Mga Ebanghelista Nagaani sa Tibuok-Kalibotang Alanihon
“Samtang ang orasan nagatiktak ngadto sa Armageddon, gipaspasan sa mga Saksi ni Jehova ang ilang mga buluhaton aron labing daghan kanato ang maluwas gikan nianang gikalisangang kalaglagan.”—Editoryal ni Ian Boyne sa “The Sunday Gleaner,” Marso 15, 1987, Kingston, Jamaica.
ANG magsusulat ug editoryal nga gikutlo sa ibabaw husto. Ang mga Saksi ni Jehova nagtuo nga ang Armageddon, dihang laglagon sa Diyos ang mga daotan, haduol na ug ang katawhan nagakinabuhi sa usa ka panahon sa balaang paghukom. (Pinadayag 14:6, 7) Busa, ang mga tawo kinahanglang mamati sa mensahe sa maayong balita. Si Jesu-Kristo, ang labing dakong tawhanong ebanghelista sukad masukad, nagpalihok sa usa ka organisasyon nga nagdala sa ebanghelyo “hangtod sa kinatumyan sa yuta” sa unang siglo. (Buhat 1:8, New English Bible; Colosas 1:23) Iyang gitagna ang susamang buluhaton sa pag-ebanghelyo sa atong adlaw. (Mateo 24:14) Ang organisasyong nagabuhat niana karon nalangkoban sa mga Saksi ni Jehova, kinsa nagawali sa maayong balita sa Gingharian uban ang pagkadinalian sa 210 ka nasod ug teritoryo.
Ang mga Saksi ni Jehova, hinunoa, dili lamang organisasyon nga nagawali. Sila maoy organisasyon nga nagatudlo usab. Gisugo ni Jesus ang iyang mga sumusunod sa “paghimog mga tinun-an sa katawhan sa tanang kanasoran, . . . nga magatudlo kanila sa pagbantay sa tanang butang akong gisugo kaninyo.” (Mateo 28:19, 20) Ipailaila namo kamo sa pipila ka tawong nakapahimulos sa ilang buluhatong pagwali ug pagpanudlo.
Mexico
Himamata si Virginia. Siya 110 anyos na ug buot siyang mosugilon kaninyo nga “dili gayod ulahi kaayo sa pagkaila ug pag-alagad kang Jehova.” Ingong batan-ong babaye, siya debotado kaayo nga sa upat ka tuig siya nagsul-ob ug linaing relihiyosong biste. “Apan may nakulang,” matud niya. Siya wala makakitag mga tubag sa iyang mga pangutana sa Bibliya. Pananglitan, sa gisukna niya ang mga magtutudlo sa iyang simbahan, “Unsa ang ngalan sa Diyos?” sila mitubag, “Ang ngalan sa Diyos mao ang Diyos.”
Apan nausab ang kahimtang niadtong 1983 dihang ang iyang apong-babaye misugod sa pagtuon sa Bibliya uban sa mga Saksi ni Jehova. Gitubag sa apong-babaye ang pangutana ni Virginia sa pag-ingong ang ngalan sa Diyos maoy Jehova. (Salmo 83:18) Kana nagtukmod kang Virginia sa pagbaton sa iyang kaugalingong pagtuon sa Bibliya uban sa mga Saksi. Duha ka tuig sa ulahi, sa Hunyo 2, 1985, siya nabawtismohan sa panuigong 108 anyos.
“Ako makahinumdom nianang petsaha uban ang pagmahal,” matud niya, “kay niadtong adlawa ako nagsugod sa pagkabuhi. Sa akong edad, ako nagasangyaw sa lima o unom ka oras sa usa ka bulan ug nagagamit sa sungkod ingong suportar sa paglakaw. Mopalabi ako sa paglakaw kay sa pagsakay sa kotse. Niining paagiha akong mahuptan ang maayong kondisyon sa lawas.”
