PANE TUS KOI TIMOTEO

1 Paulo, aposetolo i Iesu Keriso, hna acil hnei Akötresie Atre Amele së, me Iesu Keriso lo mejiune së, 2 koi Timoteo,* nekönge hniminang ngöne la lapaun:

Epi ej thei eö la ihnimi gufa me utipin, me tingeting i Akötresie la Kem, me Iesu Keriso, Joxu së.

3 Ame lo eni a mekune troa tro Makedonia, hnenge hna ithuecatre koi eö troa lapa e Efeso, nge enehila, eni hmaca ha a upi eö troa eamo itre xan, matre tha tro kö angatr a inine la itre xa ini, 4 me nyipiewekëne la itre ifejicatre, me thele la itre xötre atr, ke ka gufa lai. Kolo hi a amejëne menune la itre hnying, ngo tha thele pe la itre ewekë qaathei Akötresie göi lapaun. 5 Matre ame la kepine la eni a hamëne la itre eamo* celë, tre ihnim qa ngöne la hni ka wië, me mekuthetheu ka loi, me lapaune ka pë thoi ngön. 6 Ngo hnei itre xan hna trotrije la itre ewekë cili göi troa isi ithanata, 7 ke aja i angatr troa hamë ini göne la wathebo, ngo tha trotrohnine pe la itre ini hnei angatre hna pi hune fë.

8 Enehila, atre hë së laka, lolo la Trenge Wathebo e hna huliwane hnyawan 9 me hna atrehmekune laka, tha hna hamëne kö thatraqane la itre ka meköt, ngo thatraqai itre ka pë wathebon, me itre ka tha idrei me ka icilekeu, me ka kuca la ngazo, me ka tha mele nyipici,* me ka tha metrötrëne la ewekë ka hmitrötr, me itre ka humu keme me thin, me humuthi itre xan, 10 me itretre kuci ngazo,* me itre trahmanyi ka ce meköle me trahmany, me itre ka atrekënö atr, me itre ka thoi, me ka tha nyipici kowe la hna sisiny,* me nöjei aqane ujë ka icilekeu memine la itre ini ka nyipici, 11 thenge la lolo ne la maca ka loi hna ahnithe koi ni hnene la Akötresie ka madrin.

12 Nge eni a olene koi Iesu Keriso Joxu së, atre hamë mene koi ni, ke hnei nyidrëti hna mekune ka hape, ka mele nyipici ni matre ijije troa thue hnëqang. 13 Hnei nyidrëti hna kuca lai, ngacama eni ekö la ketre ka silitrengathoi Akötresie, me iaxösisi, me pi tru. Ngo hna utipi ni ke hnenge hna kuca thatren la itre ewekë cili, me pë lapaun. 14 Ame hnei Joxu hna amanane la ihnimi gufa theng, matre hetre lapauneng me ihnim qaathei Keriso Iesu. 15 Nge ka nyipici la trengewekë celë, nge ijije tro sa mejiune kow, ene laka: Hnei Keriso Iesu hna uti kowe la fen matre amelene la itre ka ngazo. Nge eni hi la ka tru ngazon thei angatr. 16 Ngo hane hi la kepin matre hna utipi ni: Matre jëne ni, atre ka tru ngazon, tro Keriso Iesu a amamane la aqane xomihni i nyidrë, me huliwa ni nyine tulu thatraqane la itre ka troa lapaune koi nyidrë, me kapa la mele ka pë pun.

17 Enehila, epi tro la Joxu ka epine palua, nge ka tha hnyiqetre kö, me ka tha mama kö, lo Akötresie ka cas, a kapa la iatrunyi me lolo epin, epine palua. Amen.

18 Itre ewekë lai hnenge hna qaja* koi eö Timoteo neköng, thenge lo hna qaja amë göi eö, matre tro pala hi eö a isine la nyipi isi, 19 me lapaun, me hetre mekuthetheu ka wië. Itre ewekë lai hna thipetrije hnei itre xan, ame hna luzi pi la lapaun i angatr, tune la kola lö la ketre he. 20 Nge Humenaio me Alesanedro la lue xan, ase hë ni nue nyidroti koi Satana, matre tro nyidroti a inine jëne la ihaji ka hape, tha tro kö a thaipië Akötresie.

