Ayawg Kawanga ang Katuyoan sa Hinatag-sa-Diyos nga Kagawasan
“Diin gani ang espiritu ni Jehova, atua ang kagawasan.”—2 CORINTO 3:17.
1. Nganong ang Isaias 65:13, 14 mapadapat ngadto sa mga Saksi ni Jehova?
SI Jehova maoy Diyos sa kagawasan. Ug pagkadako sa panalangin sa hinatag-sa-Diyos nga kagawasan! Tungod kay ang iyang dedikadong mga alagad aduna niana nga kagawasan, kining mga pulonga sa Soberano Ginoong Jehova ikapadapat ngadto kanila: “Tan-awa! ang akong mga alagad magakaon, apan kamo pagagutomon. Tan-awa! ang akong mga alagad magainom, apan kamo pagauhawon. Tan-awa! ang akong mga alagad magakalipay, apan kamo pagakaulawan. Tan-awa! ang akong mga alagad manag-awit tungod sa kalipay sa kasingkasing, apan kamo managhilak tungod sa kasubo sa kasingkasing ug managbakho tungod sa kaguol sa espiritu.”—Isaias 65:13, 14.
2. Nganong ang katawhan ni Jehova mauswagon sa espirituwal?
2 Ginatagamtam sa katawhan sa Diyos kining madagayaong kahimtang sa espirituwal tungod kay sila gitultolan pinaagi sa iyang espiritu, o aktibong puwersa. Si apostol Pablo miingon: “Si Jehova mao ang Espiritu, ug diin gani ang espiritu ni Jehova, atua ang kagawasan.” (2 Corinto 3:17) Unsay katuyoan sa hinatag-sa-Diyos nga kagawasan? Ug unsay gikinahanglan kanato aron gamiton kana sa bug-os?
Ang Kagawasang Nabatonan sa Diyos
3. Unsang matanga sa kagawasan ang nabatonan sa Diyos, ug ngano?
3 Si Jehova lamang ang adunay absolutong kagawasan. Walay mga linalang niya ang makalimite sa iyang kagawasan tungod kay siya ang Labing Gamhanang Diyos ug ang Soberano sa Uniberso. Ingon sa gipahayag sa matinumanong si Job, “kinsay makapugong kaniya? Kinsay magaingon kaniya, ‘Unsa ang imong gibuhat?’” (Job 9:12) Sa susama, ang Babilonyanhong haring si Nabucodonosor napugos sa pagdawat: “Walay usa nga naglungtad ang makapugong sa kamot sa [Diyos] o nga makaingon kaniya, ‘Unsay imong ginabuhat?’”—Daniel 4:35.
4. Nganong gihimo ni Jehova ang iyang kagawasan nga may mga utlanan?
4 Bisan pa, ang kaugalingong matarong nga mga prinsipyo ni Jehova naghupot sa maong absolutong kagawasan nga may mga utlanan. Kini giilustrar sa dihang gipahayag ni Abraham ang kabalaka mahitungod sa mga pomuluyo sa Sodoma ug misukna: “Ang Maghuhukom ba sa tibuok nga yuta dili mobuhat kon unsa ang matarong?” Ang tubag sa Diyos nagpakita nga giila niya ang kaakohan sa pagbuhat kon unsay matarong. Wala unta niya laglaga ang Sodoma kon dihay matarong nga mga pomuluyong nagpabilin diha niana. (Genesis 18:22-33) Gihimo sa Diyos ang iyang kagawasan nga may mga utlanan tungod kay ang iyang gugma ug kaalam naghimo kaniyang mahinay sa kasuko ug siya nagapugong-sa-kaugalingon.—Isaias 42:14.
Mga Limitasyon sa Tawhanong Kagawasan
5. Unsa ang pipila ka katarongan nga naglimite sa tawhanong kagawasan?
5 Bisag si Jehova adunay absolutong kagawasan, ang tanang uban nagalihok sulod sa mga limitasyong gipahimutang pinaagi sa ilang kinaiyahan, mga katakos, ug dominyo nga ginapuy-an, mao man usab sa mga katarongan sa karong limitadong gitas-on-sa-kinabuhi sa makasasalang katawhan. Ang Diyos naglalang sa tawo nga may bug-os nga kagawasan sa paglihok sulod sa dominyo nga gipahimutang ni Jehova alang kaniya. Adunay daghang ubang katarongan kon nganong ang tawhanong kagawasan maoy limitado, dili absoluto.
