KOI ANGETRE EFESO

1 Eni Paulo, aposetolo i Iesu Keriso hnene la aja i Akötresie, kowe la ange ka hmitrötr e Efeso, nge ka mele nyipici me cas me Keriso Iesu:

2 Epi eje thei nyipunie la ihnimi gufa me tingetinge qaathei Akötresie Keme së, me Iesu Keriso Joxu së.

3 Epi atrune la Akötresie me Keme ne la Joxu së Iesu Keriso, ke e hnengödrai, hnei nyidrëti hna hamëne jëne la ua i nyidrë la nöjei pengöne manathithi koi së, itre hlue i Keriso. 4 Hnei Akötresieti hna ië së qëmekene troa nyitrepene la fen, göi troa casi me Keriso, nge matre tro sa amamane la ihnimi së koi nyidrë, me hmitrötr, me pë ethan qëmeke i nyidrë. 5 Ke thenge la ka loi koi nyidrë me aja i nyidrë, ase hë nyidrëti canga mekune troa nyi kuku së jëne Iesu Keriso. 6 Qa ngöne lai, tro la itre atr a atrunyi Akötresie, ke hnei nyidrëti hna nue la nekö hnimina i nyidrë, matre troa amamane la elolone la ihnimi gufa i nyidrëti koi së. 7 Haawe, hna itö mele së me thepe së jëne la madra ne la nekö i nyidrë. Nyipici, kola köletrije la itre ngazo së hnene la madra cili. Matre eje hi, atraqatre la ihnimi gufa i Akötresie!

8 Nge hnei nyidrëti hna hamën atrune la ihnimi gufa cili, memine la inamacan me trotrohnin,* 9 ke ase hë nyidrë amamane koi së la aja i nyidrë, göne lo ini ka hmitrötr nge hna juetrën. Nge ame la ini cili, ej a ce tro memine la aja i nyidrë, lo hnei nyidrë hna ketre sipu mekun, 10 ene la troa acile ngöne la pune la hneijin hna sa, la ketre aqane ekö huliwa.* Qa ngöne lai, tro ha acasine la itre ewekë asë thei Keriso, itre ewekë e hnengödrai me e celë fen. Nyipici thei nyidrëti hi, 11 ene lo hne huni hna casi memin, me hna ahnithe kow, matre ce kepe edrö me nyidrë qaathei Akötresie. Ke ekö hë ië hun, angetre Iudra, thenge la aja ne la atre eatrëne la nöjei ewekë thatraqane la aja i nyidrë. 12 Qa ngöne lai, hnëqa hun, itre ka pane mejiune koi Keriso, troa nyihlue i nyidrë, me atrunyi nyidrë. 13 Ngo hnei nyipunieti fe, angetre fen, hna mejiun koi nyidrë thupene la hna drenge la maca ne nyipici, ene lo maca ka loi ne iamele. Nge pine laka hnei nyipunieti hna mejiun, Keriso a atihatrenyi nyipunieti jë, jëne la uati hmitrötr hna thingehnaean. 14 Nge celë hi hatrene ka canga anyipicine* la edrö së qaathei Akötresie. Nyidrëti a kuca lai, matre atreine jë nyidrëti të la thupen nyine thapa la itre hlue i nyidrë, nge hnene lai, nyimutre la itre ka troa atrunyi nyidrë.

15 Nge pine laka drenge hë ni la etrune la lapaune i nyipunie koi Joxu Iesu, me ihnimi nyipunie kowe la ange ka hmitrötr asë, laka, eni fe, 16 tha mano kö ni olen koi Akötresie pi nyipunie. Nge eni pala hi a thithi sai nyipunie, 17 matre tro la Keme ne la lolo, lo Akötresie ne la Joxu së Iesu Keriso, a hamë nyipunie la hni ka inamacan, me aijijë nyipunie troa trotrohnine la itre ewekë hnei nyidrëti hna amaman. 18 Ketre, ase hë nyidrëti alaine la luemeke ne la itre hni i nyipunie, matre atre jë nyipunie la pengöne mejiun hna hë nyipunieti kow, ene la trengamo ka tru hna hnëkën thatraqai ange ka hmitrötr. 19 Nge tro hë nyipunieti a wangatrehmekune la etrune la men hnei nyidrëti hna amamane koi së itretre lapaun. Nge tro ha mama jëne la itre huliwa hna kuca hnene la men atraqatr i nyidrë. 20 Ene lo men hna huliwan lo nyidrëti a amele Keriso hmaca qa hna mec, me alapa Keriso ngöne la götrane maca i nyidrë e hnengödrai, 21 hune la nöjei mus, me trene mus, me men, me joxu, me nöjei ëj ngöne la fene celë,* me ngöne la ka troa traqa. 22 Nge hnei Akötresieti hna amë la nöjei ewekë fene la lue ca i Iesu, me acili Iesu troa tane la ekalesia, 23 ene la ngönetrei Iesu, hna lapan asë hnene la itre thiina i nyidrë.