2 Eni a iup troa xëwe fë la nöjei pengön atr, me thith, me thithi sai angatr, me thithi ole pi angatr, 2 me thatraqane la itre joxu, me itre trene hnëqa ka tru.* Qa ngöne lai, ijiji së troa mele tingeting, me nyihlue i Akötresieti hnyawa, me eatrën hnyawa la nöjei pengöne huliwa. 3 Nge ewekë lai ka lolo nge ka amadrinë Akötresie, Atre Amele së 4 me atre ajane tro la nöjei pengön atr a mel, me atrehmekune hnyawa la nyipici. 5 Ke casi hi la Akötresie, nge casi hi la atre ialoinekeu Akötresie me itre atr, ene la atr, Iesu Keriso. 6 Hnene la atre cili, hna hamë nyidrëti kö nyine thupene mele ka ihmeku, thatraqane la nöjei atr asë.* Nge troa anyipicine lai ngöne la nyipi ijin. 7 Ame la kepine matre acili ni jë troa atre cainöj me aposetolo, tre ene la troa hamë ini göi lapaune me nyipici kowe la nöjei nöj. Eni a qaja la nyipici, tha eni kö a thoi.

8 Qa ngöne lai, eni a ajan tro la nöjei atr ngöne la nöjei götran a thithi pala hi, me li ime ka nyipici, nge tha tro kö a elëhni me isi ithanata. 9 Ajange fe tro la itre föe a amingömingö angatr hnei hna heetre hnyawa,* nge ngöne la götrane cili, loi e troa mama thei angatr la metrötr me atreine tulu ewekë, ngo tha tro kö a kuci pengönëne la aqane ele ihe, me thaipi gool, me penina, me itre iheetre ka tru thupene catr. 10 Ngo maine aja i angatre troa mingöming, loi e tro angatr a kuca la loi thenge la aqane ujë ne la itre föe ka nyihlue i Akötresie.

11 Nge e tro la föe a kepe ini, loi e tro angeic a lapa thaup* me metrötrëne la trahmany. 12 Tha eni kö a nue la itre föe troa hamë ini maine musinë trahmany, ngo loi e tro angeic a lapa thaup. 13 Ke hna pane xupi Adramu nge pi Eva pë hë. 14 Ketre tha Adramu kö lo hna amenun, ngo föe lo hna nyipi amenun, ene pe, ngazo pi hi. 15 Ngo e tro la föe a hnaho, tro lai a thupë angeic,* e tro pala hi angeic a catre ihnim, me thiina ka wië, me atreine tulu ewekë.

3 Ka nyipici la trengewekë celë: Maine ketre trahmany a ajane troa atre thup, ka loi lai. 2 Nyipiewekë tro la atre thup a pë gelen matre tha tro kö a qajangazo angeic, nge tro fe angeic a atreine tulu ewekë, me waiewekë, me ikep, me maca troa hamë ini, 3 nge the tro kö angeic a pi iji gorok, me isi,* me catre fë mekun, me iwesitrë, me hni koi mani. 4 Ngo loi e ka atrein angeice xomiujine hnyawa la hnepe lapa i angeic, me hiane hnyawa la itre nekö i angeic, nge tro fe nyudreni a hane idrei. 5 (Ke maine thatreine kö ketre thupëne* la hnepe lapa i angeic, troa thupëne tune kaa la ekalesia i Akötresie?) 6 Nge the tro kö a acile la ka xötrei hmi, ke wanga pi tru jë angeic, nge kei pi angeic kowe la iameköti hna hnëkën koi Diabolo. 7 Ngo loi e hna qajaloinyi* angeic qa kuhu trön, matre tha tro kö angeic a hmahma me kei kowe la thethi Diabolo.

8 Ketre tun, tro fe la itre ka ixatua hnine la ekalesia a huliwa hnyawa, the tro kö angatr a lue hna ithanata,* me pi iji gorok, me hmo pi mani me meku angatre kö. 9 Ngo loi e tro pe a hetre mekuthetheu ka wië, me xölehuje catrëne la ini ka hmitrötr nge hna juetrën, ene la lapaun.

10 Nge tune pala hi, loi e troa pane tupathi* angatr, matre e tha hna qejegele angatre kö, tro ha acili angatr troa itre ka ixatua.

11 Ketre tun, loi e tro la itre föe a macaj, the tro kö a silitrengathoi ketre, ngo tro pe a atreine tulu ewekë, me nyipici ngöne la nöjei götran asë.

12 Nge tro la itre ka ixatua a ca föe, me hiane hnyawa la itre nekö i angatr, me thupëne hnyawa la itre hnepe lapa i angatr. 13 Ke ame la itre ka huliwa hnyawa, angatr a hlemu loi, nge tha xou i angatre kö troa ithanatane la lapaune göi Keriso Iesu.

