HNAALUENE TUS KOI TIMOTEO

1 Eni Paulo, aposetolo i Keriso Iesu hnene la aja i Akötresie, thenge la mel hna thingehnaean jëne Iesu Keriso, 2 koi Timoteo nekönge hniminang:

Epi eje thei eö la ihnimi gufa me utipin, me tingeting qaathei Akötresie la Kem, me Iesu Keriso Joxu së.

3 Eni a olene koi Akötresie, la hnenge hna nyihluen, tune la hna kuca hnene lo itre xötre qaaqaang, nge cememine la mekuthetheu ka wië, eni pala hi a meku eö ngöne la itre thithing e lai me jidr. 4 Nge e mekune hmaca ha ni la itre trenge timidra i eö, atraqatre la trenge ajange troa iöhnyi hmaca me eö, matre elitrauje pi la madrineng. 5 Ke eni hmaca a mekune lo lapaune ka pë thoi ngön ka eje thei Lois qaqaa i eö, nge e thupen, thei Enis thine i eö, nge enehila, xecie hnyawa koi ni laka, eje fe thei eö la lapaune cili.

6 Qa ngöne lai, eni hmaca a amexeje koi eö troa ipicon kösë eë, lo ahnahna i Akötresie hnei eö hna kapa lo eni a atë la lue imenge hui eö. 7 Ke tha hnei Akötresieti kö hna hamë së la ua ka xou, ngo ka mene pe, me ihnim, me ka atreine waiewekë. 8 Haawe, the hmahmane kö la maca ne la Joxu së, nge the hmahma ni kö, eni la hna akalabusin pi nyidrë, ngo kapa ju la akötr pine la maca ka loi, nge mejiune jë kowe la mene i Akötresie. 9 Hnei nyidrëti hna amele së, me hë së hnene la ihë ka hmitrötr, tha hnei itre huliwa së ngo pine la aja i nyidrë, me ihnimi gufa i nyidrë. Nge ekö catre hë nyidrëti amamane lai koi së jëne Keriso Iesu. 10 Ngo enehila, tha sihngödri hë la ihnimi gufa, ke mama ha la Atre Amele së, ene Keriso Iesu, lo atre apatrene la mec, me amamane jëne la maca ka loi la aqane troa mel, me tha hnyeqetr. 11 Nge hna acili ni troa cainöjëne lai, me troa aposetolo, me atre hamë ini.

12 Nge pine lai, eni a akötr, ngo tha hmahma kö ni. Ke atre kö ni lo atr hnenge hna mejiune kow, nge ka xecie hnyawa koi ni laka, ijiji nyidrë troa thupëne lo hnenge hna amë thei nyidrë uti hë la drai ce. 13 Haawe, the mano kö xölehuje la itre nyipi ini,* me itre trengewekë nyine loi* hnei eö hna kapa qaatheng, cememine la lapaun, me ihnim, ka xulu qa ngöne la hna casi me Keriso Iesu. 14 Thupëne hnyawa ju la trengamo cili hna hamë eö, jëne la uati hmitrötr ka eje thei eö.

15 Atre hë eö ka hape: Ase hë kötre ni hnene la nöjei trahmanyi ne Asia, nge Fugelo me Hemogeni la lue xan. 16 Ngo epi tro la Joxu* a hnime la itre atrene la hnalapa i Onesiforo, ke hnei angeic hna anyimua ithuecatreng, nge enehila, tha hmahma fë kö angeic la itre iceineng. 17 Nge ketre, ame lo qa i angeice Roma, hnei angeic hna thele ni hnyawa me öhnyi ni. 18 Matre, epi tro la Joxu Iehova* a utipi angeic ngöne la drai ne iameköti. Nge atre hnyawa fe hi eö lo nöjei huliwa ka loi hnei angeic hna kuca e Efeso.

