Repaso sa Teokratikanhong Tunghaan sa Ministeryo

Ang mosunod nga mga pangutana pagatagdon nga binaba panahon sa Teokratikanhong Tunghaan sa Ministeryo sa semana nga magsugod sa Oktubre 27, 2003. Dumalahon sa magtatan-aw sa tunghaan ang 30-minutos nga repaso pinasukad sa materyal nga gikobrehan diha sa mga asaynment alang sa mga semana sa Septiyembre 1 hangtod sa Oktubre 27, 2003. [Matikdi: Kon walay mga reperensiya human sa pangutana, kinahanglang mohimo kag kinaugalingong panukiduki aron makaplagan ang mga tubag.​—Tan-awa ang Tunghaan sa Ministeryo, pp. 36-7.]

MGA HIYAS SA PAGPANULTI

1. Unsay ipasabot sa tambag nga gihatag diha sa 1 Timoteo 2:9 nga dayandayanan ang kaugalingon sa “mahapsay nga sinina,” ug sa unsang paagi kini makaapektar sa atong mga presentasyon diha sa plataporma o diha sa ministeryo sa kanataran? [be p. 132 mga par. 4-5] Kining prinsipyoha mapadapat ngadto sa mga lalaki ug babaye ug nagpasabot nga ang atong pamesti kinahanglang hinlo ug hapsay. Ang pagpadapat niining prinsipyoha mopabanaag ug maayo sa indibiduwal nga Kristohanon ug sa organisasyon ni Jehova. Sa dihang mamatikdan sa uban ang atong “mahapsay nga sinina,” sila mahimong mas makiling sa pagpaminaw sa mensahe nga atong ginasangyaw.

2. Sa unsang paagi ang mga prinsipyo sa Bibliya nga gilatid diha sa 1 Juan 2:15-17, Efeso 2:​2, ug Roma 15:3 mag-impluwensiya sa atong personal nga panagway? [be p. 133 mga par. 2-4] Ang pagpabili sa giingon diha sa 1 Juan 2:15-17 magpugong kanato sa pagpamesti sa paagi nga nagpaila sa gugma niining kalibotana, nga nagpasiugda sa tinguha sa makasasalang unod, o mapagawalong nagpasundayag sa atong mga kabtangan. Sa pagpadapat sa Efeso 2:​2, seguroon nato nga ang atong panagway dili magbanaag sa rebelyosong espiritu sa kalibotan. Ang Roma 15:3 nagpunting sa pagtagad ngadto sa panig-ingnan ni Jesus sa pagbuhat sa kabubut-on ni Jehova ug sa pagtabang sa uban. Busa likayan nato ang mga estilo ug panghindik nga mahimong makapandol sa mga tawo nga atong sangyawan.

3. Nganong hinungdanon ang kaugdang, ug sa unsang paagi maangkon nato ang kaugdang sa dihang mamulong gikan sa plataporma o makigbahin diha sa ministeryo? [be p. 135 kahon; p. 136 par. 5, kahon] Ang atong pagkaugdang motabang sa imong mamiminaw sa paghatag ug bug-os nga pagtagad nganha sa atong ginasulti inay kanato. Maangkon nato ang kaugdang pinaagi sa pagsalig kang Jehova, pagpangandam pag-ayo, ug sa pagbansayg kusog sa pakigpulong. (Sal. 55:22) Mapalig-on usab nato ang atong pagsalig pinaagi sa regular nga pagpakigbahin diha sa ministeryo sa kanataran, pagkomento diha sa mga tigom, ug sa pagboluntaryo alang sa dugang mga asaynment diha sa Teokratikanhong Tunghaan sa Ministeryo.

4. Ingong “matinumanon ug matuod nga saksi,” sa unsang paagi si Jesus naghatag ug panig-ingnan kanato sa paggamit sa Bibliya diha sa ministeryo? (Pin. 3:14) [be p. 143 mga par. 2-3] Si Jesus kanunayng nagkutlo, nagpahayag niana sa laing paagi, o naghisgot nga pasumbingay sa Kasulatan sa dihang nagtudlo sa uban. (Mat. 4:3-10; 12:1-8; Luc. 10:25-28; 17:32; 24:​27, 44-47) Siya matinud-anong nakaingon nga ang iyang gitudlo wala maggikan sa iyang kaugalingon. (Juan 8:26; 14:10) Kita usab angayng magbatasan sa paghatag ug binase-sa-Bibliya nga mga tubag ngadto sa mga pangutana.