6. Ang pagkamay-tulobagon ngadto sa Diyos adunay unsang kalabotan sa atong kagawasan?
6 Una, ang tawhanong kagawasan maoy limitado tungod kay gilalang sa Diyos ang tawo aron moalagad sa Iyang katuyoan. Si Jehova ‘takos sa pagdawat sa himaya ug sa dungog ug sa gahom tungod kay iyang gilalang ang tanang mga butang ug tungod sa iyang kabubut-on sila milungtad ug nalalang.’ (Pinadayag 4:11) Busa ang tawo manubag sa iyang Magbubuhat, kinsa sa pagkamatarong nagabuhat ug mga balaod nga niana pagamandoan ang katawhan. Sa karaang Israel ubos sa Moisesnong Kasugoan, nagsugo ang Diyos sa pagpatay sa mga indibiduwal kon sila magapasipala sa iyang ngalan o supakon ang kasugoan sa Igpapahulay. (Exodo 20:7; 31:14, 15; Levitico 24:13, 16; Numeros 15:32-36) Bisag kita ingong mga Kristohanon dili na ubos sa Kasugoan, ang atong kagawasan limitado tungod kay kita manubag ngadto kang Jehova, kinsa maoy atong Maghuhukom, Maghahatag-balaod, ug Hari.—Isaias 33:22; Roma 14:12.
7, 8. (a) Sa unsang paagi ang pisikal nga mga balaod naglimite sa tawhanong kagawasan? (b) Unsa ang ubang mga balaod sa Diyos nga naglimite sa atong kagawasan ingong mga tawo?
7 Ikaduha, ang tawhanong kagawasan limitado tungod sa pisikal nga mga balaod sa Diyos. Pananglitan, tungod sa balaod sa grabidad, ang usa ka tawo dili makalukso gikan sa hataas nga tinukod nga dili magdaot o magpatay sa iyang kaugalingon. Tin-aw, ang pisikal nga mga balaod sa Diyos naglimite sa tawhanong kagawasan sa pagbuhat sa pipila ka butang.
8 Ikatulo, ang tawhanong kagawasan limitado tungod sa moral nga mga balaod sa Diyos. Lagmit gayod, imong nakita ang katumanan sa gisulat ni Pablo sa Galacia 6:7, 8: “Ayaw kamo palimbong: Ang Diyos dili mabiaybiay. Kay bisan unsay igapugas sa tawo, kini usab ang iyang pagaanihon; kay ang magapugas gikan sa iyang kaugalingong unod gikan sa unod magaani siyag pagkadunot, apan ang magapugas alang sa espiritu gikan sa espiritu magaani siyag kinabuhing walay kataposan.” Dili malalis, ang moral nga mga balaod ni Jehova nga Diyos usab naglimite sa atong kagawasan, apan ang pagbantay kanila gikinahanglan aron kita makabaton ug kinabuhi.
9. Sa unsang paagi ang atong pagkahimong bahin sa tawhanong katilingban naglimite sa atong kagawasan?
9 Ikaupat, ang tawhanong kagawasan maoy limitado tungod kay siya bahin sa tawhanong katilingban. Busa, siya adunay kagawasan lamang ngadto sa gilapdon nga kini sa di-husto makabalda sa uban. Ang mga Kristohanon kinahanglang magpasakop sa “labawng mga pagbulot-an” sa kagamhanan, magasugot kanila basta kita dili nila palapason sa mga balaod sa Diyos. (Roma 13:1; Buhat 5:29) Pananglitan, kita kinahanglang mosugot sa mga balaod mahitungod sa pagbayad sa buhis, sa gikusgon sa atong pagmaneho, ug uban pa. Ang kamatuoran nga ato gayong sugton ang maong mga balaod ni “Cesar” dugang nagpakita nga ang atong hinatag-sa-Diyos nga kagawasan dili absoluto.—Marcos 12:17; Roma 13:7.
Nganong Relatibong Kagawasan?
10, 11. Nganong si Jehova mihatag lamang sa katawhan ug relatibong kagawasan?
