KOI ANGETRE KOLOSE

1 Ini Paulo, aposetolo i Iesu Keriso hnene la aja i Akötresie, me Timoteo, trejine me easë, 2 koi nyipunie ange ka hmitrötr nge itretre dreng ka mele nyipici koi Keriso e Kolose.

Epi tro nyipunie ange trejin, a kapa la ihnimi gufa me tingeting qaathei Akötresie Keme së.

3 Eahuni pala hi a olene koi Akötresie Keme ne la Joxu së Iesu Keriso, ngöne la eahuni a thithi sai nyipunie, 4 ke drenge hë huni la lapaune i nyipunie koi Iesu Keriso, me ihnim i nyipunie kowe la ange ka hmitrötr asë, 5 pine la mejiune i nyipunie hna hnëkën e hnengödrai. Hnei nyipunieti lo hna drenge la mejiune cili, jëne la maca ka loi ne la nyipici 6 hna tro fë koi nyipunie. Nge hetre thangane la maca ka loi cili, nge ej a jilapane la fen. Celë fe hi ka traqa koi nyipunie qaane lo nyipunieti a dreng me trotrohnine hnyawa la nyipi ihnimi gufa i Akötresie. 7 Hnei nyipunieti hna inine lai jëne Epafera, sine huliwa së hna hnim, nge atre nyihlue i Keriso ka nyihna hun. 8 Nge angeice fe la atre thuemacanyi hun la ihnimi i nyipunie hna acian hnene la ua.

9 Nge celë hi kepin matre, qaane lo drai ne drenge huni lai, tha mano kö huni thithi sai nyipunie, me sipon matre tiqa pi nyipunie hnene la nyipi atrehmekun ne la aja i Akötresie, me nöjei inamacan, me trotrohnin qaathei nyidrë.* 10 Tro hë nyipunie a tro hnyawa göi Iehova,* matre amadrinë nyidrë hnene la itre huliwa ka loi i nyipunie, me atrehmekunyi Akötresie hnyawa. 11 Nge epi tro la men atraqatr i Akötresie a aegöcatrenyi nyipunie, matre atreine jë nyipunie cile hut, me itreqe,* me madrin. 12 Nge nyipunieti a ole kowe la Kem, atre aijijë nyipunie troa ce kepe edrö memine la ange ka hmitrötr ngöne la lai.

13 Hnei nyidrëti hna thepe së qa ngöne la musi ne la jidr, me troxomi së kowe la baselaia ne la Nekö hnimina i nyidrë, 14 atre thepe së jëne la thupene mel, ene la hna köletrije la itre ngazo së. 15 Nyidrëti la hnaiji Akötresie ka tha mama kö, lo haetra ne la itre hna xup asë. 16 Ke jëne nyidrë, hna xup la nöjei ewekë asë e hnengödrai me e celë fen, itre ewekë ka mama me ka tha mama kö, itre theron, me nöjei joxu, me itre mus, me itre trene mus. Nge ame fe la itre xa ewekë asë, tre hna xup jëne nyidrë, nge thatraqai nyidrë. 17 Ketre, mele pa i nyidrëti kö hune la nöjei ewekë asë, nge jëne nyidrë matre traqa pi fe la nöjei ewekë. 18 Nyidrëti la he ne la ngönetrei, ene la ekalesia. Nge nyidrëti fe la qaan me haetra ne la itre hna hnahon qa ngöne la mec. Qa ngöne lai, tro hë nyidrëti a haetra ngöne la nöjei götran asë, 19 ke ase hë Akötresieti mekune ka hape, loi e troa pexeje la nöjei ewekë asë thene la Nekön. 20 Nge jëne la Nekön, tro la nöjei ewekë e hnengödrai me e celë fen a iloi hmaca me nyidrë, nge tro ha hetre tingetinge jëne la madra hna anenin hune la sinöe ne iaxösisi.*

