Repaso sa Teokratikanhong Tunghaan sa Ministeryo
Ang mosunod nga mga pangutana pagatagdon nga binaba panahon sa Teokratikanhong Tunghaan sa Ministeryo sa semana nga magsugod sa Oktubre 31, 2005. Dumalahon sa magtatan-aw sa tunghaan ang 30-minutos nga repaso pinasukad sa materyal nga gikobrehan diha sa mga asaynment alang sa mga semana sa Septiyembre 5 hangtod sa Oktubre 31, 2005. [Matikdi: Kon walay mga reperensiya human sa pangutana, kinahanglang mohimo kag kinaugalingong panukiduki aron makaplagan ang mga tubag.—Tan-awa ang Tunghaan sa Ministeryo, p. 36-7.]
MGA HIYAS SA PAGPANULTI
1. Sa unsang paagi makaseguro kita nga ang atong pagpanudlo gikan sa Pulong sa Diyos makatukbil sa masambingayong kasingkasing sa mga tawo? (Mat. 13:19) [be p. 258 par. 1-2, kahon] Kinahanglang maningkamot kita sa pagtukbil sa kasingkasing—ang mga pagbati ug panukmod—sa mga tawo, aron masuod sila Diyos. Makatabang niining bahina ang pag-ila kon unsa nay nakaimpluwensiya sa ilang kasingkasing. Dayon maningkamot kita sa pagpunting sa atong kaisipan diha sa pagpalig-on sa mapuslanong mga hiyas, sama sa gugma ug diyosnong kahadlok. Hinungdanon ang pagtukbil sa kasingkasing niining paagiha aron matabangan ang uban sa pagkakat-on sa pagpahimuot kang Jehova.
2. Unsay makatabang kanato sa pagpagawas kon unsay anaa sa kasingkasing sa usa ka tawo, apan unsay angay natong bantayan? [be p. 259 par. 1-2] Ang mga pangutana sama sa “Unsay imong pagtuo bahin sa . . . ?” o “Unsay nakakombinsir kanimo nga . . . ?” makapukaw sa hunahuna sa estudyante ug makatabang sa magtutudlo sa pag-ila kon unsay anaa sa kasingkasing sa estudyante. Sa dihang mosuknag mga pangutana, ang magtutudlo kinahanglang magmataktikanhon ug magpakitag hait nga pag-ila aron ang estudyante dili mobati nga siya morag gisukitsukit. Ang magtutudlo o instruktor nga adunay hait nga pag-ila mamati pag-ayo aron matino niya kon unsa gayoy pagbati sa estudyante nianang butanga ug kon unsaon kana pagtubag sa labing maayong paagi pinaagig gibase-sa-Bibliya nga impormasyon, nga maoy magpalihok sa estudyante. (Prov. 16:23)
3. Sa dihang kita manudlo, nganong hinungdanon nga atong ipasiugda ang kahibulongang mga hiyas ni Jehova? [be p. 260 par. 1] Kon atong ipasiugda ang mga hiyas ni Jehova, sama sa pagkamaayo, kaluoy, ug dili-takos nga kalulot, atong mapukaw ang kasingkasing ug maugmad ang gugma alang sa Diyos. Sa dihang mogahin kitag panahon sa pagdasig sa atong mga mamiminaw sa pagpalandong sa mga hiyas ni Jehova, sila matabangan sa pagpakigsuod sa Diyos ug sa pag-ugmad ug mas lig-ong personal nga relasyon uban kaniya. Ang maong kinasingkasing nga panaghisgot subsob nga makapukaw ug sinserong pagsanong diha sa usa ka tawo, sanglit kita gihimo man sa dagway ug kasamahan sa Diyos. (Gen. 1:27)
4. Sa unsang paagi matabangan nato ang atong mga estudyante sa Bibliya sa pag-ila kon unsang mga bahina ang kinahanglan nilang pauswagon? [be p. 260 par. 4–p. 261 par. 1] Kinahanglang ipatin-aw nato kanila nga ang ilang personal nga panggawi makaapektar sa ilang relasyon sa Diyos. Ang ilang panggawi makapaguol o makapalipay sa Maglalalang. (Sal. 78:40-42; Prov. 27:11) Makatabang kita sa atong mga estudyante sa Bibliya sa pagsabot kon unsang mga panalangin ang moresulta gumikan sa ilang pagtuman sa mga balaod sa Diyos ug sa pag-isip sa pagkamasinugtanon, dili ingong kabug-at, kondili ingong paagi sa pagpahayag sa atong pagkamahinalaron kang Jehova ingong persona. (Sal. 19:11; Isa. 48:17)