10 Nganong gihatagan lamang sa Diyos ang tawo ug relatibong kagawasan? Usa ka katarongan maoy aron ang Maglalalang makabatog intelihenting mga linalang sa yuta nga mohatag kaniyag kadungganan ug pagdayeg pinaagi sa ilang maayong mga pulong ug paggawi. Ang mga tawo makahimo niini, samtang ang mga hayop dili. Ang mga hayop, nga gimandoan sa kinaiyahan, walay nahibaloan mahitungod sa moral nga paggawi. Imong mabansay ang usa ka iro nga dili mokuhag bisan unsa, apan dili mo kana matudloan sa kasaypanan sa pagpangawat. Ang usa ka hayop uban sa mga aksiyon niini giprograma na, pagaingnon pa, dili makahimog mga desisyon nga makahatag pagdayeg ug pasidungog sa Diyos, samtang ang tawo may kagawasang makapili sa pag-alagad sa iyang Maglalalang tungod sa gugma ug pagpabili.
11 Ang Diyos naghatag usab niini nga kagawasan alang sa ilang kaayohan ug kalipay. Sila makagamit sa ilang relatibong kagawasan pinaagi sa pagkahimong malalangon ug mamugnaon, maayo ug matinabangon. Ang mga tawo usab adunay kagawasan sa pagpili diha sa mga butang sama sa trabaho ug dapit nga puy-anan. Karong adlawa, ang ekonomikanhon ug politikanhong mga katarongan sagad naglimite sa maong kagawasan sa pagpili, apan kini tungod tingali sa tawhanong kahakog, dili tungod sa paagi sa paglalang sa Diyos sa katawhan sa sinugdan.
12. Nganong ang kadaghanan sa katawhan naulipon?
12 Bisag gihatagan ni Jehova ang katawhan ug dakong kagawasan, ang kadaghanan karong adlawa anaa sa masub-anong pagkaulipon. Unsay nahitabo? Ang unang tawhanong paris, si Adan ug Eva, nagkawang sa katuyoan sa hinatag-sa-Diyos nga kagawasan. Sila milapas sa balaanong limitasyon sa ilang kagawasan ug mihagit sa matarong nga pagmando sa Diyos ibabaw kanila ingong ilang Soberanong Ginoo, si Jehova. (Genesis 3:1-7; Jeremias 10:10; 50:31) Wala matagbaw sa paggamit sa ilang kagawasan sa pagpasidungog sa Diyos, ilang gigamit kini nga mahakogon, sa paghukom nga kinaugalingon kon unsa ang matarong ug kon unsa ang sayop, sa ingon miduyog kang Satanas sa iyang pag-alsa batok kang Jehova. Imbes kay makabaton ug dugang kagawasan, hinunoa, ang makasasalang si Adan ug Eva nailalom sa malisod nga mga restriksiyon ug pagkaulipon, anam-anam nga pagkawala sa ilang kagawasan, ug sa kataposan kamatayon. Ang ilang kaliwatan nakapanunod niining pagkanawad-an sa kagawasan. “Kay ang tanan nakasala man ug nawad-an sa himaya sa Diyos.” “Ang bayad sa sala maoy kamatayon.”—Roma 3:23; 5:12; 6:23.
13. Nganong si Satanas nakahimo sa pag-ulipon sa katawhan?
13 Tungod sa rebelyon sa Eden, si Adan ug ang iyang kaliwatan usab nahimong ulipon ni Satanas nga Yawa. Aw, “ang tibuok kalibotan anaa sa gahom sa usa nga daotan”! (1 Juan 5:19) Kini tungod sa iyang superyor nga gahom ug katakos nga si Satanas nakahimo sa paglimbong ug sa pag-ulipon sa tanang katawhan nga nahimulag sa Diyos. Dugang pa, ang hakog nga mga tawo nagmando sa ilang isigkatawo sa ilang kadaotan. (Ecclesiastes 8:9) Busa, ang katawhan sa katibuk-an karon naulipon sa sala ug kamatayon, ngadto kang Satanas ug sa iyang mga demonyo, ug ngadto sa politikanhon, ekonomikanhon, ug relihiyosong mga sistema sa kalibotan.
