Pagkabililhon sa Imong Pakighigala, O Diyos!

Sumala sa giasoy ni Daniel Sydlik

ALANG kanako ang kinabuhi nagsugod sa usa ka umahan haduol sa Belleville, Michigan, sa Pebrero 1919. Ang usa ka paltera mao ang nanabang sa akong pagkatawo, sanglit ang akong imigranteng inahan nag-isip nga dili kinahanglanon ang usa ka doktor. “Nganong magpaospital man? Dili man ako masakiton,” siya mopahayag sa magkasayopsayop nga Iningles kang bisan kinsang mangutana kon diin matawo ang bata.

Lisod niadto ang kinabuhi sa umahan. Sa pagpangitag maarang-arang nga pagkinabuhi ang among pamilya mibalhin ngadto sa Detroit. Wala madugay tapos niadto, si Dad nagdaot ug unya namatay sa dihang ako mga tres anyos pa. Siya aktibong nakig-uban sa Internasyonal nga mga Estudyante sa Bibliya, nga nailhan karong adlawa nga mga Saksi ni Jehova.

Niadtong panahona ang akong inahan nabinlan sa unom ka anak ug mga utang nga pagabayran. Supak kaayo siya sa relihiyon ni Dad, apan sa iyang pagkamatay siya miliso sa Bibliya sa pagsusi kon nganong nadani kaayo siya niadto. Sa ubay-ubayng katuigan sa ulahi siya nahimo usab nga usa sa mga Saksi ni Jehova.

Pagkamatay ni Dad, ang akong inahan nagtrabahong silbidora sa magabii ug nag-atiman sa pamilya sa maadlaw. Kadto nagpadayon hangtod siya naminyo pag-usab sa katuigan sa ulahi. Ang akong amaama miergo nga malamposon nga ang labing maayong dapit sa pagmatuto sa kabataan maoy didto sa hawan nga kabanikanhan ug dili sa sobrag-tawong kongkretong lasang.

Ang usa ka umahang 55 akre (22 ektarya) napalit duol sa Caro, Michigan. Sa pag-abot namo sa tingpamulak sa 1927, ang mga prutasan napunog kabulakan. Nangalimyon ang kahanginan sa kahumot sa ihalas nga kabulakan, ug namulak ang kakahoyan. May mga lim-aw nga kalangoyan, mga kahoy nga makatkat ug mga hayop nga ikadula. Ang kinabuhi didto maoy talagsaon! Dili sama sa siyudad. Bisan pa niana, ang kinabuhi sa banika lisod alang kang Mama. Kadto maoy pagkamag-uuna nga labing lisod—walay gripo, walay kasilyas sa sulod, walay koryente.

Tagdugay ug grabe ang mga tingtugnaw niadto. Kaming mga bata matulog sa pulangki, diin ang niyebe subsob mosuhot sa sin nga atop ug literal magtabon sa mga higdaanan. Sa mabuntag dakong pagsakit ang pagsul-ob sa daw-yelo sa kabugnaw nga mga karsones nga usahay mokaging. Ang mga buluhaton sa dapa kinahanglang humanon sa dili pa ang pamahaw. Unya moabot ang pagbaktas latas sa kakahoyan paingon sa tunghaan, nga may usa ra ka lawak-klasehanan diin ang walo ka grado gitudlo sa usa ra ka magtutudlo.

Espirituwal nga Sinugdanan

Si Mama may tiunay nga gugma sa Diyos ug kadto nag-impluwensiyag dako kanamong kabataan. Siya mosulti sa Polako: “Ang Diyos naghatag kanatog matahom nga adlaw.” Kaming kabataan manggawas sa pagsusi kon unsay iyang gisulti—nga masayrang nag-ulan diay. Alang kang Mama ang tanang nahitabo sa usa ka paagi maoy tungod sa Diyos. Dihang natawo ang usa ka nating baka o dihang nangitlog ang mga manok o nag-ulan sa niyebe, alang kaniya may labot niadto ang Diyos. Ang Diyos maoy nakaingon sa maong tanang maayong butang sa usa ka paagi.

