Repaso sa Teokratikanhong Tunghaan sa Ministeryo

Ang mosunod nga mga pangutana pagatagdon sa Teokratikanhong Tunghaan sa Ministeryo sa semana nga magsugod sa Hunyo 30, 2008. Dumalahon sa magtatan-aw sa tunghaan ang 30-minutos nga repaso pinasukad sa materyal nga gikobrehan sa mga asaynment sa mga semana sa Mayo 5 hangtod sa Hunyo 30, 2008. [Matikdi: Kon walay reperensiya human sa pangutana, kinahanglang manukiduki ka aron makaplagan ang mga tubag.​—Tan-awa ang Tunghaan sa Ministeryo, p. 36-7.]

MGA HIYAS SA PAGPANULTI

1. Unsay atong mahimo aron matino nga masabtan ang mga ilustrasyon nga atong gamiton? [be p. 242 par. 3–p. 243 par. 1] Sagad mas maayo nga ipakita kon sa unsang paagi mapadapat ang ilustrasyon sa ulohang gihisgotan. Pananglitan, sa dihang gitawag ni Jesus ang iyang mga tinun-an ingong “ang kahayag sa kalibotan,” iya usab nga gipakita kon unsang kaakohan ang gipasabot niana alang kanila. (Mat. 5:14-16) Human sa iyang ilustrasyon bahin sa nawalang karnero, iyang gihisgotan ang bahin sa kalipay sa langit tungod sa usa ka makasasala nga naghinulsol. (Luc. 15:7)

2. Nganong epektibo ang dili-komplikado nga mga ilustrasyon nga gikuha gikan sa sinati nga mga kahimtang? [be p. 245 par. 2-4] Ang mga ilustrasyon nga gikuha sa sinati nga mga kahimtang makatandog sa kasingkasing sa atong mamiminaw. Sama kang Jesus, mahimo natong gamiton ang gagmayng mga butang aron ipatin-aw ang dagkong mga butang ug ang sayon nga mga butang aron ipatin-aw ang lisod nga mga butang. Pinaagi niini, atong matabangan ang mga tawo sa pagsabot ug paghinumdom sa espirituwal nga kamatuoran nga atong ginatudlo.

3. Unsa ka hinungdanon ang epektibong paggamit sa makitang mga tabang o mga visual aid, ug giunsa kini paggamit ni Jehova sa pagtudlog bililhong mga pagtulon-an? (Gen. 15:5; Jer. 18:6; Jon. 4:10, 11) [be p. 247 par. 1-2] Ang usa ka makitang tabang makahupot sa atensiyon sa mamiminaw ug makahatag ug malungtarong epekto. Sama kang Jehova, nga migamit ug mga bituon sa mga langit, buhatan sa magkukulon, ug usa ka tabayag aron sa pagtudlog bililhong mga pagtulon-an, kita usab makagamit ug makitang mga tabang aron mas mapatin-aw ang hinungdanong mga puntong gitudlo.

4. Sa unsang paagi atong magamit ang makitang mga tabang sa pagpauswag sa atong pagpanudlo? [be p. 248 par. 1-3] Sa pagdumalag pagtuon sa Bibliya, mahimo natong ipakita sa estudyante ang usa ka hulagway nga may kalangkitan sa atong ginatun-an ug hangyoon siya sa pagkomento kon unsay iyang nakita. Sa dihang maghisgot ug mga kronolohiya sa Bibliya o espesipikong mga panghitabo sa kasaysayan, kasagarang makatabang ang pagsulat sa mga kalkulasyon o paggamit ug tsart sa mga petsa nga nagpakita sa sunodsunod nga mga panghitabo. Pinaagi sa paggamit sa mga hulagway ug tsart nga makita diha sa atong mga publikasyon, atong matabangan ang mga tawo aron dali nilang masabtan ang mga pagtulon-an nga atong hisgotan.

5. Sa unsang paagi atong magamit ang mga mapa ingong epektibong makitang tabang sa dihang magtudlo sa mga estudyante sa Bibliya? [be p. 248 par. 4] Ang mga mapa magdala kanato ngadto sa mga dapit nga atong nabasahan sa Bibliya, ug kini makadugang sa atong pagsabot sa Kasulatan. Pananglitan, ang atong pagsusi sa panaw ni Abraham gikan sa Ur paingon sa Haran ug dayon paingon sa Bethel o sa ruta nga gisubay sa Israel samtang sila mibiya sa Ehipto ug mipanaw paingon sa Yutang Saad makapalawom sa atong kahibalo sa mga lugar sa Bibliya ug mopakita kanato kon sa unsang paagi kini nalangkit sa usag usa. Ang pagkakita sa mga siyudad ug mga lungsod nga gisangyawan ni Jesus ug Pablo motabang kanato sa pagsabot kon unsa ka dakong paningkamot ang ilang gihimo aron masangyaw ang maayong balita.