5. Sa unsang paagi kita mahimong mas hanas sa paggamit sa Bibliya? (Tito 1:9) [be p. 144 par. 1, kahon] Aron ‘hugot nga makuptan ang kasaligang pulong kon bahin sa atong arte sa pagpanudlo,’ kita angayng may maayong programa sa personal nga pagbasa ug pagtuon sa Bibliya. Angay natong batasanon ang paglakip ug mga kasulatan sa atong mga komento panahon sa mga tigom. Kon mag-atubang ug mga pangutana o mga desisyon, angay natong tagdon kanunay kon unsay giingon sa Bibliya bahin sa maong kahimtang. Kon wala kita masayod sa giingon sa Bibliya bahin sa maong butang, kita angayng magmaandam sa paghimog dugang panukiduki.

ASAYNMENT NUM. 1

6. Unsay nalangkit sa pagtuon, ug unsa ang pipila ka benepisyo sa regular nga pagtuon sa Pulong sa Diyos? [be p. 27 par. 3; p. 32 par. 4] Ang pagtuon naglangkit sa paggamit sa atong katakos sa panghunahuna diha sa mainampingong pagkonsiderar sa usa ka ulohan. Naglakip kana sa pag-analisar sa atong ginabasa, pagtandi niana sa ato nang nahibaloan, pagmatikod sa mga katarongan nga gihatag alang sa gipahayag nga mga pulong, ug pagpalandong sa mga impormasyon nga bag-o kanato. Ang regular nga pagtuon sa Bibliya motabang kanato nga magpabiling mapaubsanon ug mahuptang buhi ang Pulong sa Diyos diha sa atong mga kasingkasing, nga manalipod kanato batok sa malimbongong gahom sa sala. Sa ingon, kita “magalakaw nga takos kang Jehova aron bug-os nga makapahimuot kaniya samtang padayon [kitang] magapamunga sa tanang maayong buhat.” (Col. 1:10; 3:5-10; Deut. 17:18-20; Heb. 2:1; 3:13)

7. Nahiuyon sa Santiago 1:​5, 6, unsay gikinahanglan sa dihang mag-atubang kita ug hinungdanong desisyon? [w01 9/1 p. 28 par. 4] Gikinahanglan ang pag-ampo. Angay kitang masaligon nga mangayo sa pagtultol ni Jehova diha sa paghimog hustong desisyon. Kasagaran, pahinumdoman kita sa balaang espiritu sa mga prinsipyo sa Bibliya nga mapadapat, o kaha tabangan kita niini aron mas masabtan pa ang kasulatan nga may kalabotan sa atong kahimtang.

8. Unsa may pasukaranang mga petsa, ug nganong hinungdanon kaayo kini? [si p. 282 par. 27] Ang usa ka pasukaranang petsa maoy usa ka petsa sa kalendaryo sa kasaysayan nga dunay lig-ong pasukaranan aron dawaton ug kini takdo sa usa ka espesipikong hitabo nga girekord sa Bibliya. Gigamit kini ingong basehanan nga gikan niana ang usa ka serye sa mga hitabo sa Bibliya makaplagan nga may katinoan diha sa kalendaryo.

9. Sa unsang paagi “kadtong nagadala ug daotang taho” maoy hungog? (Prov. 10:18) [w01 9/15 p. 25 par. 3] Sa dihang daoton ang usa ka tawo, dili gayod mausab ang iyang pagkatawo tungod lang sa mapasipalahong taho. Ang mga tawong nagapamati nga mapaniiron makasabot sa pagdaot luyo sa maong taho ug mawad-ag pagtahod sa tigpasipala. Busa ang usa nga nagpakaylap ug daotang taho nagdaot sa iyang kaugalingon.