Magtutuo si Mama sa pag-ampo. Ang pag-ampo maoy kinahanglanon alang kanamo sa mga panahon sa pagkaon. “Ang mga iro mopakitoykitoy sa ilang mga ikog inigpakaon nimo kanila. Kita ba menos ug pagpabili kay sa mga iro?” siya moingon. Buot usab niyang kami mag-ampo una kami manghigda. Sanglit walay mausa kanamo ang nahibalo sa Pag-ampo sa Ginoo sa Iningles, kami iyang paludhon ug ipasabat kana kanamo sa Polako.—Mateo 6:9-13.

Kadto maoy sa mga adlaw sa wala pay telebisyon. Inigtikyop sa kangitngit, wala nay buluhaton gawas ang pagpanghigda. Gidasig kami ni Mama sa pagbasa. Siya mobasa sa iyang Bibliya ubay sa lamparahang de gas. Ug kaming mga bata mobasa sa mga basahong makuha gikan sa nagpanawng mga ministro sa Internasyonal nga mga Estudyante sa Bibliya, sama sa The Harp of God, Creation, ug Reconciliation. Sa ingon nasugdan pagkaugmad ang pagpakighigala sa Diyos.

Sa sinugdan sa katuigang 1930 ang pila ka Estudyante sa Bibliya gikan sa Saginaw, Michigan, mibisita ug midasig kanamo sa pagsangyaw ngadto sa uban. Apan sanglit walay organisadong grupo sa pagtuon sa Bibliya o kongregasyon sa duol, ang among sinangyawan diyutay ra kaayo. Ang pagtubo namo sa espirituwal sa kinadak-an wala maglihok.

Tungod sa depresyon sa katuigang 1930, kinahanglang mobiya ako sa balay ug mangitag trabaho sa Detroit. Dako pa ang bayranan sa umahan ug buot kong kami makagawas sa maong problema. Ugaling, ang Detroit niadto usa ka siyudad nga nagrasyon sa tinapay. LiboIibong lalaki ang molinya, nga usahay sa tibuok nga mga gabii, nga magdip-igay haduol sa mga daob sa kahoy ug uling, nga maningkamot sa ilang maarangan nga mainitan hangtod mangabli ang mga opisina sa panarbaho sa ilang mga ganghaan. Ako bulahan nga nakakitag trabaho sa usa ka pabrika sa kotse.

Espirituwal nga Pagtubo

Sa ulahing bahin na lang niadtong dekadaha, sa didto ako sa Long Beach, California, nga ang akong espirituwal nga interes nahaling sa mabungahong paagi. Ang usa ka imbitasyon sa usa ka pakigpulong publiko gitunol kanako. Niadtong Dominggoha ako mitambong sa una kong tigom sa usa ka Kingdom Hall. Didto akong nahibalag si Olive ug William (Bill) Perkins, buotang mga tawo nga may bililhong relasyon uban kang Jehova nga Diyos.

Si Sister Perkins maoy talagsaong magtutudlo sa Pulong sa Diyos, nga hanas migamit sa iyang Bibliya sama sa paggamit sa usa ka siruhano sa iyang kutsilyo. Iyang ibutang ang iyang dakong King James Version nga Bibliya sa iyang wala nga bukton, tilaan ang kumagko sa iyang tuo nga kamot, ug paklion ang mga panid gikan sa bersikulo ngadto sa bersikulo. Ang katawhan nalingaw sa iyang kahanas ug sa ilang nakat-onan gikan sa Bibliya. Siya nahimong instrumental sa pagpasabot sa daghang katawhan sa katuyoan sa Diyos. Ang pagbuhat uban kaniya sa pagsangyaw maoy usa ka inspirasyon. Kadto nagdasig kanako sa pagsulod sa bug-os-panahong payunir nga ministeryo sa Septiyembre 1941.

Si Sister Wilcox lain pa nga nakatabang kanako. Siya taason, maayog-barog, putig-buhok nga babaye sa edad nga 70 nga ang iyang buhok hapsay nga pagkasudlay pataas sa iyang ulo, nga natapos sa pinangko. Ang iyang biste kanunayng paibabwan sa matahom lapad nga kalo. Nga nagsul-ob sa iyang hapsay pagkatahi, abot-sa-kiting nga sinina siya espesyal nga tan-awon, samag bag-o pang migawas sa katuigang 1880. Kaming duha nagsangyaw sa komersiyal nga mga distrito sa Long Beach.