2 Ketre, hnei Akötresieti hna amele nyipunie, ngacama ka meci hë nyipunie ngöne lo itre tria me ngazo i nyipunie. 2 Nyipunieti lo a xötrethenge la fene celë,* memine la atre musinëne la eny, ene la aqane waiewekë ka ej thene la itre ka tha idrei. 3 Nyipici, hne së hna tro thenge la itre aja ne la ngönetrei. Easë lo a kei thenge la itre aja i ngönetrei me isa kuci mekun. Matre maine ju, qaane lo kola hnaho së, wë së hi la elëhni i Akötresie tune lo itre xa atr. 4 Ngo eloine pe, ka tru catre la utipin i Akötresie, ke hnene la etrune la ihnimi nyidrë koi së, 5 hnei nyidrëti hna ce amele së me Keriso, ngacama ka meci hë së ngöne la ngazo. Haawe, hna amele nyipunie pine la ihnimi gufa. 6 Nge hnei nyidrë hna ce aelë së, me ce alapa së ngöne la itre götran e hnengödrai me Keriso Iesu. 7 Matre ame hë ngöne la fene ka troa traqa,* tro Akötresieti a amamane la elolone la ihnimi gufa i nyidrë jëne la itre ewekë ka lolo hna troa kuca koi së, easë itretre drei Keriso Iesu.

8 Nge pine la ihnimi gufa cili, hna amele nyipunie hnene la lapaun, ngo tha thenge kö la itre sipu huliwa i nyipunie, ke ahnahna i Akötresieti lai. 9 Nyipici, tha thangane huliwa kö lai, matre tha tro kö ketre a selë angeic. 10 Easë la itre hna xup hnene la lue iwanakoime i Akötresie,* nge pine laka itretre drei Iesu Keriso së, hna xupi së troa kuca la loi, thenge lo hnei Akötresie hna mekune göi së.

11 Haawe, mekune kö nyipunie laka, tha atre Iudra kö nyipunie, nge ame lo itre hna xötrehatren hnei atr, angatr a hë nyipunie ka hape, nöje tha hna xötrehatren. 12 Nge ngöne la ijine cili, tha ce nyipunieti pala kö me Keriso, nge hna aisa nyipunieti me Isaraela, nge trenyiwa nyipunie kowe lo isisinyikeu göne la hna thingehnaean. Pëkö mejiune i nyipunieti lo, nge goi pë fe Akötresi nyipunie e celë fen. 13 Ngo enehila, ce nyipunieti hë me Iesu Keriso, ngacama ka iananyi nyipunieti lo me Keriso, ngo easenyi hë nyipunie enehila jëne la madra i nyidrë. 14 Nyidrëti la tingetinge së, ke nyidrë la atre acasine la lue lapa, me thëtrije lo hage ka aisa nyidro. 15 Nge pine la ngönetrei i nyidrë, hnei nyidrëti hna apatrene lo qane la imethinë, ene la Trenge Wathebo, nge qa ngöne lai, kola acasine la lue lapa thei nyidrë kösë ca atr ka hnyipixe, matre tingetinge pi. 16 Hnei nyidrëti hna ialoinekeune hnyawa la lue nöj ngöne la ca ngönetrei koi Akötresie jëne la sinöe ne iaxösisi,* ke ase hë nyidrë sipu apatrene lo qane la imethinë. 17 Matre hnei nyidrëti hna traqa troa tro fë koi nyipunie lo maca ka loi ne tingeting, koi nyipunie itre ka nany me ka easeny. 18 Haawe jëne nyidrë, pë hë ejolene koi së, lue nöj, troa easenyi koi Kaka hnene la ua ka cas.

