr la itre neköne haetra i angatr.

29 Hnene la lapaun, hnei angetre Isaraela hna thupa la Hnagejë Ka Palulu, kösë kola tro ngöne la nöje gaa weliwel, ngo ame la kola hane pi tun hnei angetre Aigupito, kaca tranyi angatre ju hi hnei tim.

30 Hnene la lapaun matre kei pi la hna xupi hag e Ieriko, thupene la hna tro kanoth ej hnei angetre Isaraela koi sevene lao drai. 31 Hnene la lapaun, tha ce meci ju kö Rahaba, lo föe ne gojeny, memine la itre ka tha idrei, ke tingetinge la aqane kapa angeic lo lue ka alamekëne la nöj.

32 Nge nemene hmaca la nyine tro ni a qaja? Tha ijije kö la traem troa qeje Gideona, me Baraka, me Samasona, me Iefetha, me Dravita, me Samuela, me itre xa perofeta. 33 Hnene la lapaun, hnei angatr hna ngaane la itre baselaia, me isigöline la meköt, nge hna sisinyi koi angatr, nge hnei angatre hna ahumune la që ne la itre liona, 34 me tha apine la ecatrene la eë, me neëne la taua, ngacama itre ka kucakuca angatr, ngo hna hamë men koi angatr, matre angatr a catr ngöne isi, me weje huzune la itre ithupëjia ka thele troa thapa la nöje i angatr. 35 Nge hna amelene hmaca la itre atrene la lapa ne la itre xa föe, ngo hna axösisin la itre xa trahmanyi ke xele angatre troa nuamacanyi angatr hnene la ketre thupene mel, matre tro angatr a traqa kowe la melehmaca ka sisitria. 36 Eje hi, hna tupathi itre xan hnei ihnyimasai, me itre jia ne ithaucë, me cein, me kalabus. 37 Hna tranyi angatr hnei etë, hna tupathe la lapaune i angatr, hna gili angatr,* hna humuthi angatr hnei taua, nge hnei angatre hna tro menu me heetrë kupeine mamoe me kupeine nani, nge hna axösisi angatr me qanangazo angatr, ngo angatre pe a aja ixatua. 38 Nyipici, tha hmeku i fene kö troa kapa la itre atr ka tun. Hnei angatre hna nyinyapëne la itre hnapapa, me itre wetr, me itre ngönemenyi, me itre hnaop ne la ihnadro.

39 Ngo ame angatr asë, ngacama hna qaja aloinyi angatre hë pine la lapaun, ngo tha kapa pala kö angatre lo hna thingehnaean. 40 Ke hnei Akötresieti hna hnëkëne la ketre ewekë ka sisitria koi së, ene laka, tha tro kö angatr a pexej, e patre kö së.

12 Haawe, pine laka, kola cile xötreithi së hnene la itretre anyipicine ka ala nyim, unatrije pi së la itre ehnef me ngazo ka canga ajolë së, nge catre pi së nyinyap ngöne la iwaja hna amë qëmeke së, 2 me goeëne hutine la Atre Itrosai me Atre Apexejene la lapaune së, ene Iesu. Ke pine la madrin hna amë qëmeke i nyidrë, hnei nyidrëti hna xomihnine la sinöe ne iaxösisi,* me tha nyipiewekëne la hmahma, ame hnei nyidrëti hna lapa ngöne la götrane maca i Akötresie. 3 Nge matre tha tro kö nyipunie a hane kucakuca me cil, mekune hnyawa ju la atre xomihnine la itre trenge ewekë ne imethinë hna qaja hnene la itre atre ka ngazo, itre ka nyizö angatre kö.

4 Ngöne la nyipunie a isi memine la ngazo, tha hane petre kö nyipunie cile hut uti hë la troa neni la madra i nyipunie. 5 Nge thëthëhmine hnyawa ha nyipunie lo eamo hna hamën koi nyipunie, kösë koi itre kuku, kola hape: “Neköng, the wangacone kö la ihaji i Iehova,* nge the kucakuca kö e nyidrëti a ameköti eö. 6 Ke ame la itre hnei Iehova* hna hnim, nyidrëti a hajin, nyipici, nyidrëti a thaucën* la itre hnei nyidrëti hna nyi kukun.”

