Pasian In Kua A Hiam?

1. Pasian ba’hang i biak ding kilawm hiam?

A man Pasian in na khempeuh a Piangsakpa hi. Amah pen kipatna le tawpna om lo hi. (Late 90:2) Lai Siangtho sunga om a lungdamhuai thu pen Pasian kiang pan hi. (1 Timoti 1:11) Pasian hangin eite nungta i hih manin amah bek biak ding kilawm hi.—Maangmuhna 4:11 na sim in.

2. Pasian pen bangdan ahi tam?

Pasian pen kuamah in a muh theihlohna pen mihingte saang a sangzaw, Kha pumpi ahih man hi. (Johan 1:18; 4:24) Ama piansak nate pan Pasian’ hoihna leh a ngaihsutnate i mu thei hi. Gentehna in, singgah theeino leh paakte limh takin i ngaihsut ciang Pasian’ itna leh pilna kimu thei hi. Khuavannuai i a zaina en leeng zong a thahatna hong theisak hi.—Rom 1:20 na sim in.

Lai Siangtho simna in Pasian’ hoihna hong theisak zaw kaan hi. Gentehna in, Pasian in a deih le a deih loh, mite tawh a kizopna, thu piang tawh kizui in a thukkik dante Lai Siangtho-ah na lak hi.—Late 103:7-10 na sim in.

3. Pasian in min a nei hiam?

“Vantunga om kote’ Pa aw, na min siangtho kizahtak hen.” ci-in Jesuh in a gen hi. (Matthai 6:9) Pasian in minthangna tampi nei hi taseleh min khat bek a nei hi. Tua min pen paunam khatciat ii lawhdan kibang lo hi. Zomite in “Jehovah” mah i ci hi.—Late 83:18 na sim in.

Tedim Lai Siangtho sunga, “Theihhuai kammal pawlkhat” nuai-a “Topa” cihna munah na en in.Lai Siangtho letkhiat tampite-ah Pasian’ min kihemkhia a, Topa ahihkei leh Pasian cih za min tawh kilaih hi. Ahih hangin Lai Siangtho a ki-at lai-in Pasian’ min 7,000 dektak na om hi. Jesuh in Pasian thu mite a hilh ciangin Pasian’ min na theisak hi.—Johan 17:26 na sim in.

Pasian in min a nei hiam? cih video en in

4. Jehovah in hong don naa?

Gimnate hong tamna pen Pasian in hong don lo cihna maw? Pasian in mite a ze-et nop mana gimna hong tuaksak hi, ci-in mi pawlkhat in a gen uh hang, tua na hi lo hi.—James 1:13 na sim in.

Pasian in mite’n amau ut thu-a teel khuan a piakna tawh na pahtawi hi. Tua ahih teh, Pasian’ na sem dingin, i ut thu-a ih teel theih pen a lungdamhuai na hi mawk hi. (Joshua 24:15) Ahih hangin mi tampi’n a hoih lo teel uh ahih man in gimna hong tamzaw hi. Hih hoihlo nate Jehovah in a muh ciang a khasia hi.—Piancilna 6:5, 6 na sim in.

Jehovah in hong don Pasian hi. Eite lungnuamtaka a nungta dingin hong deih hi. A sawt lo-in gimnate a piangsak mite hemkhia tading hi. Tu hun sunga gimnate Pasian in a phalna a hang na om hi. Tua thute pen khen 8 na ah kisin ding hi.—2 Peter 2:9; 3:7, 13 na sim in.

5. Pasian tawh bangci naih thei ding?

Jehovah in thungetna tawh amah i naih ding hong sam hi. Mimal ciat tungah hong lungluut hi. (Late 65:2; 145:18) Mawhna hong maisak nuam hi. Ama lungsim tawh a kituak dingin a hanciamte leh hanciam napi a tun zolote na theisiam hi. Tua manin, a cingtaak lo i hi zong, Pasian kiang ih naih nang kibawl thei hi.—Late 103:12-14; James 4:8 na sim in.

Pasian in nuntakna hong pia ahih manin a kuamah peuh sangin amah i it zawk ding kilawm hi. (Marka 12:30) Pasian thu sin behin hong ngette sepna tawh i itna lak hi leeng amah tawh i kinai ding hi.—1 Timoti 2:4; 1 Johan 5:3 na sim in.