Ikaw Makakaplag ug Hamiling mga Bahandi!

“MAY nakita ka ba?” nangutana ang usa ka sapiang Ingles. “Oo, katingalahang mga butang,” mitubag ang Ehiptologo. Ang tuig maoy 1922, ug mao pay pagsil-ip ni Howard Carter sa lubong ni Paraon Tutankhamen sa Walog sa mga Hari sa Ehipto. Puno sa kaukyab ang mga pulong ni Carter:

“Sa dihang naanad ang akong mata sa kahayag, ang mga detalye sa lawak sa sulod anam-anam nga mitin-aw gikan sa yamog, ang katingalahang mga hayop, mga estatuwa, ug bulawan​—kutob sa makita sa mata nangidlap ang bulawan. Sa usa ka yugto​—morag walay-kataposan tingali kadto alang sa uban nga nagbarog​—ako wala makatingog sa kahibulong . . . Kami wala makapanghanduraw ug sama niini, usa ka lawak nga puno​—morag puno ang tibuok museo​—sa mga butang.” Si Carter miadmiter nga mibatig “kahinam . . . sa usa ka tigpangitag-bahandi.”

Kadtong maong diskoberiya nakahatag kahayag sa katingalahang mga bahanding natago kapin sa 3,000 ka tuig kanhi. Apan ang Diyos nagtinguha nga kita makigbahin sa labi pang dako nga pagpangitag bahandi. Kini mao ang pagpangita alang sa labi pang magantihon kay sa bisan unsang pagpangita alang sa mga mutya, bulawan, o salapi. Kining maong pagpangitag bahandi maoy sa diyosnong kaalam, ug usa sa labing bililhon mao ang kinabuhing-dayon.​—Juan 17:3.

Pagkugi Hinungdanon

Dakong pagkugi ang kinahanglan sa pagkalot diha sa arkeolohikal nga lugar. Dili masayon ang pagpangalot diha sa bukirong luna o ang pagsalom diha sa peligrong mga tubig aron sa pagpangita sa natago, nalubong, o nalunod nga bahandi. Apan ang sinserong mga tigpangitag bahandi malipay sa pagkugi. Ilang antoson ang grabeng mga kalisdanan ug buntogon ang daw imposibleng mga kakulian. Buweno, dili ba ang pagpangitag diyosnong kaalam takos sa labi pang dakong pagkugi?

Kita makakaplag ug hamiling mga bahandi kon magkugi kita sa pagtuon sa Bibliya ug sa tinuod Kristohanong mga publikasyon nga gihimo aron matabangan kita nga makaplagan ang mga bahandi sa kaalam nga nasulod niini. Ang padayong pagkugi hinungdanon. Kita dili madato kon kita magsugod sa pagpangalot ug materyal nga mga bahandi apan mohunong human nga nakakalot pa lamang sa ibabaw. Tinuod usab kana kon kita mangalot ug espirituwal nga mga bahandi ug sa ulahi moundang tungod kay gihunahuna nato nga kapoy na kaayo ang pagpadayon pa. “Ang kaalam nga gikan sa kahitas-an” maoy alang sa mga tawong nagkugi aron makabaton niana. (Santiago 3:17) Dili ka ba magkugi nga maoy gikinahanglan aron makaplagan ang hamiling mga bahandi sa diyosnong kaalam?

[Kapsiyon sa panid 2]

Cover and page 3 photo: K. Scholz/H. Armstrong Roberts