5. Unsay atong mahimo sa pagtabang sa atong mga estudyante sa Bibliya o mga mamiminaw sa pagsusi sa ilang mga motibo sa pagbuhat sa mga butang? [be p. 262 par. 2-3] Sa dihang kita manudlo, angay natong dasigon ang atong mga estudyante o mga mamiminaw sa pagsukna sa ilang kaugalingon: ‘Nganong gusto man nakong buhaton kini? Ang ako bang motibo sa pagpili niining dalana nagpakitag apresasyon sa tanan nga nahimo ni Jehova alang kanako? Tinuod, motuman tingali ako sa mga kinahanglanon sa Diyos, apan unsay akong pagbati niana?’ (Sal. 37:4) Kinahanglang dasigon nato ang atong mga estudyante sa Bibliya o mga mamiminaw sa pag-ampo kang Jehova alang sa kalig-on ug pagtuo aron mahadlok sa iyang dakong ngalan. (Sal. 86:11)
ASAYNMENT NUM. 1
6. Unsay kahulogan sa ‘matinuorong pagpangita’ kang Jehova, ug sa unsang paagi mapasundayag nato nga ginabuhat nato kini? (Heb. 11:6) [w03 8/15 p. 25 par. 2; p. 26 par. 1-2; p. 27 par. 2] Ang ‘matinuorong pagpangita’ naglakip ug pagpanglimbasog, “maisogon nga pagkamapadayonon” pa gani, nga kaharmonya sa kabubut-on sa Diyos. (Luc. 11:8; 1 Juan 5:14) Ikapakita nato nga kita matinuorong nagtinguha sa pag-uyon ni Jehova pinaagi sa kinasingkasing nga pagbuhat sa bisan unsang teokratikanhong kalihokan nga bukas kanato. Kini naglakip sa pagpangandam pag-ayo alang sa mga tigom, pagpaningkamot sa pagpauswag sa kalidad sa atong ministeryo, ug pagtanyag sa atong kaugalingon alang sa bug-os-panahong pag-alagad.
7. Unsa ang “sumbanan sa makapahimsog nga mga pulong,” ug sa unsang paagi ang mga ansiyano makapakita nga sila naghupot niana? (2 Tim. 1:13, 14) [w03 1/1 p. 29 par. 3–p. 30 par. 1] Sa 1 Timoteo 6:3, miingon si Pablo nga ang “makapahimsog nga mga pulong” iya “sa atong Ginoong Jesu-Kristo.” Tungod kay ang mga pulong ni Jesus kaharmonya man sa ‘tanang Kasulatan nga inspirado sa Diyos ug mapuslanon sa pagpanudlo,’ “ang sumbanan sa makapahimsog nga mga pulong” nagtumong usab sa tanang pagtulon-an sa Bibliya. (2 Tim. 3:16, 17) Ang mga ansiyano kinahanglang mogamit sa Pulong sa Diyos sa dihang manudlo sa kongregasyon ug likayan gayod nila ang pagpasiugda sa tawhanong kaalam o personal nga mga ideya. (2 Tim. 4:2) Ang susamang prinsipyo mapadapat diha sa pagwali sa gawas sa kongregasyon. (2 Tim. 4:5)
8. Unsay kahulogan sa terminong “kanon sa Bibliya,” ug unsa ang pipila ka butang nga magtino kon ang usa ka basahon nalakip sa kanon sa Bibliya? [si p. 299 par. 5-6] Ang terminong “kanon sa Bibliya” nagtumong sa koleksiyon, o listahan, sa mga basahon sa Bibliya nga gidawat ingong matuod ug inspirado. Lakip sa mga butang nga magtino nga ang usa ka basahon nalakip sa kanon sa Bibliya mao ang mosunod: Kini kinahanglang maghisgot sa mga kalihokan ni Jehova dinhi sa yuta, kini kinahanglang magtukmod sa mga tawo sa pagsimba kaniya, ug kini kinahanglang magpukaw ug halalom nga pagtahod sa iyang ngalan ug sa iyang buluhaton ug mga katuyoan dinhi sa yuta. Ang maong basahon kinahanglang maghatag ug pamatuod nga kini inspirado sa Diyos. Kini dili gayod magpasiugda sa patuotuo o pagsimba sa linalang, kondili magpasiugda gayod kini sa paghigugma ug pag-alagad sa Diyos.
