Telepono Para sa mga Bible Study

Si Daiane maoy usa sa mga Saksi ni Jehova ug nag-alagad ingong usa ka payunir sa Brazil. Usa ka adlaw, samtang nagsangyaw siya gamit ang telepono, naestorya niya ang batabatang magtiayon nga nagpakitag interes. Ilang giingnan si Daiane nga mamalhin sila sa layong baryo nga walay koryente o Internet. Dugang pa, walay Saksi ni Jehova nga nagpuyo didto. Aron makapadayon silag hisgot bahin sa Bibliya, gihatagan nila si Daiane sa numero sa telepono nga naa sa baryo, ug nagsabot silang tulo sa adlaw ug oras nga puwede silang mag-estorya.

Gituman ni Daiane ang ilang sabot. Gitawagan niya ang telepono ug gitubag siya sa magtiayon! Ug sa duha ka semana, naka-study pa sila ug katulo ni Daiane gamit ang telepono.

Human ana, wala na motubag ang magtiayon sa iyang mga tawag. Pero wala moundang si Daiane. Padayon siyang manawag katulo sa usa ka semana, ug iyang sangyawan kon kinsay motubag sa telepono. Ingong resulta, nakasugod si Daiane ug mga Bible study sa mga tawo didto sa baryo.

Usa ka adlaw, samtang giestadihan ni Daiane ug sa iyang bana ang batan-on gamit ang telepono, nadunggan sa lider sa simbahan sa baryo ang ilang gihisgotan. Mibarog siya tapad sa batan-on aron makapaminaw siyag tarong. Dayon gusto sa lider sa simbahan nga makig-estorya kang Daiane ug sa iyang bana. Ganahan kaayo siya sa iyang nadunggan ug gusto pod niyang magpa-Bible study!

Paglabay sa panahon, si Daiane ug ang iyang bana naa nay unom ka Bible study sa layong baryo gamit ang telepono, ug usa nila mao ang lider sa simbahan. Gani, ang uban sa iyang study tigtambongan na sa mga tigom gamit ang mao ra gihapon nga telepono. Ang usa nila naghimog bangko aron naa silay kalingkoran dihang mag-study sila.

Mapasalamaton si Daiane ug ang iyang bana sa kahigayonan nga ilang nasangyaw ang mensahe sa Gingharian sa layo nga baryo. Si Daiane miingon, “Seguroon ni Jehova nga masangyawan ang tanang tawo, bisan pa niadtong nagpuyo sa layong lugar nga dili kaayo maadtoan.”