Ang mga manedyer dihadiha mahingangha inigkakita kang Sister Wilcox. Ug uban ang mausisaong kadasig dapiton nila siya sa pagsulod sa ilang mga opisina. Ako mokuyog. “Unsa may ato?” sila mangutana nga matinahoron. “Makatabang ba ako kanimo?”

Nga walay pagpanuko si Sister Wilcox, nga mogamit sa hingpit nga Iningles sa usa ka propesor, motubag: “Ania ako sa pagsugid kanimo mahitungod sa usa ka tigulang nga bigaon sa Pinadayag nga nagsakay sa usa ka mananap.” (Pinadayag 17:1-5) Ang mga manedyer mongislo ug moirog-irog sa ilang lingkoranan nga matingala kon unsay isunod. Iyang ihulagway kanila sa tin-aw ang pagkalaglag niining sistema sa mga butang. Ang sanong halos kanunay tino. Buot nila ang bisan unsa nga iyang dala. Kada adlaw kami makapahimutang sa literal kinartong basahon. Ang akong trabaho mao ang pagpatokar sa ponograpo kon moingon siyang kadto patokaron, ug mahimong dili mahadlokon ug maisogon kutob sa mahimo samtang siya nagsulti.

Bag-ong mga Asaynment

Ang usa ka sobre gikan sa Watchtower Society kanunayng nakapaukyab kanako. Ang ingong sobre, nga nadawat sa 1942, nasudlan sa usa ka asaynment sa pag-alagad nga espesyal payunir sa San Pedro, California. Didto si Bill ug Mildred Taylor nagbukas sa ilang pinuy-anan alang kanako. Gikinahanglan ang dakong disiplina sa kaugalingon sa pagtrabahong nag-inusara sa ministeryo sa kanataran sa sunodsunod nga adlaw. Apan kadto nakapasuod kanako kang Jehova, mao nga akong gibati ang iyang pakighigala. Unya gipadala sa Sosyedad si Georgia ug Archie Boyd uban sa ilang anak lalaki ug anak babaye, si Donald ug Susan, sa pagtabang sa pagtrabaho sa teritoryo. Ang pamilyang Boyd nagpuyo sa usa ka 18-tiil (5.5-m) nga treyler uban sa tanan nilang suplay ug butang.

Ang laing sobre gikan sa Sosyedad miabot alang kanamo! Kami nagpangurog samtang among gibasa ang among bag-ong asaynment—Richmond, California, sa amihanan lamang sa San Francisco. Bisan pag lagmit dili makaabot didto ang among daang kotse ug treyler, namutos kami ug milarga. Kami nahisamag mga Hitano nga nanglalin, nga nag-ayo sa makina ug nagbolket sa mga ligid sa dalan. Sa dihang sa kataposan nakaabot kami sa Richmond, kusog kaayo ang bunok sa ulan.

Ang Gubat sa Kalibotan II niadto nagpadayon na sa bug-os. Ang mga pandayan sa barko sa Kaiser namuhat nga pinakyaw sa “Liberty Ships,” sumala sa pagtawag niadto kanila. Ang among trabaho mao ang pagsangyaw ngadto sa katawhan nga mipanon didto sa pagtrabaho. Gikan sa sayo sa buntag hangtod sa gabii nang dako, among hisgotan ang Gingharian, nga kadaghanan mamauli nga paos na tungod sa pagsultig sobra. Nasugdan ang daghang pagtuon sa Bibliya. Ang maong mga trabahante sa pandayan sa barko manggihatagon ug maabiabihong katawhan nga nagsuplay sa tanan namong panginahanglan. Ang teritoryo aktuwal nga nagsuportar kanamo nga dili na kinahanglang kami manarbaho pa sa sekular inoras nga trabaho.

Mga Kasinatian sa Pagkabilanggo

Ang mga batan-ong lalaki gipanguhang sundalo sa armadong kusog. Ang akong mga igsoong lalaki sa unod, kinsa dili mga Saksi, miboluntaryo ug mialagad nga mga tigparasiyot ug sa pundok sa inhenyeria. Ako miaplay alang sa eksemsiyon ingong ministro nga tungod sa konsensiya supak sa gubat. Ang Hunta sa Pagtala sa Sundalo wala moila sa akong pagkaministro. Ako gidakop, gihusay, ug sa Hulyo 17, 1944, gisentensiyahan sa tulo ka tuig sa pinugos nga trabaho sa McNeil Island Federal Penitentiary sa Washington State. Sa prisohan akong nasayrang ang pakighigala kang Jehova molungtad sa walay kataposan.—Salmo 138:8, The Bible in Living English.

