Kinsa ang Matuod nga mga Ebanghelista?

BISAN kon diin ka magpuyo, sa usa o laing paagi ang kalihokan sa pag-ebanghelyo nga gisugdan ni Jesu-Kristo nakatandog sa imong kinabuhi. Apan dili ang tanan nga nagaangkong nagahawas kang Kristo nagpakaylap sa matuod nga mensahe sa Pulong sa Diyos. Dili ang tanang ebanghelista—karon o kagahapon—ang gidasig sa samang misyonaryong kasibot nga nagtimaan sa unang-siglong mga tinun-an ni Kristo.

Matuod, ang mga iglesya sa Kakristiyanohan dunay gibanabanang 220,000 ka misyonaryong nagabuhat sa kalibotan karong adlawa, apan ang mao bang mga misyonaryo makapasar sa pagsulay sa matuod nga mga ebanghelista? Ang Kristohanong pag-ebanghelyo wala tuyoa nga mahimong usa ka matang sa espirituwal nga imperyalismo, diin ang mga magwawali makabuhat ingong mga ahente sa tigkolonisar nga mga gahom sa kalibotan. (Itandi ang Santiago 4:4.) Dugang pa, ang tinuod Kristohanong pag-ebanghelyo dili magpasiugda sa gitawag teolohiya bahin sa kagawasan ug magduso sa radikal nga kausaban sa politikanhon ug sosyal nga mga kahikayan; ni diha sa hunahuna ni Jesus ang nagapalagapak-sa-Bibliya elektronik nga mga magwawali nga nagasibya sa ilang bersiyon sa “teolohiya sa kauswagan” sa TV ug sa radyo. (Juan 17:16; Mateo 6:24) Aw, unsa man diay ang usa ka ebanghelista?

Unsa ang Matuod nga Pag-ebanghelyo?

Sa orihinal nga mga pinulongan sa Bibliya, ang Hebreohanon ug Grego, ang usa ka ebanghelista maoy magmamantala sa makalipayng balita, o maayong balita.a Maayong balita sa unsa? Sa kaluwasan, sa matarong nga pagmando, ug sa pakigdait. Pananglitan, ang Isaias 52:7 nagaingon: “Pagkatahom sa ibabaw sa kabukiran sa mga tiil niadtong nagdala sa maayong balita, nga nagmantala sa pakigdait, nga nagdalag maayong balita sa butang labi pang maayo, nga nagmantala sa kaluwasan, nga nag-ingon sa Zion: ‘Ang imong Diyos nahimo nang hari!’”

Dugang pa, sa pagkatawo sa Anak sa Diyos, ang manulonda nagpahibalo sa mga magbalantay sa mga karnero: “Ayaw kamo kahadlok, kay, tan-awa! ako nagapahayag kaninyo sa maayong balita sa dakong kalipay nga maangkon sa tanang tawo, tungod kay natawo alang kaninyo karong adlawa ang usa ka Manluluwas, nga mao si Kristo nga Ginoo.” (Lucas 2:10, 11) Busa, ang maayong balita nahasentro kang Jesu-Kristo.

Mga 30 ka tuig sa ulahi, si Jesus misulod sa sinagoga sa siyudad sa Nazareth sa adlawng Igpapahulay ug mitindog aron sa pagbasa. “Ang basahon ni propetang Isaias gitunol kaniya, ug iyang gibuksan ang basahon ug nakaplagan ang dapit diin kini nahisulat: ‘Ang espiritu ni Jehova ania kanako, tungod kay iyang gidihogan ako sa pagmantala sa maayong balita.’” Sa pagkahuman niyag basa, “iyang gilukot ang basahon, gitunol pagbalik sa alagad ug milingkod; ug ang mga mata sa tanan sa sinagoga gitutok kaniya. Dayon siya miingon kanila: ‘Kining kasulatana nga bag-o pa ninyong nadungog natuman karong adlawa.’” Si Jesus tinuod nga usa ka magwawali sa maayong balita, ug ang maayong balita nga iyang gipahayag nasentro sa “gingharian sa Diyos.”—Lucas 4:17-21; 8:1.

Si Jesus nagtandi sa iyang buluhaton sa pag-ebanghelyo sa usa ka pag-ani ug miingon nga “ang alanihon dako, apan diyutay ra ang mga mangangani.” (Mateo 9:36-38) Busa, gibansay ug gisugo niya ang iyang mga sumusunod nga mahimo usab nga mga ebanghelista. (Mateo, kapitulo 10; Lucas, kapitulo 10) Sama sa kahimtang sa ilang Magtutudlo, ang sentro sa ilang pagwali mao “ang gingharian sa mga langit.” (Mateo 10:7) Bisan pa niana, ang pagwali sa Gingharian dili limitado sa mga apostol ni Jesus.

