Ang Kinabuhi ug Ministeryo ni Jesus

Mabdos apan Dili Minyo

TULO na ka bulang nagsabak si Maria. Imong mahinumdomang iyang gipalabay ang iyang unang bulan sa pagsabak sa pagduaw kang Elisabet, apan karon mipauli na siya sa balay sa Nazaret. Sa dili madugay mahibaloan sa mga tawo sa iyang lungsod nga natawhan ang iyang kahimtang. Siya, sa tinuod, nahimutang sa makahingawang situwasyon!

Ang nakapasamot sa situwasyon mao ang pagkasinayoran ni Maria nga mahimong asawa sa karpenterong si Jose. Ug siya nahibalo nga, ilalom sa kasugoan sa Diyos sa Israel, ang babayeng sinayoran, kon makapakighilawas sa ubang lalaki, batoon hangtod nga mamatay. Unsaon niya sa pagsaysay kang Jose nga siya mabdos?

Sanglit nawala si Maria sa tulo ka bulan, makatino kita nga naghinamhinam si Jose sa pagpakigkita kaniya. Inigkita nila, seguradong ibalita kini ni Maria kaniya. Iyang himoon ang labing maayong paagi sa pagsaysay nga nagsamkon siya pinaagi sa balaang espiritu sa Diyos. Apan, sumala sa imong mahanduraw, malisod kaayong butang kini alang kang Jose.

Nahibalo si Jose nga maayog dungog si Maria. Ug piho nga iyang gimahal gayod siya. Apan, bisan pa sa iyang pangangkon, makita nga nagsabak siya sa laing tawo. Bisan pa, dili buot si Jose nga mabato siya hangtod nga mamatay o sa pagpakaulaw kaniya sa katilingban. Busa naglaraw siya sa pagdiborsiyo kaniya sa hilom. Niadtong panahona, giisip ang mga sinayoran ingong minyo, ug gikinahanglan ang diborsiyo aron sa pagtapos sa saad sa pagminyo.

Sa ulahi, samtang gipalandong ni Jose kining mga butanga, natulog siya. Mipakita kaniya ang manulonda ni Jehova ug miingon: ‘Ayaw kahadlok sa pagdawat kang Maria sa imong balay ingong imong asawa, tungod kay nagsamkon siya pinaagi sa balaang espiritu sa Diyos. Ug kinahanglang imong nganlan ang bata nga Jesus, tungod kay iyang pagaluwason ang iyang katawhan sa ilang mga sala.’

Sa pagmata ni Jose, pagkadako sa iyang pasalamat! Sa walay langan iyang gituman ang gisulti kaniya sa manulonda. Iyang gidala si Maria sa iyang balay. Kining dayag sa tanan nga lihok nagsilbi, sa epekto, ingong seremonya sa kaminyoon, nagpahibalo nga minyo na karon si Jose ug Maria. Apan wala hilabti ni Jose si Maria samtang gimabdos niya si Jesus.

Tan-awa! Dako na kaayog tiyan si Maria, apan gipasakay siya ni Jose sa asno. Asa sila moadto, ug nganong mobiyahi pa gayod sila nga talianak na man unta si Maria? Lucas 1:39-41, 56; Mateo 1:18-25; Deuteronomio 22:23, 24.

◆ Unsay hunahuna ni Jose sa pagkasayod nga nagsabak si Maria, ug ngano?

◆ Sa unsang pagkaagi nga diborsiyohan ni Jose si Maria nga wala pa man sila magminyo?

◆ Unsang dayag sa tanan nga lihok ang nagsilbing seremonya sa kasal ni Jose ug Maria?