Sulod sa usa ka bulan ako gipriso sa prisohan sa distrito sa Los Angeles nga nagpaabot nga ibalhin ngadto sa McNeil Island. Ang unang mga impresyon sa kinabuhi sa prisohan lisod mahikalimtan, nga ang mga priso misinggit sa mga kalaw-ayan sa mga guwardiya ug ngari kanamo samtang kami gidala sa sulod. O ang paagi sa pagmando sa mga guwardiya: “Bantayi ang mga ganghaan!” Ang pagdahunog sa pagsira sa dekoryenteng mga ganghaan nahisamag mga dahunog sa dalugdog sa halayo. Samtang masirang tagsatagsa ang mga ganghaan, ang dahunog magkaduol hangtod ang ganghaan mismo sa usa mangurog ug masira uban ang kusog nga lagubo! Diha ang pagbati nga dili na makagawas ug ang kahadlok. Ako miampo dayon sa Diyos sa pagtabang kanako, ug halos dihadiha mihakgom kanako ang malinawong kadasig, usa ka kasinatiang dili ko gayod mahikalimtan.

Sa Agosto 16, uban sa usa ka grupo sa ubang priso, ako giposasan ug gikadenahan. Unya, ilalom sa mabinantayong mga mata sa usa ka armadong kuwerpo sa kapolisan, kami gikuyogan latas sa panon sa udto sa Los Angeles paingon sa bus ug dayon gibalhin ngadto sa usa ka tren sa priso paingon sa McNeil Island. Kadtong mga kadena sa priso nakahupong kanako sa kalipay, kay kadto naglangkit kanako ngadto sa hugpong sa mga apostol ni Kristo nga gigapos usab tungod sa paghupot sa ilang integridad.—Buhat 12:6, 7; 21:33; Efeso 6:20.

Samtang ako gieskedyul nga mosulod sa McNeil nga prisohan, ang usa ka opisyal diha sa luyo sa usa ka talad-trabahoan nangutana kanako: “J.W. ka ba?” Kadto nakapatingala kanako, kay kadto ang unang panahong akong nabatian ang terminong “J.W.” Hinuon sa taudtaod nasabtan ko kon unsay iyang gihisgotan, mao nga ako miingon, “Oo!”

“Dali ngari,” matud niya. Ako natingala sa pagkadungog nga iyang gipangutana ang tawong diha gayod sa akong luyo sa samang pangutana: “J.W. ka ba?” Ang tawo daling mitubag: “Oo!”

“Dako kang bakakon!” ang polis miingon nga mikatawa. “Wala ka gani masayod kon unsay J.W.” Nasayran ko sa ulahi nga ang lalaki maoy mangtas nga kriminal nga may dokit sa prisohan nga sama ka taas sa iyang bukton. Ang “J.W.” mibarog, siyempre, alang sa “Jehovah’s Witness,” ug dili siya Saksi.

Gabii na niadto, ug ang usa ka guwardiya nagdala kanako latas sa kangitngit paingon sa akong higdaan. Lisod ang pagtuo nga ako didto sulod sa usa ka pederal nga prisohan nga ginatosgatos ka milya ang kalayo gikan sa balay o ni bisan kinsang akong kaila. Sa maong panahon akong nakita nga may nagpaingon kanako sa kangitngit. “Shhh!” matud niya samtang milingkod siya tapad kanako sa higdaan. “Ako brader. Sumala sa hulongihong umaabot ang usa ka Saksi.” Nagpaila siya sa iyang kaugalingon ug mipahayag sa mga pulong sa pagdasig, nga misulti kanako mahitungod sa pagtuon sa grupo sa Watchtower nga gitugot sulod sa prisohan sa mga hapon sa Dominggo. Supak sa mga lagda nga mobiya sa higdaan sa usa inigpamalong sa mga suga, mao nga wala siya magdugay. Apan niadtong pipila ra ka gutlo, akong gibati ang bililhong pakighigala ni Jehova nga napadayag mismo pinaagi sa iyang dedikadong alagad.