7 Haawe, nyipiewekë tro nyipunieti a cile hut ngöne la akötr, ke ihaji* lai koi nyipunie, nge Akötresie a nyi kuku nyipunie. Ke drei la kuku hna tha hane hajine hnei kem? 8 Ngo e tro nyipunieti a trije la ihaji celë, nyipunie la itre nekö ne gojenyi, nge tha itre nyipi kuku kö. 9 Ketre, hnene lo itre keme* së hna majemine haji së, nge hne së hna metrötrë angatr. Hapeu, tha tro kö sa dreng asisitriane la Keme së, atre ië së hnene la uati hmitrötr matre mel? 10 Ke itre keme së a haji së thenge la ka loi koi angatr, göne hi la ketre hnepe ijin, ngo ame nyidrë, nyidrëti a haji së nyine loi koi së, matre ce hmitrötre jë së me nyidrë. 11 Eje hi, ame la kola haji së, tha madrine kö së lo xötrei, nge easë a dreng akötrën;* ngo e thupene hë, ej a acian thene la itre hna inin la wene ne la tingeting, ene la meköt.

12 Qa ngöne lai, aegöcatrene jë la itre ime ka thip, me itre watingöneca ka geny. 13 Nge catre jë amekötine la itre gojeny thatraqane la lue ca i nyipunie, matre tha tro kö a jole catr kowe la itre ka peje ca, ngo tro pe a aloinyi angatr. 14 Catre jë mele tingeting me nöjei atr me melëne la thiina ka hmitrötr,* ke maine tha thele kö lai hnei ketre, tha ijiji angeice kö troa öhnyi Joxu. 15 Wange kö, ke triane pi ketre la ihnimi gufa i Akötresie, wanga cia pi thei nyipunie la iwan poizin ka troa axulune la itre jol, ame hna troa kei thenge hnene la ka ala nyim. 16 Nge thupëne kö matre tha tro kö a hetrenyi thei nyipunie la atre kuci ngazo,* me atre wangesixane la itre ewekë ka hmitrötr, tui Esau, lo atre nuetrij la edrö ne haetra göi ca trepe xen. 17 Atre hi nyipunieti lo laka, ame lo angeic a thele hmaca la manathith, hna thipetriji angeic; nge ngacama hnei angeic hna isin, me treij matre saze la mekuna ne la keme i angeic, ngo tha ie ju kö.

18 Ke tha hnei nyipunieti kö hna easenyine la ewekë hna ketr, nge hna dreuth hnei eë, maine ketre iaw ka miti hnin, maine götrane gaa mit, maine wene, 19 maine mejene trutru, maine nine ithanata ka hamë trengewekë; lo nine ithanata laka, thupene lai, hnene lo nöj hna sipone ielene matre tha tro kö a ithanata koi angatr. 20 Ke thatreine kö angatre kapa lo wathebo hna hape: “Nge maine tro hi la ketre öni a ketr la wetr, tro ha tran hnei etë.” 21 Nge nyine xouene la ewekë cili, matre hnei Mose hna qaja ka hape: “Eni a xou me hmengöhmengön.” 22 Ngo hnei nyipunieti hna easenyine la Wetre Ziona, me traon ne la Akötresie ka mel, me Ierusalema ne hnengödrai, me itre miriad* lao angela 23 ngöne la icasikeu ka tru, me ekalesia ne la itre haetra hna siji ëjen e hnengödrai, me Akötresie Atre Amekötin asë, me mel ne la itre hna jele mekötin, itre hna hnahon hnei ua, nge hna apexejen, 24 me Iesu, atre ialoinekeun ngöne la isisinyikeu ka hnyipixe, me madra hna thathan hu së, madra ka sisitria hune lo madra i Abela.

25 Nge hmekëne kö, wanga xele pi nyipunie ma drenge* la atre ithanata. Ke ase hë nyithupen ekö kowe lo itre ka xele ma drenge la atre tro fë maca ka hmitrötr nyine hmekëne la fen, haawe, the qeje së pala ha e tro së a trotriji nyidrë, atre ithanata qaa hnengödrai! 26 Ngöne la ijine cili, tro la nine ithanata i nyidrë a enienijëne la ihnadro, ngo enehila, nyidrëti a sisinyi ka hape: “Nyipici, tro hmaca ni a enienijëne la ihnadro, me hnengödrai fe.” 27 Ame la hna hape, “tro hmaca,” tre kola amamane ka hape, tro ha patre la itre ewekë hna enienijën, itre hna kuca matre lapa ju pe hi la itre ewekë tha hna enienijën. 28 Haawe, pine laka, tro hë së a kapa la Baselaia hna thatreine enienijën, loi e tro pala hi sa kapa la ihnimi gufa, ihnimi gufa ka aijijë së troa kuca la huliwa ka hmitrötr thatraqai Akötresie, cememine la xou me hmengöhmengön, nge huliwa ka amadrinë nyidrë. 29 Ke ame la Akötresi së, ceitu i nyidrë me eë ka dreuthetrije la nöjei ewekë asë.

