Unsaon Nako Paghunong ang Dobleng Pagkinabuhi?

Naa tingali mga panahon nga ang ubang magsisimba sa Diyos maghunahuna kon angay ba nilang hatagag panahon ug paningkamot ang pagkinabuhi sumala sa mga sukdanan sa Bibliya. (Salmo 73:2, 3) Mohimo na tingali silag mga butang nga dili uyon sa mga balaod ni Jehova ug dayon ilang limbongan ang ubang magsisimba pinaagi sa pagtago sa ilang dili maayong binuhatan.

Kini nga artikulo gidisenyo aron tabangan kadtong nagsugod sa pagkinabuhing doble pero gusto nang magbag-o.

Niining artikuloha

• Unsa ang dobleng pagkinabuhi?

• Kon doble ang akong pagkinabuhi, nagpasabot ba na nga daotan ko?

• Unsaon nako paghunong ang dobleng pagkinabuhi?

• Ang giingon sa ubang batan-on

Unsa ang dobleng pagkinabuhi?

Ang dobleng pagkinabuhi nagpasabot nga dihang kauban nimo kadtong wala magsunod kang Jehova, mohimo kag mga butang nga nahibalo kang sayop; pero dihang kauban nimo ang mga igsoon, imong ipakita nga gusto pod kang moalagad kang Jehova. Mora kag nagsul-ob ug maskara ug naa kay duha ka kinabuhi.

“Kon doble kag pagkinabuhi, naa kay ginatago maong walay nakaila kon kinsa gyod ka. Ang tinuod, kon doble kag pagkinabuhi, dili ka matinud-anon sa tanan.”—Erin.

Nahibalo ka ba? Apil sa dobleng pagkinabuhi ang paghimog mga butang nga wala uyoni ni Jehova dihang mag-inusara ka.

“Niadtong 14 anyos ko, nagsugod ko sa pagtan-aw ug imoral nga mga picture ug video diha sa Internet. Dihang naa koy kauban, akong ipakita nga gidumtan nako ang pornograpiya, pero dili kana ang naa sa akong kasingkasing.”—Nolan.

Prinsipyo sa Bibliya: “Walay ulipon nga makaalagad sa duha ka agalon; kay dumtan niya ang usa ug higugmaon ang lain, o unongan niya ang usa ug tamayon ang lain.”—Mateo 6:24.

Kon doble ang akong pagkinabuhi, nagpasabot ba na nga daotan ko?

Dili ra man pod. Siyempre, ang uban nakadesisyon na nga dili sila gustong magkinabuhi uyon sa mga sukdanan sa Bibliya. Pero mao pod ba na imong gibati? O naa pay laing rason, sama sa:

• Nahadlok kang malahi sa imong mga higala.

• Mibati ka nga mas pareho mog hilig sa imong mga schoolmate kay sa mga igsoon diha sa kongregasyon.

• Mibati ka nga dili nimo kayang sundon ang tanang sugo sa Diyos.

“Para nako, ang ubang batan-on nga naay dobleng pagkinabuhi mas komportableng makig-uban niadtong mga dili Kristohanon kay dili nila gustong malahi sa uban.”—David.

Siyempre, dili ni maghatag natog rason nga magkinabuhing doble. Pero makatabang ni nga masabtan nga bisan ang maayong mga tawo makahimo niini nga sayop. Kon nahitabo na nimo, unsay puwede nimong himoon?

Unsaon nako paghunong ang dobleng pagkinabuhi?

1. 1. Susiha ang imong paagi sa pagkinabuhi karon. Pangutan-a ang imong kaugalingon: ‘Mao ba gyod ni ang gusto nako? Kon dili, unsa kahay resulta sa akong mga desisyon?’

   Prinsipyo sa Bibliya: “Ang tawong maalamon makakita sa kapeligrohan . . ., pero ang walay kasinatian moderetso ra ug mag-antos sa resulta.”—Proverbio 27:12.

2. 2. Magmatinud-anon. Isulti ang imong situwasyon ngadto sa imong ginikanan o sa hamtong nga higala nga nagsunod sa mga balaod ni Jehova. Malipay gyod sila nga miduol ka nila. Ug ma-proud sila nimo kay gusto nimong himoon kon unsay husto!

   

   “Ang pagtug-an sa akong mga sayop mao ang usa sa pinakalisod nga akong gihimo, pero dihang gihimo nako ni, nahuwasan gyod ko.”—Nolan.

   Prinsipyo sa Bibliya: “Siya nga nagatabon sa iyang mga sala dili molampos, apan kadtong motug-an sa iyang mga sala ug mobiya niini kaluy-an.”—Proverbio 28:13.

3. 3. Dawata ang mga resulta. Hinumdomi, kon naa kay ginatago sa imong ginikanan ug sa kongregasyon, malisdan na sila sa pagsalig nimo. Ingong resulta sa imong binuhatan, hatagan tingali kag mga restriksiyon sa imong ginikanan o sa mga ansiyano sa kongregasyon. Dawata ang maong mga resulta, ug magmadeterminado nga “magmatinud-anon [na] sa tanang butang.”—Hebreohanon 13:18.

   Prinsipyo sa Bibliya: “Paminaw sa tambag ug dawata ang disiplina, aron mahimo kang maalamon sa umaabot.”—Proverbio 19:20.

4. 4. Magmakombinsido nga gimahal ka sa Diyos. Kay gimahal ta ni Jehova, nahibalo siya sa tanan natong ginahimo. Kon doble kag pagkinabuhi, nahibalo siya ana ug nakapaguol na niya. Pero, “kay gimahal [ka] niya,” gusto kaayo ka niyang tabangan nga mabag-o.—1 Pedro 5:7.

   Prinsipyo sa Bibliya: “Ang mga mata ni Jehova nagalibotlibot sa tibuok yuta aron ipakita ang iyang kusog alang niadtong kansang kasingkasing bug-os alang kaniya.”—2 Cronicas 16:9.