Ang mga haylait sa akong pagkapriso mao ang pinanahong mga pagduaw ni A. H. Macmillan gikan sa hedkuwarter sa Sosyedad sa Brooklyn. Siya usa ka “Bernabe,” usa ka magdadasig, kon may usa man ugaling. Inig-abot niya kami tugotang makagamit sa kan-anan, ug kaming tanang Saksi ug ubang priso maghuot sa pagpamati kaniya. Siya maayo kaayong mamumulong, ug bisan ang opisyales sa prisohan nahimuot sa pagpamati kaniya.

Among organisahon ang mga bloke sa selda ug mga dormitoryo ingong mga teritoryong sangyawanan. Sa sistematikanhong paagi kami mosangyaw sa maayong balita sa Gingharian sa maong mga dapit sama sa among himoon sa usa ka bloke sa siyudad sa wala pa kami mapriso. Ang pagdawat maoy lainlain ug lisod matagna. Apan may mga nanimati. Ang mga tulisan sa bangko ug uban pa, apil ang mga guwardiya sa prisohan, mingdangop kang Jehova ug nangabawtismohan. Ako malipay gihapon inighinumdom ko sa maong mga kasinatian.

Mga Lakang nga Nag-umol sa Akong Kinabuhi

Sa sinugdan sa 1946, kay natapos na ang gubat, ako nakagawas sa prisohan. Nagpaabot kanako mao ang laing sobre gikan sa Sosyedad! Ang sunod kong espesyal-payunir nga asaynment mao ang Hollywood, California! Ang siyudad sa pagpakaaron-ingnon. Pagkadaghan ang mga hagit! Diha ang mga panahong masayon pa ang pagbaligyag mga repriherador ngadto sa mga Eskimo kay sa pagpatuon sa mga tawo sa Bibliya. Bisan pa niana, sa hinay apan tino, ang “mga karnero” sa Ginoo nakaplagan ra.

Samtang nagtambong sa “Malipayong Kanasoran” internasyonal nga kombensiyon sa Cleveland, Ohio, sa Agosto 1946, si Milton Henschel, sekretaryo ni Nathan Knorr nga presidente niadto sa Watchtower Society, mipahunong kanako ug nangutana: “Dan, kanus-a ka ba mosulod sa Bethel?” Giingnan ko siya nga ako malipayon sa pagpayunir. “Apan gikinahanglan ka namo sa Bethel,” matud niya. Tapos sa pila pa ka pulong, ako nahutdan sa mga pasangil. Gusto ko ang California ug giayran ko ang paghunahuna nga mopuyo sa New York. Apan mahinumdom ako nga ako miingon sa akong kaugalingon, ‘Dan, kon gusto ni Jehova nga ikaw moadto sa Brooklyn, nan adto sa Brooklyn.’ Busa sa Agosto 20, 1946, gisugdan ko ang akong pag-alagad sa Bethel, ang hedkuwarter sa Brooklyn sa mga Saksi ni Jehova.

Sa daghang katuigan ako nagtrabaho sa tahianan sa libro sa pabrika nga nagbuhat sa nagkadaiyang pakusog nga mga trabaho. Sa kadugayan ako gipaadto sa Departamento sa Suskrisyon, nga mitanyag ug bag-ong direksiyon. Unya miabot ang mga hagit sa pangutok, sama sa pagsulat sa mga igsisibya sa radyo ug pagsibya alang sa estasyon sa radyo sa Sosyedad nga WBBR. Ako mitrabaho usab sa Departamento sa Panulat sulod sa 20 ka tuig, nga naningkamot sa pagkab-ot sa hatag-as nga mga sukdanan niana. Kasamtangan, diha ang mga pagkatudlo ngadto sa Pennsylvania ug New York nga mga korporasyon sa Watchtower Society, mga pagrekord sa drama, mga asaynment sa pakigpulong sa distrito ug internasyonal nga mga kombensiyon, ug sa daghan pang pribilehiyo sa pag-alagad nga dili na maihap.

