KOI ANGETRE FILIPI

1 Paulo me Timoteo, lue hlue i Keriso Iesu koi ange ka hmitrötr asë e Filipi, itre atre i Keriso, me nyipunie itretre thup, me itre ka ixatua hnine la ekalesia.

2 Epi tro nyipunieti a kapa la ihnimi gufa me tingetinge qaathei Akötresie Keme së, me Iesu Keriso Joxu së.

3 Ame la nöjei ijine eni a meku nyipunie, eni pala hi a olene kowe la Akötresing 4 ngöne la nöjei ijin eni a xëwe. Nge ka madrine pala hi ni troa xëwe sai nyipunie, 5 pine la itre ahnahna hnei nyipunieti hna hamën thatraqane la maca ka loi, qaane lo pane drai nge uti pala hi enehila. 6 Nge ka xecie hnyawa koi ni ka hape: ame lo atre nyiqaane la huliwa ka lolo thei nyipunie, tro kö angeic a umuthe hnyawa, uti hë la drai ne traqa Iesu Keriso. 7 Nge meköt e tro ni a mekune tune koi nyipunie, ke tru la ihniminge koi nyipunie, nyipunie itretre ce thawa me eni la ihnimi gufa ngöne la kalabus, me ngöne la kola cilëgölin me isigöline la maca ka loi qëmekene la itre mus.

8 Öhne hnyawa kö Akötresie la treng ajange troa iöhnyi hmaca me nyipunie, ke ka tru nyipunieti koi ni, tune lo aqane hnimi nyipunieti hnei Keriso Iesu. 9 Nge eni pala hi a thithi fë laka, tro la ihnimi nyipunie a kökötre trootro thenge la nyipi inamacan, me atrehmekun, 10 matre atreine jë nyipunieti tuluthe la ka nyipiewekë. Qa ngöne lai, tro pala hi nyipunieti a wië, nge tha tro kö nyipunieti a akeinyi ketre, uti hë la drai i Keriso. 11 Nge jëne Iesu Keriso, tro hë nyipunieti a tiqa hnene la wene ne la meköt, matre troa qaja aloinyi Akötresie, me atrunyi nyidrë.

12 Ngo enehila ange trejin, ajange tro nyipunieti a atre ka hape, ame la jol hnenge hna melën, ixatua pena ha kowe la huliwa ne tro fë maca ka loi. 13 Matre, mama cile hë kowe la itre ka thupëne la joxu i angetre Roma, me nöjei atr asë ka hape, kola ceinë ni pi Keriso. 14 Nge ala nyimu enehila la itre trejine me Joxu hna thuecatren pine la hna ceinë ni, matre tha xou i angatre fe hë troa catre cainöjëne la trengewekë i Akötresie.

15 Nyipici, hetre itre ka cainöjë Keriso hnei zalu me iwesitrë, ngo hetre itre xane ka kuca lai hnene la hni ka nyipici. 16 Angatr a cainöjë Keriso pine la ihnimi angatre koi nyidrë, ke atre hi angatre ka hape, hna acili ni troa isigöline la maca ka loi; 17 ngo ame lo itre ka pi tru, tha angatre kö a kuca lai hnene la hni ka nyipici, ke angatr a thele troa akötrë ni ngöne la itre iceineng. 18 Matre nemene hë la thangan? Ka loi asë hi, ke ngacama kola cainöj thoi maine kola nyipi cainöj, ngo kolo pala hi a qeje Keriso, matre ka madrine ni, nge tro pala hi ni a madrin. 19 Nge atre hë ni laka, tro ha amele ni pine la itre xëwe i nyipunie, memine la ixatua ne la uati hmitrötr hnei Iesu Keriso hna hamë së. 20 Kolo hi a ihmeku memine lo hnenge hna treqen me mejiun laka, tha tro kö ni a hmahmane la mejiune cili. Ngo pine laka, tha xounge kö troa ithanata, tune ekö, kola ha atrunyi Keriso jëne la ngönetreing, ka mele ju hë ni maine ka mec.