14 Ngacama eni a mekune troa canga traqa koi eö, ngo eni pe a pane cinyihane la itre ewekë cili koi eö, 15 matre e traqa ni hmitr, atre hë eö la aqane troa ujë hnine la hnalapa i Akötresie, ene la ekalesia ne la Akötresie ka mel, nge ikapa me trepen ne la nyipici. 16 Eje hi, ka draië catre lo ini ka hmitrötr nge hna juetrën, ene lo ini ka ce tro memine la aqane troa nyipici koi Akötresie, laka: ‛Hnei Iesu hna mama ngöne la ngönetrei ne atr, nge hna jelemeköti nyidrë ngöne la ngönetrei ne hnengödrai, nge hnei nyidrëti hna mama kowe la itre angela, nge hna cainöjë nyidrë ngöne la itre nöj, nge hna lapaune koi nyidrëti e cailo fen, nge hna kepe nyidrëti e hnengödrai cememine la lolo.’

4 Ngo hnene la ua hna qaja hnyawa ka hape, ngöne la itre drai hnapin, ala nyimu la itre ka troa ananyine la lapaun, me nyipiewekëne la itre trengewekë, me itre ini ka thoi ne la itre dremoni. 2 Tro ha traqa tun pine la trengathoi i atr, itretre thoi me itre trene mekuthetheu ka mec, kösë hna dreuth hnei fao. 3 Angatr a wathebone troa faipoipo, me wathebone la itre xa pengöne xen. Ngo hnei Akötresieti pe hna xupe la itre xeni cili, matre tro la itre ka lapaun me ka nyipi atrehmekun la nyipici, a xeni me thithi ole. 4 Ke ka lolo asë hi la itre ewekë hna xupe hnei Akötresie, matre pëkö nyine thipetrij e hna kapa madrin. 5 Eje hi, itre ewekë lai hna ahmitrötrën hnene la trengewekë i Akötresie, me hnei thith.

6 E tro eö a hamëne la eamo cili kowe la itre trejin, tro hë eö a ketre hlue i Keriso Iesu ka lolo, hna thuan hnene la itre trengewekë ne lapaun, me itre ini hnei eö hna trongëne hnyawa. 7 Ketre, thipetrije pi la itre ifejicatre ka thoi, nge ka sixane la itre ewekë ka hmitrötr, tune lo itre hna ithanatan hnene la itre qatre föe. Ngo isine jë matre atreine jë eö nyipici koi Akötresie. 8 Ke hetre eloine la troa jumijumi itrei,* ngo ame la troa nyipici koi Akötresie, tre tru catre hmaca kö la thangan ngöne la nöjei götrane la mel, ke jëne manathithi lai enehila me elany. 9 Trenge nyipici hi lai, nge ijije troa mejiune kow. 10 Celë hi kepin matre easë a catre huliwa me isi, ke hne së hna mejiun kowe la Akötresie ka mel, Atre Amelene la nöjei pengön atr, ngo sisitria la itretre lapaun.

11 Haawe, qa i eö troa ahnithe pala hi la itre hna amekötine celë, me ini angatr. 12 Nge the nue ketre kö troa wangaconyi eö pine hi laka, thöth eö. Ngo nyi tulu jë thatraqane la itre ka mele nyipici göi aqane ithanata, me aqane ujë, me ihnim, me lapaun, me thiina ka wië. 13 Nge ngöne la ijine patre pala kö ni, isine jë troa e tusi hnyawa qëmekene la ka ala nyim, me eamo,* me hamë ini. 14 Nge the wangesixane kö lo ahnahna hna hamë eö, ngöne lo ijine kola perofetane göi eö, me ati ime hui eö hnene la itre qatre thup. 15 Mekune jë* la itre ewekë cili, nge nue itre eje pi troa löthi eö, matre mama pi koi nöjei atr asë ka hape, keresiano ka macaj eö. 16 Ngo wai eö kö, me itre ini hnei eö hna hamën. Qale catre jë kowe la itre ewekë cili, nge tro hë eö a amele eö, me itre ka drei eö.

5 The qeje ithanata ka catre kö kowe la itre qatr, ngo xatua nyudreni jë kösë itre kem, nge itre ka co kösë itre jin, 2 me itre föe hmae kösë itre thin, me itre jajiny, kösë itre xa, ngöne la thiina ka hmitrötr.