Unya sa Nobyembre 1974, ang laing sobre miabot. Kadto nasudlan sa dili-katuohan, imposible nga pribilehiyo. Ako gidapit sa pag-alagad nga membro sa Nagamandong Lawas sa mga Saksi ni Jehova. Gibati kong bug-os walay katakos ug sa kamapaubsanon mapasalamaton. Milabay na ang mga napulo ka tuig sukad sa maong pagkatudlo, ug ang mga pagbati susama gihapon.

Ang nanglabay nga katuigan natugob tungod sa tawhanong mga relasyon uban sa dedikado ug debotadong mga tawo nga nahigugma kang Jehova nga labaw kay sa kinabuhi mismo—ang mga tawo sama kang Judge Rutherford, kinsa nakapribilehiyo ako sa paghibalag didto sa iyang balay sa San Diego, California. Napribilehiyo usab ako sa pagtrabahong kauban sa uban pang ingon nga mga tawo, apil si Hugo Riemer, Nathan Knorr, Klaus Jensen, John Perry, Bert Cumming, ug daghan pang uban nga maoy espirituhanong mga higante, “dagkong mga kahoy sa pagkamatarong.”—Isaias 61:3.

Ug ang pagkanapribilehiyo sa pagkakita nga ang organisasyon ni Jehova miuswag gikan sa diyutay ra nga 50,000 ka magmamantala sa Gingharian sa tibuok yuta ngadto sa halos tulo ka milyon dili gamay nga kadungganan. Makapaukyab ang pagkasaksi sa pagtubo sa pagpatik gikan sa pila ra ka galamiton sa pagpatik ngadto sa dinosenang pabrika nga gisuportahan sa 95 ka sanga nga nagapahayag sa maayong balita diha sa 203 ka nasod sa yuta. Ang mga kausaban ug pagpasibo sa teknolohiya ug pagkompiyutir katingalahan gayod. Kay nakasaksi niining tanan, ang usa makasubli lamang sa mga pulong sa Mateo 21:42: “Kini buhat ni Jehova, ug kini kahibulongan sa atong mga mata.”

Sa pagsulting labing menos, kini maoy tugob ug magantihong kinabuhi. Ubay sa dalan nakapanahon ako sa pagkaminyo ngadto sa usa ka matahom nga babaye nga taga-Hebburn, Inglaterra. Si Marina, ang akong asawa, maoy hinatag-sa-Diyos nga tigpaluyo. Pagkatinuod ang mga pulong sa Proverbio 19:14: “Ang panulondon gikan sa mga amahan mao ang usa ka balay ug bahandi, apan ang usa ka asawang maalamon maoy gikan ni Jehova.”

Latas sa mga kasinatian sa kinabuhi, samag naglikop nga pasilongan, diha ang nagalig-on-kanunay nga gahom sa pakighigala sa Diyos. Ang pagpalandong sa Pulong ni Jehova, paghinuktok sa kahulogan niana, ug pagpangitag kaalam ug salabotan nagpuno sa akong mga takna nga nagamata sa espirituhanong bahandi ug katagbawan. Bisan niining gutloa mismo, ako mahupong sa dakong kalipay inigbasa ko sa mga pulong sa salmista: “Malipayon ang nasod nga si Jehova mao ang iyang Diyos, ang katawhan nga iyang gipili ingon nga iyang kabtangan! Ang among mga kalag nagapaabot kang Jehova; siya mao ang among panabang ug among kalasag; kay ang among mga kasingkasing malipayon diha kaniya tungod kay kami may pagsalig sa iyang gibalaan nga ngalan. Itugot nga ang imong pakighigala anaa sa ibabaw namo, Jehova, samtang among isandig ang among mga paglaom diha kanimo.”—Salmo 33:12, 20-22, By.

[Hulagway sa panid 23]

Si Olive Perkins usa nako ka inspirasyon

[Hulagway sa panid 24]

Ang pamilyang Boyd mitabang sa pagtrabaho sa teritoryo sa San Pedro, California

[Hulagway sa panid 25]

Sa 1946 “Malipayong Kanasoran” nga kombensiyon uban sa kaubang mga Saksi nga bag-o pang nakagawas sa prisohan sa McNeil Island

[Hulagway sa panid 26]

Usa ka pagsibya sa buntag sa Dominggo sa WBBR