Repaso sa Teokratikanhong Tunghaan sa Ministeryo

Sirado-basahong pagsubli sa materyal nga nakobrehan diha sa mga asaynment sa Teokratikanhong Tunghaan sa Ministeryo para sa mga semana sa Septiyembre 3 hangtod sa Disyembre 24, 2001. Gamita ang usa ka separadong papel sa pagsulat sa mga tubag sa mga pangutana sa daghan nga imong maarangan diha sa gitagal nga panahon.

[Matikdi: Sulod sa panahon sa sinulat nga pagsubli, ang Bibliya lamang ang mahimong gamiton sa pagtubag sa bisan unsang pangutana. Ang mga reperensiya nga nagasunod sa mga pangutana maoy alang sa imong personal nga panukiduki. Ang mga numero sa panid ug parapo mahimong dili makita diha sa tanang reperensiya sa Ang Bantayanang Torre.]

Tubaga ang matag usa sa mosunod nga mga pahayag nga Matuod o Bakak:

1. Sanglit ang pagtuo maoy usa ka bunga sa espiritu sa Diyos, ang mga tawong walay pagtuo wala magtinguha nianang espirituha, o nagatinguha sila niana sa sayop nga katuyoan o nagasukol sa paglihok niana diha sa ilang kinabuhi. (Luc. 11:13; Gal. 5:22) [rs p. 324 par. 3] Matuod.

2. Ang Salmo 58:4 hustong nagpakita nga ang kobra adunay ‘mga igdulungog’ nga dili makadungog kay kini kinaiyanhong bungol. [Senemanang pagbasa sa Bibliya; tan-awa ang Rbi8-E p. 1583.] Bakak. Sumala sa gipakita sa bersikulo 5, ang mga halas sama sa kobra makadungog ug mahimong madani sa mga honi sa musika ug dili sa mga lihok sa usa ka tiglamat.

3. Ang “dakong panon” sa mga babaye nga gihisgotan sa Salmo 68:11 maoy langyawng mga ulipon nga babaye nga gipagawas sa mga lalaki sa Israel gikan sa pagkabihag sa dihang nagparot sa kaaway nga mga nasod. [Senemanang pagbasa sa Bibliya; tan-awa ang w86 10/15 p. 30 par. 6.] Bakak. Ang mga babayeng Israelinhon mao ang dakong panon; sa dihang ang mga lalaki sa Israel nakigbugno batok sa kaaway nga mga nasod sa Yutang Saad ug nagpildi kanila, kini naghatag sa mga babayeng Israelinhon ug maayong balita nga iwali diha sa mga kasaulogan sa kadaogan; Karong adlawa, ang mga babayeng ministro nagdulag hinungdanong papel ingong mga magmamantala sa Gingharian, nga nagmantala sa mga nasod nga sa dili madugay sila pagalaglagon sa Mesiyanikong Hari.

4. Kon ang takna ug paagi sa pagkamatay sa matag usa ka tawo gitakda nang daan sa iyang pagkahimugso o sayosayo niana, wala nay panginahanglan sa paglikay sa makuyaw nga mga kahimtang o pag-atiman sa panglawas sa usa, ug ang mga panagana alang sa kahilwas dili mag-usab sa gidaghanon sa mamatay. [rs p. 402 par. 3] Matuod.

5. Ang giingon ni Pablo nga “ayaw gayod tugoting may tawo nga magtamay sa imong pagkabatan-on” nagpakita nga si Timoteo tin-edyer pa lamang o lapas lang ug diyutay sa 20 anyos. (1 Tim. 4:12) [w99 9/15 p. 29 mga par. 1-3; p. 31 par. 2] Bakak. Ang mga pulong ni Pablo gihimo human nga si Timoteo nagsugod sa iyang pagpakig-uban kang Pablo ug lagmit nagpakita nga bisan pag si Timoteo nakaarang na sa pag-inusara ug pag-abaga ug kaakohan, daw nagpanuko siya pagpatuman sa iyang awtoridad.

6. Sumala sa natala sa Salmo 110:​1, ang “akong Ginoo” nagtumong kang Jesus. [Senemanang pagbasa sa Bibliya; tan-awa ang w94 6/1 p. 28 par. 5.] Matuod.

7. Sa basahon sa Mga Salmo, ang ngalang Jehova makita sa halos 700 ka beses, ug ang gipamubo nga pormang “Jah,” 43 ka beses, sa ingon tanantanan ang balaang ngalan gihisgotan sa halos 5 ka beses, sa aberids, diha sa matag Salmo. [si p. 104 par. 23] Matuod.