2 Ngo ame eö neköng, catre jë aegöcatrenyi eö ngöne la ihnimi gufa thei Keriso Iesu. 2 Nge ame la itre ewekë cili hnei eö hna kapa qaatheng qëmekene la ka ala nyim, hane jë fe eö ahnithe kowe la itre trahmanyi ka nyipici, matre tro fe angatr a atreine ini itre xan. 3 Nge pine laka, eö la ketre nyipi sooc i Keriso Iesu, hane jë fe eö kapa troa akötr. 4 Pëkö atr ka sooc nge ka xomi ketre huliwa nyine mele koi angeic, ke aja i angeic troa amadrinëne la atre alö angeic troa sooc. 5 Nge ame la atre ka elo, tro angeice lai a hun e hnei angeic hna trongëne hnyawa la itre hna amekötin. 6 Nge ame la atre catre eëny, angeice la ka troa pane kapa la itre wen. 7 Mekune kö lo hnenge hna qaja koi eö; nge tro kö la Joxu a hamë inamacane* koi eö ngöne la nöjei ewekë asë.

8 Mekune pala kö, hna amele Iesu Keriso qa hna mec, nge matra* i Dravita nyidrë, thenge la maca ka loi hnenge hna cainöjën, 9 nge hnenge hna akötre fë, nge hna akalabusi ni pin kösë ka kuca la ngazo. Ngo ame la trengewekë i Akötresie, tha hna othe kö. 10 Qa ngöne lai, eni a cile huti ngöne la nöjei ewekë asë pine la itre hna iën, matre tro fe angatr a hane kapa la iamele jëne Keriso Iesu, me lolo ka epine palua. 11 Nge trenge nyipici la trengewekë celë: Maine tro sa ce mec, tro fe a ce amele së. 12 Nge e tro pala hi sa cile hut, tro hë sa ce joxu me nyidrë, ngo e tro sa xele nyidrë, tro fe nyidrë a hane xele së. 13 Nge e tha nyipici hë së, tro pala hi nyidrë a nyipici, ke thatreine kö nyidrëti thoi koi nyidrëti kö.

14 Haawe, the mano kö amexeje la itre ewekë celë koi angatr, nge eamo angatre jë qëmeke* i Akötresie ka hape, the tro kö a isi ithanata ke ka gufa lai, nge ka akötrëne* la itre ka dreng. 15 Nge isine jë tro Akötresie a kapa aloinyi eö, kösë atre catre huliwa nge ka pë nyine hmahman, nge ka maca troa tro fë la nyipici. 16 Thipetrije pi la itre ithanata ka pë alien nge ka adrone la ewekë ka hmitrötr, ke kolo lai a ihul kowe la nöjei thiina ka tha ijiji Akötresie, 17 kösë ixelek ka xuje la ngönetrei. Nge thiina i Humenaio lai, me Fileto, me itre xane ju kö. 18 Hnei nyidroti hna nuetrije la nyipici me qaja ka hape, mele hmaca ha la itre ka mec, ene pe, ajolëne jë hi la lapaune i itre xan. 19 Ngo ka cile catre kö la trepene ka catr i Akötresie, lo hna sija ka hape: “Atre kö Iehova* la itre atr i nyidrë,” nge “Loi e tro la nöjei atr ka qaja la ëje i Iehova* a xelen la ka tha meköti kö.”

20 Hetrenyi e hnine la ketre uma atraqatr la itre trengen, hna kuca itre xan hnei gol me sileva, nge itre xan hnei sinöe me dro ka fedr; hna xome la itre xan thatraqane la huliwa ka loi, nge itre xan thatraqane la itre xa huliwa kö. 21 Matre, e tro ketre a ananyine la itre trengen thatraqane la itre xa huliwa kö, tro hë angeic a nyi trengene ka loi, hna ahmitrötrën, nge ka nyipiewekë kowe la atrekë ewekën, nge hna hnëkën thatraqane la nöjei huliwa ka loi. 22 Haawe, kötrene pi la itre aja i thöth, nge catre jë thele la meköt, me lapaun, me ihnim, me tingeting cememine la itre ka hë Joxu hnene la hni ka lolo.