ASAYNMENT NUM. 1

6. Pinaagi sa tabang sa balaang espiritu sa Diyos, unsay atong masabtan sa dihang kita magtuon sa Bibliya? [be p. 32 par. 3-4] Sa tabang sa espiritu sa Diyos, atong masabtan ang katumanan sa tagna sa Bibliya ug ang tinuod nga kahulogan sa mga panghitabo sa kalibotan. (Mar. 13:4-29; Pin. 12:12) Atong makita diha sa pisikal nga uniberso ang mga hiyas sa Maglalalang. (Roma 1:20) Ang pagtuon sa Pulong sa Diyos motabang usab kanato sa pagpabiling mapaubsanon, sa pagsukol sa “malimbongong gahom sa sala,” ug sa paglakaw nga takos kang Jehova. (Heb. 3:13; Deut. 17:18-20; Col. 1:10)

7. Sa unsang paagi atong magamit ang Bibliya mismo sa atong pagpanukiduki sa kahulogan sa usa ka teksto? [be p. 34 par. 4–p. 35 par. 2] Mahimo nato kining sugdan pinaagi sa pagsusi sa konteksto ug sa pagsukna sa atong kaugalingon sa mga pangutanang sama sa: ‘Kang kinsa gitumong kining tekstoha? Unsay gipaila sa haduol nga mga bersikulo kon bahin sa mga kahimtang nga maoy hinungdan kon nganong kini gisulti o sa mga tinamdan sa mga tawong nalangkit?’ Ang pagsusi sa mga “cross-reference” sa “Bag-ong Kalibotang Hubad” tingali maghatag ug katin-awan sa katumanan sa usa ka tagna, sa usa ka sumbanan sa pakigsaad sa Balaod, susamang ideya, o impormasyon bahin sa kagikan o dapit. Ang konkordansiya sa Bibliya motabang kanato sa pagpangitag mga teksto nga nalangkit sa ulohan.

8. Sa unsang paagi gipasiugda sa Ebanghelyo ni Juan ang papel ni Jesus isip instrumento ni Jehova sa pagpanalangin sa katawhan? [si p. 198 par. 32] Ang papel ni Jesus ingong bugtong instrumento nga gigamit sa Diyos sa paghatag ug mga panalangin sa katawhan gipasiugda sa mga teksto sama sa Juan 14:​13, 14 ug 16:23. Si Jesus gipaila ingong “ang Kordero sa Diyos,” “ang tinapay sa kinabuhi,” “ang kahayag sa kalibotan,” “ang maayong magbalantay,” “ang pagkabanhaw ug ang kinabuhi,” “ang dalan ug ang kamatuoran ug ang kinabuhi,” ug “ang matuod nga punoan sa paras.” (Juan 1:29; 6:35; 8:12; 10:11; 11:25; 14:6; 15:1)

9. Unsang Kasulatanhong pamatuod ang nagpakita nga ang doktor nga si Lucas mao ang nagsulat sa basahon sa Mga Buhat? [si p. 199 par. 3; p. 200 par. 5-7] Ang Ebanghelyo ni Lucas ug ang basahon sa Mga Buhat gisulat alang kang Teofilo. (Luc. 1:3; Buh. 1:1) Ang unang mga bersikulo sa Buhat naghisgot sa paniklop nga mga panghitabo sa Lucas. Ang asoy ni Lucas bahin sa barko ug sa paglawig gikan sa Cesarea paingon sa Roma tukma gayod bisan sa kinagamyang detalye. (Buh. 27:40)

10. Sa katibuk-an, unsa nga mga lakang ang angayng himoon sa usa sa dihang maghimog laraw sa pakigpulong? [be p. 39-41] Ang unang lakang mao ang paghibalo sa imong tema, o pangunang ideya, nga gusto nimong ipahayag. Analisaha ang matag pangunang pulong sa tema. Hunahunaa kon unsay tumong sa imong pakigpulong. Dayon, ilha ang mga pangunang punto nga kinahanglan nimong hisgotan aron imong mahan-ay ang imong tema ug makab-ot ang imong tumong. Panukiduki ug pagpilig mga teksto ug mga detalye nga may kalabotan sa imong mga pangunang punto. Hikaya ang imong materyal “sa makataronganong kahan-ayan.” (Luc. 1:3)