3 Nge nyipiine* jë la itre nyipi sine föe.* 4 Ngo maine ka trene kuku me api hmunë la ketre sine föe, nue angatre pi troa pane amamane la aqane nyipici i angatre koi Akötresie hnine la sipu hnalapa i angatr, me të koi keme me thin, me qaaqaa hmunë, ke ewekë lai ka amadrinë Akötresie. 5 Nge ame la nyipi sine föe ka pë sineen, angeice pe hi a mejiune koi Akötresie me thithi lapa e lai me jidr. 6 Ngo ame la sine föe ka mel kowe la itre sipu aja* i angeic, meci hë angeice lai, ngacama ka mele kö. 7 Qa ngöne lai, the mano kö eö hamëne la itre hna amekötine* celë, matre tha tro kö a hetre gele i angatr. 8 Haawe, maine tha pane thupëne kö ketre la itre atrene la hnalapa i angeic, me itre xa sine la madra i angeic, angeice hi lai a xelene la lapaun, nge tru catre kö la ngazo i angeic hune la atre ka pë lapaun.

9 Nge loi e troa sija la ëjene la itre sine föe e ka 60 hë lao macatre, nge ka föene la ca trahmany, 10 nge hna qajaloin, nge ka hia nekönatr ekö, nge ka ikep, me köle la itre waca ne la ange ka hmitrötr, nge ka xatuane la itre hna akötrën, nge ka isin troa kuca la loi.

11 Ngo the siji ëjene kö la itre sine föe xötre ka co, ke e traqa ju la itre aja ne ce meköl troa aisa angatr me Keriso, tro hë angatre lai a pi faipoipo. 12 Nge iameköti la pune koi angatr pine angatr nue lo pane isisinyikeu i angatr. 13 Nge angatre a inine pë jol, me xötrë hnalapa trootro, ngo tha angatre hmekuje kö a pë jol, ngo kolo fe a iqej, me lö hnine la itre ifekë jolen, me kötre fë ithanata. 14 Ngo eni pe a ajane tro la itre sine föe cili a faipoipo, me hia nekönatr, me nyidrawa hnalapa, matre tha tro kö a nue jëne la itre ka icilekeu troa qeje së. 15 Ngo nyipici, hetre itre xane hë ka trotrije la nyipici troa xötrethenge Satana. 16 Nge maine hetre itre sine föe hnine la hnalapa ne la ketre föe ka lapaun, nue angeice pi troa thupë angatr, matre tha tro kö a nyi ehnefene la ekalesia. Ngo tro hi la ekalesia a xatuane la itre nyipi sine föe.

17 Loi e troa nyipi atrune la nöjei qatre thup, nge tro kö a sisitria koi itre ka huliwa catr göi troa cainöj me hamë ini. 18 Ke önine lo hna cinyihan ka hape, “Tha tro kö a hnöth la që ne la kau e kola wejeweje wene qitr,” ke “Tro kö la atre huliwa a kapa la thupe i angeic.” 19 Nge the canga jelenyipicine kö la kola upezöne la qatre thup e tha qaathene kö la luetre, maine köni ka anyipicin. 20 Nge ame la itre ka majemine kuca la ngazo, haji angatre jë qëmekei nöjei atr asë, matre tro fe a hmekëne* la itre ka dreng. 21 Haawe, qëmeke i Akötresie, me Keriso Iesu, me itre angela hna iën, eni a upi eö troa trongëne la itre ewekë celë, nge the tro kö a imekuhni, maine ië hna hnim.

22 Nge the canga ati ime* kö hui ketre, nge the nyixölene kö la ngazo i ketre, ngo lapa pë ethane ju.

23 Nge loi ju hë hna iji tim,* ngo nango iji waina ju göne la trengenane i eö, me itre sine meci eö ka traqa lapa.

24 Ame la ngazo ne la itre xan, tre hna atre hnene la nöjei atr, nge kola xomi angatr kowe la iameköti. Ngo ame itre xan, mama pë hë e thupen. 25 Ketre tune mina fe, ame la itre huliwa ka loi, hna atre hnei nöjei atr asë, nge maine tha hna atre kö, thatreine kö tro ej a sihngödri palua.