21 Ke ame koi ni, e tro ni a mel, eni a mel göi Keriso, ngo e meci pi ni, manathithi hë ni lai. 22 Matre enehila, maine tro ni a mel ngöne la ngönetreing, thangane la huliwange lai, ngo tha tro kö ni a qaja amamane la hnenge hna troa iën. 23 Ngo lue mekun a ajolëne la hning, eni a ajane troa nuamacanyi ni matre tro ni a ce me Keriso, nge mekune ka sisitria lai. 24 Ngo eje hi laka, pi nyipunie, loi e tro ni a lapa ngöne la ngönetrei. 25 Haawe, loi e xecie hnyawa koi nyipunie ka hape, atre hi ni laka, tro pala hi ni a ce me nyipunieti asë, matre tro la lapaun me madrine i nyipunie a kökötr. 26 Nge e traqa pi ni koi nyipunie, tro ha tru catre la trenge madrine i nyipunie, ke itretre drei Iesu Keriso nyipunie.

27 Haawe, loi e tro la aqane ujë i nyipunie a ihmeku memine la maca ka loi göi Keriso, matre ngacama traqa ju hë ni koi nyipunie maine tha traqa pena, ngo loi e tro ni a drenge me atre ka hape, nyipunieti a catr, me ca mekun, me casi troa isigöline la lapaun göne la maca ka loi, 28 nge tha nyipunieti kö a xouene la itre ka icilekeu. Celë hi nyine anyipicine ka hape, tro ha apatrenyi angatr, ngo hatrene iamele pe koi nyipunie. Nge qaathei Akötresie la hatrene cili. 29 Ke hna hamë nyipunie la manathith troa lapaune koi Keriso, memine la manathith troa akötre pi nyidrë. 30 Matre nyipunie enehila a melëne la itre akötr hnei nyipunieti hna öhne theng, me drenge ka hape, eni pala hi la a melën.

2 Haawe, pine laka casi hë nyipunieti me Keriso, nge maine nyipunieti a hamë ithuecatr me keukawa cememine la ihnim, nge maine nyipunieti a akötrehni itre xan, me hnimi angatr, me utipi angatr, 2 apexejene jë la madrineng koi nyipunie qa ngöne la hna ce hni, me ihnimikeu, me cas, me ca mekun. 3 The kuca kö la ketre ewekë matre thele iwesitrë maine pi draië, ngo ipië* ju nge mekune ju ka hape, sisitria kö itre xane hui nyipunie. 4 Haawe, the thele ewekë thatraqai nyipunieti hmekuj, ngo thele jë fe la ka loi koi itre xan.

5 Nge kuca jë matre eje pala hi thei nyipunie la aqane waiewekë i Keriso Iesu 6 laka, ngacama hnaiji Akötresieti nyidrë, ngo tha hnei nyidrëti kö hna thele troa thapa la göhnë i Akötresie. 7 Pëkö, ngo hnei Iesu hna aipië nyidrëti kö, me xome la pengö i hlu, me xome la ngönetrei ne atr.* 8 Nge ame lo nyidrëti a mama ngöne la ngönetrei ne atr, hnei nyidrëti hna ipië me idrengethenge uti hë la mec, nyipici, mec hune la sinöe ne iaxösisi.* 9 Celë hi matre hnei Akötresieti hna adraië Iesu kowe la göhnë ka tru, me hamë nyidrëti la ketre ëje ka draië catre kö hune la itre xa ëj. 10 Qa ngöne lai, ngöne la ëje i Iesu, tro ha sa iwatingöne ca hnene la nöjei ka lapa e hnengödrai, me e celë fen, me e kuhu hnadro. 11 Nge tro la nöjei thinem a jelenyipicine ka hape, Joxu hë Iesu Keriso, nge tro lai a atrunyi Akötresie, la Kem.