India
“Ako mao ang bagis ug tawong walay pulos sa among dapit,” matud sa usa ka lalaking naulipon sa daghang bisyo. “Ako tigyuhot ug mga droga, modulag mutka (mosugal), ug motabakog libreng mga sigarilyo nga maikagong isuplay sa akong sekretong mga kliyente. Diha usab ang bisyo sa alkohol—kanang tanan bisan pa sa akong pagka aktibong membro sa simbahan.” Apan dihang usa sa mga Saksi ni Jehova miduaw sa iyang balay ug siya misugod sa pagtuon sa Bibliya ug pagpadapat sa tambag niini, nausab ang iyang kinabuhi. (Proverbio 2:1-22; 2 Timoteo 3:16) Karon siya, iyang asawa, ug duha ka anak babaye nagatabang sa uban sa pagbulag sa maong mga bisyo.
Belgium
Usa ka batan-ong magtiayon nasuko sa mapait sa Diyos. Ngano? Ang ilang unang anak, usa ka batang babaye, namatay napulo ka adlaw tapos sa pagkatawo. Ang ikaduha nilang anak natawong bakol. Ug ang ilang ikatulo, nga daw lig-on ug maayog lawas, kalit namatay tapos sa lima ka bulan. Ang inahan dili makatuo nga itugot sa mahigugmaong Diyos nga mahitabo kanila ang maong mga trahedya sa dihang daghan kaayong tawo nga nagakinabuhing mahilayon nakabatog himsog nga mga anak.
Wala madugay, usa sa mga Saksi ni Jehova nagsangyaw sa balay ug balay sa silinganan ug miduaw sa iyang balay. Samtang naghisgot ang Saksi bahin sa mga saad sa Diyos sa malipayong kaugmaon sa katawhan, ang babaye misupak sa ideya nga ang Diyos usa ka mahigugmaong langitnong Amahan. (Salmo 37:10, 11) Apan siya midawat ug pila ka basahon sa Bibliya. Sa inanay, tapos sa balikbalik nga mga pagduaw sa Saksi, ang mensahe sa Bibliya sa maayong balita nakapahumok sa iyang kasingkasing ug nakapalig-on sa iyang pagsalig sa Diyos. Karon siya ug ang iyang bana dunay lig-ong paglaom nga dili lamang ayohon ni Jehova ang bakol nilang batang lalaki sa umaabot Paraisong yuta apan nga Iyang banhawon usab ang duha nila ka anak.—Juan 5:28, 29; Pinadayag 21:1-4.
Portugal
Usa ka buntag sa Dominggo, ang usa ka babayeng nagdalag bag nga punog groseria mihunong sa pagpakigsulti sa usa ka magtiayon. Kadto ang una apan dili ang kataposang panahong sila magkatagbo. Ang magtiayon, mga Saksi ni Jehova, nakig-ambit sa buluhatong pag-ebanghelyo. Ilang gidayeg ang namalit sa pag-atiman sa materyal nga mga kinahanglanon sa iyang pamilya. Apan kinsa ba, sila nangutana, ang makatagana sa mga panginahanglan sa mga tawo? Gitubag nila ang mga pangutana sa ilang kaugalingon pinaagi sa pag-ingon nga ang Diyos makatagana. (Salmo 107:8, 9; Isaias 33:24) “May solusyon ba siya sa akong suliran?” misukna sa makusog ang babaye. Ang mga Saksi mitubag nga apirmatibo ug gidapit sila sa iyang balay, diin nasugdan ang pagtuon sa Bibliya. Ang iyang bana, kay nakamatikod ug kausaban sa pagkamaayo sa tinamdan sa iyang asawa, miduyog sa pagtuon sa Bibliya ug sa kadiyut nga panahon mihimo usab ug kausaban sa iyang paagi sa kinabuhi.
Sa ulahi, gisuginlan sa babaye ang mga Saksi nga una sa pagpakigsulti kanila niadtong buntag sa Dominggo, siya misulay sa paghikog sa duha ka beses. Siya naguol kaayo kay siya ug ang iyang bana mihukom sa pagbulag. Karon, hinunoa, siya, iyang bana, ug ilang mga anak nahiusang nagauswag sa pagkakat-on sa maayong balita.