SENEMANANG PAGBASA SA BIBLIYA

11. Unsa nga templo ang “gitukod sulod sa kap-atag-unom ka tuig”? (Juan 2:20) [w08 4/15 “Ang Pulong ni Jehova Buhi​—Mga Pangunang Punto Gikan sa Basahon ni Juan”] Gitumong sa mga Hudiyo ang pagtukod pag-usab sa templo ni Zorobabel ni Haring Herodes sa Judea. Sumala sa historyanong si Josephus, kana nga buluhaton nagsugod sa ika-18 ka tuig sa pagmando ni Herodes, o sa 18/17 W.K.P. Ang sangtuwaryo sa templo ug uban pang pangunang mga estruktura gitukod sulod sa walo ka tuig. Hinunoa, ang pagpanukod sa uban pang gambalay sa dapit sa templo nagpadayon hangtod sa Paskuwa sa 30 K.P. sa dihang ang mga Hudiyo nag-ingon nga ang pagtukod niini mikabat ug 46 ka tuig.

12. Kinsa ang mga ‘makalabang gikan sa kamatayon ngadto sa kinabuhi’? (Juan 5:24, 25) [w08 4/15 “Ang Pulong ni Jehova Buhi​—Mga Pangunang Punto Gikan sa Basahon ni Juan”] Si Jesus naghisgot bahin kanilang kanhi patay sa espirituwal apan miundang na sa ilang makasasalang mga buhat human makadungog sa iyang mga pulong ug mituo kaniya. Sila ‘makalabang gikan sa kamatayon ngadto sa kinabuhi’ sa diwa nga wala na sila tungloha sa kamatayon, ug sila gihatagag paglaom nga mabuhi sa walay kataposan tungod sa ilang pagtuo sa Diyos. (1 Ped. 4:3-6)

13. Sa dihang naghisgot bahin sa magtatabang, o espiritu sa kamatuoran, nganong ang Juan 14:16, 17 migamit sa pronombreng “kini,” samtang ang Juan 16:7, 8, 13, 14 migamit sa pronombreng “siya”? [w08 4/15 “Ang Pulong ni Jehova Buhi​—Mga Pangunang Punto Gikan sa Basahon ni Juan”] Ang hinungdan niana maoy tungod sa gramatika. Sa Gregong pinulongan, nga maoy gigamit sa pagsulat sa Ebanghelyo ni Juan, ang pulong “magtatabang” nagtumong sa lalaki, apan ang termino nga gigamit alang sa “espiritu,” dili mapadapat sa lalaki o babaye. Busa, sa dihang iyang girekord ang gisulti ni Jesus, gigamit ni Juan ang pronombre alang sa lalaki, sama sa “siya” (“he” o “him”) sa paghisgot kon unsay pagahimoon sa magtatabang. Ang pronombreng “kini” gigamit sa dihang naghisgot kon unsay ipatuman sa espiritu sa kamatuoran.

14. Nganong giingnan ni Jesus si Maria Magdalena nga dili siya kuptan? (Juan 20:17) [w08 4/15 “Ang Pulong ni Jehova Buhi​—Mga Pangunang Punto Gikan sa Basahon ni Juan”] Lagmit nagtuo si Maria nga hapit nang mosaka si Jesus sa langit ug dili na niya siya makita pag-usab mao nga iyang gikuptan si Jesus. Aron pasaligan si Maria nga dili pa siya mobiya, giingnan ni Jesus si Maria sa dili pagkupot kaniya, ug iya siyang gisugo sa pag-adto sa iyang mga tinun-an aron itaho ang iyang pagkabanhaw.

15. Unsay gipasabot sa pagbalik ni Jesus “sa samang paagi” nga siya misaka sa langit? (Buh. 1:9-11) [rs p. 342 par. 4; it-1 p. 186 par. 8] Matikdi nga ang mga manulonda naghisgot bahin sa “paagi” (Gr., troʹpos) dili sa porma (Gr., mor·pheʹ) sa pagkayab ni Jesus. Sa dihang gisakgaw siya sa panganod, wala na siya makita sa mga tawo. Ang asoy sa Buhat nagpakita nga ang iyang pagkayab maoy dili mapagarbohon o mapagawalong pagpasundayag ug nga kini nakita lamang sa pipila ka matinumanong mga tinun-an. Wala mahibalo ang kalibotan sa katibuk-an kon unsay nagakahitabo. Ingon usab niana ang kahimtang sa dihang mibalik si Kristo sa pagmando sa Gingharian niadtong 1914.