12 Haawe ange hniminang, tune lo aqane idrengethenge i nyipunie ngöne lo eni thei nyipunie, me ngöne lo itre ijin patre kö ni, the cile kö troa huliwa catre thatraqane la iamele i nyipunie, cememine la xou me hmengöhmengön. 13 Ke thenge la aja i nyidrë, Akötresieti casi hi la ka atreine huliwane la itre hni i nyipunie, matre hetre aja me trengecatre i nyipunie troa kuca. 14 Haawe, loi e tro pala hi nyipunieti a kuca la nöjei ewekë, ngo tha tro kö a iqej me isi ithanata. 15 Qa ngöne lai, tro hë nyipunieti a wië me pë engazon, itre nekö i Akötresie ka wië nyipine la xötre ka qali thiina. Nyipunieti a hudrum nyipi angatr kösë itre lai ne la fen, 16 me xolouthe catrëne la trengewekë ne mel. Qa ngöne lai, troa hetre kepin matre tro ni a madrin ngöne la drai i Keriso, ke tro ni a öhne ka hape, tha nyinyape menu kö ni, nge tha gufa kö lo hnenge hna huliwa catr. 17 Hna huliwa ni kösë waina nyine fii huuj, kola qaja la huliwa* ne ixatua, huliwa hnei nyipunieti hna hane kapa hnene la lapaun, matre eni a madrin, me ce madrine me nyipunieti asë. 18 Ketre tun, madrine jë nyipunie, nge ce madrine jë me eni.

19 Nge enehila, eni a mejiune koi Iesu Joxu troa canga upi Timoteo koi nyipunie, matre madrine jë ni e atre hë ni la pengö i nyipunie. 20 Nge pëkö ketre atr thei eni ka tui angeic, ke angeic a hnehengazo nyipunie. 21 Ngo ame itre xan, angatr a goeëne la nyine loi koi angatre kö, ngo tha koi Iesu Keriso kö. 22 Nge öhne kö nyipunie la nyine anyipicine göi angeic ka hape, tune la lue treme nekön, hnei angeic hna ce huliwa me eni matre akökötrene la huliwa ne tro fë maca ka loi. 23 Haawe, angeice hi la hnenge hna troa upe koi nyipunie, e mama jë la pune koi ni. 24 Ketre, ka mejiune ni koi Joxu laka, easenyi hë matre traqa pi ni koi nyipunie.

25 Ngo enehila, eni a mekune ka hape, nyipiewekë troa upi Epaferodito koi nyipunie. Angeice la trejine me eni, nge sine huliwang, me sine ising, me atre huliwa thatraqai ni hna upe koi nyipunie. 26 Tru la aja i angeic troa wai nyipunie, nge hace fe la hni angeic ke drenge hë nyipunie ka hape, hnei angeice hna wezipo. 27 Nge maine ju, ka meci hë angeice lo, ngo hnei Akötresieti hna utipi angeic, ngo tha angeice casi kö ngo eni fe, matre tha tro kö a traqa itrai la itre akötre koi ni. 28 Ngo eni a canga upi angeice koi nyipunie, matre e öhnyi angeice hë hnei nyipunie, tro hmaca nyipunie a madrin, nge tro ha nango tro hmidra la aqane hnehengazong. 29 Haawe, tune pala hi lo, kepe angeice hnyawa ju göi Joxu cememine la madrin. Nge the mano kö hnim la itre atre ka tun, 30 ke hnei angeic* hna qëmeke kowe la mec pine la huliwa i Keriso,* me nyihna i nyipunie troa catre huliwa koi ni, ke patre kö nyipunie.

3 Haawe, ange trejin, loi e tro pala hi nyipunie a madrine göi Joxu. Nge tha jole kö koi ni troa amexeje koi nyipunie ngöne la tusing, ke jëne mele lai koi nyipunie.

2 Wange pala kö la itre kuli, nge wange pala kö la itre ka iakötrë, nge wange pala kö la itre ka sijisiji itrei, 3 ke easë hi la itre hna nyipi xötrehatren, easë itre ka kuca la huliwa ka hmitrötr jëne la ua i Akötresie, nge ka sipu selë së pi Keriso Iesu, nge ka tha mejiune kowe la ngönetrei. 4 Ngo maine ketre a pi selë angeic ngöne la ngönetrei, sisitria kö ni hui angeic.

