‘Magpatalinghog ug Magkuhag Dugang Instruksiyon’
1 Sa umaabot nga distritong mga kombensiyon, dakong panahon ug paningkamot ang himoon sa pagpangandam sa programa nga maghisgot sa mga panginahanglan sa tibuok-kalibotang kapunongan. Kon ipadapat, ang espirituwal nga instruksiyon nga ihatag makatabang kanato sa paghupot ug maayong relasyon uban kang Jehova. Dayag nga kita adunay maayong katarongan sa ‘pagpatalinghog ug pagkuhag dugang instruksiyon.’—Prov. 1:5.
2 Andama ang Imong Kasingkasing: Si Esdras ‘nag-andam sa iyang kasingkasing sa pagkonsulta sa balaod ni Jehova ug sa pagbuhat niini.’ (Esd. 7:10) Unsaon man nato pag-andam ang atong mga kasingkasing aron madawat ang instruksiyon nga ihatag ni Jehova? Kon makuha na nimo ang pinatik nga programa sa kombensiyon, susiha ang mga ulohan sa nagkalainlaing mga bahin nga gilista ug pangutan-a ang imong kaugalingon: ‘Unsay gustong isulti ni Jehova kanako pinaagi niining programaha? Sa unsang paagi akong magamit kining impormasyona aron makabenepisyo ako ug ang akong pamilya?’ (Isa. 30:21; Efe. 5:17) Suknaa kanunay ang imong kaugalingon sa maong mga pangutana sa tibuok kombensiyon.
3 Paminaw ug Pamalandong: Gidayeg ni Jesus si Maria tungod sa iyang pagpaminaw pag-ayo sa iyang gisulti, ug miingon: “Gipili ni Maria ang maayong bahin, ug dili kini pagakuhaon gikan kaniya.” (Luc. 10:39, 42) Kon kita adunay samang tinamdan, dili nato tugotan ang ginagmayng mga butang nga makabalda kanato. Kon nagsugod na ang programa, kini maoy “panahon sa paghilom” ug pagpaminaw. (Eccl. 3:7) Kinahanglan natong paneguroon nga kita nakalingkod ug naminaw pag-ayo sa tibuok programa. Unsay makatabang kanato aron dili maglatagaw ang atong hunahuna? Tan-awa kanunay ang mamumulong. Sundi sa imong Bibliya kon dunay mga tekstong basahon ug ablihi kanunay ang imong Bibliya samtang gihisgotan kini.
4 Kon maminaw kita sa mga pakigpulong, mas maayo kon magkuha kitag mugbong mga nota nga makatabang kanato sa pagsentro sa atong pagtagad. Angay natong ilangkit ang atong nadunggan sa ato nang nahibaloan. Kini motabang kanato sa pagsabot ug paghinumdom sa impormasyon. Dayon sa matag gabii sa dili pa matulog, mas maayong repasohon ang imong mga nota ug susihon kon imo ba gayong gituman ang paagi ni Jehova sa kinabuhi.—Prov. 4:10-13.
5 Ipadapat ang Imong Makat-onan: Bisan tuod ang programa makapadasig gayod kanimo ug sa imong pamilya, dili igo nga kita mobiya nga mibating napalig-on ug napalagsik. Si Jesus nag-ingon: “Kon nahibalo kamo niining mga butanga, malipayon kamo kon inyo kining buhaton.” (Juan 13:17) Kinahanglang makugihon natong ipadapat ang mga punto nga mapadapat kanato sa personal. (Filip. 4:9) Kini ang yawi sa ‘pagkuhag dugang instruksiyon.’