6 Epi tro la itre ka thue la ehnefe ne hlu a metrötrëne qa kuhu hni la itre maseta i angatr, matre tha tro kö a qajangazone la ëje i Akötresie, me itre ini qaathei nyidrë. 2 Nge ketre, tha tro kö la hlue ne la maseta ka lapaun, a tha metrötrëne la maseta i angeic, ke lue trejine nyidro. Ngo tro pe angeic a huliwa hnyawa, ke ame la ka troa kepe eloine la huliwa i angeic, tre ketre keresiano, nge trejin hna hnim.

Haawe, catre jë eö tro fë la ini cili, me eamon. 3 Nge maine tro ketre a inine la ketre ini, me xelene la itre ini ne iamele qaathene la Joxu së Iesu Keriso, me itre ini göi aqane troa nyihlue i Akötresie, 4 ka pi tru catr angeic, nge pëkö hna trotrohnin, nge ka pi isi ithanata me catre fë mekun. Itre ewekë lai ka aciane la piin, me iwesitrë, me iqaqa,* me imekuhni, 5 nge kolo pala hi a iwesitrë menu hnene la itre ka tria inamacanen, me itre ka tha trotrohnine hë la nyipici, ke kola mekun ka hape, jëne kepe mani la troa nyipici koi Akötresie. 6 Eje hi, jëne manathithi ka tru la troa nyipici koi Akötresie, me melëne la hna hetreny. 7 Ke pëkö ewekë hne së hna traqa fë e celë fen, nge pëkö nyine tro sa xometrongën. 8 Qa ngöne lai, e hetrenyi hë së la xen* me iheetr,* haawe, mejihnine ju.

9 Ngo ame la itre ka isine troa trenamo, angatr a kei kowe la itupath me ihnö, me itre aja ka hmo nge ka iakötrë, itre ewekë lai ka xome la atr kowe la hnëjin, me mec. 10 Ke ame la troa hni koi mani, celë hi iwaane la nöjei pengöne ngazo, nge pine laka, hnei itre xan hna nyinyape thele lai, ene pe, nanyi pi angatr qa ngöne la lapaun, nge angatr a sipu jaqa angatr hnei itre akötr.

11 Ngo ame eö, atre i Akötresie, kötrene pi la itre ewekë cili. Catre jë pe thele la meköt, me nyipici koi Akötresie, me lapaun, me ihnim, nge cile huti ju, me thiina ka menyik. 12 Ketre, isine jë la isi ka loi ne la lapaun, nge xölehuje ju la mele ka pë pun, lo hna hë eö kow, nge hnei eö hna amamane hnyawa qëmekene la itre atre anyipicin.

13 Haawe, qëmeke i Akötresie atre thupëne la mele ne la nöjei ewekë, me Iesu Keriso, atre anyipicine hnyawa qëmeke i Ponetio Pilato, eni a upi eö 14 troa trongëne hnyawa la itre wathebo, matre pë ethan nge pëkö nyine qajangazon, uti hë la ijine mama pi la lolo ne la Joxu së Iesu Keriso. 15 Nge tro la Joxu ka madrin nge ka tru trenge men a amamane la lolo cili ngöne la ijine hna sa. Nyidrëti la Joxu ne la itre joxu, me Tane la nöjei tan, 16 nge nyidrëti hmekuje hi la ka tha meci kö, nge ka mel hnine la lai hna thatreine easenyin, lo hna tha öhn me hna thatreine öhn. Haawe, epi troa atrunyi nyidrë, nge epi tro pala hi a eje thei nyidrëti la men. Amen.

17 Inine* jë kowe la nöjei trenamo ngöne la fene celë* ka hape, the tro kö angatr a pi tru,* me mejiune kowe la itre mo ka tha cile hut, ngo koi Akötresieti pe, atre hamën atrune la nöjei ewekë nyine amadrinë së. 18 Upi angatre jë troa huliwa thatraqane la loi, me trenamo göne la itre huliwa ka loi, me ham,* me saqe ce thawa me itre xan. 19 Aqane tro angatre lai a amë acon la itre mo qaathei Akötresie nyine trepene ka loi thatraqai angatr elany. Qa ngöne lai, tro hë angatr a xölehuje la nyipi mel.

20 Haawe Timoteo, thupëne hnyawa kö lo hna ini eö, the nyipiewekëne kö la itre ithanata ka pë alien, nge ka adron la itre ewekë ka hmitrötr. Nge wange kö la itre ini ka icilekeu, lo hna hëne menune ka hape, “atrehmekun.” 21 Nyipici, hnei itre xan hna amamane la atrehmekune cili, ene pe, nanyi hë angatr qa ngöne la lapaun.

Haawe, epi tro la ihnimi gufa a ce me eö.