Ang Matuod nga Kagawasan Gihimong Posible
14. Ang paglaom sa katawhan alang sa matuod nga kagawasan nahasandig diha sa unsa?
14 Ang pagpakabaton ug kagawasan gikan sa sala, kamatayon, ug sa Yawa ug sa iyang kalibotan suod nga nalangkit sa determinasyon sa Diyos sa paghusay sa isyu mahitungod sa pagkamatarong sa iyang kaugalingon unibersohanong pagkasoberano. Tungod kay gibangon ni Satanas kining isyuha, si Jehova nagtugot kaniya nga magpabiling naglungtad, sama sa Iyang pagtugot kang Paraon nga mabuhi sa usa ka gitagal nga panahon. Kini aron nga si Jehova makapasundayag sa bug-os sa iyang gahom ug aron ang iyang ngalan igamantala sa tibuok nga yuta. (Exodo 9:15, 16) Ang Diyos sa dili madugay magabayaw sa iyang kaugalingon ingong Unibersohanong Soberano ug magahimaya sa iyang balaang ngalan pinaagi sa pagwagtang sa pasipala nga nahatag diha niana pinaagi sa rebelyon ni Satanas, Adan, ug Eva. Busa, kadtong may kahadlok kang Jehova mahigawas na unya gikan sa pagkaulipon sa sala ug kamatayon ug pagadalhon ngadto sa usa ka bag-ong kalibotan nga may hinatag-sa-Diyos nga kagawasan.—Roma 8:19-23.
15. Unsang papel ang gidula ni Jesus sa pagpasig-uli sa kagawasan sa katawhan?
15 Aron ikapasig-uli ang kagawasan ngadto sa katawhan, gipadala sa Diyos ang iyang Anak nganhi sa yuta ingong usa ka tawo. Pinaagi sa kinabubut-ong paghalad sa iyang hingpit tawhanong kinabuhi, ang Anak sa Diyos, si Jesu-Kristo, mitagana sa halad lukat, ang pasukaranan sa pagpahigawas sa katawhan. (Mateo 20:28) Siya usab nagmantala sa usa ka mensahe sa kagawasan. Sa sinugdan sa iyang ministeryo, iyang gipadapat sa iyang kaugalingon ang mga pulong: “Ang espiritu sa Soberano Ginoong Jehova ania ibabaw kanako, tungod kay gidihogan ako ni Jehova aron sa pagwali sa maayong mga balita ngadto sa mga maaghop. Siya nagpadala kanako aron sa pagbugkos sa mga dugmok ug kasingkasing, aron sa pagmantala sa kagawasan sa mga binihag ug sa pagbuka sa mga mata bisan sa mga binilanggo.”—Isaias 61:1; Lucas 4:16-21.
16. Unsang mga lakang ang gikuha sa unang-siglong mga Hudiyo aron mabatonan ang matuod nga kagawasan?
16 Unsaon sa katawhan sa pagbaton sa maong kagawasan? Si Jesus miingon: “Kon kamo magpabilin sa akong pulong, kamo sa pagkatinuod akong mga tinun-an, ug kamo mahibalo sa kamatuoran, ug ang kamatuoran magpagawas kaninyo.” Busa, ang mga sumusunod ni Jesus nakadangat sa pagpahimulos sa espirituwal nga kagawasan. (Juan 8:31, 32, 36) Dugang pa, giingnan ni Jesus ang Romanong gobernador nga si Poncio Pilato: “Tungod niini ako gipakatawo, ug tungod niini ako mianhi sa kalibotan, aron ako magapanghimatuod sa kamatuoran. Ang tanan nga iya sa kamatuoran magapatalinghog sa akong tingog.” (Juan 18:37) Ang mga Hudiyo nga midawat sa kamatuoran ingon sa gisangyaw ug gihawasan ni Jesus naghinulsol sa ilang mga sala, nagatul-id sa ilang makasasalang dalan, nagtanyag sa ilang kaugalingon ngadto kang Jehova, ug nagpabawtismo sama kang Jesus. (Mateo 3:13-17; Buhat 3:19) Niining paagiha sila nakadangat sa pagpahimulos sa relatibong hinatag-sa-Diyos nga kagawasan.
17. Nganong si Jehova nga Diyos mihatag sa iyang mga alagad ug kagawasan?
17 Si Jehova nagahatag sa iyang maunongong mga alagad ug kagawasan alang sa kabayawan sa iyang kaugalingong pagkasoberano ug alang sa ilang kalipay o kaayohan. Iyang gipahigawas ang mga Israelinhon gikan sa pagkaulipon sa Ehipto aron nga sila magahimaya kaniya ingong usa ka gingharian sa mga saserdote, iyang mga saksi. (Exodo 19:5, 6; Isaias 43:10-12) Sa susama, si Jehova nagpagawas sa iyang katawhan gikan sa pagkadestiyero sa Babilonya aron nga sa paninugdan tukoron pag-usab ang iyang templo ug ipasig-uli ang matuod nga pagsimba. (Esdras 1:2-4) Sa dihang ang mga nadestiyero nabalaka lamang sa ilang kaugalingong materyal nga kaharuhay, si Jehova nagpadala sa iyang mga manalagnang si Haggeo ug si Zacarias aron pahinumdoman sila sa ilang mga kaakohan atubangan sa Diyos. Ang pagpakabaton sa ilang hinatag-sa-Diyos nga kagawasan sa ingon nahibalik diha sa hustong katimbang nga miresulta sa pagkatapos sa templo, alang sa kahimayaan sa Diyos, ug usab alang sa kalipay ug sa kaayohan sa iyang katawhan.
