29 ELIAS
“Ang Akong Diyos Mao si Jehova”
SAMAG kilat nga kalit nga mikidlap sa asul nga kalangitan, si Elias kalit nga gihisgotan sa Bibliya. Ikasubo, daotan kaayo ang unang unom ka hari nga nagmando sa 10 ka tribo nga gingharian sa Israel. Si Ahab ang ikapitong hari, ug para kang Jehova mas daotan siya kay sa tanang hari nga nauna kaniya. Siya naminyog langyaw ug daotang prinsesa, si Jezebel. Si Ahab nagsimbag mga idolo, pero mas grabe pa ang iyang asawa. Si Jezebel nagsimba kang Baal, ug kana lagmit naglakip ug paghalad ug mga bata. Ug iyang gidasig ang iyang bana ug ang katawhan nga mosimba sab kang Baal. Pero usa ka adlaw niana, si Elias miadto kang Ahab. Gipadala siya ni Jehova aron hukman ang hari ug sultihan kini kon unsa unyay himoon sa Diyos.
Imadyina nga si Elias nagbaktas ug layo kaayo gikan sa batoon ug habog nga kayutaan sa Gilead paingon sa Samaria, ang pinarilang siyudad diin gitukod ni Ahab ang iyang dako kaayong palasyo. Gitawag pa gani nig “balay nga garing,” tingali tungod sa kaluho niini. (1 Hari 22:39) Mahunahunaan tingali nato si Elias nga nagsul-ob ug simpleng besti nga gama sa balhibo ug lapad nga bakos nga gama sa panit. Naglakaw siya sa maong luho nga palasyo ug mibarog atubangan sa hari aron sultihan kini nga inutil ang iyang diyos nga si Baal. Dayon, unsa kaha kon tua pod didto si Jezebel? Unsa kahay reaksiyon ni Ahab ug sa iyang rayna sa gisulti ni Elias? Si Jezebel ug Ahab nagtuo nga si Baal dunay gahom nga magpatunghag ulan, pero gisultihan sila sa maisogong propeta nga ang ilang diyos dili makatabang nila. Si Jehova magpahinabog grabeng hulaw sa yuta. Dili moulan sulod sa pipila ka tuig hangtod nga ang alagad ni Jehova nga si Elias moingon nga moulan na pag-usab!
Nganong maisogon kaayo si Elias? Matikdi ang iyang giingon bahin kang Jehova. Iyang gisugdan ang iyang mensahe niining paagiha: “Ingon nga si Jehova nga Diyos sa Israel nga akong gialagaran buhi.” Ang Hebreohanong ekspresyon nga gihubad “nga akong gialagaran” sa literal nagkahulogan ug “nga sa atubangan niya ako nagabarog.” Si Elias nagbarog atubangan sa gamhanang hari nga si Ahab. Pero dunay nahibaloan ang propeta nga mas importante: Nagsimba siya kang Jehova nga Diyos, busa nagbarog siya atubangan Niya. Si Ahab ug Jezebel morag makahahadlok ug gamhanan, pero wala ra sila sa kumingking kon itandi kang Jehova. Ang paghunahuna niana nakahatag kang Elias ug kaisog.
Maisogong giatubang ni Elias ang daotang hari ug rayna ug ang rebelyosong nasod, ug misalig siya kang Jehova dihang siya nahadlok
Si Elias padayong nagpakitag kaisog sa iyang pag-alagad kang Jehova. Iya ning gipakita dihang gisunod niya ang sugo ni Jehova nga modangop sa usa ka mingaw nga walog panahon sa hulaw ug gutom. Didto, sa sapa ra siya magkuhag tubig nga mainom ug dad-an siya sa mga uwak ug pagkaon. Nagpakita siyag kaisog dihang gipadala siya ni Jehova sa Sidon, nga gimandoan sa daotang amahan ni Jezebel, aron tabangan ang pobreng balo nga nagpakitag talagsaong pagtuo. Ug nagpakita sab si Elias ug kaisog dihang iyang gihagit ang 450 ka propeta ni Baal didto sa Bukid sa Carmelo, ug iyang gipamatud-an kanila nga si Jehova lang ang matuod nga Diyos. Sa tibuok niyang kinabuhi, gipamatud-an ni Elias nga tinuod ang kahulogan sa iyang ngalan, “Ang Akong Diyos Mao si Jehova.”