13 Loi e cile huti la ihnimi trejin. 2 The thëthëhmine kö troa ikep,* ke jëne lai, hnei itre xan hna kapa thatren la itre angela. 3 Mekune pala kö la itre hna akalabusin,* kösë hna ce akalabusi nyipunie me angatr, nge mekune ju fe la itre hna qanangazon, ke nyipunieti fe ngöne la ngönetrei.* 4 Loi e tro nöjei atr a wangatrune la faipoipo, nge the tro pi kö a adrone la faipoipo, ke tro Akötresieti a amekötine la itre ka kuci ngazo* me ka nyixetë. 5 Nge ngöne la aqane mele i nyipunie, the tro kö a hni koi mani, ngo tro pe a melëne la ka ijij. Ke öni nyidrë: “Tha tro jë kö ni a triji eö, nge tha tro jë kö ni a nuaxöji eö.” 6 Qa ngöne lai, tro hë së a catr me qaja ka hape: “Iehova* la ixatuang, tha tro kö ni a xou. Nemene la hna troa kuca koi ni hnei atr?”

7 Mekune ju la itre ka elemeken thei nyipunie, itretre qaja la trengewekë i Akötresie koi nyipunie. Nge ame la nyipunieti a goeëne la aqane ujë i angatr, nyitipune jë la lapaune i angatr.

8 Casi pala hi Iesu Keriso qaane eidr me enehila, nge uti hë epine palua.

9 The tro kö a amenu nyipunie hnene la nöjei pengöne ini me itre ini trenyiwa, ke loi ju kö e troa aegöcatrene la hni hnene la ihnimi gufa hune la xen,* ke pëkö eloine la xen kowe la itre ka hni kow ej.

10 Hetrenyi the së la ketre ita ne huuj laka, ame angetre kuca la huliwa ka hmitrötr, pëkö ca hna aijijën troa xeni qa ngön. 11 Ame la itre ngönetrei ne la itre öni hna huujën hnene la itre atre cili, hna dreuthetrij tröne la itre lapa. Nge ame la madra, hna xom hnene la atre huuje ka sisitria kowe la Gaa Nyipi Hmitrötr, göi troa nue la itre ngazo. 12 Qa ngöne lai, hnei Iesu hna akötr tröne la traon, matre ahmitrötrëne la itre atr hnene la sipu madra i nyidrë. 13 Haawe, ce tro jë hë së koi nyidrë tröne la lapa, nge kapa trongëne jë fe së la hmahma hnei nyidrëti hna kapa, 14 ke e celë, pëkö traone së ka troa cile hut, ngo easë pe a trengeneune la traone ka troa traqa. 15 Haawe, jëne Iesu, the mano kö së huujëne koi Akötresie la itre huuj ne iatruny, ene la wene ne la itre ineqë së, itretre anyipicin la ëje i nyidrë qëmekene la ka ala nyim. 16 Ketre, the thëthëhmine kö troa kuca la loi, me ce thawa me itre xan la hnei nyipunieti hna hetreny, ke Akötresieti a madrine kowe la itre huuje cili.

17 Drengethenge ju la itre ka elemeken thei nyipunie, nge kapa madrine ju la musi angatr, ke angatr a thupë nyipunie,* nge tro angatr a isa qeje thiinan, matre tro angatr a madrin troa kuca la hnëqa i angatr, ngo tha tro kö a sixel, wanga zö i nyipunieti jë.

18 The mano kö thithi sai hun, ke xecie hnyawa koi huni ka hape, wië* la itre mekuthetheu hun, nge eahuni a ajane troa meköt ngöne la nöjei götran asë. 19 Ngo eni a sipone iele nyipunie troa thith matre tro ni a canga bëeke koi nyipunie.

20 Epi tro la Akötresie ne tingeting, atre amejëne qa hna mec la atre thupë mamoe ka sisitria, ene Iesu Joxu së, me madra ne la isisinyikeu ka epine palua, 21 a hamë nyipunie la nöjei ewekë ka loi nyine kuca la aja i nyidrë. Nge jëne Iesu Keriso, nyidrëti a uku së troa kuca la itre ewekë ka amadrinë nyidrë. Haawe, loi e tro pala hi a atrunyi Akötresie epin, epine palua. Amen.

22 Enehila, eni a sipone iele nyipunie ange trejin, troa pane drenge hnyawa la ithuecatre celë, ke ka co hi la tus hnenge hna cinyihane koi nyipunie. 23 Eni a ajane troa thuemacanyi nyipunie ka hape, ase hë nue la trejine me easë Timoteo. Nge maine tro angeic a canga traqa, tro hë ni a ce traqa me angeic troa wai nyipunie.

24 Tro fë jë la ibozung koi itre ka elemeken thei nyipunie, me koi ange ka hmitrötr asë. Nge itre ka lapa e Itali a iupi fë la ibozu i angatr koi nyipunie.

25 Haawe, epi tro la ihnimi gufa i Akötresie a ce me nyipunieti asë.