Inimprentang mga Publikasyon sa Panahon nga Daghan nag Digital nga Publikasyon

Unsay sagad nimong gamiton dihang mobasa kag Bibliya o sa atong mga publikasyon? Daghan nato ang dili na tigbasag inimprentang libro o magasin kay gadyet na ang atong gigamit. Posible gani nga gadyet ang imong gigamit sa pagbasa niini nga artikulo. Mapasalamaton gyod ta nga ang atong mga publikasyon available na sa JW Library nga app ug sa jw.org!

Nganong ang kadaghanan sa atong mga publikasyon gi-publish na karon online? Daghang Saksi ang gustong mogamit ug digital nga format kay mas kombenyente ni ug tungod sa dugang nga mga feature niini. Kon bahin sa atong ministeryo, naghatag gihapon tag literatura pero mas nagpokus ta karon sa pagsugod ug panag-estorya.

Tungod ana, naibanan ug 60 porsiyento ang atong ginaimprenta kon itandi niadtong 10 ka tuig kanhi. Niadtong 2015, sa wala pa gamita sa daghang tawo ang JW Library sa pag-download ug mga publikasyon, kadaghanan sa atong mga imprentahanan 16 ka oras nga nag-operate kada adlaw. Ang uban natong imprentahanan nagplano pa gani nga himoong 24 oras ang pag-imprenta tungod sa dakong panginahanglan. Pero karon, kadaghanan sa atong mga imprentahanan walo ka oras na lang nag-operate kada adlaw.

Dili lang kay ang atong organisasyon ang naghimo sa maong kausaban sa pag-imprenta. Ang mga eksperto nag-ingon nga sa milabayng mga katuigan, giibanan ang pag-imprentag mga publikasyon sama sa mga newspaper ug magasin. Kay nagkadaghan man ang naggamit ug digital nga publikasyon, kinahanglan pa ba gihapon tang mag-imprenta? Oo! Atong sayron kon nganong padayon gihapon tang nag-imprenta ug kon sa unsang paagi nakatabang niini ang inyong mga donasyon.

Nganong Gikinahanglan Gihapon ang Inimprentang mga Publikasyon?

Ang uban natong mga igsoon nagdepende gihapon sa inimprentang mga publikasyon. Niay pipila ka pananglitan:

“Naggamit kog inimprentang publikasyon kay wala koy ikapalit ug gadyet. Kon naa man gani koy gadyet, maglisod kog charge kay magsige mag brownout sa amoa. Maong inimprenta gyod nga publikasyon ang akong gigamit.”—Odete, Mozambique.

“Wala koy ikapalit ug gadyet. Ug kon baratohon ang akong paliton, dali ra ning maguba ug kinahanglang ipaayo pirme. Kon ipaayo nako ni, dili ko makabasa sa atong mga publikasyon.”—Linley, Malawi.

“Kay gamay ra man mig kuwarta, usa ra ang among cellphone ug maghinulamay ra mi sa akong duha ka anak. Panahon sa tigom, usa namo ang maggamit sa cellphone ug ang duha maggamit ug inimprentang publikasyon.”—Sinine, Micronesia.

Ang ubang igsoon dunay access sa digital nga mga publikasyon, pero mas ganahan gihapon silag inimprentang publikasyon. Matikdi ang mosunod nga mga komento:

“Kasagaran, digital nga publikasyon ang akong gamiton. Pero sa dihang mangandam ko para sa tigom, mas ganahan kog inimprentang publikasyon. Mag-enjoy gyod kog basa niini ilabina nga ganahan kong mag-highlight ug magnota. Mahimo man nako ni sa gadyet, pero kon ako ning himoon sa inimprentang kopya, mas sayon nakong mahinumdoman ug mapadapat ang akong gibasa.”—Márcia, Brazil.

“Mas sayonan ko kon inimprentang publikasyon ang akong basahon kay dili magsakit ang akong mata. Dili pod kaayo ko suheto ug gadyet. Maglisod kog note, research, ug download ug file diha sa gadyet.”—Selina, Mozambique.

“Tibuok adlaw kong mogamit sa akong cellphone ug computer. Pero dihang gusto kong mogahin ug panahon uban kang Jehova, dili ko mogamit sa akong gadyet. Inimprentang publikasyon ang akong gamiton kay makapokus ko sa akong gibasa ug dili ko mabalda sa mga notification.”—Guillaume, Canada.