Pero si Elias tawo pod nga “may pagbati nga sama kanato.” (Sant. 5:17) Dihay mga panahon nga nahadlok siya. Human sa gihimo nga mga milagro ni Jehova sa Bukid sa Carmelo, wala gihapon magbag-o si Ahab. Dayon nanumpa si Jezebel nga iyang patyon si Elias. Tungod niana, nahadlok ang propeta ug miikyas siya aron maluwas ang iyang kinabuhi. Naguol pag-ayo si Elias, ug iya ganing giingnan si Jehova nga gusto na niyang mamatay. Mibati siya nga wala siyay pulos ug miingon nga wala siyay kalainan sa iyang namatay na nga mga katigulangan. Pero mapailobong naminaw si Jehova kaniya. Sa ulahi, kaduha giingnan ni Elias ang iyang Diyos nga mibati siyang nag-inusara ug nahadlok ug nga walay kapuslanan ang tanan niyang paghago. Gipasaligan ni Jehova ang iyang propeta nga wala siya mag-inusara ug nga siya gipabilhan ug mapuslanon gihapon. Gihatagan pa gani siya ni Jehova ug tig-alagad ug kauban nga puwedeng bansayon ni Elias sa paghimo sa buluhaton sa usa ka propeta.
Wala madugay human niana, giadto ni Elias ang maong tawo, si Eliseo. Silang duha padayong mibarog alang kang Jehova sa maong lisod nga mga panahon. Gitabangan ni Eliseo ang iyang edarang kauban ug siya nakakat-on gikan kaniya. Sa tabang ni Jehova, nagmaisogon pag-usab si Elias ug siya nagpabiling maisogon hangtod sa kataposan.
Basaha ang asoy sa Bibliya:
Pakighisgot:
Sa unsang mga paagi nga si Elias nagpakitag kaisog?
Tun-ig Dugang
1. Nganong haom lang nga mga uwak ang gigamit sa pagdalag pagkaon kang Elias? (it “Uwak” ¶5) A
Lior Kislev
Hulagway A
2. Unsa nga mga milagro ang gihimo ni Elias? (it “Elias” Num. 1 ¶11)
3. Didto sa Bukid sa Carmelo, gisugo ni Elias ang mga tawo nga pun-og tubig ang usa ka dakong kanal. Pero kay hulaw man, diin kaha gikan ang tubig? (ba 17 ¶3) B
Todd Bolen/BiblePlaces.com
Hulagway B: Bukid sa Carmelo ug ang Dagat Mediteranyo
4. Unsay gipaila sa opisyal nga besti ni Elias, ug nganong iya kining gisul-ob sa abaga ni Eliseo? (w14 2/1 12 ¶3)
Hunahunaa ang mga Leksiyon
Giunsa pagtratar ni Jehova si Elias, ug unsaon nato pagsundog si Jehova aron matabangan nato ang mga igsoon nga dili magpanuko sa pagsulti sa ilang gibati dihang maluya sila? (1 Hari 19:1-18) C
Hulagway C
Si Elias nalipay sa pagbansay kang Eliseo sa paghimo sa buluhaton nga sama sa iyang ginahimo. Unsaon nato pagsundog ang iyang tinamdan samtang magbansay ta sa uban ug magdelegar ug mga responsibilidad?
Sa unsa pang mga paagi masundog nimo ang kaisog ni Elias?
Pamalandonga Kini
Unsay akong nakat-onan bahin kang Jehova niini nga asoy?
Sa unsang paagi kini nga asoy konektado sa mga katuyoan ni Jehova?
Unsay akong ipangutana kang Elias dihang banhawon na siya?
Pagkat-og Dugang
Tan-awa ang video nga nagpakita kon giunsa pagpalig-on ni Jehova si Elias aron matuman niya ang iyang asaynment.
Unsay makat-onan sa mga batan-on sa kaisog nga gipakita ni Elias didto sa Bukid sa Carmelo?
“Depensahi ang Matuod nga Pagsimba!” (Serye nga “Pagtuon sa Bibliya” diha sa jw.org)