Laibute Koici Ki-atin, Kiletkhia Hiam?

“Mi namkim, pau namkim a zang mite” kiang lungdamna thu ka hih zawh zah a, tangko nading laibu kampau 750 val ka thoh uh hi. (Maangmuhna 14:6) Hih a haksa naseppi koi bangin tangtungsak zo ding? Gam khempeuh a, lai-at mite le lai letkhia ding a, a kipiakhia mite’ huhna tawh kizo a, a vekpi-un Jehovah Tecite ahi uh hi.

Lai masa pen Manglai tawh kibawl hi. Governing Body in ko ii leitungbup headquarter-a om Lai-atna Zum ii nasepnate na vaan uh hi. Tua zum in headquarter le Branch office danga om lai bawlte tavuan na seh uh hi. Pianna kibang lo lai-atte om ahih teh ko ii laibute sungah ngeina kibang lo mite tawh kisai thute zong kihel ahih manin ka thohkhiat laibute gam a tuamtuama om mite in hoihsa uh hi.

Lai masa pen lai letkhia-te kiang kipuak hi. A ki-at masa lai pen kisitin a ki thukim khit teh electronic tawh leitungbupa lai letkhiate kiangah kikhak a, amau te’n lai letkhia a, lai sitin laimal puahphat kiknate sem uh hi. Letkhiat ding kammalte-ah Manglai pan a khiatna a manin letkhiat theih nading “kammalte a man tak” in hanciamin kiletkhia hi.—Thuhilhna 12:10.

Computer in nasep manlang sak hi. Computer in mihingte bangin laimal bawlna le letkhiatnate bawl thei lo hi. Ahih hang computer sungah a kithun dictionary, kampau ahuh computer program-te le thuzonna vante in lai letkhiat nasepna na manlang sak hi. Kampau nam tampi kithun thei a, lim tawh zong thakhat thu in laibu a kikhen thei, kampau tampi electronic tawh kikhet theihna (MEPS) a kici set Jehovah Teci te’n na bawlkhia uh hi.

Mi tulsanga a tawmzawte ii zat kampaute ka letkhiat banah kampau nam tampi tawh letkhiat ding ba’hang hih zahtaka hanciam ka hi uh hiam? Ahang pen “mi khempeuh in hotkhiatna ngahin, thuman a theihkim ding” Jehovah in deih ahih man hi.—1 Timoti 2:3, 4.

• Ko ii laibu thohte koici bangin ki-at a hiam?

• Ko ii laibu thohte kampau nam tampi-in ba’hang letkhia ka hi uh hiam?