19 Tha ketre pengöne hmaca kö nyipunie, nge tha itre atrene hmaca kö nyipunieti la itre xa nöj, ngo casi hë la nöje i nyipunie me ange ka hmitrötr, nge nyipunieti fe hë a sine la lapa i Akötresie. 20 Nge hna xupi nyipunie hune la trepen ne la itre aposetolo me perofeta, nge Iesu Keriso hi la etë ka sisitria* ne la trepene cili. 21 Hna acatrene hnyawa la uma cili me itre götran ej. Nge pine laka, ej a casi me Keriso, ej a kökötr troa nyi uma ne hmi thatraqai Iehova.* 22 Haawe, pine laka casi hë nyipunieti me Keriso, Akötresieti a ce xupe draië nyipunie me itre xan, matre nyi hnalapa i nyidrë, ke e cili la ua i nyidrë.

3 Qa ngöne lai, eni Paulo, lo hna akalabusine pi Iesu Keriso me pi nyipunie itre atre ne fen— 2 maine jë, ase hë nyipunieti dreng ka hape, hna upi ni troa xatua nyipunie matre kepe manathithi qa ngöne la ihnimi gufa i Akötresie. 3 Nyipici, ase hë Akötresie amamane koi ni, la ini ka hmitrötr nge hna juetrën, lo hnenge hna cinyihane koi nyipunie. 4 Matre ame hë la nyipunieti a troa e lai, tro hë nyipunieti a jelenyipicine ka hape, ka trotrohnine ni la ini ka hmitrötr nge hna juetrën göi Keriso. 5 Ngo eje hi, ame ngöne lo itre xötre atr ekö, hna juetrëne petre kö la ini cili kowe la itre nekö i atr, ngo enehila, ase hë amamane lai jëne la ua, kowe la itre aposetolo ka hmitrötr me itre perofeta i nyidrë. 6 Nge ame lai ini cili tre: Tro la itre atre ne fen a ce kepe edrö me Keriso Iesu, nge tro angatr a itre xa hnepe igötranene la ngönetrei. Nge pine la maca ka loi, ame lo edrö hnei Akötresieti hna thingehnaeane koi së, tre thatraqai angatre fe. 7 Nge hnene la ejuine la ihnimi gufa i Akötresie, eni hi la hlue ne la ini cili. Hnei nyidrëti hna hamë ni la ahnahna cili, hatrene la mene i nyidrë.

8 Nge hna hamë ni la ihnimi gufa cili, eni, lo ka co catr thene la ange ka hmitrötr. Matre, eni a tro fë maca ka loi kowe la itre nöj, ene la elolone la itre trengamo hna thatreine e thei Keriso. 9 Nge eni a xatuane la nöjei atr troa trotrohnine la aqane ekö huliwa göne la ini hna juetrën, ene laka, ngöne la itre macatre ka nyimutre, hna juetrëne la ini cili thei Akötresie, atre xupe la nöjei ewekë asë. 10 Nge hna traqa tun, matre jëne la ekalesia, tro ha atre hnene la itre mus, me itre trene mus e hnengödrai la ejuin la inamacane i Akötresie ka nyimu pengön. 11 Nge kolo hi lai a ce tro memine lo aja ka cile hut i Akötresie göi Keriso Iesu Joxu së, 12 lo atre aijijë së hnene la lapaune së koi nyidrë, troa easenyi Akötresie me tha cile troa ithanata. 13 Haawe, eni a sipon matre tha tro kö nyipunieti a cil, pine la itre akötreng göi nyipunie, ke jëne loi lai koi nyipunie.

14 Pine lai, eni a sa iwatingöne ca qëmeke i Kaka, 15 me olene koi nyidrë, ke nyidrëti la qaane la nöjei hnepe lapa e hnengödrai me e celë fen. 16 Eni a thith matre, thenge la etrune la lolo i nyidrë, tro nyidrëti a huliwane la mene ne la ua i nyidrë, matre acatrene la itre hni me mekuna i nyipunie. 17 Nge eni fe a thith matre, jëne la lapaune i nyipunie, tro Keriso me ihnimi i nyipunie koi itre xan a lapane la itre hni i nyipunie. Haawe, loi e tro nyipunieti a cia waan, me fedr kowe la trepen ne la lapaun. 18 Matre, tune la ange ka hmitrötr, tro hë nyipunie a trotrohnine hnyawa la eisaisan, me eqean, me edraiën, me ejuine la nyipici. 19 Nge tro fe nyipunieti a atre la ihnimi Keriso, laka, ka sisitria kö hune la atrehmekun. Qa ngöne lai, tro hë nyipunieti a tiqa hnei itre thiina ka lolo qaathei Akötresie.

