Repaso sa Teokratikanhong Tunghaan sa Ministeryo

Ang mosunod nga mga pangutana pagatagdon panahon sa Teokratikanhong Tunghaan sa Ministeryo sa semana nga magsugod sa Oktubre 30, 2006. Dumalahon sa magtatan-aw sa tunghaan ang 30-minutos nga repaso pinasukad sa materyal nga gikobrehan diha sa mga asaynment alang sa mga semana sa Septiyembre 4 hangtod sa Oktubre 30, 2006. [Matikdi: Kon walay mga reperensiya human sa pangutana, kinahanglang mohimo kag kinaugalingong panukiduki aron makaplagan ang mga tubag.—Tan-awa ang Tunghaan sa Ministeryo, p. 36-7.]

MGA HIYAS SA PAGPANULTI

1. Nganong hinungdanon ang kaugdang sa dihang magpakigpulong, ug sa unsang paagi atong mahupay ang atong kabalaka? [be p. 135 par. 5–p. 137 par. 2, mga kahon] Kon kita ugdang, lagmit ihatag sa atong mamiminaw ang bug-os nga pagtagad nganha sa atong ginasulti inay kanato. Atong mahupay ang atong kabalaka pinaagi sa pagpangandam pag-ayo, pagbansay ug kusog sa atong pakigpulong, pag-ampo kang Jehova alang sa tabang, ug pagbaton ug kasinatian pinaagi sa regular nga pagpakigbahin sa teokratikanhong mga kalihokan.

2. Sa dihang pangutan-on bahin sa atong tinuohan, nganong angay kitang maningkamot sa paggamit sa Bibliya sa pagtubag? [be p. 143 par. 1-3] Ang pangunang katarongan sa paggamit sa Bibliya mao nga kini ang Pulong sa Diyos, ug atong gipasukad ang atong tinuohan, ang atong pagkinabuhi, ug ang atong paglaom sa umaabot diha sa inspiradong mga saad sa Bibliya. (2 Tim. 3:​16, 17) Agig pagsundog kang Jesus, kita dili mosulti sa ato rang kaugalingon kondili kanunay natong kutloon ang Kasulatan sa pagtubag sa mga pangutana. (Mat. 4:3-10; Luc. 24:​27, 44-47)

3. Sa unsang paagi kita mahimong mas hanas sa paggamit sa Bibliya? [be p. 144, kahon] Kita mahimong mas hanas sa paggamit sa Bibliya pinaagi sa pagbasa niana adlaw-adlaw, pinaagi sa paglakip ug mga teksto diha sa atong mga komento sa mga tigom, ug pinaagi sa pagtino kon unsay giingon sa Bibliya sa dili pa mohimog mga desisyon. Kon wala kita mahibalo sa giingon sa Bibliya bahin sa usa ka butang, kita manukiduki imbes managhap o magpahayag ug kaugalingong opinyon.

4. Nganong hinungdanon ang paggamit kanunay sa Bibliya sa dihang manudlo kita diha sa ministeryo, ug sa unsang paagi makadasig kita nga gamiton kini diha sa mga tigom sa kongregasyon? [be p. 145-6, mga kahon] Ang Bibliya adunay mas dakong gahom sa paggiya sa matinud-anog-kasingkasing nga mga tawo kay sa bisan unsa nga mahimo natong isulti. Sa dihang makita mismo sa usa ka tawo kon unsay giingon sa Bibliya, kini makahatag ug mas dulot nga impresyon. Sa dihang mopakigpulong sa kongregasyon, direktang dapita ang mamiminaw sa pagtan-aw sa mga teksto, ug dayon hatagi silag igong panahon sa pagpangita niana.

5. Unsa ang duha nato ka tumong sa dihang magsitar ug usa ka teksto? [be p. 147 par. 2] Sa dihang magsitar ug usa ka teksto, ang atong tumong mao ang pagpukaw sa kahinam ug pagpunting sa pagtagad nganha sa katarongan sa paggamit sa teksto.

