Mensahe Gikan sa Pulong sa Diyos—Paglaom Para sa mga Refugee

Kada tuig, minilyon sa mga tawo ang mapugos sa pagbiya sa ilang puy-anan. Nakasinati ba ka niining lisod kaayo nga kahimtang? Kon mao, makasalig ka nga naay makatabang nimo. Ang Diyos naghatag ug mas maayong kaugmaon para nimo nga imong mabasa diha sa Bibliya.

“Kadtong mga napugos sa pagbalhin sa laing lugar o sa laing nasoda wala lang magkinahanglan sa atong dinalian nga tabang. Nagkinahanglan pod sila . . . ug paglaom para sa umaabot,” miingon si Christos Stylianides, usa ka European Union commissioner.b Ang mga tawo nga naay gipanguptan nga paglaom mas positibog panglantaw sa kinabuhi ug sa ilang kaugmaon. Pero gawas sa paglaom, ang mga refugee nagkinahanglan pod ug paghupay sa ilang pait kaayo nga mga nasinatian.

“Sakit gyod kaayo kadtong panahon nga kinahanglan kong mobiya sa among nasod ug sa akong pamilya. Mibati kog grabeng kahadlok, kaguol, ug kabalaka.”—Emmanuel, Haiti.

Ingon ana pod ba ang imong gibati? Kon napugos ka nga mobiya sa inyong puy-anan, nagkinahanglan gyod kag paghupay ug paglaom. Sa unsang paagi ang Pulong sa Diyos, ang Bibliya, makatabang nimo?

Paghupay gikan sa Pulong sa Diyos

Ang Bibliya nag-ingon: “Gimahal [ni Jehova]c ang langyawng residente.”—Deuteronomio 10:17, 18.

Ang Bibliya nag-ingon: “Si Jehova duol sa tanang nagatawag kaniya.”—Salmo 145:18.

Ang Bibliya nag-ingon: “Ang matuod nga Diyos dili gayod mobuhat ug daotan . . . Dili tuison sa Labing Gamhanan ang hustisya.”—Job 34:10, 12.

Nagpasabot ni nga dili ang Diyos ang hinungdan sa imong pag-antos. Ang imong kahimtang karon wala magpasabot nga gisilotan o gisulayan ka sa Diyos.

Paglaom gikan sa Pulong sa Diyos

Gipatin-aw sa Bibliya kon unsay himoon sa Diyos para nato sa umaabot. Konsideraha kon sa unsang paagi kini nga paglaom nakatabang sa mga tawo nga napugos ug biya sa ilang puy-anan.

Ang Bibliya nag-ingon: “Pahiran [sa Diyos] ang matag luha sa ilang mga mata, ug ang kamatayon mawala na, ug wala na unyay pagbangotan, pagtiyabaw, ug kasakit.”—Pinadayag 21:4.

Nagpasabot ni nga matapos ra ang tanan natong pag-antos. Ang Diyos nagsaad nga iyang wagtangon ang tanang problema nga nakapalisod pag-ayo sa atong kinabuhi karon.

“Sa dili na madugay, taposon sa Diyos ang tanang inhustisya ug ang daotang mga butang nga nagakahitabo sa atong palibot karon. Kana nga paglaom nakatabang nako nga magpokus sa panahon nga wala nay mga pag-antos.”—Karla, El Salvador.

Ang Bibliya nag-ingon: “Ang kanhing mga butang dili na hinumdoman, ug dili na kini motungha sa kasingkasing.”—Isaias 65:17.

Nagpasabot ni nga dili na nato mahinumdoman ang atong pait nga mga kaagi. Seguroon sa Diyos nga matapos gyod ang emosyonal nga kasakit nga resulta sa imong dili maayong mga kaagi.

“Ang Bibliya nagsaad nga dili na nato mahinumdoman ang emosyonal nga kasakit nga atong gibati dihang napugos ta sa pagbiya sa atong puy-anan. Kana nga saad nakatabang nako nga molahutay sa among lisod nga situwasyon karon kay nahibalo ko nga sa dili madugay mabag-o ra ang tanan.”—Natalia, Ukraine.

Ang Bibliya nag-ingon: “Ang Diyos sa langit magtukod ug gingharian . . . Dugmokon ug taposon niini kining tanang gingharian.”—Daniel 2:44.

Nagpasabot ni nga ang perpekto nga gobyerno sa Diyos magmando sa tibuok yuta. Sa dili madugay, pulihan niini nga gobyerno ang tanang gobyerno sa tawo. Kini nga gobyerno magmando gikan sa langit ug magpatunghag tinuod nga kalinaw, kasegurohan, ug hustisya. Wagtangon pod niini ang kalisod sa kinabuhi.—Miqueas 4:3, 4.

“Nahupayan gyod ko sa pagkahibalo nga ang mga problema sama sa pagdaogdaog, pagduda, pagpihigpihig, ug diskriminasyon temporaryo ra. Sa dili madugay, taposon sa Gingharian ni Jehova kining tanang problema.”—Mustafa, Middle East.