20 Nge jëne la ua ka huliwa the së, atreine hi Akötresie troa hamëne atrune hune la itre ewekë hne së hna sipon, maine mekun. 21 Qa ngöne lai, loi e tro la nöjei xötr epin, epine palua a atrunyi Akötresie jëne la ekalesia, me jëne Iesu Keriso. Amen.

4 Qa ngöne lai, eni, lo hna akalabusin pi Joxu, a sipone iele nyipunie troa tro hnyawa thenge la hna hë nyipunieti kow, 2 me ipië,* me menyik, me atreine itreqe, me ixomihnikeu thenge la ihnim. 3 Nge mele tingetinge jë me itre xan, nge isine jë troa acatrene la cas i nyipunie, lo hnei nyipunieti hna kapa jëne la ua. 4 Ke casi hi la ngönetrei, nge casi hi la ua, ketre tun, casi hi la mejiune hna hë nyipunieti kow, 5 nge casi hi la Joxu, nge casi hi la lapaun, nge casi hi la bapataiso; 6 nge casi hi la Akötresie me Keme ne la nöjei ewekë asë, atre mus hun asë, nge jëne la nöjei ewekë asë, nge hnine la nöjei ewekë asë.

7 Enehila, hna isa hamë së la ihnimi gufa qaathei Akötresie, nge Keriso la atre isa thawa koi së la ahnahna cili. 8 Celë hi matre kola qaja ka hape: “Ame lo nyidrëti a elë, hnei nyidrëti hna thapa la itre hna akalabusin, thupene lai, nyidrëti a upi angatre jë troa itre ahnahna.” 9 Nge ame la kola hape, “nyidrëti a elë,” hapeu, tha kolo kö lai a hape, hnei nyidrëti hna pane uti kowe la fen? 10 Matre ame lai atre ka ut, nyidrëti fe hi lo ka elë hune la itre hnengödrai. Qa ngöne lai, tro hë nyidrëti a eatrëne la nöjei ewekë asë.

11 Hnei nyidrëti hna hamëne la itre aposetolo, me itre perofeta, me itretre cainöj,* me itre atre thup, me itretre hamë ini, 12 göi troa xom amekötine* la ange ka hmitrötr, nge matre nyihluene la itre xan, ene pe, tro ha xupe draiëne* la ngönetrei i Keriso. 13 Nge tro angatr a kuca lai, uti hë ce traqa së kowe la lapaun ka cas, me atrehmekune hnyawa la Nekö i Akötresie, matre tro së a tune la itre ka tru, itre ka traqa kowe la hmae ne ka tru,* ene la hmae ka tru i Keriso. 14 Haawe, the tro hmaca kö së a itre nekönatr, kösë hna kapa trongën hnei gejë, nge hna hul hnei nöjei ini thenge la nyinyithiina i atr, me itre trengathoi hna sil hnene la itre hni ka iaö. 15 Ngo qa së pe troa qaja la nyipici me amamane la ihnim, matre macaje pi së ngöne la nöjei ewekë asë, me mele thenge Keriso, he së. 16 Ke jëne nyidrë, kola acatrene hnyawa la itre hnepe götrane la ngönetrei hnene la itre hna itöjun, qa ngöne lai, itre hnep a ce huliwa hnyawa, me hamëne la ka nyipiewekë thatraqane la ngönetrei. Matre ame la kola isa huliwa hnyawa hnene la itre hnep, kolo hi lai a xatuane la ngönetrei asë troa tru trootro, nge ej a tru ngöne la ihnim.

