Abdias—Masundog Nimo ang Iyang Kahadlok sa Diyos

Si Abdias ang tigdumala sa panimalay ni Ahab, usa ka daotang hari kinsa nagtugot nga mokaylap sa tibuok Israel ang pagsimba kang Baal. Bisan pa sa daotang impluwensiya nga komon niadtong panahona, si Abdias naay kahadlok sa Diyos “sukad sa iyang pagkabatan-on.” (1 Hari 18:​1-13) Busa dihang gustong ipapatay ni Rayna Jezebel ang tanang propeta ni Jehova, nahibalo si Abdias nga kinahanglan siyang magpakitag kaisog ug molihok dayon aron maluwas ang maong mga propeta. Unsay iyang gihimo? Iyang gitagoan ang mga propeta ni Jehova ug gitagan-an silag pagkaon bisag dihay grabeng kagutom sa yuta. Hunahunaa kon unsa to ka lisod. Dili lang usa ka propeta ang iyang gitagoan, kondili 100 ka propeta ni Jehova! Unya kinahanglan pa gyod siyang magbantay pag-ayo nga dili masakpan sa daghan kaayong bakak nga propeta nga nag-alagad sa hari ug sa rayna.—1 Hari 18:19.

Unsay atong makat-onan sa kaisog ni Abdias? Bisag nahadlok siya kang Ahab, mas nahadlok siya sa Diyos. Tungod ana, andam niyang ipameligro ang iyang kinabuhi para sa mga alagad ni Jehova. Masundog pod nato ang iyang kahadlok sa Diyos, ilabina kon nagpuyo ta sa lugar diin gidili ang atong pagsimba. Kon naa tay kahadlok sa Diyos, magpalihok ni nato nga tabangan ang mga igsoon nga nag-atubang ug mga pagsulay.