Sa Dihang ang Tanang Tawo Maghigugmaay sa Usag Usa
SA IYANG Wali sa Bukid, nagpunting si Jesu-Kristo sa panahon sa dihang ang tanang tawo maghigugmaay sa usag usa. Sa pagsugod sa iyang mga komento, si Jesus mikutlo sa ika-37ng Salmo, nga nag-ingon: “Malipayon ang mga malumog-buot: sanglit magapanunod sila sa yuta.” Kanang maong salmo sa Bibliya nagbatbat usab kon sa unsang paagi kining kahibulongang kahimtang matuman, nga nag-ingon: “Ang mga mamumuhat ug daotan pagalaglagon; apan kadtong magahulat kang Jehova, sila magapanunod sa yuta.”—Mateo 5:5; Salmo 37:9; American Standard Version.
Pagkakahibulongang kausaban unya kana—ang tanang mamumuhat ug daotan wagtangon gikan sa yuta ug ang mga tawo lamang nga nahigugma sa usag usa ang magpabilin! Sa unsang paagi mahitabo kana? Si Jesus nagpadayon sa iyang iladong wali sa pagpakita kon sa unsang paagi sa dihang gitudloan niya kita sa pag-ampo: “Moabot unta ang imong gingharian. Matuman unta ang imong pagbuot, maingon sa langit, dinhi usab sa yuta.” (Mateo 6:10, AS) Matikdi kon asa pagatumanon ang kabubut-on sa Diyos. Dili lamang sa langit. “Kita nag-ampo nga, matuman unta ang imong pagbuot, dinhi sa yuta maingon sa langit,” nagpasiugda ang usa ka artikulo sa The Christian Century.
Nan, unsa ba ang Gingharian sa Diyos nga gitudlo ni Jesus kanato nga iampo? Tin-aw, kana maoy usa ka tinuod nga gobyerno, usa nga magmando gikan sa langit. Mao nga gitawag kini ug “ang gingharian sa mga langit.” (Mateo 10:7) Ang tinudlong Magmamando niining maong Gingharian, o gobyerno, mao ang Anak sa Diyos, si Jesu-Kristo.
Dugay na una pa matawo si Jesus kang Maria, ang manalagna ni Jehova nga si Isaias nagtagna bahin nianang milagrosong hitabo ug kon unsay mosunod ngadtongadto: “Alang kanato natawo ang usa ka bata, alang kanato gihatag ang usa ka anak nga lalaki; ug ang kagamhanan igatungtong sa iyang abaga: ug ang iyang ngalan pagatawgong Kahibulongan, Magtatambag, Gamhanang Diyos, Walay-Kataposang Amahan, Prinsipe sa Pakigdait. Sa pag-uswag sa iyang kagamhanan ug sa pakigdait walay kataposan.” (Isaias 9:6, 7, AS) Human sa kamatayon ug pagkabanhaw ni Jesus, milingkod siya uban sa iyang Amahan sa langit, nga nagpaabot nga hatagan sa sugo nga mosugod sa pagmando ingong Hari.—Salmo 110:1, 2; Hebreohanon 10:12, 13; Pinadayag 11:15.
Nan, unsay mahitabo ngadtongadto niining puno-sa-pagdumot nga kalibotan? Matikdi kon sa unsang paagi gitubag sa Bibliya kanang pangutanaha. Ang manalagna sa Diyos nga si Daniel mitagna: “Sa mga adlaw nianang mga haria ang Diyos sa langit magatukod ug usa ka gingharian nga dili gayod malumpag. Ug ang gingharian dili ipasa sa laing katawhan. Kini magadugmok ug magaut-ot niining tanang gingharian, ug kini molungtad sa walay kataposan.”—Daniel 2:44.
Tin-aw, kining maong tagna sa Bibliya nagpunting sa unahan sa usa ka dakong kausaban sa mga kalihokan sa mga tawo. Kining enterong sistema sa mga butang, nga naglakip niadtong ania niining kalibotan sa katawhan nga matig-ang modumili sa pagpasakop sa pagmando sa Diyos, pagawagtangon gikan sa yuta! Tagda kon unsay mopuli niana.
Kinabuhi sa Usa ka Matarong nga Bag-ong Kalibotan
Sa dihang matapos ang daang kalibotan, duna unyay mga makalabang-buhi. Misaysay ang Bibliya: “Ang kalibotan nagataliwan maingon man ang tinguha niini, apan siya nga nagabuhat sa kabubut-on sa Diyos magapabilin hangtod sa hangtod.” (1 Juan 2:17) Oo, kadtong magabuhat sa kabubut-on sa Diyos makalabang-buhi ngadto sa usa ka bag-ong kalibotan, maingon nga si Noe ug ang iyang pamilya nabuhi latas sa kataposan sa kalibotan sa ilang adlaw. Si apostol Pedro misulat: “Adunay bag-ong mga langit ug usa ka bag-ong yuta nga atong ginapaabot sumala sa saad [sa Diyos], ug niini nila magapuyo ang pagkamatarong.”—2 Pedro 3:5-7, 11-13.
Mahitungod sa panahon sa dihang ang bugtong gobyerno nga nagalihok mao ang Gingharian sa Diyos, ang Bibliya nagsaad: “Ang mga matarong magapanunod sa yuta, ug magapuyo sila sa ibabaw niana sa walay kataposan.” (Salmo 37:29) Ang mga matarong makatagamtam sa kinabuhi diha sa usa ka hininloang yuta. Pagkamahimayaong panahon unya kana! Kon wala pa nimo mahimo, palihog susiha ang mga panalangin nga gibatbat diha sa Bibliya nga giilustrar sa nag-unang mga panid.