8. Bisan tuod si Jesus gihisgotan sa Kasulatan ingong “usa ka diyos,” gani ingong “Diyos nga Gamhanan,” dili gayod makita nga siya gihisgotan ingon nga labing gamhanan. (Juan 1:1; Isa. 9:6; Gen. 17:1) [rs p. 145 par. 9] Matuod.

9. Ang pagtuon sa basahon sa Proverbio, sa pagkatinuod, maoy pagtuon sa kaalam mismo ni Solomon. [si p. 106 par. 1] Bakak. Sanglit ang kaalam ni Solomon sa tinuoray mao ang “gibutang sa Diyos diha sa iyang kasingkasing,” ang pagtuon sa Proverbio sama ra sa pagtuon sa kaalam sa Diyos. (1 Hari 10:​23, 24)

10. Ang tambag sa Bibliya, nga makaplagan sa Proverbio 21:​17, nga maglikay nga ‘mahigugma sa paglipaylipay’ nagpakita nga ang paglingawlingaw sayop kay moilog kinig panahon alang sa mas hinungdanong mga butang. [Senemanang pagbasa sa Bibliya; tan-awa ang w97 10/1 p. 27 par. 7.] Bakak. Ang teksto nagpahimangno batok sa ‘paghigugma sa paglipaylipay,’ o paghimo niini nga panguna, nga mosangpot sa pagkahanaw sa espirituwal nga gana sa usa ka tawo ug magbilin na lag diyutayng panahon sa pagsangyaw sa maayong balita.

Tubaga ang mosunod nga mga pangutana:

11. Unsay ipasabot sa lumong pagbadlong ni Jesus kang Marta? (Luc. 10:​40, 41) [w99 9/1 p. 30 par. 7] Gipasabot ni Jesus nga si Marta, tungod sa iyang mabalak-ong pagtagad sa pagkaon, nawad-an sa talagsaong kahigayonan sa pagdawat ug personal nga instruksiyon gikan sa Anak sa Diyos.

12. Sa unsa nga “himaya” gidala ni Jehova ang salmista? (Sal. 73:24) [Senemanang pagbasa sa Bibliya; tan-awa ang w86 12/15 p. 28 par. 3.] Hangtod nga nasabtan sa Salmista nga ‘ang pagduol sa Diyos maayo alang kaniya,’ gibati niya nga ang mga daotan mas maayo kay sa mga matarong. (Sal. 73:​2-​12, 28); ang pagtugot sa “tambag” sa Diyos sa paggiya kaniya misangpot sa pagdawat niya sa “himaya,” nga mao, ang pag-uyon ni Jehova, usa ka suod nga relasyon uban Kaniya.

13. Unsang panglantaw ang gipahayag sa salmista bahin sa mga pribilehiyo sa pag-alagad nga natala sa Salmo 84:1-3? [Senemanang pagbasa sa Bibliya; tan-awa ang w97 3/15 p. 8 mga par. 5-7.] Dako ang iyang pagtamod sa iyang mga pribilehiyo sa pag-alagad sa dapit sa pagsimba ni Jehova, nga naglakip sa limitadong panahon didto ug labi pang magmalipayon siya kon, sama sa mga langgam, siya makabaton pa untag permanenteng puy-anan diha sa balay sa pagsimba ni Jehova.

14. Sa unsang paagi gipakita sa Pinadayag 22:17 ug Roma 2:​4, 5 nga si Jehova dili mopili nga mahibalo daan o mohukom daan sa tanang butang nga buhaton sa mga tawo? [rs p. 404 par. 4–​p. 405 par. 1] Ang pagpili nga moinom sa tubig sa kinabuhi nga libre maoy iya na sa indibiduwal; si Jehova dili mamugos sa usa ka tawo nga sundon ang gilatid nga dalan.