Nge maine ka xecie hnyawa koi ketre ka hape, hetre kepin matre angeic a mejiun kowe la ngönetrei, nga the qeje ni pala ha: 5 hna xötrehatrenyi ni ngöne la hnaeitrene draing, nge atre Isaraela ni qa ngöne la lapa i Beniamina, nge atre Heberu hna hnahon hnei lue atre Heberu; nge thenge la wathebo, Faresaio ni, 6 nge pine laka, ka catre ni ngöne la huliwa, hnenge hna axösisine la ekalesia, nge thenge la meköti ne la wathebo, pëkö ngazong. 7 Eje hi, ame lo itre ewekë ka tru koi ni ekö, luzi* hë pi Keriso. 8 Nyipici, pëkö ca eloin koi ni la itre ewekë cili, ke sisitria catre kö la etrune la atrehmekun göi Keriso Iesu Joxung. Haawe, pi nyidrë, ase hë ni trije la nöjei ewekë asë, nge eni a wange la itre ewekë cili ceitu me itre hnasany,* matre kepe ni jë hnei Keriso, 9 nge matre casi jë nyio. Qa ngöne lai, tha tro kö ni a jelemeköti ni pine eni sipu amekötine la ka meköt, lo meköt ka xulu qa ngöne la Wathebo, ngo pine la meköt ka xulu qa ngöne la hna lapaun koi Keriso, ene la meköt qaathei Akötresie hna nyitrepene hnene la lapaun. 10 Nge ame la ajang, tre troa atrepengöi nyidrë, memine la mene ka ahlë nyidrë qa hna mec. Nge ajange fe troa hane melëne la itre akötre i nyidrë, me mec tui nyidrë, 11 matre maine ijij, tro fe hë ni a hane sine la pane mele hmaca.

12 Ngo tha kolo kö a hape, ase hë ni kapa, maine pexeje hë ni, ngo eni pe a catre huliwa matre öhne jë ni ka hape, ijijinge kö troa kapa la thupen hna ië* ni kow hnei Iesu Keriso. 13 Nyipici ange trejin, tha eni kö a mekune ka hape, ka tro hë ni a kapa, ngo ame la ka xecie koi ni, tre, eni a thëthëhmine la itre ewekë hutröng, me qëmeke kowe la itre ewekë ka eje qëmekeng, 14 me catre nyinyape troa kapa la thupen, ene la ihë i Akötresie, ihë qa hnengödrai jëne Keriso Iesu. 15 Ngo loi e tro asë hi së, itre ka macaj, a hetrenyi la aqane waiewekë celë, nge maine isazikeu la mekuna i ketre, tro kö Akötresie a amamane koi angeice la aqane waiewekë ka loi. 16 Haawe, pine laka hne së asë hi hna kökötr ngöne la lapaun, loi e tro pala hi së a isa nyinyape hnyawa ngöne la iwaja ka cas.

17 Ange trejin, casi jë troa nyitipu ni, nge goeëne hutine ju la itre ka xötrethenge la tulu hne huni hna hamëne koi nyipunie. 18 Ala nyimu la itre ka ujë tune la itre ithupëjia memine la sinöe ne iaxösisi* i Keriso, lo hnenge hna majemine qaja koi nyipunie, ngo enehila, eni a treije troa qeje angatr, 19 ke tro ha apatrenyi angatr, nge akötresi angatr la itre hni angatr, nge hmahma la lolo i angatr, nge angatre pala hi a mekune la itre ewekë ne fen. 20 Ngo ame easë, zi së kö e hnengödrai, nge easë a lapa treqene la atre iamele ka troa uti qa lai, ene Iesu Keriso Joxu. 21 Matre jëne la men atraqatr hna hamëne koi nyidrë nyine musi kowe la nöjei ewekë, tro hë nyidrëti a saze la ngönetrei së ka ngazo, matre tune* la ngönetrei i nyidrë ka lolo.

4 Haawe, ange trejine hniminang, itre hnenge hna lapa mekun, nge madrinenge me koronang, catre pi ange hniminang ngöne la jë i Joxu celë.