17 Ngo eni pe a qaja me upe iele nyipunie ngöne la ëje i Joxu ka hape, the tro hmaca kö nyipunieti a tro thenge la aqane tro ne la fen, ke angatr a tro thenge la aqane waiewekë i angatre ka menu.* 18 Nge jidri la itre mekuna i angatr, nge trenyiwa angatr göne la mel ka eje thei Akötresie, ke xele kö angatre troa atrepengöi Akötresie, nge xeti hnyawa la itre hni angatr. 19 Nge pine laka, pë hë wangatrehmekun i angatr, angatr a nue angatr kowe la itre huliwa nyine hmahman,* me thele catrëne troa kuca lapane la nöjei huliwa ka sis.

20 Ngo ase hë nyipunie inin, matre atre hë nyipunie ka hape, tha aqane ujë i Keriso kö lai. 21 Ngo tro nyipunie a atre, e nyipici ka hape, Keriso hi la hnei nyipunieti hna dreng me kepe ini qaathen, ke thei nyidrë la nyipici. 22 Hna ini nyipunie troa unatrije lo thiina hnapan, ka ce tro memine lo aqane ujë i nyipunie ekö, nge ka amenu nyipunie hnene la itre aja ne ej. 23 Ngo qa i nyipunieti enehila troa ahnyipixene pala hi la itre aqane waiewekë* i nyipunie, 24 me heetrëne la thiina ka hnyipixe, hna eköth thenge la aja i Akötresie, ngöne la thiina ka nyipi meköt me lapaun.

25 Qa ngöne lai, enehila, pine laka ase hë nyipunie thipetrije la thoi, isa qaja jë la nyipici hnei ketre koi ketre, ke easë hi la itre hnepe ngönetrei ka ce huliwa. 26 Elëhni jë, ngo the ngazo kö; nge the nue kö troa lö la jö nge ka elëhni pala hi nyipunie. 27 The nue jë* i Diabolo kö. 28 Nge ame la ka atrekënö, the atrekënö hmaca kö. Ngo loi e tro angeic a huliwa catr, me huliwa hnyawa memine la lue ime i angeic, matre hetre nyine tro angeic a thawa kowe la itre ka pë. 29 Nge the nue kö la itre trengewekë ka pi troa tro qa ngöne la itre që i nyipunie, ngo tro hmekuje hi a qaja la itre trenge ka loi nyine xupe draiën e kola ajan, matre hetre eloin kowe la atre dreng. 30 Ketre, the ahleuhleune* kö la uati hmitrötre i Akötresie, lo hna atihatrei nyipunieti fë, uti hë la drai ne thepe nyipunie jëne la thupene mel.

31 Thipetrije pi qaathei nyipunie la nöjei aqane lapa fë trengehni, me elëhni, me iwesitrë, me sue, me iqaqa, me nöjei thiina ka ngazo. 32 Ngo loi hni jë nyipunie, ketre koi ketre, nge utipi itre xane ju, nge nue hnyawane pi la ngazo i ketre, tune la aqane nue Akötresieti la ngazo i nyipunie jëne Keriso.

5 Haawe, nyitipu Akötresieti jë tune la itre nekö hnimina; 2 nge the mano kö nyipunie tro thenge la ihnim, tune la aqane hnimi së* hnei Keriso lo nyidrëti a nue nyidrëti koi së, kösë ahnahna me huuj ka pui lolo koi Akötresie.

3 Tha tro kö a drei mejene thei nyipunie la kuci ngazo,* me nöjei huliwa ka sis, me nöjei aqane meciun, ke tha aqane ujë i ange ka hmitrötre kö lai. 4 Nge the tro kö a hetre huliwa nyine hmahman, me itre trengewekë ne hmo maine ka sis, ke tha ka loi kö lai, ngo loi e troa thithi ole. 5 Atre hë nyipunieti lai, nge xecie fe koi nyipunie ka hape, tha tro kö la atre kuci ngazo, memine la atre kuca la itre huliwa ka sis,* me atre meciun, ene la ka kuci idrola, a hane kepe edrö hnine la Baselaia i Keriso me Akötresie.