15. Sanglit ang unang mga Kristohanon nagtuo sa Milenyal nga Pagmando ni Jesus nga gihisgotan sa basahon sa Pinadayag, unsang mga impluwensiya ang mosangpot sa pagsalikway ngadtongadto niining pagtulon-an sa Diyos pinaagi sa apostatang mga Kristohanon? [w99 12/1 p. 6 par. 3–​p. 7 par. 5] Dili timbang nga materyalistikanhong mga panglantaw sa pipila ka milenyalista; paglimod sa pagkakasaligan sa basahon sa Pinadayag; ang tin-aw nga nasabtan gipulihan sa Gregong pilosopikanhong mga panglantaw. (Bisan hain sa ibabaw)

16. Unsang mga utlanan sa pagpakitag “personal nga interes” sa ubang mga tawo ang angayng sundon sa mga Kristohanon? (Fil. 2:4) [w99 12/1 p. 29 par. 1] Ang mga Kristohanon kinahanglang maglikay nga mahimong “mga tabian ug hilabtanon sa mga kalihokan sa ubang mga tawo.” (1 Tim. 5:13)

17. Unsay ipasabot sa gihisgotan sa Salmo 128:3 bahin sa mga anak nga “mahisama sa mga turok sa mga kahoyng olibo” palibot sa lamesa sa usa ka tawo? [Senemanang pagbasa sa Bibliya; tan-awa ang w00 8/15 p. 30 par. 4.] Kasagarang motubo ang bag-ong mga subol gikan sa tiilan sa punoan sa kahoyng olibo; sa dihang ang orihinal nga punoan dili na mamungag daghan, ang bag-ong mga subol mahimong lig-ong mga punoan palibot niini; sa susama, ang mga ginikanan malipay nga makabaton ug mabungahong mga anak nga magaalagad kang Jehova duyog kanila.

18. Kon atong makaplagan nga makapahadlok ang buhat sa Diyos, sa unsang paagi kini makaapektar kanato? (Sal. 139:14) [Senemanang pagbasa sa Bibliya; tan-awa ang w93 10/1 p. 15 par. 18.] Kini angayng magpatungha kanato ug maayo, kusganong makapalihok nga matang sa kahadlok nga makaapektar sa atong personalidad ug sa paagi sa atong paggamit sa atong kinabuhi.

19. Nganong ang Proverbio 5:​3, 4 naghisgot sa mga sangpotanan sa imoralidad nga ingon ka “pait sa ajenjo” ug “ingon ka hait sa espada nga duhay-sulab”? [Senemanang pagbasa sa Bibliya; tan-awa ang w00 7/15 p. 29 par. 2.] Ang mga sangpotanan sa imoralidad masakit ug makamatay; naglakip kini sa usa ka nahasol nga tanlag, kaguol, ug sakit nga napasa pinaagi sa pakigsekso.

20. Uyon sa Proverbio 14:​29, sa unsang paagi ang katakos sa pag-ila makatabang kanato sa paglikay sa mga sangpotanan sa kawalay-pailob ug walay-pagpugong nga kasuko? [Senemanang pagbasa sa Bibliya; tan-awa ang w97 3/15 p. 13 mga par. 7-8.] Ang katakos sa pag-ila makapahunahuna kanato sa sangpotanan sa hinarasharas nga panggawi ug walay-pagpugong nga kasuko, nga mao, makadaot nga mga epekto sa lawas, dili-maalamong mga lihok, pagkawala sa maayong panghukom, ug pamatasan nga makawala sa pag-uyon sa Diyos nga makababag sa atong relasyon uban sa Diyos.

Itagana ang (mga) pulong o prase nga gikinahanglan sa pagkompleto sa matag usa sa mosunod nga mga pahayag:

21. Ang matuod nga mga manalagna nagsulti sa ․․․․․․․․ ug nagpahayag sa ․․․․․․․․ . (Deut. 18:18-​20; 1 Juan 4:​1-3) [rs p. 65 mga par. 1-3]

22. Duha ka pilo ang katuyoan sa Proverbio​—pagpaambit sa ․․․․․․․․ ug pagtaganag ․․․․․․․․ . (Prov. 1:​1-4) [w99 9/15 p. 13 par. 1]

23. Ang “natago nga dapit sa Labing Hataas” mao ang ․․․․․․․․ alang niadtong modapig sa kiliran sa Diyos sa isyu sa ․․․․․․․․ ; kini “natago,” o wala mahibaloi, sa mga tawo nga ․․․․․․․․ . (Sal. 91:1) [Senemanang pagbasa sa Bibliya; tan-awa ang w86 12/15 p. 29 par. 6.]

24. Ang ‘dili pagkalimot sa tanang buhat ni Jehova’ dayag nga nalangkit sa ․․․․․․․․ sa ‘iyang mga buhat,’ sa iyang mga buhat sa mahigugmaong-kalulot sumala sa gibatbat sa ika-103 nga Salmo. (Salmo 103:2) [Senemanang pagbasa sa Bibliya; tan-awa ang w99 5/15 p. 21 mga par. 5-6.]