2 Eni a catre iele Euodia me Sunetuke troa ca mekun thei Joxu. 3 Nyipici, eni fe a sipo eö, sine huliwang, xatuane jë la lue föe celë ka ce isigöline me eni la maca ka loi, nge xatua Kelemene jë fe me itre xa sine huliwang, itre hna siji ëjen ngöne la tusi ne mel.

4 Haawe, madrine jë thei Joxu. Nge eni hmaca a amexej, Madrine jë! 5 Nge loi e mama cile kowe la nöjei atr ka hape, itre ka atreine tulu ewekë nyipunie. Nge the thëthëhmine kö laka, tha nanyi kö Joxu. 6 The hnehengazo kö, ngo ngöne la nöjei ewekë asë, jëne la itre thith, me xëwe, me thithi ne ole, qaja jë la itre sipo i nyipunie koi Akötresie. 7 Nge jëne Iesu Keriso, tro ha thupëne la itre hni me mekuna i nyipunie hnene la tingetinge qaathei Akötresie, tingetinge hna thatreine trotrohnine hnei atr.

8 Haawe ange trejin, ame la nöjei ewekë ka nyipici, me nöjei ewekë ka nyipiewekë, me ka meköt, me ka wië, me ka aciane la ihnim, me hna qaja aloin, me ka lolo, nge ka amadrinë Akötresie, thele* catrëne jë. 9 Ame la itre ewekë hnei nyipunieti hna inin, me kapa, me dreng, me öhne theng, kuca jë, nge tro hë la Akötresie ne tingeting a ce me nyipunie.

10 Atraqatre la madrineng thei Joxu, ke tha hnei nyipunieti kö hna thëthëhmi ni, ngo hnene laka, thatre kö nyipunie lo aqane troa xatua ni. 11 Tha eni kö a qaja lai ke hetre ka pë theng, ke ngöne la nöjei götran asë, hnenge hna inine troa melëne* la hna hetreny. 12 Atre hë ni la pë xen me mana xen. Nge ngöne la nöjei ewekë me nöjei götran, hnenge hna inine la hna atre hnene la ala xalaith, ene la troa mej me pi xen, me hetrenyi atruny, me pë hnyawa. 13 Ke ngöne la nöjei ewekë asë, hetre trengecatreng qaathene la atre hamë men koi ni.

14 Ngo nyipici laka, lolo la ixatua i nyipunie ngöne lo itre akötreng. 15 Ketre, atre hë nyipunie angetre Filipi ka hape, thupene la nyipunieti a pane drenge la maca ka loi, pëkö ca ekalesia ka xatua ni maine kapa la ixatuang lo eni a tro qaa Makedonia, ngo nyipunieti hmekuje hi. 16 Ke ame lo eni e Thesalonika, tha acasi kö ngo alua kapa ni la ixatua hnei nyipunieti hna upe koi ni. 17 Ngo tha eni kö a thele ahnahna, ngo eni pe a ajane tro nyipunieti a kuca la loi, matre hetre gufa nyine troa të koi nyipunie. 18 Ke hetrenyi asë hi ni nge munëne ju pe kö. Ngo atraqatre la madrineng troa kapa la hnei nyipunieti hna iupi fë jëne Epaferodito, kösë ewekë ka pui lolo, me huuj ka amadrinë Akötresie. 19 Nge tro la Akötresieting a hamëne la ka nyipiewekë koi nyipunie jëne Iesu Keriso, thenge la etrune la lolo i nyidrë. 20 Matre enehila, loi e tro pala hi a eje thei Akötresie Keme së, la lolo epin, epine palua. Amen.

21 Haawe, qaja ju la ibozung kowe la ange ka hmitrötr, itretre casi me Keriso Iesu. Nge itre trejin ka ce me eni a hane upe la ibozu i angatr. 22 Ange ka hmitrötr asë fe a upe la ibozu i angatre koi nyipunie, nge nyimutre kö qaathene la hnalapa i Kaisara.

23 Haawe ange trejin, epi troa amanathithine la aqane waiewekë i nyipunie hnene la ihnimi gufa i Iesu Keriso Joxu së. Amen.