6 Haawe, the nue ketre kö troa amenu nyipunie hnene la itre trengewekë ka pë alien, ke celë hi qaane la elëhni i Akötresie ka troa traqa kowe la itre nekö ne la tha idrei. 7 Qa ngöne lai, the ce tro kö me angatr. 8 Nyipici ame ekö, itre nekö ne la jidri nyipunie, ngo enehila, hna alai nyipunie ke ce nyipunieti hë me Joxu. Haawe, catre pi tro tune la itre nekö ne la lai. 9 Nge ame la wene ne la lai, ej a xatua së troa loi hni ngöne la nöjei ewekë asë, me meköt, me nyipici. 10 Haawe, the mano kö waipengöne la ka amadri Joxu. 11 Nge the sine hmaca kö la itre huliwa ne la jidr ka pë eloin, ngo qaja amamane jë la nyipi pengöne la itre huliwa cili. 12 Ke ame la itre ewekë hnei angatre hna kuca juetrën, hmahma së troa qaja. 13 Haawe, kola mama cile* la nöjei ewekë hnene la lai, matre ame la nöjei ewekë hna amaman, tre lai. 14 Celë hi matre hna qaja ka hape: “Hlë jë atre ka meköl, nge mejë jë qa ngöne la mec, nge tro la Keriso a hudrum koi eö.”

15 Haawe, wai nyipunieti hnyawa kö, wanga tro nyipunie a tro tune la itre hmo, ngo loi pe troa tro inamacan, 16 me huliwane hnyawane la traeme i nyipunie,* ke ngazo la itre drai. 17 Qa ngöne lai, loi ju hë hna ujë tune la hmo, ngo thele catrene jë troa trotrohnine la aja i Iehova.* 18 Nge the hmo kö hnei ka haitr, ke ej a itroxom kowe la mele ka sis. Ngo loi e tro pe nyipunieti a tiqa hnei uati hmitrötr. 19 Nge ce nyimane* jë la itre salamo, nge atrunyi Akötresieti jë, nge nyimane jë la itre nyima ne hmi. Haawe, nyima jë koi Iehova* kösë nyipunieti a elo miuzik ngöne la itre hni nyipunie. 20 The mano kö olene la nöjei ewekë asë kowe la Akötresi së me Keme së, ngöne la ëje ne la Joxu së, Iesu Keriso.

21 Nge imetrötrekeu ju nyipunie ngöne la xoue Keriso. 22 Loi e tro la itre föe a drengethenge la itre föi angatr, kösë koi Joxu, 23 ke trahmanyi la he i föe, tui Keriso he ne la ekalesia, nge nyidrëti la atre amelene la ngönetrei cili. 24 Nyipici, tune la aqane drei Keriso hnene la ekalesia, nyipiewekë fe tro la itre föe a drengethenge la itre föi angatr ngöne la nöjei ewekë asë. 25 Nge itre trahmanyi fe, the mano kö hnime la itre föi nyipunie, tune la aqane hnime me meci pine la ekalesia hnei Keriso, 26 matre ahmitrötrën ej me awiën, jëne la hna siën hnene la trengewekë i Akötresie. 27 Qa ngöne lai, tro hë la ekalesia a mingöminge me lolo qëmeke i Keriso, nge tha dro kö, me fitr, me eatr, ngo tro pe a wië me pë engazon.

28 Ketre tun, nyipiewekë tro la itre trahmanyi a hnime la itre föi angatr, kösë sipu ngönetrei i angatr. Ame la trahmanyi ka hnime la föi angeic, angeice hi lai a hnimi angeice kö. 29 Ke pë pala kö trahmanyi ka methinëne la ngönetrei angeic, ngo angeice pe a ithuan, me nyidrawan hnyawa, tune la aqane kuca Keriso kowe la ekalesia, 30 ke itre hnepe ngönetrei nyidrëti së. 31 “Celë hi matre, tro la trahmanyi a nue la keme me thine i angeic, me fedre kowe* la föi angeic, nge tro nyidroti a ca ngönetrei.” 32 Nge eni hë a qaja la pengö i Keriso memine ekalesia laka, ini ka tru, la ini ka hmitrötr nge hna juetrëne cili. 33 Ngo ame nyipunie itre trahmany, nyipiewekë troa isa hnimi föen, tune la aqane hnime nyipunie la itre ngönetrei i nyipunie. Nge nyipiewekë mina fe tro la itre föe a metrötrëne hnyawa la itre föi angatr.

