Upa Te’n Pawlpi Koi Bangin Panpih Uh Hiam?

Ko pawlpi sungah khasum sang biakna makai cihte om lo hi. Kristian pawlpi a kiphut hun lai mah bangin “pawlpi a kemcing” dingin a picing upa kikoih hi. (Sawltak 20:28) Pasian deihna bangin a nungta upate’n pawlpi makaih in a kep uh ciang “ut lo pipi hi loin, Pasian’ hong deih bangin utna lungsim takpi tawh na cing” uh a, “ Sum ngahnopna bek tawh a sem hi loin utna lungsim tawh a semte” ahi uh hi. (1 Peter 5:1-3) Eite ading amau bang hong sepsak uh hiam?

Upate’n hong donin hong kem uh hi. Upate’n Lai Siangtho lamlahnate hong lakin Jehovah tawh i kinaih zawh nading hong huh uh hi. Pasian in hih a thupi mahmah nasep ding a ap lam thei uh ahih manin Pasian mite tungah upate’n aana tawh uk lo uh a, ko ii phattuamna le lungdamna hong khangsak hi. (2 Korin 1:24) Tuucing pa in a tuute khat ciat hanciam takin a don mah bangin upate’n pawlpi mi khat ciat theih ding hanciam uh hi.—Paunak 27:23.

Pasian deihna i sep theih nading hong hilh uh hi. Upate’n ka upna uh a kip na’ng kalsimin pawlpi kikhopnate hong makaih uh hi. ( Sawltak 15:32) A kipiakhia upate’n thu tangko nasepna-ah zong makaih uh hi. Pasian nasepna a tuamtuamah kote tawh semkhawmin hong pantah uh hi.

Mimal khat ciat tha hong pia uh hi. Mimal khat ciat ii Jehovah tawh a kizopna uh a hoih nading upate’n tavuan a neih mah bangin i teenna muna om upate’n inn-ah ahi zong Biakinn-ah ahi zong hong hopih uh a, Lai Siangtho tawh hong hehnem uh hi.—James 5:14, 15.

Leitung bupa upa a tamzaw in pawlpi nasep banah leitung nasep zong nei-in hun le lungsim piakna a kisam innkuan tavuante zong nei uh hi. Nasep a hahkat hih upate i zahtak ding kilawm hi.—1 Thesalonika 5:12, 13.

• Pawlpi upate’ dinmun bang hiam?

• Upate’n mimal khat ciat ii kisapnate hong don ahih na koi bang danin lak uh hiam?