21 Ketre, ka nanyi nyipunieti ekö qaathei Akötresie, nge itre ithupëjia nyipunieti me nyidrë, ke nyipunieti lo a mekune lapane la itre huliwa ka ngazo. 22 Ngo enehila, ase hë Akötresie kuca matre iloi jë nyipunie me nyidrë, jëne la ngönetrei ne la atr ka mec, matre ijij troa mama sai nyipunie koi Akötresie, ke wië hë nyipunie me pë ethan me pë gelen. 23 Ngo eje hi, loi e tro pala hi nyipunieti a catr ngöne la lapaun, me fedre hnyawa kowe la trepen, me cile hut, me tha enij ngöne la mejiune ne la maca ka loi hnei nyipunieti hna dreng, nge hna cainöjën kowe la nöjei atr e cailo fene hnengödrai. Nge eni, Paulo, la hlue ne la maca cili.

24 Enehila, eni a madrine troa akötre pi nyipunie, nge eni a melëne la itre akötre i Keriso, lo tha hnenge pala kö hna melën ngöne la ngönetreing, pine la ngönetrei nyidrë, ene la ekalesia. 25 Haawe, eni hi la hlue ne la ekalesia, thenge la aqane ekö huliwa i Akötresie, lo hna hamëne koi ni thatraqai nyipunie göi troa tro fë hnyawa la trengewekë i Akötresie, 26 ene lo ewekë ka hmitrötr nge hna juetrën ngöne lo fene hnapan,* me kowe lo itre xötre hnapan. Ngo enehila, ase hë amamane kowe la itre atr i nyidrë ka hmitrötr. 27 Itre atr qa ngöne la itre xa nöj, hna madrine kow hnei Akötresie troa amamane la elolone lo ini ka hmitrötr nge hna juetrën, ene laka, ce Keriso me nyipunie, kola hape, tro hë nyipunieti a ce thawa la lolo i Keriso. 28 Nyidrëti hi la hne së hna cainöjën, nge easë a hmekën me inine la nöjei atr thenge la inamacan, matre ijije troa mama fë la nöjei atr koi Akötresie, nge pexeje la aqane imelekeu i angatr me Keriso. 29 Eje hi, kepine hi lai matre eni a catre huliwa. Nge eni a kuca lai, hnene la mene i nyidrë ka huliwa ngöne la meleng.

2 Nge ajange tro nyipunieti a öhne la aqane catre huliwang thatraqai nyipunie, me thatraqai angetre Laodikea, me itre ka tha hane kö öhnyi ni.* 2 Qa ngöne lai, tro ha keukawa la itre hni angatr, nge tro angatr a casi hnyawa ngöne la ihnim, nge tro hë angatr a öhnyi loi, qa ngöne la hna trotrohnine hnyawa la ini i Akötresie ka hmitrötr nge hna juetrën, ene Keriso. 3 Ke hna juetrëne hnyawa thei nyidrë la nöjei trengamo ne inamacan me atrehmekun. 4 Eni a qaja lai matre tha tro kö ketre a amenu nyipunie hnene la itre mekune ka iaö. 5 Matre ngacama patre kö ni ngöne la ngönetrei, ngo ce eni me nyipunie ngöne la mekun, nge madrine ni troa drenge la aqane tro loi la ekalesia i nyipunie, memine la ecatrene la lapaune i nyipunie koi Keriso.

6 Haawe, pine laka, ase hë nyipunie kepe Iesu Keriso Joxu, catre jë ce tro me nyidrë. 7 Nge tune lo hna ini nyipunie, nyipiewekë tro la lapaune i nyipunie koi Keriso a aegöcatren me acatrenyi nyipunie, kösë sinöe ka jui iwaan. Nge loi e tro pala hi nyipunie a olene koi Akötresie.

