Kikhoppite-ah Ba’hang Kikhawm Ka Hi Uh Hiam?

Hih taka mite ba’hang hih zah takin lungdam uh hiam? Ko ii kikhoppi khatah a kikhop hang uh hi. Tanglai-a Pasian’ mite’n kum khatin thumvei a kikhop ding uh lamlahna a ngah uh hi. Tua mah bangin ko zong kikhoppi-ah kimuhkhop ding ka lamen uh hi. (Thu Hilhkikna 16:16) Kum simin kikhoppi thumvei ka nei uh a, nikhat bek a kibawl khawk kikhoppi pen kum khatin nihvei le nithum sung a sawt gam khawk kikhoppi-te hi. Hih kipawl khopnate pan bang hamphatna ngah ka hi uh hiam?

Tua in Khristian kisangamna kipsak hi. Israel mite’n “mi hon tampi lakah” Jehovah phatna nuam a sak mah bangin kikhoppite-ah Pasian biak khopna nuam ka sa uh hi. (Late 26:12; 111:1) Hih bangin hun hoihte-ah pawlpi a tuama om Tecite le gamdanga Tecite kimuh khopna hunpha ka ngah uh hi. Sun an kipuatekin annek kawmin kimeltheihna hunpha hong ngahsak hi. (Sawltak 2:42) Tua munah leitungbupa “thu uppih mite” a kipumkhat sak itna kimu kha ding hi.—1 Peter 2:17.

Kha lama i khantoh nading hong huh hi. Israel mite’n Lai Siangtho hilh thute a “theihtel” uh ciang phattuamna ngah uh hi. (Nehemiah 8:8, 12) Ko zong Kikhoppite pan ka ngah uh Lai Siangtho lamlahnate thupi ka sa uh hi. Hun gelna khempeuh Lai Siangtho kibulphuh hi. A lungluthuai thugenna, a kizom thugennate le lim lahkiknate pan Pasian deihna i nuntakna-ah i zuih theih nading hong hilh hi. Tu hun gentheih haksat hun sungah haksatnate a phuzo Khristiante ii tuahkhaknate i zak ciang hong thahatsak hi. Gam khawk kikhopna-ah tanglai puante silhin drama-te kilak a, tua in Lai Siangtho sunga thute piang takpi ahih na le i nuntakna-ah zuih ding thute hong hilh hi. Kikhoppi simin amau nuntakna Pasian kiangah a ki-apna a lak nuamte ading tuiphumna om hi.

• Kikhoppite in ba’hang a lungdamhuai hunpha khat ahi hiam?

• Khawk kikhoppite-ah na kikhopna pan bangci phattuamna ngah thei ding na hiam?