Pioneer Ka Cih Uh Bang Hiam?

“Pioneer” a kici kamal pen gam thak a satte le mite a pai theih nading lam thak a phuante kici hi. Jesuh zong Pioneer khat mah kici thei a, nuntakna a kingah theih nading le gup khiatna lampi a kihon nading in hih leitungah kisawl hi. (Matthai 20:28) Tu hun a, ama nungzuite in amah etteh in mite ‘nungzui suaksak’ na-ah ahih theih zah uh tawh hun pia-in na sem uh hi. (Matthai 28:19, 20) Mi pawlkhatte zong tua Pioneer a kici nasepna-ah na kihel uh hi.

Pioneer-te pen hun bit a, lungdamna thu a gente hi. Jehovah Tecite khempeuh pen a lungdamhuai thu a tangko mite hi-gai uh hi. Ahih hang, pawlkhat in amau nuntakna hoih taka gelin regular pioneer–te in tangko nasepna-ah khasimin hun nai 70 na pia uh hi. A tamzaw in tua regular pioneer sem nuam uh ahih teh leitung nasepna-ah hun bit a, sem loin hun ciangtan nei-in na sem uh hi. Pawlkhatte pen Pasian Gam thu a gen mite a kisapna munah special pioneer a sem dingin kiteel a, khasim nai 130 ahih kei leh tua sang a tamzaw piakhia uh hi. Tua Pioneer-te in a nuntakzia uh neihzah tawh lungkimin a kisapnate uh Jehovah in panpih ding cih na lungmuang uh hi. (Matthai 6:31-33; 1 Timoti 6:6-8) Hun bitin a sem thei lo te’n auxiliary pioneer semin kipiakhia a, amau thugen kipiakkhiatna-ah nidang sang kha khat in nai 30 ahih kei leh nai 50 piakhia uh hi.

Pasian le mite itna in Pioneer-te na thalawpsak hi. Pasian le ama geelna mite’n a theih ding a kisapna Jesuh in amuh mah bangin ko zong ka mu uh hi. (Marka 6:34) Tu hunah amau’ ahuh thei ding le mailam ading a kician lametna a pia thei pilna ka nei uh hi. Vengte itna in pioneer-te na thalawpsak a, mi dangte ii kha thu lamah a thahat nading pioneer te’n amau hun le a thatang uh lungsim takpi tawh piakhia uh hi. (Matthai 22:39; 1 Thesalonika 2:8) Tua in pioneer-te upna tha na khauhsak a, Pasian tawh zong kinai sakin lungnopna na ngahsak zaw hi.—Sawltak 20:35.

• Pioneer-te nangh koici khen ding?

• Hun bit pioneer sem dingin mi pawlkhat bang in na hanthawn hiam?