ASAYNMENT NUM. 1

6. Unsang mapuslanong mensahe ang anaa sa Mga Salmo? [si p. 104 par. 23] Ang Mga Salmo naghatag ug halalom nga pagsabot sa paninugdang mga pagtulon-an sa Bibliya, nga pangunang naghisgot bahin kang Jehova, ang Awtor niini. Siya tin-awng gipadayag nga mao ang Maglalalang sa uniberso ug sa tanang butang diha niana. (Sal. 8:3-9; 90:​1, 2; 100:3; 104:1-5, 24; 139:14)

7. Kanus-a gisulat ug gitigom ingong basahon ang Proverbio? [si p. 107 par. 5] Ang kinadak-ang bahin sa Proverbio way duhaduha nga gisulat panahon sa paghari ni Solomon (1037-998 W.K.P.) una pa sa iyang pagtipas. Sanglit usa sa mga pagtigom gihimo man sa paghari ni Ezequias (745-717 W.K.P.), ang pangataposang pagtigom lagmit wala himoa sa wala pa maghari si Ezequias. Kini naglakip sa pagtigom sa kataposang duha ka hugpong sa maong basahon, nga gikolekta usab ubos sa pagdumala ni Haring Ezequias. (Prov. 25:1) Ang usa ka makapalamdag nga potnot sa Proverbio 31:31 diha sa “New World Translation of the Holy Scriptures​—With References” nag-ingon: “Ang pipila ka [edisyon] sa [Hebreohanong] teksto nagpakita sa trigrammaton, o tulo ka letra, ‘Chehth, Zaʹyin, Qohph’ (חזק) nga nagsilbing pirma ni Haring Ezequias sa trabaho nga gikopya sa iyang mga eskriba agig pagpaila nga kompleto na ang trabaho.”

8. Unsa ang usa ka proverbio, ug nganong haom ang Hebreohanong titulo sa maong basahon? [si p. 107 par. 6] Ang usa ka proverbio maoy usa ka mubong panultihon nga punog kahulogan nga sagad nagtandi sa duha ka magkaamgid o sa magkaatbang nga mga butang ug gidisenyo sa pagpahunahuna sa tigpatalinghog. Sa Hebreohanong mga Bibliya, ang maong basahon unang gitawag pinaagi sa unang pulong sa basahon, “mish·lehʹ,” nga nagkahulogang “mga proverbio.” Ang “mish·lehʹ” maoy plural nga porma sa Hebreohanong pulong nga “ma·shalʹ,” nga kasagarang giisip nga gikuha gikan sa lintunganayng pulong nga nagkahulogang “mahimong sama” o “mahimong ikatandi.” Kining mga terminoha haom nga nagbatbat sa kaundan sa maong basahon.

9. Sa Proverbio 2:1-5, unsay gipasabot sa pagdasig nga padayong pangitaon ang kahibalo, pagsabot, ug katakos sa pag-ila “ingon sa plata, ug ingon sa tinagong mga bahandi”? [be p. 38 par. 4] Ang pagtandi diha sa Proverbio nagkahulogan sa paghago ug dagayang mga balos. Ang pagpanukiduki nagkinahanglag paghago, apan ang pagbuhat niini motabang kanato nga masayran ang hunahuna sa Diyos bahin sa mga butang, nga matul-id ang sayop nga mga ideya, ug mapalig-on ang atong pagsabot sa kamatuoran. Kini makahatag usab ug dugang nga kahulogan ug kadasig sa atong mga presentasyon, nga maghimo niana nga kahimut-anang ipahayag ug nindot nga pamation.

10. Sa unsang paagi gibutyag sa basahon sa Proverbio ang mapuslanong katuyoan niini? [si p. 109 par. 19] Ang mapuslanong katuyoan sa maong basahon gihisgotan diha sa unang mga bersikulo niini, nga nagpasiugda sa kahibalo, kaalam, ug pagsabot ingong hinungdanong mga hiyas sa pag-alagad kang Jehova sa dalawatong paagi. (Prov. 1:2-4)

