Kikhopna-ah Ba’hang Puan Etlawm Taka Silh Ka Hi Uh Hiam?

Hih laibu sunga limte-ah Jehovah Teci-te pawlpi kikhopna-ah a kikhop uh ciang amau’ puan etlawm taka a silh lam na ngaihsun kha hiam? Ba’hang tua bangin puan hoih takin le etlawm taka silh ka hi uh hiam?

Pasian zahtakna ka lahnop man uh hi. Pasian in a pualam a kilangte bek en lo cih i thei hi. (1 Samuel 16:7) Ahih hang amah bia dingin ka kikhop uh ciang Pasian le thu uppihte lungsim takpi tawh zahtakna ka lak nuam uh hi. Thukhenna zum a, thukhenpi pa mai-ah a ding hile’ng ama zaliatna zahtakin puan hoih takin silh nuam hi lo i hi hiam? Tua mah bangin “leitung khempeuh Thukhen pa” Jehovah Pasian le amah i biakna kikhopna munte zahtakna ka lak uh hi.—Piancilna 18:25.

Tua in i nuntakzia hong lak hi. Lai Siangtho in Khristiante puansilh “a kilawm” le “gamtat hoih” nading na hanthawn hi. (1 Timoti 2:9, 10) A “kilawm” a, puansilhna a cihin mi et ding ut a, a tom lua-a puansilhna, ki hoihsaknate pelh ding cihna hi. Puan hoih i tel ciang zong a val ahih kei leh a uanglua tel loh ding hi. Tua thuzungte a om hang mimal ciat ii tel theih ding tampi na om ve ve hi. Kampau kul loin etlawma gamtat hoihna in “hong Hon Pasian’ thu ahoihna kilangsak” in “Pasian” na pahtawi hi. (Titus 2:10; 1 Peter 2:12) Kikhopna-ah a kilawm puansilhna in Jehovah abia kote’ tungah midangte hong muhdan na kikhelsak thei hi.

Nikten puansilh hangin Biakinn-ah nong kikhop ding na maizum kullo hi. I puansilhte in a tam man ahih kei leh ahoih pen cih kullo a, siangtho in etlawm ding kisam zaw hi.

• Pasian i biak ciang nikten puansilh dan ba’hang thupi hiam?

• Nikten puansilh i tel theih nading bang thuzung om hiam?