Thailand
Sa kinadak-ang bahin sa iyang kinabuhi, ang usa ka babayeng nagpuyo sa amihanang bahin sa maong nasod gihasi sa mga demonyo. Sa nahibalag niya ang usa sa mga Saksi ni Jehova sa buluhatong pag-ebanghelyo, nakakuha siyag pila ka basahon sa Bibliya ug miuyon sa pagtuon sa Bibliya sa balay. Tapos sa duha ka bulang pagtuon, iyang nasabtan ang Kasulatanhong mga katarongan sa paghinlo sa iyang balay sa tanang butang sa bakak nga pagsimba, sama sa mga idolo, ug sa pagguba sa iyang minahal nga balay sa espiritu nga gitukod sa pagpanalipod sa iyang pamilya batok sa daotang mga espiritu. (Buhat 19:19; 1 Corinto 10:21; 1 Juan 5:21) Karon siya wala na atakeha sa mga demonyo ug nakaarang sa pagbug-os sa hunahuna sa pagtabang sa uban nga makakat-on bahin sa bugtong matuod nga Diyos, si Jehova.
Kenya
Dihang ang usa ka lider sa kriminal nga gang gisultihang giisip siyang peligroso kaayo nga gimandoan ang mga polis sa pagpusil kaniya kon hikit-an, siya mikatawa lamang nga nagbale wala ra niana. Bisan pa niana, wala madugay usa sa mga pag-atake sa iyang gang wala molampos sumala sa plano. Iyang nadiskobrehang siya nag-inusara, nga gilibotan sa nasukong panon nga andam nga ipadapat ang hustisya isip magubotong panon. Niadtong gutloa, nangabot ang mga polis nga mitabang kaniya, naghulbot niya, ug nagbanlod niya sa prisohan sa pagpaabot sa husay sa korte.
Gitambagan siya sa iyang abogado bahin sa nagkalainlaing taktika sa paglimod sa sala. Apan samtang didto sa atob sa bilanggoan, siya nahinumdom sa mga pagduaw nga gihimo sa usa sa mga Saksi ni Jehova katuigang miagi. Gibasolan niya ang iyang malapasong mga paagi ug miampong tabangan siya sa Diyos. Sa pagkamatuod, siya mitawag sa ngalan ni Jehova sa pag-ampo. (Itandi ang Buhat 10:1, 2.) Sa katingala sa huwes, giangkon sa maong kriminal ang iyang sala sa korte. Busa gipahamtang sa huwes ang may pagkagaan nga silot; imbes sa kamatayon, ang iyang sentensiya maoy napulo ka tuig sa prisohan nga may kinalabwang seguridad.
Samtang didto sa sulod sa prisohan, madasigon siyang nagbasa sa mga basahon sa Bibliya ug subsob miampo sa Diyos, nga mihangyo nga, kon mahimo, ang iyang tagal sa pagkapriso maus-osan aron siya makaalagad Kaniya. Nga wala dahoma, siya gisultihang ang iyang sentensiya gius-osan sa katunga. Busa, tapos sa pagkapriso sa lima ka tuig, siya gibuhian ug misugod dayon sa pagtuon sa Bibliya uban sa mga Saksi ni Jehova. Sa wala madugay siya nabawtismohan, ug karon iyang tumong mao ang bug-os-panahong pag-ebanghelyo.
Ang gihisgotan sa ibabaw maoy pila ra ka pananglitan sa unsang paagi ang mga Saksi ni Jehova nagatuman sa ilang komisyon ug obligasyon sa pag-ebanghelyo o pagwali “hangtod sa kinatumyan sa yuta.” Kining mga kasinatiana mapilopilo sa linibo. Nan, nagaduhaduha ka ba nga ang mga Saksi ni Jehova mao ang matuod nga mga ebanghelista karong adlawa?