10. Sa unsang paagi mas masabtan pa sa mga tawo ang panglantaw ni Jehova sa panahon sa bag-ong kalibotan? [si p. 283 par. 32] Sa bag-ong kalibotan, ang sakit, kamatayon, kawalay-buhat, kalaay, ug kakawangan mahanaw na. Ang buluhaton makalingaw ug makaiikag. Samtang molabay ang mga milenyo, mas masabtan sa bug-os sa mga tawo sa yuta ang panglantaw ni Jehova sa panahon: ‘Kay ang usa ka libo ka tuig ingon lamang sa kagahapon.’ (Sal. 90:4; Pin. 21:4)

SENEMANANG PAGBASA SA BIBLIYA

11. Matuod o Bakak: Diha sa 1 Corinto 2:​9, si apostol Pablo nagtumong sa mga butang nga giandam ni Jehova alang sa iyang matinumanong katawhan ingong panulondon. Ipatin-aw. [ip-2 p. 366 kahon] Bakak. Sumala sa gipakita sa konteksto, si Pablo nagsulat bahin sa natagong kaalam ni Jehova mahitungod sa iyang katuyoan sa pagpatunghag tibuok-kalibotang kalinaw ug panaghiusa. (1 Cor. 2:7) Kadtong may diyutay o walay espirituwalidad dili makaila o makasabot sa maong halalom nga kaalam, nga ipadayag lamang ngadto niadtong nakabaton sa espiritu sa Diyos. (1 Cor. 2:10)

12. Ngadto sa unsang mga tentasyon mapadapat ang mga pulong nga narekord diha sa 1 Corinto 10:​13, ug sa unsang paagi si Jehova “magtaganag kalingkawasan”? [w91 10/1 pp. 10-11 mga par. 11-14] Kining inspiradong mga pulong nagtumong ngadto sa bisan unsang kahimtang nga kasagarang masinati sa katawhan nga tingali mag-aghat sa usa ka tawo nga dili magmatinumanon sa Diyos. (1 Cor. 10:6-11) Si Jehova magtaganag kalingkawasan pinaagi sa paghatag ug nagkalainlaing mga tabang sa pagpalig-on kanato sa espirituwal. Kon atong pahimuslan ang maong mga tagana, makaarang kita sa pagsukol sa tentasyon ug sa paghupot ug integridad bisan hangtod sa kamatayon.

13. Sa unsang paagi ang panig-ingnan ni Jesus sa pagkamahinatagon mag-apektar sa mga Kristohanon? (2 Cor. 8:9) [w92 1/15 p. 16 par. 10] Bisan tuod ug dato si Jesus didto sa langit, kinabubut-on niyang gisakripisyo ang maong mga bahandi ug nahimong kabos nga tawo alang sa dakong kaayohan niadtong modawat sa iyang halad lukat. Ingong mga sumusunod ni Jesus, kita angayng matukmod sa paghatag nga madagayaon sa atong kaugalingon ug sa atong mga kahinguhaan sa pagbuhat sa kabubut-on ni Jehova ug sa pagtabang sa uban nga makabaton ug kinabuhi.

14. Sa unsang paagi ang Balaod usa ka “magtutudlo nga nagatultol ngadto kang Kristo”? (Gal. 3:24) [w02 6/1 p. 15 par. 11] Ang usa ka magtutudlo sa adlaw ni Pablo maoy usa ka ulipon o alagad nga nagalihok ingong tigpanalipod sa mga bata diha sa usa ka dakong panimalay ug naghatod kanila sa eskuylahan. Sa samang paagi, bisan tuod ang Balaod gidisenyo aron ang mga Israelinhon mas makaamgo ug sala, kini nanalipod kanila batok sa makauulawng moral ug relihiyosong mga buhat ug nagtultol kanila ngadto sa Mesiyas, kinsa magtudlo kanila sa dalan paingon sa kaluwasan. (Gal. 3:19)

15. Unsa ang “paninugdang mga butang sa kalibotan” nga kita kinahanglang magbantay aron dili mahisalaag? (Col. 2:8)