“Usa ka Kahibulongang Gasa Gikan Kang Jehova”

ANG Mayo 1, 1996, nga isyu sa Ang Bantayanang Torre naundan sa bug-os nga panaghisgot bahin sa Kristohanong neyutralidad ug kon unsaon pagtimbangtimbang ang atong mga responsabilidad ngadto kang Jehova ug ngadto kang “Cesar.” (Mateo 22:21) Daghang pulong sa pagpabili ang nadungog alang sa bag-ong impormasyong gitagana. Lakip niini mao ang mosunod nga sulat, nga gisulat sa usa ka Saksi sa Gresya ug giadres ngadto sa Nagamandong Lawas sa mga Saksi ni Jehova:

“Gusto ko nga ipahayag ang akong kinasingkasing nga pagpasalamat alang kaninyong tanan minahal nga mga igsoon sa pag-atiman kanamo ug maayo sa espirituwal. Kay nakagugol ug siyam ka tuig sa bilanggoan tungod sa akong Kristohanong pagtuo, gipabilhan ko gayod ang maayong mga hunahuna diha sa Mayo 1, 1996, nga isyu sa Ang Bantayanang Torre. (Isaias 2:4) Kini maoy usa ka kahibulongang gasa gikan kang Jehova.​—Santiago 1:17.

“Samtang ako nagpahimulos niining mga artikuloha, akong nahinumdoman ang komento sa mas nag-unang Bantayanang Torre (Agosto 1, 1994, panid 14): ‘Tin-aw, ang pagkamakataronganon maoy usa ka bililhong hiyas, usa nga mopalihok kanato sa paghigugma ug labaw pa kang Jehova.’ Oo, mga igsoon, nagpasalamat ako kang Jehova nga ako bahin sa iyang maluloton ug mahigugmaong organisasyon, nga tin-awng nagpabanaag sa iyang kaalam.​—Santiago 3:17.

“Ang nag-uswag nga kahayag diha sa Mayo 1 nga Bantayanang Torre gidawat ug maayo dinhi sa Gresya, ilabina niadtong migugol ug daghang tuig sa bilanggoan o niadtong anaa pa sa bilanggoan tungod sa ilang pagtuo. Salamat kaninyo pag-usab. Hinaot si Jehova magapalig-on kaninyo pinaagi sa iyang espiritu sa padayong pagtagana kanamo sa hinungdanong espirituwal nga pagkaon niining masamok nga mga panahon.”