9. Nganong ang Tipik Muratorian, nga masubay ngadto sa ulahing bahin sa ikaduhang siglo K.P., ilabinang hinungdanon sa pagpamatuod nga ang Kristohanon Gregong Kasulatan nalakip sa kanon sa Bibliya? [si p. 302 par. 19] Sa pag-ingon nga ang Lucas mao ang ikatulong Ebanghelyo, gipaila niining Latin nga katalogo nga una niining gihisgotan ang Mateo ug Marcos. Gihisgotan usab niini ang Juan ingong “ikaupat nga basahon sa Ebanghelyo.” Gihisgotan sa maong katalogo ang mga sulat ni apostol Pablo ngadto sa mga kongregasyon maingon man ang iyang mga sulat ngadto sa mga indibiduwal. Gihisgotan usab ang ubang mga basahon sa Bibliya nga gidawat ingong bahin sa kanon sa Bibliya hangtod karon.
10. Unsang awtorisasyon sa paghubad sa Bibliya ang gihatag mismo sa Kasulatan, ug unsay katuyoan sa karaang mga hubad sa Bibliya? [si p. 307 par. 9] Ang giingon sa Diyos ngadto sa Israel nga “Pagsadya kamong mga nasod, uban sa iyang katawhan” ug ang tagna ni Jesus nga ang maayong balita sa Gingharian igawali sa tibuok gipuy-ang yuta ingon nga pagpamatuod ngadto sa tanang kanasoran nagpakita nga angayng hubaron ang Bibliya. (Deut. 32:43; Mat. 24:14) Gipamatud-an sa karaang mga hubad sa mga manuskrito nga dakong paningkamot ang gihimo aron ang orihinal nga Hebreohanong teksto mapahayag sa tukmang paagi.
SENEMANANG PAGBASA SA BIBLIYA
11. Gisuportahan ba sa 2 Hari 13:21 ang pagsimba ug mga relikyas? Kini maoy asoy mahitungod sa milagro nga naglangkit sa walay-kinabuhing mga bukog sa usa sa mga manalagna sa Diyos. Sanglit si Eliseo patay na ug “walay nahibaloan nga bisan unsa” sa dihang nahitabo ang maong milagro, kining maong pagbanhaw nahitabo tungod sa nagahimog-milagro nga gahom ni Jehova nga Diyos, kinsa nagpahinabo niana pinaagi sa iyang balaang espiritu, o aktibong gahom. (Eccl. 9:5, 10)Angayng tagdon usab nga ang Kasulatan wala moingon nga ang mga bukog ni Eliseo gisimba. [1, w05 8/1 “Ang Pulong ni Jehova Buhi—Mga Haylayt Gikan sa Basahon sa Ikaduhang Hari”]
12. Nakig-alyansa ba si Ezequias sa Ehipto? (2 Hari 18:19-21, 25) Wala. Bakak ang akusasyon ni Rabsake, maingon man ang iyang pangangkon nga nabatonan niya ang “pagtugot ni Jehova.” Ang matinumanong Haring Ezequias misalig kang Jehova lamang. [2, w05 8/1 “Ang Pulong ni Jehova Buhi—Mga Haylayt Gikan sa Basahon sa Ikaduhang Hari”]