8 Wange pala kö wanga tro ketre a tra thethi* nyipunie jëne la inamacane i fen, me itre mekune ka pë alien thenge la qenenöje i atr, me thenge la hna wangatrun hnei fen, ngo tha koi Keriso kö; 9 ke pexeje thei Keriso la itre thiina i Akötresie. 10 Haawe jëne nyidrë, tha tro kö a patre thei nyipunie la ketre ewekë, ke nyidrëti la he ne la nöjei mus me trene mus. 11 Nge hnene la aqane imelekeu i nyipunieti me nyidrë, ase hë xötrehatrenyi* nyipunie, ngo tha hnei iwanakoim, ngo ngönetrei pe la hna xometrij. Nge aqane xötrehatrene la itre hlue i Keriso lai, 12 ke hna ce kelemi nyipunie me nyidrë ngöne la bapataiso i nyidrë, nge pine la aqane imelekeu i nyipunie me nyidrë, hna ce amele nyipunie me nyidrë jëne la lapaune i nyipunie kowe la itre huliwa ka mene i Akötresie, atre amele Keriso qa hna mec.

13 Ketre, ngacama ka meci hë nyipunie ngöne lo itre ngazo i nyipunie, me ngöne laka, tha itre hna xötrehatrene kö, ngo hnei Akötresieti hna amele nyipunie matre casi me nyidrë. Hnei nyidrëti hna nuetrije la itre ngazo së. 14 Nge hnei nyidrëti hna apatrene* lo Wathebo hna cinyihan nge ka nyizö së, me jei faon ej hune la sinöe ne iaxösisi.* 15 Nge jëne lai,* hnei nyidrëti hna acile xöeëne la itre mus me itre trene mus, me ahmahmanyi angatr ngöne la gaa tru atr, me amamane hnyawa ka hape, hune hë nyidrë.

16 Haawe, the nue pi kö tro ketre a ameköti nyipunie göi nyine xen, me nyine ij, maine göi ketre feet, maine göne la treu ka hnyipixe, maine göi sabath. 17 Ke ame asë hi la itre ewekë cili, tre iahnue ne la ewekë ka troa traqa, ngo Keriso la ngönetrei. 18 Haawe, wange pala kö la itre ka ipië thoi, me itre ka hmi koi itre angela,* ke tro hë angatre lai a sewe nyipunie troa kapa la thupe i nyipunie. Ame la itre atre cili, angatre hi a qale kowe la hna goeën, me selëne la inamacane i angatr ka gufa. 19 Nge tha angatre kö a fedre kowe la he, lo atre thuane la ngönetrei me iacatrenekeune hnyawa la itre hnepe ngönetrei jëne la itre hnaitöjun, me akökötren ej thenge la aja i Akötresie.

20 Nge maine nyipici ka hape, ka meci hë nyipunie me Keriso göne la itre ewekë hna wangatrune hnei fen, hnauëne hö laka, nyipunieti pala kö a mele kösë atre ne fen me trongëne la hna amekötin celë: 21 “The xome kö, the tupathe kö, nge the ketre kö”? 22 Ke e huliwan [maine, “xen maine ij”] hë së la itre ewekë cili, tro lai a pë. Nge ame la hna amekötine cili, tre wathebo me ini qaathei atr. 23 Matre, maine nyipici ka hape, kösë ka inamacane la aqane ujë cili, ke kola xomaconyi së troa nyihlue i Akötresie, me ipië, me qanangazone la ngönetrei, ngo ka gufa göi troa isi me itre aja i ngönetrei.

3 Nge maine hna ce amele nyipunie hmaca me Keriso, thele jë la itre ewekë e hnengödrai, lo hna lapa hnei Keriso, ngöne la götrane maca i Akötresie. 2 Thele catrëne jë la itre ewekë ne hnengödrai, ngo tha itre ewekë ne fene kö. 3 Ke, itre ka meci hë nyipunieti lo, nge thenge la aja i Akötresie, hna juetrëne thei Keriso la mele i nyipunie. 4 Nge e mama pi lo mele së, ene Keriso, tro fe hë nyipunie a ce mama me nyidrë, me ce thawa la lolo i nyidrë.