6 Ha nekönatr, drengethenge ju la itre keme me thine i nyipunie thenge la aja i Akötresie, celë hi meköt. 2 “Metrötrëne ju la keme me thine i eö,” ke celë hi pane hna amekötin ka troa aijijë nyipunie troa kapa la hna thingehnaean celë: 3 “Jëne manathithi* lai koi nyipunie, nge tro hë nyipunie a mel aqeany hune la ihnadro.” 4 Nge nyipunie itre kem, the aelëhni nyudreni kö, ngo hia nyudreni jë pe ngöne la itre ihaji me itre ini* qaathei Iehova.*

5 Nge nyipunie itre hlu, drengethenge ju la itre maseta i nyipunie e celë fen, ngöne la xou me hmengöhmengön, thenge la hni ka nyipici kösë koi Keriso. 6 Ngo tha kolo kö a kuca ke kola goeë nyipunie matre amadrinë* atr, ngo tro pe a tune la itre hlue i Keriso ka kuca la aja i Akötresie hnene la hni ka pexej, me trengecatre ka pexej. 7 Haawe, nyihlue jë thenge la thiina ka loi kösë koi Iehova,* ngo tha koi atre kö, 8 ke atre hë nyipunie ka hape, ame la loi hna kuca hnei ketre, tro hë Iehova* a të koi angeic, ngacama hlue ju hë angeic, maine atr ka tha hlue kö. 9 Nge ame nyipunie itre maseta, kuca tune jë fe koi angatr, ngo the qanangazo angatre kö, ke atre hi nyipunie laka, ame la Maseta i angatr me Maseta i nyipunie, nyidrëti e hnengödrai, nge tha ka ië hna hnime kö nyidrë.

10 Haawe, thele lapane jë troa xomi trengecatre thei Joxu, ke atraqatre la trengecatre i nyidrë. 11 Thupene lai, heetrëne asë jë la hna heetre ne isi qaathei Akötresie, matre atreine jë nyipunie cile catr qëmekene la itre nyinyithiina i Diabolo; 12 ke tha easë kö a isi* memine la madra me ijön, ngo memine la itre mus, me itre trene mus, me itre joxu ne la jidr, me trongene isi ne la itre u ka ngazo e hnengödrai. 13 Qa ngöne lai, heetrëne asë jë la hna heetre ne isi qaathei Akötresie, matre atreine jë nyipunieti cile catr ngöne la ijine ngazo, nge e ase jë nyipunie hnëkën asë, tro hë nyipunie a cile catr.

14 Cile catre ju hnene la hna othe hnyawa la beletr ne la nyipici kowe la itre gö i nyipunie, nge heetrëne jë la imano ne la meköt. 15 Nge loi e ka otrë ibutre hë nyipunie, ene la hna catre tro fë la maca ka loi ne tingeting. 16 Nge ketre, xome jë la petr ka tru ne la lapaun, ke aqane tro nyipunieti lai a thupë nyipunie qa ngöne la itre ewekë hna hna koi nyipunie. 17 Nge petrëne jë fe la itrapetr ne iamele, nge xome jë la taua ne la uati hmitrötr, ene la trengewekë i Akötresie. 18 Ketre, the mano kö thith thenge la ua, me qaja la nöjei pengöne thith, me nöjei aqane xëwe koi Akötresie thatraqai ange ka hmitrötr asë. 19 Nge thithi sai ni jë matre hamë trengewekë koi ni e fe pi ni la qëng. Haawe, tro hë ni a atreine qaja catrëne la ini ka hmitrötr nge hna juetrën göne la maca ka loi, 20 laka, eni la qeneqaja hna ceinëne pin, matre tune lo aqan, tha tro kö ni a xou troa qaja la maca ka loi.

21 Ngo enehila, göi tro nyipunieti a atre la pengöng me itre huliwang, tro Tukiko, trejin hna hnim nge ka mele nyipici koi Joxu, a troa qaja asë koi nyipunie. 22 Nge ame la kepin matre eni a upi angeic, tre matre tro nyipunieti a atre la pengö hun, nge matre keukawa pi la itre hni i nyipunie.

23 Haawe, epi tro la itre trejin a hetre tingeting, me ihnim, me lapaun, qaathei Akötresie la Kem, me Iesu Keriso Joxu. 24 Nge epi tro la ihnimi gufa a eje thene la itre ka nyipi hnimi Iesu Keriso Joxu së.