“Sa dihang magsangyaw mi, maglisod mig padala ug digital nga publikasyon sa among kaestorya kay managana mig pangayo sa ilang contact information, ilabina kon mao pa toy una namong panag-estorya. Sagad mas sayon kon inimprentang kopya ang among ihatag. Gawas pa, mosangyaw pod mi sa delikadong mga lugar maong dili kaayo mi mogamit ug mga gadyet.”—Usa ka tigdumala sa sirkito sa South America.

Unsay gihimo sa organisasyon aron tabangan ang mga igsoon nga nanginahanglan o mas ganahan ug inimprentang publikasyon?

Pagtagana sa Gikinahanglan sa mga Igsoon

Nag-imprenta gihapon tag mga publikasyon diha sa siyam nato ka sangang buhatan. Niadtong 2025 nga tuig sa pag-alagad, nag-imprenta tag kapig 1.5 ka bilyong literatura, nga naglakip sa kapig 3 ka milyong Bibliya, kapig 18 ka milyong libro, ug kapig 941 ka milyong tract ug imbitasyon. Migasto tag kapig $35 milliona sa pag-imprenta niini nga mga publikasyon. Gawas pa ana, sa milabayng tulo ka tuig, migasto tag mga $10 million sa pag-update sa atong printing ug binding equipment.

Aron magamit sa kinamaayohang paagi ang mga donasyon, mag-imprenta lang ta kon unsay gamiton sa mga igsoon. Sa ato nang nahisgotan, mohatag gihapon tag literatura sa dihang mosangyaw ta. Pero mas nagpokus ta ron sa pagsugod ug panag-estorya. Busa sa miaging 10 ka tuig, giibanan nato ang gidaghanon sa magasing Pagmata! nga giimprenta. Sa miagi, nag-imprenta tag 86 ka magasin para sa matag magmamantala kada tuig. Pero karon, nag-imprenta na lang tag 11 ka magasin para sa matag magmamantala kada tuig. Ug kay daghang Saksi ang kanunayng mogamit ug contact card, nag-imprenta ta karon ug halos tulo ka pilo sa gidaghanon sa contact card nga atong giimprenta sa wala pay 2020.

“Gimahal Gyod sa Diyos ang Tanan”

Mapasalamaton ang mga igsoon kay nag-imprenta gihapon tag mga publikasyon. Si Ricardo, nga taga-Brazil, miingon: “Lipay ko nga bahin ko sa usa ka mahigugmaong organisasyon nga naghunahuna gyod sa pagtagana ug espirituwal nga pagkaon para sa tanan, bisan niadtong walay access sa digital nga mga publikasyon. Pinaagi niini, ‘si bisan kinsa nga giuhaw’ ug ‘gustong moinom’ makakat-on sa mga kamatuoran nga makaluwas ug kinabuhi.” (Pinadayag 22:17) Si Bernard, nga taga-Tahiti, miingon: “Mapasalamaton kaayo ko nga naay inimprentang mga publikasyon. Pamatuod ni sa gugma, kaalam, ug pagkamakataronganon sa organisasyon ni Jehova. Gipaneguro sa organisasyon nga ang tanan—bata man o tigulang, dato man o pobre—makakat-on sa maayong balita sa Gingharian. Gipakita niini nga naghunahuna gyod ang Diyos sa kaayohan sa matag indibiduwal.”

Si Andréia, nga taga-Brazil, nasayod nga ang iyang mga donasyon magamit sa pag-imprentag mga publikasyon. Siya miingon: “Ang atong organisasyon naggamit ug kuwarta, panahon, ug skill, ug naningkamot sa pag-imprentag mga publikasyon para niadtong dili maka-access ug digital nga mga publikasyon. Tungod niini, kombinsido ko nga gimahal gyod sa Diyos ang tanan. Bisan pag gamiton lang ang akong mga donasyon sa pag-imprentag mga publikasyon, malipay gihapon ko sa paghatag.”

Mapasalamaton kaayo mi sa tanan ninyong donasyon, apil niadtong gihatag pinaagig donate.jw.org. Pinaagi niini nga mga donasyon, padayon tang makaimprentag mga publikasyon para niadtong nanginahanglan o mas ganahan niini.