5 Haawe, humuthe pi la itre hnepe ngönetrei i nyipunie e celë fen, tune la kuci ngazo,* me thiina ka sis, me itre aja ka sis hna thatreine xomehnöth, me itre aja ka iangazo, me meciun ke aqane nyi idrola lai. 6 Nge itre aqane ujë ka jele la trengehni i Akötresie. 7 Eje hi, itre ewekë lai hnei nyipunieti hna majemine kuca* ekö. 8 Ngo enehila, trije hnyawa pi qaathei nyipunie la itre ewekë celë, ene la elëhni, me wesitr, me nöjei ngazo, me iqaqa, me trenge ka sis. 9 Ketre, the ithoikeu kö, unatrije pi la itre thiina hnapan me itre hna majemin. 10 Nge hetrëne jë la itre thiina ka hnyipixe, hna ahnyipixen hnene la nyipi atrehmekun, matre ihmeku memine la thiina ne la Atre Xupe ej. 11 Matre, pë hmaca kö angetre Geres, me angetre Iudra, me itre hna xötrehatren, me tha hna xötrehatren, me itre trenyiwa, me angetre Sekuthia,* me itre hlu, me itre hna nue kö, ke Keriso la nöjei ewekë asë, nge nyidrëti e hune la nöjei ewekë asë.

12 Haawe, hetrëne jë la utipin me ihnim, me thiina ka loi, me ipië,* me hni ka menyik, me xomihni* tune la itre atr hna iën hnei Akötresie, ange ka hmitrötr nge hna hnim hnei Akötresie. 13 Nge the mano kö nyipunie ixomihnikeu me inualoinekeun, ngacama kola ngazo koi nyipunie. Nge loi e tro fe nyipunieti a nyitipune la aqane nue Iehova* la itre ngazo i nyipunie. 14 Haawe, hetrëne jë la ihnim, ke celë hi otrene ka nyipi loi nyine acasine la nöjei atr asë.

15 Epi tro la tingetinge i Keriso a musi* ngöne la itre hni nyipunie, ke, hna hë nyipunieti kowe la tingeting matre casi hi la ngönetrei. Haawe, amamane jë la hni ne ole i nyipunie. 16 Nge epi troa tiqa thei nyipunie la itre ini i Keriso, matre mana pi la inamacan thei nyipunie. Nge catre jë nyipunie ini itre xan, me ithuecatrekeu* jëne la itre salamo, nge atrunyi Akötresieti jë, nge nyimane jë la itre nyima ne hmi, me itre nyima ne ole, nge nyima jë koi Iehova* e kuhu itre hni i nyipunie. 17 Matre, ngöne la itre ewekë hnei nyipunieti hna qaja maine kuca, kuca asë jë ngöne la ëje i Iesu Joxu, nge olene jë koi Akötresie Keme së jëne Iesu.

18 Itre föe fe, drengethenge ju la itre föi nyipunie, tune la aqane ujë ne la itretre drei Joxu. 19 Nge itre trahmanyi fe, the mano kö hnime la itre föe i nyipunie, nge the ngazo thiina* kö koi nyudren. 20 Nge ha nekönatr, drengethenge ju la itre kem me thine i nyipunie ngöne la nöjei ewekë asë, matre amadrinë Joxu. 21 Nge nyipunie itre kem, the aelëhni nyudreni kö, wanga akötrëne* jë la itre hni i nyudren. 22 Nge nyipunie itre hlu, drengethenge ju la itre maseta i nyipunie, tha hnene kö laka, kola goeë nyipunie matre amadrinë atr, ngo hnene la hni ka nyipici me xoue Iehova.* 23 Haawe, ngöne asë hi la itre hnei nyipunie hna kuca, kuca asë jë hnene la hni ka pexej koi Iehova,* ngo tha koi itre atre kö, 24 ke atre hnyawa hi nyipunie ka hape, qaathei Iehova* la edrö i nyipunie. Haawe, huliwa jë tui itre hlue kowe la Maseta, ene Keriso. 25 Eje hi, ame la atre huliwa menu, tro angeice a xeni pune la itre huliwa i angeic, ke ame Akötresie, tha ka ië hna hnime kö nyidrë.

