Andama ang mga Estudyante sa Bibliya sa Pag-atubang sa mga Pagsupak
1 Sa dihang ang mga tawo magtuon sa Bibliya ug ‘magtinguha sa pagkinabuhi uban ang diyosnong pagkamahinalaron,’ si Satanas mohimog dakong paningkamot sa pagsupak kanila. (2 Tim. 3:12) Ang pagsupak mahimong maggikan sa mga kaubanan sa trabaho, isigka-estudyante, o mga silingan. Ilabinang lisod sagubangon ang pagsupak kon kini maggikan sa ilang paryente.—Mat. 10:21; Mar. 3:21.
2 Gitagna ang Pagsupak: Angayng masabtan sa mga estudyante sa Bibliya nga sila makasinati gayod ug pagsupak ug kini maoy timailhan sa pagkahimong tinuod nga tinun-an ni Kristo. (Juan 15:20) Usahay, ang pagsupak motungha tungod sa sayop nga panghunahuna bahin sa mga Saksi ni Jehova. Hinumdomi nga dako ang kalipay nga bation sa usa kon siya pakaulawan tungod sa iyang pagsunod kang Kristo ug sa pagtuman sa mga sugo sa Diyos. (Buh. 5:27-29, 40, 41) Pasaligi sila nga si Jehova nahigugma ug motabang kanila. (Sal. 27:10; Mar. 10:29, 30) Ang ilang paghupot ug integridad nagpaila nga sila midapig kang Jehova sa isyu sa pagkasoberano.—Prov. 27:11.
3 Kon Nganong Hinungdanon ang Tukmang Kahibalo: Pasabta ang inyong mga estudyante sa Bibliya kon nganong hinungdanon ang pagpadayon sa pagkuhag tukmang kahibalo bisag makasinati silag pagsulay. Gamiton ni Satanas ang pagsupak aron dili makagamot diha sa ilang kasingkasing ang ilang nakat-onan. (Prov. 4:23; Luc. 8:13) Kinahanglang magpadayon sila sa pagkuhag tukmang kahibalo sa Pulong sa Diyos aron malig-on ang ilang pagtuo.—Sal. 1:2, 3; Col. 2:6, 7.
4 Gikinahanglan ang Paglahutay: Sa malisod nga mga kahimtang, gikinahanglan ang paglahutay ug kini magpatunghag maayong mga resulta. (Luc. 21:16-19) Kon ang mga estudyante sa Bibliya makalahutay sa mga pagsupak, dili lamang sila ang makabenepisyo kondili ang uban usab. Ilang masinati nga si Jehova dagayang magapanalangin niadtong matinumanong molahutay.—Sant. 1:12.
5 Si apostol Pablo nalipay tungod sa espirituwal nga pag-uswag sa mga igsoon sa Tesalonica. Daghan kanila ang iyang natabangan nga makakat-on sa kamatuoran, ug siya nagpasalamat sa Diyos alang kanila. (2 Tes. 1:3-5) Kita usab makasinati ug susamang kalipay ug katagbawan kon atong tabangan ang atong mga estudyante sa Bibliya sa pag-atubang sa mga pagsupak ug sa paglahutay niini.