Unsay Mahitabo sa Relihiyon?—Kon Unsay Giingon sa Bibliya

Nadismaya ba ka o nasuko pa gani sa relihiyon? Bisag ang relihiyon naay positibong epekto sa ubang komunidad ug indibiduwal, nakapahinabo pod nig daghang kadaot. “Ang pipila sa kinagrabehang mga gubat sa kasaysayan maoy resulta sa magkalahi nga relihiyosong tinuohan,” miingon ang Encyclopedia of Religion and War. Ang relihiyosong mga lider sagad naggamit sa relihiyon, dili sa pagsimba, kondili sa pag-endorso ug politikal nga mga ideya. Dugang pa, gitago sa ubang relihiyosong lider ang seksuwal nga pag-abuso o mga krimen nga konektado sa kuwarta.

Kon nadismaya ka sa relihiyon, naghunahuna tingali ka kon unsa kahay gibati sa Diyos bahin niini. Ang Bibliya nag-ingon nga wala uyoni sa Diyos ang kadaghanang relihiyon tungod sa mga gihimo niini. Naghisgot pod nig mga tagna nga nagpakita kon unsay iyang himoon. Sa simbolikong paagi, ang Bibliya nag-ingon nga sa dili madugay naay himoon ang Diyos sa tanang relihiyon sa tibuok kalibotan nga wala pa gyod mahitabo sukad.

Unsay giingon sa Bibliya bahin sa mahitabo sa relihiyon sa umaabot?

Tagna: Ang basahon sa Bibliya nga Pinadayag naghisgot sa usa ka pampam nga ginganlag Bantogang Babilonya. Kini nga pampam nagsakay sa hayag-pula nga pintas nga mananap. Pero sa ulahi, atakehon siya sa pintas nga mananap ug patyon siya.—Pinadayag 17:3, 5, 16.

Kahulogan: Ang pampam, ang Bantogang Babilonya, nagsimbolo sa tanang klase sa bakak nga relihiyon—sa ato pa, relihiyon nga gisalikway sa Diyos.a Ang hayag-pula nga pintas nga mananap nagsimbolo sa United Nations (UN).b Ang pagsakay sa pampam sa hayag-pula nga pintas nga mananap nagpakita nga ang bakak nga relihiyon misulay sa pag-impluwensiya ug pagkontrol pa gani sa UN. Ang tagna nga patyon sa pintas nga mananap ang pampam nagpakita nga atakehon sa UN ug sa nagsuportar nga mga nasod ang tanang bakak nga relihiyon niining kalibotana ug bug-os kining laglagon. Wala pa gyoy ingon niini nga nahitabo sukad sa bakak nga relihiyon.

Sa unsang paagi laglagon ang bakak nga relihiyon?

Tagna: “Ang 10 ka sungay nga imong nakita ug ang pintas nga mananap, kini sila magdumot sa pampam ug maglaglag kaniya ug . . . ugdawon siya sa kalayo. Kay gibutang kini sa Diyos sa ilang kasingkasing [sa kasingkasing sa mga lider sa kalibotan] aron buhaton ang iyang hunahuna, oo, aron buhaton ang ilang usa ra ka hunahuna pinaagi sa paghatag sa ilang gingharian ngadto sa pintas nga mananap . . . Sa usa ka adlaw ang iyang mga hampak moabot, ang kamatayon ug pagbangotan ug gutom, ug ugdawon siya sa kalayo kay kusgan man si Jehovac nga Diyos nga maoy naghukom kaniya.”—Pinadayag 17:16, 17; 18:8.

Kahulogan: Ibutang sa Diyos ang “iyang hunahuna” diha sa kasingkasing sa mga nasod sa kalibotan. Iyang ipahinabo nga ilang ihatag ang “ilang gingharian,” o ang ilang politikal nga gahom, ngadto sa UN. Dayon ang UN—nga nahimo nang gamhanan tungod sa mga nasod—maglaglag sa bakak nga relihiyon sa tibuok kalibotan. Kining makapahinganghang hitabo mahitabo nga daw ”sa usa [lang] ka adlaw”—kalit ug paspas—nga makapakurat sa daghang tawo.—Pinadayag 18:21.

Nganong laglagon ang bakak nga relihiyon?

Tagna: “Ang iyang mga sala nagtipun-og sangko sa langit, ug gihinumdoman sa Diyos ang iyang daotang mga buhat.”—Pinadayag 18:5.