25. Ang proverbio maoy usa ka makahuloganong sanglitanan nga naggamit ug ․․․․․․․․ ug gidisenyo aron ․․․․․․․․ . [si p. 107 par. 6]

Pilia ang hustong tubag sa matag usa sa mosunod nga mga pahayag:

26. Bisan tuod siya adunay rason nga masuko sa pagtratar nga iyang naagoman kang Saul, si David nagpugong sa iyang kaugalingon kay (siya nakaamgo nga si Saul dili hingpit ug nga ang mga alagad sa Diyos kinahanglang mapinasayloon; tin-aw diha sa iyang hunahuna ang iyang relasyon kang Jehova; nahibalo siya nga sayop nga hukman ang laing tawo). (1 Sam. 24:​6, 15) [w99 8/15 p. 8 par. 7]

27. Ang (kaalam; disiplina; pagkamatarong) maoy kombinasyon sa daghang butang, lakip ang pagsabot, hait nga salabotan, kalantip sa pangisip, ug katakos sa panghunahuna; ang (pagkamaayo; pagsabot; maayong panghukom) mao ang katakos sa pagsusi sa usa ka butang ug pag-ila sa naglangkob niini pinaagi sa pagsabot sa mga koneksiyon tali sa mga bahin ug sa katibuk-an niini, sa ingon makasabot sa kahulogan niini. (Prov. 1:​1-4) [w99 9/15 p. 13 par. 2]

28. Ang kalig-on ni Jose sa pagdumili sa imoral nga mga panghaylo sa asawa ni Potipar nagsumikad sa (iyang kahibalo sa Balaod ni Moises, nga nagdili sa pakighilawas; halalom nga pagtahod sa bug-at nga katungdanan sa iyang bana; pagpabili sa iyang relasyon kang Jehova). (Gen. 39:​7-9) [w99 10/1 p. 29 par. 3]

29. Ang magsusulat sa Salmo 119 dayag nga may lalom nga pagpabili alang sa (pulong, o balaod, sa Diyos; gasa sa kinabuhi; palaaboton sa kaluwasan), nga gihisgotan sa halos tanang bersikulo niini nga salmo. [Senemanang pagbasa sa Bibliya; tan-awa ang w99 11/1 p. 9 par. 5; w87 3/15 p. 24 par. 2.]

30. Sa unang duha ka kapitulo sa sulat ni Pablo ngadto sa (mga taga-Roma; mga taga-Galacia; mga Hebreohanon), kita makakaplag ug daghang pangutlo gikan sa Mga Salmo bahin sa (labaw nga katungdanan; bawtismo; yutan-ong ministeryo) ni Jesu-Kristo. [si p. 105 par. 28]

Ipatukma ang mosunod nga mga kasulatan sa mga pahayag nga gitala sa ubos:

Prov. 2:​19; 14:15; 18:17; Roma 10:17; Heb. 13:18

31. Aron mabatonan ang pagtuo, kinahanglang susihon una sa usa ka tawo kon unsay ginaingon sa Bibliya ug usisahon pag-ayo kini. [Roma 10:17] [rs p. 325 par. 3]

32. Ang mga Kristohanon dili makasagop ug mga kalihokan sa negosyo nga dili-matinud-anon o magbalewala sa lehitimong mga interes sa uban. [Heb. 13:18] [w99 9/15 p. 10 par. 2]

33. Kadtong mohimog seksuwal nga imoralidad mahimong makaabot sa punto nga imposible na ang pagbalik, nga mao ang kamatayon, sa dili pa moabot ang panahon nga posible na unta ang pagbalik. [Prov. 2:​19] [w99 11/15 p. 27 mga par. 4-5]

34. Ang maalamon ug masinabotong tawo magtulotimbang sa mga sangpotanan sa iyang mga lihok ug dili sa binuta magsunodsunod sa pipila ka bag-ong hilig tungod lang kay kini popular. [Prov. 14:15] [Senemanang pagbasa sa Bibliya; tan-awa ang g94 12/8 p. 15 par. 8.]

35. Bisan tuod ang argumento sa usa ka tawo daw makataronganon ug husto, maalamon nga maminaw sa duha ka kiliran sa butang sa dili pa mohimog konklusyon. [Prov. 18:17] [si p. 111 par. 36]