Ayawg Kawanga ang Katuyoan sa Hinatag-sa-Diyos nga Kagawasan
18. Nganong ikaingon nga ang modernong-adlaw nga mga alagad ni Jehova wala magkawang sa katuyoan sa ilang hinatag-sa-Diyos nga kagawasan?
18 Komusta man ang mahitungod sa modernong-adlaw nga mga alagad sa Diyos? Ingong usa ka organisasyon, wala nila kawanga ang katuyoan sa ilang hinatag-sa-Diyos nga kagawasan. Sa mga tuig 1870 sila misugod sa pagkalingkawas gikan sa Babilonyanhong mga kasaypanan ug sa pagpahimulos sa nagadugang nga Kristohanong kagawasan. Kini nahiuyon sa Proverbio 4:18, nga nag-ingon: “Ang alagianan sa matarong ingon sa banagbanag sa kahayag nga nagakasanag ngadto sa pagkahingpit sa adlaw.” Busa, sama nga ang karaang katawhan sa Diyos nabihag sa Babilonya sulod sa usa ka panahon, sa 1918 ang mga alagad ni Jehova sa nahaigong gidugayon naulipon ngadto sa Babilonyang Bantogan. (Pinadayag 17:1, 2, 5) Ang mga membro nianang kalibotanong empiryo sa bakak nga relihiyon nalipay sa dihang ang mahulagwayong “duha ka saksi” namatay sa espirituwal. Apan pinaagi sa dili-takos nga kalulot sa Diyos, sa 1919 ang iyang dinihogang mga alagad nabuhi, ingong may kagawasan sa espirituwal. (Pinadayag 11:3, 7-11) Gigamit ang ilang hinatag-sa-Diyos nga kagawasan, sila nahimong masibutong mga Saksi sa Labing Hataas. Busa, pagkatukma gayod nga sila, sa 1931, malipayong misagop sa ngalang mga Saksi ni Jehova! (Isaias 43:10-12) Ilabina sukad sa 1935 nga ang dinihogang mga Saksi giduyogan sa “usa ka dakong panon,” kinsa naglaom nga makabaton sa kinabuhing walay kataposan sa yuta. Wala usab nila kawanga ang katuyoan sa ilang hinatag-sa-Diyos nga kagawasan.—Pinadayag 7:9-17.
19, 20. (a) Unsa ang usa ka talagsaong paagi nga gipahimuslan sa katawhan ni Jehova ang ilang hinatag-sa-Diyos nga kagawasan? (b) Diha sa unsang laing talagsaong paagi nga ang mga Saksi ni Jehova nagagamit ug maayo sa kagawasan nga gihatag sa Diyos kanila?
19 Ang katawhan ni Jehova nagagamit ug maayo sa ilang hinatag-sa-Diyos nga kagawasan diha sa duha ka talagsaong mga paagi. Alang sa usa ka butang, ilang gigamit kana aron padayonon ang matarong nga dalan. (1 Pedro 2:16) Ug pagkamaayo sa dungog nga ilang nabatonan! Pananglitan, usa ka tawo nga kas-a misulod sa Kingdom Hall sa Zurich, Switzerland, ug miingon nga buot niya nga mahimong usa sa mga Saksi ni Jehova. Sa gipangutana kon ngano, siya miingon nga ang iyang igsoong babaye usa ka Saksi ug napalagpot tungod sa imoralidad. Siya miingon: ‘Kana nga organisasyon ang buot kong pakig-ubanan—usa nga dili motugot sa daotang paggawi.’ Uban sa maayong katarongan nga ang New Catholic Encyclopedia miingon nga ang mga Saksi ni Jehova nakabaton ug dungog nga “labing maayog batasan nga mga grupo sa kalibotan.”
