SIN DING THU 08
Jehovah’ Lawm Na Suak Thei Hi
Jehovah in ama thu hong theiciansak nuam hi. Bang hang hiam? Pasian’ pianziate, a lampite, le a ngimnate na theih semsem ciangin Pasian’ lawm na suah nopna hong khang ding ahih man hi. Pasian’ lawm na suak thei ding hiam? (Late 25:14 sim in.) Pasian tawh kilawmtat nadingin bang na hih ding kisam a hiam? Tu-a dotnate Lai Siangtho in a dawn banah Jehovah tawh kilawmtatna pen nang ading a thupipen ahihlam zong hong theisak hi.
1. Jehovah in bang hih dingin hong sam a hiam?
“Pasian kiang nai un. Amah in zong hong nai ding hi.” (James 4:8) Tua in bang a cihnopna hiam? Jehovah in amah tawh kilawmta dingin hong sam hi. I muh theih loh mi khat tawh kilawmtat ding nangawn haksa ahih ciang, Pasian tawh kilawmtat ding pen hithei lo ding hi, ci-in mi pawlkhatte in ngaihsun uh hi. Ahih hang Jehovah in amah tawh i kinai theih nadingin ama thu i theih ding a kisamte Lai Siangtho sungah na gen hi. Tua ahih manin Jehovah pen i muh theih loh hang, Lai Siangtho i sim ciangin amah tawh i kilawmtatna hong khangto hi.
2. Jehovah pen bang hangin na lawm hoihpen hi a hiam?
Jehovah’ hong it bangin kuamah in hong it zo lo ding hi. Ama’n nang hong lungnuamsak nuam a, huhna na kisap hun sialin ama kiangah huhna na nget ding deih hi. “Pasian in note hong kem ahih manin na lungkhamnate khempeuh uh ama kiang tunpih un.” (1 Peter 5:7) Jehovah in a lawmte huh dingin, hehnem dingin, le a thugen uh ngaihsak dingin a kigingsa-in om den hi.—Late 94:18, 19 sim in.
3. Jehovah’ lawm suak dingin bang sep ding kisam a hiam?
Jehovah in mi khempeuh it hi. Ahih hang, “thuman mite bek a pawlpih dingin a la hi.” (Paunak 3:32) Jehovah in a lawmte pen hoih a sakte semsak nuam a, sia a sakte peelsak nuam hi. A sia le a pha tawh kisai-a Jehovah’ tehnate tawh kituaka om ding pen hithei lo hi, ci-in mi pawlkhat in ngaihsun khathei uh hi. Ahih hang, Jehovah pen migi mahmah hi. Amah a it takpi mi le Ama maipha ngah nadingin ahi theizah a a hanciam mite khempeuh Pasian in sang hi.—Late 147:11; Sawltak 10:34, 35.
ZON BEH INLA, MUH BEH IN
Jehovah’ lawm na suah theih dan kan inla, Jehovah pen na lawm hoihpen ahihna a hang zong kan in.
4. Jehovah’ Lawm Abraham
Abraham’ (Abram zong kici) thu Lai Siangtho sunga a kigelhte in Pasian’ lawm cih in bang a cihnopna hiam, cih hong telsak hi. Abraham’ thu Piancilna 12:1-4 ah sim in. Tua khit teh hih dotnate kikum un:
Jehovah in Abraham pen bang hih dingin sawl a hiam?
Jehovah in bang kamciamna pia a hiam?
Jehovah’ thugente pen Abraham in bangci thukkik a hiam?
5. Jehovah in a lawmte tunga a lamet
I lawmte’ tung pan i lamet thute om hi.
Na lawmte’ tung pan bang lamen na hiam?
Johan Masa 5:3 sim in. Tua khit teh hih dotna kikum un:
Jehovah in a lawmte’ tung pan bang lamen a hiam?
Jehovah’ thu i man theih nadingin i gamtatnate le pianziate i kikhel ding kisam hi. Isaiah 48:17, 18 sim in. Tua khit teh hih dotna kikum un:
Jehovah in a lawmte’ kiangah a kikhel ding uh bang hang kalh a hiam?
Lawm hoihte in siatna i tuah khak loh nading le i hamphatpih ding thute hong hilh uh hi. Jehovah in zong a lawmte adingin tua bangmahin hilh hi
6. A lawmte adinga Jehovah’ sepsakte
A lawmte’n buainate a phulzawh nadingun Jehovah in huh hi. VIDEO hong in. Tua khit teh hih dotna kikum un.
Video sunga numei in a sia lama ngaihsutnate a dozawh nadingin Jehovah in koici huh a hiam?
Isaiah 41:10, 13 sim in. Tua khit teh hih dotnate kikum un:
Jehovah in a lawmte adingin bang sepsak ding, ci-in kamciam a hiam?
Jehovah pen lawm hoih hithei dingin na um hiam? Bang hang hiam?
Lawm hoihte in na kisap hunin hong huh uh hi. Jehovah in zong tua bangmahin hong huh hi
7. Jehovah tawh kilawmta dingin kizopna kisam
Kihotuahna in lawmta ki-itna kipsak hi. Late 86:6, 11 sim in. Tua khit teh hih dotnate kikum un:
Jehovah koici hopih thei ding ihi hiam?
Jehovah in koici hong hopih a hiam?
Thungetna tawh Jehovah i hopih a, Jehovah in Lai Siangtho tungtawnin hong hopih hi
MI PAWLKGHATTE’ GEN: “Pasian’ tawh kilawmta ding cih pen hithei vet ke’n teh.”
Jehovah’ lawm kisuak thei hi, ci-in bang Lai Siangtho mun in gen a hiam?
TOMLAKNA
Jehovah in a Lawm dingin hong deih a, a lawm na suah theih nadingin zong hong huh ding hi.
Kikupkikna
Jehovah in a lawmte koici huh a hiam?
Jehovah in a lawmte’ kiangah a kikhel ding uh bang hang kalh a hiam?
A lawmte’ kiang pan Jehovah in a khengvalin lamen hi, ci-in na ngaihsun hiam? Bang hang hiam?
THEIH BEH NADING
Pasian tawh kilawmtatna in na nuntakna-ah bang hamphatna hong ngahsak a hiam?
“Jehovah—Theihtel Ding A Kilawm Pasian” (Vilnatausang, February 15, 2003)
Pasian tawh na kilawmtat theih dan kan in.
“Pasian’ Lawm Koici Suakthei Ding Ka Hiam?” (Khangnote’ Dotna, Volume 2, khenpi 35)
Jehovah tawh kilawmtatna in numei khat ii nuntakna a hotkhiat dan kan in.
Jehovah tawh kisai khangnote’ lungsim sunga om thute ngai in.