13. Bisan tuod ang talaan sa Asirya dili espesipikong naghisgot sa talagsaong kapildihan ni Senakerib, unsay imong nakaplagan nga makaiikag bahin sa gisulti nianang maong talaan? (2 Hari 19:35, 36) Ang talaan ni Senakerib, nga nasulat diha sa Oriental Institute Prism ug sa Taylor Prism, nag-ingon: “Mahitungod kang Ezequias, nga Hudiyo, wala siya mopailalom sa akong yugo, akong giilog ang 46 sa iyang lig-ong mga siyudad, kinutaang mga dapit ug ang daghang gagmayng mga balangay duol niana, ug gipukan (kana) . . . Siya akong gihimong binilanggo sa Jerusalem, ang iyang harianong balay, sama sa langgam diha sa halwa.” Si Senakerib nag-ingon nga “ang makalilisang nga katahom” sa iyang pagkahari nakapahadlok kang Ezequias. Apan, wala siya mag-ingon nga iyang nabihag si Ezequias o nailog ang Jerusalem, sama sa iyang giingon bahin sa “lig-ong mga siyudad” ug “gagmayng mga balangay.” Kini maoy dili direktang pag-admitir sa kapildihan, nga nagpamatuod sa pagkatukma sa rekord sa Bibliya mahitungod sa pagkalaglag sa labing maayo sa mga sundalo ni Senakerib. [3, w88 2/15 p. 28 par. 2]
14. Kinsa ang amahan ni Sealtiel? (1 Cron. 3:16-18) Ang 1 Cronicas 3:17, nga kaharmonya sa Mateo 1:12, nagpaila nga si Jeconias (Haring Jehoiakin) mao ang amahan ni Sealtiel. Apan ang magsusulat sa Ebanghelyo nga si Lucas nagtawag kang Sealtiel nga “anak ni Neri.” (Lucas 3:27) Dayag nga gihatag ni Neri ang iyang anak nga babaye kang Sealtiel ingong asawa. Tungod kay ang mga Hebreohanon sagad nga nagtawag sa ilang umagad nga lalaki ingong anak, ilabina diha sa mga listahan sa mga kaliwat, tukmang tawgon ni Lucas si Sealtiel ingong anak ni Neri. Sa samang paagi, gitawag ni Lucas si Jose ingong anak ni Heli, kinsa sa pagkatinuod maoy amahan sa asawa ni Jose nga si Maria. (Lucas 3:23) [5, w92 7/15 pp. 5-6]
15. Sa mga adlaw ni Haring Saul, sa unsang paagi ang mga Rubenhon, ug mga Gadhanon, ug ang katunga nga tribo ni Manases nagpakita ug maayong panig-ingnan alang sa tanang alagad sa Diyos karon? (1 Cron. 5:18-22) Kaharmonya sa saad ni Jehova sa ilang katigulangan nga si Abraham, sila maisogong nanglimbasog sa pagpalapad sa ilang teritoryo nga saylo pa sa yuta sa Gilead. (Gen. 15:18) Bisan tuod nga gumikan niini ilang nakaaway ang mga Hagrihanon, ang maong mga Israelinhon andam nga makiggubat bisan diyutay ra sila. Ang ilang gidaghanon maoy 44,760. Apan sa paggubatay na, sila nakadala ug 100,000 ka bihag. Dili kini ang bug-os nga gidaghanon sa kasundalohan sa mga Hagrihanon, tungod kay nagtaho ang Bibliya nga ‘daghan ang gipamatay.’ Klaro nga ang mga Rubenhon, mga Gadhanon, ug ang katunga nga tribo ni Manases nagmadaogon dili tungod sa ilang kaugalingong kusog. Sila nangayo ug tabang kang Jehova nga Diyos.