20 Ang mga Saksi ni Jehova usab nagagamit sa ilang hinatag-sa-Diyos nga kagawasan pinaagi sa pagtuman sa ilang sugo sa pagsangyaw sa maayong balita sa Gingharian, ingon sa gibuhat ni Jesus. (Mateo 4:17) Pinaagi sa pagpakigsulti ug sa pinatik nga mga panid, sa pormal ug sa di-pormal, sila nagapahayag sa Gingharian ni Jehova. Sa pagbuhat sa ingon sila sa dako uyamot nakabatog kaayohan sa ilang kaugalingon pinaagi sa pagpalig-on sa ilang pagtuo ug sa pagpasanag sa ilang paglaom. Dugang pa, kini nga kalihokan nagsilbing kaluwasan alang kanila ug alang niadtong kinsa mopatalinghog kanila. (1 Timoteo 4:16) Mahitungod niini nga kalihokan, ang librong Dynamic Religious Movements miingon: “Maoy malisod kaplagon ang mga membro sa bisan unsang grupo nga mapanlimbasogon sa ilang relihiyon sama sa mga Saksi.”
21. Unsang ebidensiya ang makita nga si Jehova nagapanalangin sa ministeryo sa iyang katawhan?
21 Pagkadako sa panalangin ni Jehova kanato sa pagtuman sa katuyoan sa atong hinatag-sa-Diyos nga kagawasan! Kini makita gikan sa miaging tuig nga report sa pag-alagad sa kanataran—usa ka kinatas-ang ihap sa kapin sa upat ka milyong mga magmamantala sa Gingharian, uban sa kapin sa napulo ka milyon ang mitambong sa Memoryal sa kamatayon ni Jesus. Sa usa ka surbi, ang Irlandia dunay 29 ka sunodsunod binulang kinatas-ang ihap sa mga magmamantala; ang Mexico dihay 78 ka kinatas-ang ihap sa 80 ka bulan; ug ang Hapon dihay 153 ka kinatas-ang ihap nga sagunson!
Pahimuslig Maayo ang Imong Hinatag-sa-Diyos nga Kagawasan
22. Unsa ang diwa sa pipila ka makapukaw-sa-hunahunang mga pangutana nga mahimong atong isukna sa atong kaugalingon?
22 Kon ikaw usa sa dedikadong mga Saksi ni Jehova, imo bang gipahimuslan ug maayo ang kagawasan nga gihatag sa Diyos kanimo? Maayong ang matag usa kanato mangutana sa kaugalingon: ‘Ako ba mabinantayon sa paggamit sa akong hinatag-sa-Diyos nga kagawasan aron dili makapandol kang bisan kinsa pinaagig sayop nga paggawi? Ako ba sa matanlagon nagasunod sa mga balaod ni Cesar, bisag nagbutang pag-una sa mga balaod sa Diyos? Ako ba bug-os nga nagakooperar sa mga ansiano sa kongregasyon? Ako bang bug-os nga gigamit ang akong hinatag-sa-Diyos nga kagawasan sa pagsangyaw sa maayong balita? Ako ba kanunayng “okupado sa buluhaton sa Ginoo”? Ako ba maikagong nagapangagpas sa kalibotanong karera nga ako untang magamit ug maayo ang akong hinatag-sa-Diyos nga kagawasan pinaagig pagpalapad sa akong ministeryo, nagapangab-ot sa mas dakong kaakohan diha sa kongregasyon o sa bug-os panahong pag-alagad?’—1 Corinto 15:58.
23. Unsay atong angay nga buhaton aron dili nato makawang ang katuyoan sa hinatag-sa-Diyos nga kagawasan?
23 Hinaot ang tanan kanato “makatilaw ug makakita nga si Jehova maayo.” (Salmo 34:8) Kita mosalig kaniya, motuman sa iyang mga balaod, ug dayegon ang iyang balaang ngalan pinaagi sa masibotong pagpahayag sa iyang Gingharian. Hinumdomi nga kadtong ‘magapugas ug daghan magaani usab ug daghan.’ (2 Corinto 9:6) Busa, maghatag kita ug bug-os-kasingkasing nga pag-alagad kang Jehova ug ipakita nga wala nato kawanga ang atong hinatag-sa-Diyos nga kagawasan.
Unsaon Nimo Pagtubag?
◻ Unsang matanga sa kagawasan ang nabatonan sa Diyos?
◻ Ang tawhanong kagawasan adunay unsang mga limitasyon?
◻ Sa unsang paagi gipaposible ang matuod nga kagawasan?
◻ Unsay atong kinahanglang buhaton aron dili nato makawang ang katuyoan sa hinatag-sa-Diyos nga kagawasan?
[Hulagway sa panid 9]
Ang tawhanong kagawasan gilimitahan pinaagi sa maong mga butang sama sa balaod sa grabidad