Wala ba makapalipay sa imong kasingkasing ang pagkahibalo nga ang atong Maglalalang nagasaad nianang kahibulongang mga butang alang sa kaayohan niadtong nagasimba kaniya? Tino, mao kini ang katuyoan sa Diyos sa dihang iyang gilalang ang unang tawhanong magtiayon ug nagbutang kanila diha sa usa ka yutan-ong paraiso! Matikdi kon unsay gisulti sa Diyos kanila: “Sumanay ug dumaghan kamo ug pun-on ninyo ang yuta ug magagahom kamo niini, ug magbaton kamo ug pagbulot-an ibabaw sa mga isda sa dagat ug sa mga langgam sa kalangitan ug sa tanang buhing linalang nga nagalihok sa ibabaw sa yuta.”—Genesis 1:27, 28.
Si Adan ug Eva gisugo nga manganak, ug samtang magkahamtong sila, makig-ambit sila sa makapahimuot nga buluhaton sa pagmentinar sa yutan-ong Paraiso. Hunahunaa ang kalipay sa pagpalapad sa mga utlanan sa tanaman sa Eden samtang magkadaghan ang tawhanong pamilya! Tin-aw, katuyoan sa Diyos nga ang tibuok yuta mahimong paraiso. Matuman ba kanang maong katuyoan? Makaseguro kita nga matuman gayod kana, kay gisaad kana sa Diyos kanato! Siya misaad: “Ako nang gisulti; . . . Ako usab kanang himoon.”—Isaias 46:11; 55:11.
Malipay ka bang magkinabuhi sa walay kataposan sa yutan-ong Paraiso nga gihubit diha sa kasulatan nga giilustrar sa miaging mga pahina? Ingon sa madahom, dili tanan ang tugotan sa pagpuyo didto sa walay kataposan. Dunay mga kinahanglanon. Unsa man kana?
Pagkuwalipikar Aron Mabuhi sa Walay Kataposan
Una sa tanan, kadtong mopuyo sa bag-ong kalibotan sa Diyos kinahanglang makakat-on sa paghigugma sa usag usa, maingon sa gitudlo kanato sa Diyos nga buhaton. Ang Bibliya nag-ingon: “Kamo mismo gitudloan sa Diyos sa paghigugma sa usag usa.” (1 Tesalonica 4:9) Sa unsang paagi gitudloan kita niini sa Diyos?
Ilabina pinaagi sa iyang sinulat nga Pulong, ang Bibliya. Nagkahulogan kini nga aron mabuhing walay kataposan, kinahanglang dawaton nato ang mga pagtulon-an sa Diyos diha sa Bibliya. Usa ka estudyante sa Bibliya sa Oriente ang miingon: “Nagpaabot ako sa panahon sa dihang, sumala sa gisaad sa Bibliya, ang tanang tawo nakakat-on na sa paghigugmaay sa usag usa.”
Sa pag-ampo ngadto sa iyang Amahan, gipaila ni Jesus ang usa ka hinungdanong kinahanglanon. Siya miingon: “Kini nagakahulogan ug kinabuhing walay-kataposan, ang ilang pagkuha ug kahibalo kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Ang 32-panid nga brosyur nga Unsay Gikinahanglan sa Diyos Kanato? motabang kanimo nga makabaton nianang kahibaloa. Makabaton ka ug kopya pinaagi sa pagsulat sa kupon sa panid 32 ug pagpadala niana ngadto sa Watch Tower Society, P.O. Box 2044, 1060 Manila, o sa nahiangay nga direksiyon sa panid 5.
[Kahon/Mga hulagway sa panid 8-10]
Kon Unsay Gisaad sa Diyos
Tibuok-Kalibotang Mahigugmaong Panag-igsoonay
“Ang Diyos dili mapihigon, apan sa matag nasod ang tawo nga magakahadlok kaniya ug magabuhat ug pagkamatarong dalawaton kaniya.”—Buhat 10:34, 35.
Wala nay Krimen o Gubat
“Mahitungod sa mga daotan, sila pagaputlon gikan sa yuta.”—Proverbio 2:22.
“Gipahunong [sa Diyos] ang mga gubat hangtod sa kinatumyan sa yuta.”—Salmo 46:9.
Daghang Lamiang Pagkaon
“Aduna unyay daghang trigo sa yuta; sa tumoy sa kabukiran dunay pag-awas.”—Salmo 72:16.
Pakigdait Tali sa mga Tawo ug mga Hayop
“Ang lobo mopuyo sa makadiyot uban sa laki nga nating karnero, ug uban sa nating kanding ang leopardo mohigda, . . . ug ang usa ka bata maoy magamando kanila.”—Isaias 11:6.
Sakit, Pagkatigulang, ug Kamatayon Wagtangon
“Pahiran [sa Diyos] ang matag luha sa ilang mga mata, ug wala na unyay kamatayon, ni pagbangutan ni pagtiyabaw ni may kasakit pa. Ang kanhing mga butang mitaliwan na.”—Pinadayag 21:4.
Pagkabanhaw Dinhi sa Yuta sa Nangamatayng mga Minahal
“Ang takna nagasingabot diin kadtong tanan nga anaa sa handomanang mga lubnganan makadungog sa tingog [ni Jesus] ug managpanggula.”—Juan 5:28, 29.