4 Nyipunie itre maseta, catre jë troa loi thiina me meköt kowe la itre hlue i nyipunie, ke atre hë nyipunie ka hape, hetre Maseta i nyipunieti fe e hnengödrai.

2 Haawe, the mano kö thith, hmeke jë ngöne la itre thith, nge ole jë koi Akötresie. 3 Nge thithi sai huni jë fe, matre tro Akötresie a fe gojenyi huni troa cainöjëne la trengewekë i nyidrë, me itre ini hna juetrën göi Keriso, lo itre ini hna akalabusi ni pin. 4 Qa ngöne lai, tro hë ni a atreine qaja amamane hnyawa la itre ini cili.

5 The mano kö tro ngöne la inamacan qëmekene la itre atr ka tha hmi kö, nge huliwane* hnyawane jë la traem i nyipunie. 6 Nge tune la aqane hnyapane la xen hnei sootr, loi e tro pala hi la itre trengewekë i nyipunie a menyik matre hnyapa troa dreng, nge tro hë nyipunieti lai a atreine sa.

7 Tro pë hë Tukiko, lo trejine hnimina, nge sine huliwang me hlue i Joxu, a qaja koi nyipunie la pengöng. 8 Haawe, eni a upi angeic matre atre jë nyipunie la pengö hun, nge matre keukawa pi la itre hni i nyipunie. 9 Ce angeic me Onesimo, atrene la nöje i nyipunie, nge trejine hnimina ka mele nyipici koi Akötresie. Tro pë hë nyidro a thuemacanyi nyipunie la itre ewekë ka traqa e celë.

10 Nge Aritako lo trejine hna ce akalabusin me eni, a hane ibozu me nyipunie, me Mareko lo trejine me Banaba, (lo hnenge hna ahnithe koi nyipunie troa wai angeic e traqa pi) 11 me Iesu, lo hna ati ëjen ka hape, Iuseto, ketre hna xötrehatren. Angatre hi la itre sine huliwang göne la Baselaia i Akötresie, me angetre akeukawanyi* ni. 12 Nge Epafera fe, atrene la nöje i nyipunie, nge hlue i Keriso Iesu, a hane ibozu me nyipunie. Tha mano kö angeic xëwe sai nyipunie, matre tro pala hi nyipunieti a cile hut, tune la itre ka macaj göne la aja i Akötresie. 13 Nge eni a anyipicine la aqane huliwa mec i angeic koi nyipunie, me kowe la itre trejine ne Laodikea me Hierapoli.

14 Nge Dema me Luka, lo droketre me trejine hnimina, a hane ibozu me nyipunie. 15 Nge tro fë jë la ibozung kowe la itre trejine ne Laodikea, me koi Numefa, memine la ekalesia ka icasikeu thei angeic. 16 Nge e ase jë nyipunieti e la tusi celë, thele jëne jë troa e kowe la ekalesia ne Laodikea. Nge loi e tro fe nyipunie a hane e la tusing koi angetre Laodikea. 17 Nge qaja jë fe koi Arekipo ka hape: “Thele catrëne jë troa eatrëne la huliwa i eö qaathei Joxu.”

18 Haawe, ibozunge hi lai koi nyipunie, eni Paulo, a cinyihane lai hnene la imeng. The thëthëhmine kö laka, hna ceinë ni. Nge epi tro la ihnimi gufa a lapa thei nyipunie.