SENEMANANG PAGBASA SA BIBLIYA

11. Sa unsang paagi ‘gialam-alaman ug gipahilom ni David ang iyang kalag sama sa usa ka batang gilutas nga gisapnay sa iyang inahan,’ ug sa unsang paagi atong masundog siya? (Sal. 131:1-3) Maingon nga ang gilutas nga bata makabaton ug kahupayan ug katagbawan diha sa mga bukton sa iyang inahan, si David nakakat-on sa pagkontrolar sa gitinguha sa iyang kalag pinaagi sa pag-ila sa iyang mga limitasyon ug sa pagpasundayag ug pagkamapaubsanon. Siya wala magtinguhag kabantog, ni siya migamit ug kusog aron ituboy ang iyang kaugalingon aron mahimong hari. Siya mapaubsanon ug mapailobong nagpaabot kang Jehova. Kita makasundog kang David pinaagi sa dili pagpaningkamot nga mahimong inila. Imbes ituboy ang atong kaugalingon, kita angayng magpaabot kang Jehova. [Sept. 11, w06 9/1 “Ang Pulong ni Jehova Buhi​—Mga Haylayt Gikan sa Ikalimang Basahon sa Mga Salmo”; w77-E 7/15 p. 445]

12. Unsang paghupay ang makaplagan diha sa inspiradong mga pulong sa Salmo 139:7-12? Walay dapit sa yuta nga dili maabot ni Jehova. Ang iyang balaang espiritu makaabot kanato bisag asa pa kita. Walay kahimtang nga makapugong sa Diyos sa pag-abot kanato. Kon kita maningkamot sa pag-alagad kang Jehova, siya makabanhaw pa gani kanato. Ang matinumanon ug maunongong mga alagad ni Jehova makasalig sa iyang mahigugmaong pagpaluyo. [Sept. 18, w06 9/1 “Ang Pulong ni Jehova Buhi​—Mga Haylayt Gikan sa Ikalimang Basahon sa Mga Salmo”; w93 10/1 p. 12-13]

13. Unsa ang pipila ka pananglitan sa pagkahalangdon ni Jehova nga gihisgotan diha sa Salmo 145 diin siya atong madayeg diha sa atong mga pag-ampo ug sa publikong ministeryo? (Sal. 145:3) Ang mga pananglitan sa dili-matukib nga pagkahalangdon ni Jehova diin siya atong madayeg naglakip sa mosunod: ang iyang kahibulongang mga buhat sa paglalang (ber. 9, 10), ang iyang gamhanang mga buhat sa pagluwas alang sa iyang maunongong mga magsisimba (ber. 4, 6, 14, 18-20), ang iyang pagkamaayo sa pagtagana sa tanang butang nga gikinahanglan alang sa kinabuhing walay kataposan (ber. 7, 15, 16), ug ang iyang personalidad (ber. 7-9, 17). [Sept. 25, w04 1/15 p. 10-14; w90 9/15 p. 11-15]

14. Sa unsang paagi ang kahadlok kang Jehova mao “ang sinugdanan sa kahibalo” ug ang “sinugdanan sa kaalam”? (Prov. 1:7; 9:10) Kon walay kahadlok kang Jehova, walay kahibalo, tungod kay siya ang Maglalalang sa tanang butang ug ang Awtor sa Kasulatan. (Roma 1:20; 2 Tim. 3:​16, 17) Siya ang Tuboran sa tanang matuod nga kahibalo. Busa, ang kahibalo magsugod sa matahaong pagkahadlok kang Jehova. Ang diyosnong kahadlok maoy sinugdanan usab sa kaalam tungod kay walay kaalam kon walay kahibalo. Gawas pa, ang usa ka tawo nga nakulangan ug kahadlok kang Jehova dili mogamit sa bisan unsang kahibalo nga iyang nabatonan aron sa pagpasidungog sa Maglalalang. [Okt. 2, w06 9/15 “Ang Pulong ni Jehova Buhi​—Mga Haylayt Gikan sa Basahon sa Proverbio”; rs p. 337]

15. Sa Proverbio 7:1, 2, unsay nalakip diha sa “akong mga pulong” ug sa “akong mga sugo”? Gawas pa sa mga pagtulon-an sa Bibliya, kining mga pulonga ug mga sugoa naglakip sa mga lagda sa pamilya, o tulumanon, nga gimugna sa mga ginikanan. (Deut. 6:​6, 7; Efe. 6:4) Kon ang maong mga tulumanon nga gihikay sa mga ginikanan dili supak sa balaod sa Diyos, angay kining sundon sa mga anak, kay kini gimugna pinasukad sa gugma ug alang sa kaayohan sa pamilya. (Prov. 6:20-22) [Okt. 9, w06 9/15 “Ang Pulong ni Jehova Buhi​—Mga Haylayt Gikan sa Basahon sa Proverbio”; w00 11/15 p. 28]