KOI TITO

1 Qaathei Paulo, hlue i Akötresie me aposetolo i Iesu Keriso. Hlu me aposetolo ka lapaun tune lo itre hna iën hnei Akötresie, nge ka atrehmekune hnyawa la nyipici. Nyipici lai ka ihmeku memine la aqane troa nyipici koi Akötresie. 2 Itre ewekë lai hna nyi trepen hnene la mele ka pë pun, lo hna thingehnaean ekö qa, hnene la Akötresie ka thatreine thoi. 3 Ngo ngöne la nyipi ijin, hnei nyidrëti hna amamane la trengewekë i nyidrë, jëne la huliwa ne cainöj hna ahnithe koi ni, thenge lo hna amekötin hnei Akötresie Atre Amele së. 4 Eni a cinyianyi koi Tito, nekö hnimina thenge la lapaune so ka cas:

Epi ce me eö la ihnimi gufa me tingeting qaathei Akötresie la Kem, me Keriso Iesu, Atre Amele së.

5 Hnenge hna nue eö e Kerete matre tro eö a wenë amekötine la itre ewekë ka jol e cili, me acile la itre qatre thup ngöne la itre traone trootro, thenge lo hnenge hna ini eö. 6 Maine jë hetre trahmanyi e cili hna tha qeje gelen, nge ka ca föe, nge ka trene kuku ka lapaun nge tha ka hlemu kö troa qenahmo, me catre që. 7 Ke ame la hna acile hnei Akötresie troa ekö huliwa, ene la atre thup, tha tro kö a hetre gele i angeic, nge tha tro kö angeic a catre fë mekun, me canga elëhni,* me hmo hnei ka haitr, me isi, me hni koi mani, me meku angeice hi. 8 Ngo loi e tro pe angeic a ikep, me hnime la loi, me atreine waiewekë,* me meköt, me mele nyipici, me atreine xomehnöth. 9 Nge ame göi aqane troa hamë ini, tro fe angeic a qale catre kowe la trengewekë ne nyipici.* Qa ngöne lai, tro hë angeic a atreine hamë ithuecatr,* jëne la itre ini ne iamele, me hmekëne la itre ka icilekeu.

10 Ke ala nyimu la itre ka icilekeu, itretre ewekë menu, me iaö, nge nyimutre thei angatr la itre ka catre fë troa ixötrehatreny. 11 Matre, nyipiewekë troa lep ahumune la itre që i angatr, ke pine la aqane pi hetrenyi angatr, angatre pala hi a angazone la lapaun ne la itre hnalapa asë, hnene la itre ini hna hamën menun. 12 Nge önine hmaca la ketre e angatr, ketre perofeta i angatr ka hape: “Ume ka thoi la angetre Kerete, kösë itre öni ka ihej, nge ume tru hna xen.”

13 Trenge nyipici hi lai, haawe, nyipiewekë troa catre la ihaji i eö, matre egöcatre hmaca pi la lapaune i angatr. 14 The semesinene kö la itre ifejicatre i angetre Iudra, me itre wathebo i atr ka ixomananyi qa ngöne la nyipici. 15 Eje hi, ka wië asë hi la nöjei ewekë kowe la itre ka pë gelen, ngo pëkö ewekë ka wië kowe la itre ka trene gelen nge ka pë lapaun, ke ce ngazo asë hë la itre mekun me itre mekuthetheu i angatr. 16 Angatr a selëne ka hape, ka atre Akötresieti hi angatr, ngo itre huliwa i angatr a ahmahmanyi nyidrë, ke angatre la itre hna methinën hnei Akötresie, me itre ka tha idrei, me itre ka tha ijije troa kuca la itre huliwa ka loi.

2 Ngo ame eö, thupëne kö matre tro pala hi eö a hamë ini thenge la itre ini ne iamele. 2 Nge loi e tro la nöjei qatr a atreine tulu ewekë göi itre hna majemin, nge tro fe angatr a itre atr hna metrötrën, me ka inamacan, me ka catre lapaun, me ka catre ihnim, me ka cile hut. 3 Ketre tun, loi e tro fe la itre qatre föe a ujë tune la itre ka xoue Akötresie, the tro kö a silitrengathoi ketre, me hlue i waina, ngo loi e tro angatr a inine la loi koi itre xan. 4 Nge tro hë angatr a atreine xatuane* la itre föe ka co troa hnime la itre föi nyudren, me ha nekö i nyudren, 5 me waiewekë hnyawa, me pë ethan, me huliwa ngöne hnalapa,* me loi hni, me metrötrëne la itre föi nyudren. Qa ngöne lai, tha tro kö a hane qaja angazone la Trengewekë i Akötresie.