Kahulogan: Ang bakak nga relihiyon daghag gihimong daotang mga buhat sulod na sa daghang katuigan. Matikdi ang “iyang mga sala” nga maoy hinungdan nga laglagon siya sa Diyos:

Pag-apil-apil sa politika. Gitudloan ni Jesu-Kristo ang iyang mga sumusunod nga dili mag-apil-apil sa politika, hinuon angay silang mosalig sa Gingharian sa Diyos, langitnong gobyerno nga mopuli sa tawhanong pagmando.d (Daniel 2:44; Mateo 6:9, 10; Juan 6:15; 18:36) Pero ang bakak nga relihiyon nagdasig sa mga tawo nga mosalig sa tawhanong mga gobyerno. Kay grabe ang iyang pag-apil-apil sa politika imbes magmaunongon sa Diyos, ang tagna sa Pinadayag naghisgot nga ang Bantogang Babilonya sad-an sa “seksuwal nga imoralidad” ug haom nga nagtawag kaniya ingong “bantogang pampam.”—Pinadayag 17:1, 2; Santiago 4:4.



Kapintasan. Ang bakak nga relihiyon gihisgotan ingong responsable sa kamatayon “sa tanang gipamatay sa yuta.” (Pinadayag 18:24) Daghang relihiyon ang wala magtudlo sa ilang mga membro nga mahimong makigdaiton. Ang uban nagsuportar pa gani ug nagdasig sa mga tawo nga moapil sa mga gubat ug mohimog terorismo.



Kahakog. Ang bakak nga relihiyon ’walay kaulaw nga nagbaton ug mga bahandi.’ (Pinadayag 17:4; 18:7) Gigamit sa daghang relihiyon ang ilang impluwensiya ug relasyon sa uban aron padaghanon pag-ayo ang ilang bahandi. Wala gyod malipay ang Diyos niana.—Tito 1:7.



Kabakakan. Ang bakak nga relihiyon nagtudlog mga pagtulon-an ug binuhatan nga sukwahi sa kamatuoran sa Bibliya.e Kay naggikan sa bakak nga relihiyon ang daghang pagtulon-an ug binuhatan nga nagpahisalaag sa mga tawo ug nagpasipala sa Diyos, ang tagna nagtawag kaniya nga “ang inahan . . . sa dulumtanang mga butang sa yuta.”—Pinadayag 17:5; 18:23.

Maglaglag ba ang tanang relihiyon?

Dili. Ang basahon ang Pinadayag naghisgot ug grupo sa mga tawo nga gikan sa lainlaing bahin sa kalibotan nga gitawag ug “dakong panon.” (Pinadayag 7:9) Kining dakong panon gihisgotan nga “nagsul-ob ug puting tag-as nga mga besti,” nga nagpakita nga sila maunongong nagsimba sa Diyos sumala sa iyang mga sukdanan. Sila maluwas sa “dakong kasakitan,” nga gitawag sa Bibliya nga yugto sa panahon diin ang bakak nga relihiyon ug ang uban pang kaaway sa Diyos laglagon. (Pinadayag 7:13, 14; 19:11, 19-21) Ang dakong panon nga nagsul-ob ug puting tag-as nga mga besti maoy sakop sa tinuod nga relihiyon—relihiyon nga magpabilin hangtod sa hangtod.f

Nganong importanteng mahibalo ka sa kalaglagan sa bakak nga relihiyon?

Mahupayan ka sa pagkahibalo nga wala malipay ang Diyos sa ngil-ad nga mga butang nga ginahimo sa relihiyon. Makabaton kag paglaom sa umaabot kay nahibalo ka nga wad-on na unya ang tanang relihiyon nga nagpasipala sa Diyos ug nagpaantos sa mga tawo.

Makasalig pod ka nga naay dalawatong paagi sa pagsimba sa Diyos. Ang Bibliya nag-ingon nga ang “matuod nga mga magsisimba magsimba sa Amahan sa espiritu ug kamatuoran, kay sa pagkatinuod, ang Amahan nangitag mga tawo nga ingon niini sa pagsimba kaniya.” (Juan 4:23) Giingnan niya sila: “Gula mo kaniya [Bantogang Babilonya], akong katawhan, kon dili mo gustong makaambit sa iyang mga sala, ug kon dili mo gustong makaagom sa iyang mga hampak.” (Pinadayag 18:4, 5) Oo, gidapit sa Diyos ang mga tawo sa pagsimba kaniya sa kamatuoran. (1 Timoteo 2:3, 4) Misaad siya nga kadtong modawat sa iyang pagdapit mabuhi hangtod sa hangtod.—1 Juan 2:17.