Biakna Man Bangci Khen Thei Ding?

1. Biakna man khatbek om maw?

Jesuh in biakna man khatbek om hi, ci-in a nungzuite a hilh hi. Tua pen tawntung nuntakna hong tunpih lampi khat tawh kibang hi. Tua lampi pen, “mi tawmno bekin a zuizo uh,’’ ci-in Jesuh in a gen hi. (Matthai 7:14) Pasian in Lai Siangtho zui-a biakpiakna bek na saang hi. Thuman in a bia mi khempeuh upna khat sungah kipumkhat uh hi.—Johan 4:23, 24; 14:6; Efesa 4:4, 5 na sim in.

Pasian In Biakna Khem Peuh A Sang Hiam? cih video en in

2. Khristian man lote tawh kisai Jesuh in bang na gen hiam?

Jesuh in kamsang taktak a hi lote in Khristian biakna siasak ding hi, ci-in vauna na pia hi. Amaute en vat leng, man taka a biate mah tawh kibang hi. A biakinnte un Khristianin kigeen uh hi. Ahih hang a mau kua hi takpi hiam, cih khen thei ni-teh. A hang pen, biakpiakna man bek in miciim mihoih Khristian taktak suaksak thei hi.—Matthai 7:13-23 na sim in.

3. Thumanin a biate bangci khen thei ding?

Nam nga tawh kikhen thei hi:

• Thumanin a biate in Pasian’ Kammal a hi Lai Siangtho pen thupisak uh hi. Lai Siangtho thubulte tawh kizui-in nungta uh hi. Tua ahih teh, biakna man pen mi’ ngaihsutdan tunga a kinga biaknate tawh kilamdang hi. (Matthai 15:7-9) Thumanin a biate in a gen leh gamtat kibangsak uh hi.—Johan 17:17; 2 Timoti 3:16, 17 na sim in.

• Jesuh’ nungzui takpite’n Pasian’ min Jehovah pen na pahtawi uh hi. Jesuh in Pasian’ min mite a theihsakna tawh a pahtawi hi. Mite’n Pasian a theih nading leh Pasian’ min siangtho ta hen, ci-in thu a nget ding uh a hilh hi. (Matthai 6:9) Na omna munah Pasian’ min a kitheih na’ng bang biakna in hilh uh a hiam?—Johan 17:26; Late 148:5, 13 na sim in.

• Khristian mante in Pasian Gam Taangko uh hi. Gam ki-ukna tawh kisai a lungdamhuai thu a taangko dingin Pasian in Jesuh a sawl hi. Pasian Gam pen mihingte a’ding lametna khatbek ahi hi. Jesuh in a sih ciang dong hih thu a gen hi. (Luka 4:43; 8:1; 23:42, 43) A nungzuite in hih thu mah a taangko ding hi, a ci hi. Mi khat peuhpeuh in Pasian Gam tawh kisai thu hong gen leh koi biakna pan hi ding hiam?—Matthai 24:14 na sim in.

• Jesuh’ nungzuite in leitung buaina te-ah kihel lo uh hi. Amau, leitung gamvai leh minam buaina te-ah kihel lo uh hi. (Johan 17:16; 18:36) Leitung ii a lauhuai heekzia tatzia leh lungsimte etteh lo uh hi.—James 4:4 na sim in.

• Khristian mante in khat le khat itna kilak uh hi. Minam kim pan mite a zahtak na’ng un Lai Siangtho pan na sin uh hi. Biakna man lo te’n galte-ah panpihna a neih uh hang, biakna man in tua ci lo hi. (Mikah 4:1-3) Tua sangin, Khristian mante in angsung khual lo-in a hun le a thatang uh midangte huhna-ah zang zaw uh hi.—Johan 13:34, 35; 1 Johan 4:20 na sim in.

4. Biakna man bangci khen thei ding na hiam?

Bang biakna in a hilhna khempeuhah Pasian’ Kammal bulphuh a, Pasian’ min pahtawi-in, Pasian Gam pen mihingte a’ding lametna khatbek hi, ci-in taangko uh a hiam? Koi pawl in itna lak-in gal peel uh hiam? Bangci na ngaihsut aa?—1 Johan 3:10-12 na sim in.