Sa misilaob ang paglutos batok sa bag-ong Kristohanong kongregasyon sa siyudad sa Jerusalem, ang talaan sa kasaysayan sa Buhat 8:1 nagasugid nga “ang tanan gawas sa mga apostol natibulaag sa tanang rehiyon sa Judea ug Samaria.” Kadto bang natibulaag nga mga tinun-an nanago ug nangahadlok? Wala, kay ang bersikulo 4 nagapadayon: “Hinuon, kadtong nangatibulaag milatas sa yuta nga nagpahayag sa maayong balita sa pulong.” Sa maong paagi ang dakong alanihon naani niadtong unang-siglong mga ebanghelista.

Makaiikag, ang librong A Theological Word Book of the Bible nagaingon: “Sa BT [Bag-ong Tugon] ang pagwali walay kalabotan sa pagpahayag sa mga wali ngadto sa mga kinabig, nga kasagaran mao ang ipasabot karong adlawa, apan sa tanang panahon may kalabotan sa pagmantala sa ‘maayong balita sa Diyos’ ngadto sa dili-Kristohanong kalibotan.” Busa, ang tanang Kristohanon maoy mga ebanghelista, ug ang ilang pag-ebanghelyo dili limitado sa pagpahayag ngadto sa kaubang mga magtutuo.

Apan unsa ang tema sa pag-ebanghelyo karong adlawa? Gitagna ni Jesus nga sa atong adlaw “kining maayong balita sa gingharian igawali sa tibuok gipuy-ang yuta alang sa usa ka pamatuod sa tanang kanasoran; ug unya moabot ang kataposan.” (Mateo 24:14) Ug si Jesus nagsugo dili lamang niadtong nakakita sa iyang pagkayab kondili sa iyang umaabot usab nga mga sumusunod nga mahimong “mga saksi [niya] sa Jerusalem ug sa tibuok Judea ug Samaria ug sa kinalay-ang bahin sa yuta.”—Buhat 1:8; tan-awa usab ang Mateo 28:19, 20.

Busa, ang pinakasubok sa mensahe sa usa ka ebanghelista mao ang maayong balita sa Gingharian ni Jehova nga Diyos diha sa mga kamot sa iyang tinudlong Magmamando, si Jesu-Kristo, ang Prinsipe sa Pakigdait. (Isaias 9:6) Ug kini nagaapil sa tanang kamatuoran nga gipahayag ni Jesus ug gitala sa iyang mga tinun-an. Ang matuod nga mga ebanghelista karong adlawa matinumanong nagasunod niining temaha lamang.

Kinsay Nagapasiugda sa Matuod nga Pag-ebanghelyo?

Ang matuod nga mga ebanghelista nagasimba kang Jehova ingong Diyos. Siya mao ang Dakong Ebanghelista; siya ang Tigpasiugda sa pagwali sa maayong balita. (Galacia 3:8; Pinadayag 10:7) Ug buot niyang ang tanang tawo sa bisan diin makadungog ug magasugot sa iyang mensahe. “Sa tino akong naila nga ang Diyos walay pinalabi,” nagpahayag si apostol Pedro ngadto sa usa ka gamayng panon sa Mediteranyong dunggoanan sa Cesarea. “Apan sa matag nasod ang tawong nahadlok kaniya ug nagabuhat sa pagkamatarong dalawaton niya. Iyang gipadala ang pulong ngadto sa mga anak sa Israel nga imantala kanila ang maayong balita sa pakigdait pinaagi ni Jesu-Kristo: kini Siya mao ang Ginoo sa tanan nga uban.”—Buhat 10:34-36.

Ang Bibliya nagtagna nga sa atong adlaw ang mga ebanghelista sa makausa pa magaani sa usa ka dakong alanihon. (Pinadayag 14:15, 16) Basaha sa sunod nga artikulo ang pipila ka kasinatian sa mga Saksi ni Jehova samtang sila nakig-ambit sa maong buluhaton sa pag-ani. Susiha ang ilang rekord sa pagwali sa mga panid 12 hangtod 15 niining magasina. Unya pakigsulti sa mga Saksi ni Jehova inigduaw nila sa inyong balay ug tan-awa kon dili ka ba mouyon nga sila mao ang matuod nga mga ebanghelista karong adlawa.

[Mga footnote]