Kaalam gikan sa Pulong sa Diyos

Ang praktikal nga kaalam sa Bibliya makatabang samtang naningkamot ka nga madawat ang mga nahitabo, apil na ang materyal nga mga butang nga nawala kanimo. Makatabang pod ni nimo sa pag-atubang sa imong bag-ong kahimtang karon. Matikdi kon sa unsang paagi ang mosunod nga mga prinsipyo nakatabang sa mga refugee:

Ang Bibliya nag-ingon: “Bisag dato ang usa ka tawo, ang iyang kabtangan dili makahatag niyag kinabuhi.”—Lucas 12:15.

Kon sa unsang paagi kining maalamong mga pulong makatabang nimo: Wala gyod tingali nimo gidahom ang nahitabo, ug mibati kag grabeng kaguol sa mga butang nga nawala kanimo. Pero kon imong pamalandongon kon unsa ka importante ang imong kinabuhi, dili ka sobrang maguol bahin sa materyal nga mga butang.

“Ang kinabuhi mas importante gyod kay sa materyal nga mga butang. Naay mga kahimtang nga ang kabtangan o kuwarta dili gyod makatabang nimo.”—Natalia, Ukraine.

Ang Bibliya nag-ingon: “Ayaw pag-ingon, ‘Nganong ang kanhing mga adlaw mas maayo pa kay sa karon?’”—Ecclesiastes 7:10.

Kon sa unsang paagi kining maalamong mga pulong makatabang nimo: Lisod gyod tingali ang imong kahimtang karon, pero kon maningkamot ka nga dili ni ikomparar sa imong kahimtang kaniadto, makatabang ni nga dili ka mahimong negatibo.

“Gidawat nako kon unsay akong kahimtang karon. Tungod ana, nakapabilin kong positibo.”—Eli, Rwanda.

Ang Bibliya nag-ingon: “Kon duna tay makaon ug masul-ob, kita magmakontento na niini.”—1 Timoteo 6:8.

Kon sa unsang paagi kining maalamong mga pulong makatabang nimo: Paningkamot nga makontento sa pangunang mga panginahanglan sa kinabuhi. Kon kontento ka, dili kaayo ka ma-stress. Makatabang ni nga mahimong balanse ang imong emosyon.

“Ang Bibliya nakatabang nga mausab ang akong panglantaw sa mga butang ug dili magpokus sa mga butang nga nawala kanamo. Malipayon mi sa akong asawa kay buhi ra mi ug naa sa safe nga lugar.”—Ivan, Ukraine.

Ang Bibliya nag-ingon: “Buhata sa uban ang tanan nga gusto ninyong buhaton nila kaninyo.”—Mateo 7:12.

Kon sa unsang paagi kining maalamong mga pulong makatabang nimo: Dali kang ikasabot sa uban kon mapailobon ka ug buotan. Ang imong paningkamot nga himoon ni makatabang nga malikayan ang diskriminasyon ug dawaton ka sa mga tawo sa lugar nga imong gibalhinan.

“Daghan gyod ang ganahan kon imo silang pakitaag pagtahod, pagkabuotan, ug gugma. Tungod ani, makabaton kag maayong relasyon sa mga tawo sa lugar nga imong gibalhinan.”—Angelo, Sri Lanka.

Ang Bibliya nag-ingon: “Ipahibalo sa Diyos ang inyong mga hangyo . . . ug ang kalinaw nga gikan sa Diyos, . . . magbantay sa inyong kasingkasing ug hunahuna.”—Filipos 4:6, 7.

Kon sa unsang paagi kining maalamong mga pulong makatabang nimo: Iampo sa Diyos ang imong mga gibati, panginahanglan, kahadlok, ug mga kabalaka. Ang maong mga pag-ampo makatabang nga dili ka sobrang mabalaka ug maka-adjust sa imong bag-ong kahimtang.

“Ginaampo nako sa Diyos ang akong mga problema ug ginatubag gyod ko niya. Ang akong nakat-onan sa Bibliya nakahatag gyod nakog tinuod nga kalinaw sa hunahuna.”—Yol, South Sudan.

“Ang maayong tambag sa Bibliya nakatabang nako nga magpabiling kalmado, nga mao gyoy gikinahanglan nako sa akong lisod nga situwasyon karon.”—Valentina, Ukraine.

“Nalig-on gyod ko sa pagkahibalo nga si Jehova nga Diyos nagsaad natog nindot kaayo nga kinabuhi sa umaabot.”—Emmanuel, Haiti

Gusto ba kang makakat-on ug dugang bahin sa paghupay ug paglaom nga gisaad sa Bibliya ug kon nganong makasalig ka niana? Puwede kang mohangyo nga magpaduaw sa mga Saksi ni Jehova. Wala ni bayad ug malipay sila nga motabang nimo.