6 Nge ketre, catre jë eö eamone la itre thupëtresij troa atreine waiewekë. 7 Nge ngöne la nöjei götran asë, amamai tulu jë göi itre huliwa ka loi. Nge ini angatre hnyawa jë la thiina ka wië.* 8 Huliwane jë la itre trengewekë ne iamele hna thatreine qeje gelen,* matre hmahma pi la itre ka icilekeu, ke pëkö nyine tro angatr a jelengazo së. 9 Ketre, ngöne la nöjei götran asë, loi e tro la itre hlu a metrötrëne me amadrinëne la maseta, ngo the tro kö a sa ithanata, 10 nge the tro kö a atrekënö, ngo tro pe a itre atr nyine mejiune kow. Qa ngöne lai, tro hë angatr a amamane la emingömingöne la ini qaathei Akötresie, Atre Amele së.

11 Ke mama ha la ihnimi gufa ne la Akötresi së, atre traqa fë la iamele kowe la nöjei pengön atr. 12 Nyidrëti a ini së troa thipetrij la itre thiina hnei nyidrëti hna xelen, me itre aja i fen, matre tro sa atreine tulu ewekë ngöne la mele së, me meköt, me nyipici koi nyidrë ngöne la fene celë.* 13 Nge easë a treqene troa eatre lo mejiune ka mingöming, me ijine troa mama la Akötresie ka pë san, me Iesu Keriso, Atre Amele së, 14 atre meci pi së matre nuamacanyi* së qa ngöne la nöjei pengöne ngazo, me awiën thatraqai nyidrë la ketre nöj, ewekë i nyidrë, itretre catre huliwa kowe la loi.

15 Haawe, the mano kö eö ithanatane la itre ewekë cili, me eamo,* me ihaji, ke hna nyipi aijijë eö troa kuca lai. Nge the nue ketre kö troa wangaconyi eö.

3 The mano kö upi angatre troa metrötrëne me drengethenge la itre mus, me itre trene mus, me hnëkë thatraqane la nöjei huliwa ka loi, 2 nge tha tro kö a iqejegele, me iwesitrë lapa, ngo tro pe a atreine tulu ewekë, me menyike koi nöjei atr. 3 Ke itre ka hmo së ekö me ka tha idrei, nge hna amenun, me ka nyihluene la nöjei aja me nyine iamadrinë, me mel ngöne la ngazo, me piin, itre hna methinën, nge ka methinë itre xan.

4 Eloine hi, ame hë la kola mama la aqane loi hni i Akötresie, Atre Amele së, me ihnimi i nyidrëti kowe la itre atr, 5 (tha hnene kö la itre huliwa ka meköt hne së hna kuca, ngo hnene la utipine i nyidrë), hnei nyidrë hna amele së jëne la hna ahmitrötrë* së kowe la mel, me uati hmitrötr ka ahnyipixe së. 6 Nge hnei nyidrëti hna hamën atrune koi së la ua cili jëne Iesu Keriso, Atre Amele së, 7 matre thupene la hna jelemeköti së hnene la ihnimi gufa i nyidrë, ijiji së ju hi troa kepe edrö, thenge lo mejiun göne la mele ka pë pun.

8 Trenge nyipici hi lai, nge ajange tro pala hi eö a qaja lapan, matre tro la itre ka mejiune koi Akötresie a lapa mekune la itre huliwa ka loi. Itre ewekë ka loi lai, nge nyine loi koi nöjei atr.

9 Ngo ananyine pi la itre isi ithanata menu, memine la troa thele la itre xötr atr, me iwesitrë, me isi pi Wathebo, ke itre ewekë lai ka gufa nge ka pë eloin. 10 Nge ame kowe la atre tro fë ketre hmi, helë angeice pi thupene la hna pane alua haji* angeic, 11 ke mama ha ka hape, jea ha la atre ka tun, nge angeic a kuca la ngazo, me sipu nyizö angeic.

12 Nge e upi Aretema jë ni maine Tukiko koi eö, canga isine jë troa traqa koi ni e Nikopoli, ke e cili hi la hnenge hna mekune troa lapa ngöne la ijine hnötr. 13 Nge waipengöne hnyawa ju la tronge i Zena, lo ka atrepengöne la Wathebo, me Apolo, matre tha tro kö la ketre ewekë a pë thei nyidro. 14 Ngo nue pi fe la itre trejine troa inine la aqane kuca la itre huliwa ka loi, matre hamë ixatua ngöne ijine pë, wanga tha wa wene pi angatr.

15 Itre ka ce me eni a iupi fë la ibozu i angatre koi eö. Nge tro fë jë la ibozunge koi angetre hnimi hun ngöne la lapaun.

Haawe, epi tro la ihnimi gufa a ce me nyipunieti asë.