23 Nge thipetrije pi la itre ithanata hmo nge ka pë alien, ke atre hë eö ka hape, jëne iwesitrë lai. 24 Ke tha ka isi kö la hlue i Joxu, ngo ka menyike* pe koi nöjei atr, nge ka maca troa hamë ini, nge ka atreine xomihni, 25 nge ka menyik troa hamë ini kowe la itre ka xele ma idrei. Ke maine jë, tro Akötresie a aijijë angatre troa ietra,* matre hetrenyi la nyipi atrehmekun göne la nyipici. 26 Nge tro hmaca ha angatr a goe me utretr qa ngöne la ihnö i Diabolo, matre mama pi koi angatr ka hape, hna jeli angatr hnei Diabolo troa kuca la aja i angeic.

3 Ngo atre jë ka hape, ngöne la itre drai ne la pun, tro ha traqa la itre ijin akötr hna thatreine xomihnin. 2 Ke tro la itre atr a hnimi angatre kö, me hni koi mani, me pi draië, me pi tru, me silitrengathoi, me tha drei keme me thin, me huja nonony, me tha mele nyipici, 3 me ka tha hnimi atr, me xele ma ca mekun, me silitrengathoi ketre, me thatreine xomehnöth, me iaxösisi, me xelene la loi, 4 me mele hnihni, me catre që, me pi tru catr, me ajane catrëne la nyine iamadrinë hui Akötresie, 5 itretre nyi ka hmi, ngo tha metrötrëne pe la mene i Akötresie. Haawe, kötrene pi itre ej. 6 Nge thene la itre atre cili, hetre itre trahmanyi ka iaö, itre ka lö fë trenge iaö hnine la hnalapa ne la itre föe ka kucakuca nge ka kuca la ngazo. Angatr a thapa la hni ne la itre föe cili, itre ka nyihluene la nöjei pengön aja, 7 nge ka ini pala hi ngo tha wangatrehmekune pe la nyipici.

8 Matre ame la aqane icilekeu i Iane me Iamebere koi Mose, aqane icilekeu i angatre fe hi lai memine la nyipici. Hna angazone hnyawa la mekuna ne la itre atre cili, matre tha kepe angatr hmaca kö hnei Akötresie, ke tha trongëne hë angatre la lapaun. 9 Nge tha tro hë angatre lai a ujë tun, ke tro ha mama cile koi nöjei atr la aqane menu i angatr, tune lo aqane mama thene lo lue atre cili. 10 Ngo hnei eö pe hna trongëne hnyawa la itre ining, me aqane meleng, me itre hnenge hna thele troa eatrën, me lapauneng, me aqane xomihning, me aqane ihniming, me aqane cile huting, 11 me melëne la itre itupath me itre akötr, tune lo hnenge hna melën e Anetioka, me Ikonio, me Lusetara. Hnenge hna cile huti ngöne la itre itupathi celë, nge hnei Joxu hna thepe ni qa ngön. 12 Ke eje hi, ame la itre ka ajane troa mele thenge la aja i Akötresie, me casi me Keriso Iesu, tro fe a hane axösisi angatr. 13 Nge tro la itre atre ka ngazo me ka iaö a ngazo catre hmaca kö, me amenu itre xan, me angatre fe.

14 Ngo ame eö, cile huti ju ngöne la itre ini hna hamë eö, lo hna ahmalane la hni eö troa mejiun, ke atre hi eö la itre ka ini eö. 15 Nge qaane lo co petre kö eö, atre hë eö la itre hna cinyihane ka hmitrötr, itre ej a ainamacanë eö matre mele jë eö, ke eö a lapaune koi Keriso Iesu. 16 Qaathene la ua i Akötresie la nöjei hna cinyihan asë, nge ka nyipiewekë göi troa hamë ini, me hmekën, me xom amekötine* la nöjei ewekë, me hajin ngöne la thiina ka meköt, 17 matre tro la atre i Akötresie a atreine huliwa hnyawa, me hnëkë hnyawa kowe la nöjei huliwa ka loi.

4 Tro Keriso Iesu a amekötine la itre ka mel me ka mec, ngöne la ijine tro nyidrëti a mama, me mus ngöne la Baselaia i nyidrë. Haawe, eni a upe iele eö qëmeke i Keriso Iesu me Akötresie troa: 2 Cainöjëne la trengewekë i Akötresie. Nge canga cainöje jë e ijine loi me ijine jol; eamo jë, ihaji jë, ithuecatre jë, nge kuca jë la nöjei ewekë cili ngöne la xomihni me atreine hamë ini. 3 Ke tro ha traqa la ijine tro angatr a xelene la ini ka loi, ngo thenge la itre aja i angatr, tro angatr a thele la itretre hamë ini ka qaloth* la itre hnangenyë i angatr. 4 Tro hë angatr a xele ma drenge la nyipici, me ujë kowe la itre ifejicatre. 5 Ngo ame eö, waiewekë hnyawa ju ngöne la nöjei götran asë, nge cile huti ju hnine la itre jol, nge catre pi eö cainöjëne la maca ka loi, me eatrëne hnyawa la huliwa i eö.

6 Ceitunge me waina hna neng nyine fii huuj, nge easenyi hë la ijine tro ni a mec. 7 Ase hë ni isine la nyipi isi, me sine la iwaja uti hë la hna ie, me melëne la lapaun. 8 Matre qaan enehila, ase hë Joxu, atre iameköti ka meköt, hnëkëne koi ni la korona ne la meköt hna troa hamën nyine thupeng, ngo tha koi ni casi kö, ngo koi angetre ajane catrëne la ijine mama i nyidrë.

9 Isine jë troa canga traqa koi ni. 10 Ase hë Dema nuaxöji ni ke angeic a hnine la fene celë,* matre angeic a tro pi a tro Thesalonika, nge Kerese e Galatia, nge Tito e Dalamatia. 11 Matre Luka casi pe hi me eni. Haawe, ce traqa pi me Mareko, ke ixatua angeice koi ni thatraqane la huliwa. 12 Ngo ase hë ni upi Tukiko a tro Efeso. 13 Nge e traqa jë eö, xometrongëne jë fe lo ikootreng hnenge hna nu e Troas thei Karepo, me itre tusi hna ewath, ngo mekune kö la itre ikupeine öni nyine cinyiany.

14 Hnei Alesanedro, lo atre dreu kopa, hna anyimua akötrë ni. Ngo tro kö Iehova* a të koi angeic thenge la aqane ujë i angeic. 15 Matre eö fe, wai eö pala kö hnei angeic, ke angeic a catre icilekeu memine la maca së.

16 Ame lo kola pane kootrë ni, pëkö ala casi ka ce me eni, hnei angatr asë hna nuaxöji ni—ngo epi the tro kö a nyizö angatr. 17 Eloine hi, ce Joxu me eni, nge hnei nyidrëti hna hamë trengecatreng, matre jëne eni, hna eatrëne hnyawa la huliwa ne cainöj, nge hna dreng hnene la nöjei nöj; ketre, hna amele ni qa ngöne la që i liona. 18 Nge tro la Joxu a thepe ni qa ngöne la itre huliwa ka ngazo, me amele ni kowe la Baselaia i nyidrë e hnengödrai. Matre, epi tro pala hi a atrunyi nyidrë epin, epine palua. Amen.

19 Haawe, tro fë jë la ibozunge koi Perisila me Akula, me nöjei atrene la hnalapa i Onesiforo.

20 Lapa pë hë Eraseto e Korinito, nge hnenge hna nue Trofimo e Mileto, ke ka wezipo angeic. 21 Isine jë troa canga traqa qëmekene la ijine hnötr.

Nge Eubulo, me Pude, me Lino, me Kelaudia, me nöjei trejin a upe la ibozu i angatr.

22 Haawe, epi tro la Joxu a amanathithine la aqane waiewekë i eö. Nge epi ce me eö la ihnimi gufa i nyidrë.